رواية ضحية إمرأة الفصل العاشر10 بقلم زينب سعيد ابراهيم
( مفاجأة جديدة)
بصيتله وأنا متضايقه وسيبته وخرجت عادل جه وسألنى :
_كان عايز منك إيه ؟
_بيقولى عقبالنا
_لا واللهى ده لطيف بقا
_لأ على فكره مش زى ما إنت متخيل نادر محترم جدا
_نقول مبروك يعنى ؟
_لأ طبعا أنا خلاص جربت حظى مرة ومش هعملها تانى
_أيوه عشان إنتى جربتى حظك مع واحد مش محترم فلازم تتعقدى
_بقولك إيه ركز فى خطوبتك وملكش دعوه بيا
_ما خلاص الخطوبة خلصت ولا إحنا هنبات عندهم لحد ميعاد الفرح
_إيه ده ما شاء الله عليك بقيت عسل زيه أهو
_عيب عليكى أخوكى ميتقارنش بحد
_طبعا ولا بسبت
_نينينيني ربنا يستر ومتكونش هبله زيك
_مابلاش أحسنلك
_إيه هتضربينى ولا إيه ؟
_لا يا قلبى هوصيها عليك
وإحنا مروحين عادل قال لبابا :
_إتفضلى يا ماما وبعد إذن حضرتك يا بابا أنا هاخد إبتسامه ونلف شويه بالعربية بقالى كتير مخرجتهاش
بابا رد عليه وقال :
_ماشى بس خلى بالك منها لأن الوقت إتأخر
_عيب على فكره الكلام ده دى خارجه مع إبنك قبل ما تبقى خارجه مع ظابط
_راجل يلا
عادل ركن العربية عند الكورنيش وطلب منى أنزل ضحكت وقولت :
_إيه هترمينى من فوق ولا إيه ؟
_ههههههه لأ تعالى متخافيش
_أدينى نزلت أهو يا سيدى خير ؟
_عايز أقولك إنى بحبك أوى والحمدلله إنى عندى أخت فى جمالك محليه دنيتى كلها
_يا سيدى يا سيدى إيه الجمال ده كله طيب ما تسيبلها حاجه من الكلام ده
_ممكن تركزى معايا أنا محبتش أتكلم معاكى فى البيت عشان نبقى لوحدنا ومحدش ينط فى الكلام
_طيب شكل الموضوع كبير ده أنا أتعدلك بقا
_هو إنتى لسه بتحبى تامر ؟
_إيه لازمة السؤال ده ؟
_عايز أعرف
_معرفش
_يعنى إيه ؟
_يعنى معرفش أحيانا كتير بفكر فيه وبفتكر كل ذكرياتنا لما أجى أشترى حاجه بشوفه وهو داخل معايا نفس المحل بشوف ضحكته قصادى نبره صوته بسمعها قبل ما أنام
_طيب وهو تفتكرى بيمر بنفس اللى بتمرى بيه ولا عايش حياته مع خطيبته ؟
......
_سكتى ليه ؟ معندكيش رد مش كده ؟ بصى يا حبيبتى متوقفيش حياتك على حد ميستاهلش ولا تأنبى نفسك إعتبريها مش هقولك غلطه وإتعلمتى منها لكن هقولك درس ليكى هديه من ربنا اه وجعتك لكن أنقذتك ومن رأيى المتواضع جربى تانى إدى قلبك فرصة تانيه بس مع شخص صح
_مش قادره أفكر فى الموضوع ده يا عادل
_إيه رأيك فى نادر ؟
_إيه حكايتك النهارده تحقيقك طول
_مش تحقيق بس حابب أعرف رأيك بصراحه
_عايزنى أقولك إيه إنى بحبه يعنى ؟
_لأ أنا مقولتش كده شايفاه شخص عامل إزاى ؟
_محترم , هادى , عاقل لحد الأن , إبن ناس
_طيب مستنيه إيه بقا ؟
_مش مستنيه حاجه
_لأ مستنيه أقولك مستنيه إيه ؟
_إيه يا حضرة الظابط ؟
_مستنيه ده يعمل دوم دوم دوم
_يا سخيف
_مش هى دى الحقيقة ؟ ولا هتخبى على دولا أخوكى
_عادل هو إنت إتجننت يا حبيبى ؟ هو إنت شايف إن أنا ونادر شبه بعض ؟
_بصراحه أه جدا محترمين , متربيين , ولاد ناس , وأنا شايف إنه بيحبك جدا وهيقدر يسعدك ويقدر قيمتك
_وشوفت كل الكلام ده إمته ؟
_أول لما إتخانقنا أنا كنت متابع كل الناس اللى فى حياتك ومنهم أستاذ نادر ده لو مكنش أولهم أصلا وبالأمانة محاولش يتجاوز حدوده معاكى أما بقا.....
قاطعته وأنا بقول :
_إستنى بس خد هنا إنت بترمى الكلمه وعايزنى أعديها إيه متجاوزش حدوده معاكى دى ؟ ده على أساس إن أنا كنت هسمحله ؟
عارفك بمليون راجل
أيوه كده إتعدل ها وثانيا ؟
ثانيا بقا إنه كان دوغرى وراجل وجه عندى فى الشغل وإتكلم معايا بمنتهى الصراحه
وبدأ عادل يحكى اللى حصل لما نادر راحله المكتب