المقدمة والفصل الاول
مش كل حاجه نفسنا فيها بنقدر نحققها ولا كل اللي عايزينه بناخده ده ساعات كتير أوي بيبقي كل اللي هنموت عليه حاجة واحدة بس وبكل أسف بنخسرها المحزن بقا إن إنت مش بيبقي ليك دخل اوغ إتخليت عن الحاجة دي بمزاجك بالعكس ده الشئ الوحيد اللي بنحارب عشانه بيبقي أول حاجة مكتوبة لينا إننا نخسره في ناس بتسمي الخسارة هزيمة وناس تانيه
بتسميها حظ سئ والبعض الأخر بيقول إن دي ترتيبات القدر واللي مكتوب علي الجبين لازم تشوفه العين يا ترى إنت أنهي فيهم ؟ وايه هو رأيك ؟ لما تخسر كل اللي إتمنيته وحاربت وسعييت عشان توصله عارف الإحساس
الممزوج ؟ غضب على كراهية على إنتقام على حقد جواك نار حاولت تتحكم فيها كتير عشان إنت متأكد انها لو خرجت هتحرق الكل وأولهم
سيادتك شيطان كنت بقول أذكاري وبقرأ وردي ومواظبة على صلاتي عشان ألجمه وأسيطر عليه سؤال الخير اللي ينتصر ولا الشر ؟ سيبني أنا أجاوبك بدل ما تتعب نفسك وتفضل تفكر في مسألة أمرها محسوم الشر هو اللي يكسب بجميع الطرق بس الإجابة دي ناقصة وتكملتها في الدنيا أما الخير فبدون جدال يكسب بالقوي في الآخرة هو نفس المبدأ اللي لو طبقته
على بعض الناس هتلاقي إن الجنة بتاعتهم نار وناس النار بتاعتهم جنة وفي الأول وفي الأخر محدش هيدخل الجنة إلا برحمة ربنا سبحانه وتعالى مش بعمله
الدنيا ماشيه بالعكس المحترم بياخد على دماغه عشان إبن ناس ويعرف الأصول وقليل الذوق اللي معندوش أخلاق الكل بيخاف منه وبيعمله ألف حساب تصنيف الرواية واقع مرعب حقيقة مؤلمة لكن لازم تعرفها لو إنت ظالم نصيحة مني ليك إقفل الرواية ودور على حاجة تانية ممكن تسليك أو تملي وقت فراغك بيها لأن الرواية دي مراية هتكشف نفسك قدامها أما لو إنت مظلوم ومن الناس اللي اتخذلت من كل اللي تعرفه أحب أقولك إن
الرواية دي هتنصفك وهتجيب حقك قاضي بيحقق العدالة لكن يا تري أنهي
عدالة ؟ عدالته الشخصية
( الفصل الاول) غلطة
ماما أنا نازلة يا حبيبتي عايزة حاجة وأنا جاية ؟
لأ يا حبيبتي خلي بالك من نفسك
هو بابا نزل ولا لسه ؟
لأ لسه قدامه ١٠ دقايق ويتحرك
حلو عشان ياخدني في سكته عقبال ما يخلص بقا أدخل أرخم على عادل
دخلت شغلت النور وروحت قعدت على السرير وبوست عادل من خده وأنا بلعب فى شعره وقولت
صباح الخير يا دولا يلا قوم ولا مش ناوي تسلم على أختك قبل ما تنزل ؟
ضحك وقال
صباح النور يا قلب دولا عرفتي ليه بقا أنا مش عايز اتجوز بالرغم إن عندي ٣٠ سنة عشان دلعك ليا واثق إنها مش هتحبني بالطريقة دي
ده على أساس إن أنا مش هتجوز السنة الجاية ؟
بصراحة خطيبك تامر ده أنا مبقبلوش ومعرفش إنتي شايفة فيه إيه عدل ؟
بحبه
وبتقوليها قدامي ؟
ههههه مش خطيبي وبعدين بطل غيرتك الزايدة دي عليا ده هيبقي جوزي
طيب خلاص رايحة الكلية ؟
اه قولت أسلم عليك قبل ما أنزل
إستني طيب هلبس وأوصلك
لأ خليك بابا هياخدني معاه إفطر إنت عشان تنزل شغلك
خلي بالك من نفسك وأي حاجة تحصل كلميني
حاضر يا فندم
ناوية تقابليه النهاردة كمان ؟
لأ بقولك ايه تحريات البوليس دي تعملها في شغلك على إصحابك أي حد تاني إلا أختك
يبقي هتقابليه عموماً متخرجيش معاه لوحدك سامعه ؟
حاضر يلا سلام بقا ده إنت رغاي أوي
ماشي يا إبتسامة لما ترجعيلي هوريكي
خرجت بره بابا كان قاعد مستنيني قال
ها أخوكي خلص إستجواب ؟
لسه هيكمله لما أرجع
هههههههه طيب يلا عشان إنتي أخرتيني
نزلت وروحت الكلية بعد أول محاضرة تامر عدي عليا وقعدنا في الكافيتريا إتكلم زي عادته وقال
وحشتيني
فعلا ؟ أومال مكلمتنيش إمبارح ليه ؟
هو أنا لازم أكلمك كل يوم عشان أبقي بحبك ؟
أنا قصدي لو كنت وحشتك كنت دخلت سألت
حبيبتي بتبقي فى دماغي والله بس في حاجات بتحصل بتخليني أنسي أكلمك
تنسي ؟ وأنا لسه خطيبتك وبتنسي أومال لما أبقي مراتك هتعمل ايه ؟
حبيبتي أنا جاي أقعد معاكي ساعتين وماشي بلاش نقلبهم نكد
خلاص يا تامر مافيش حاجه
طيب بحبك
واضح
على فكره أنا مبحبش أتحايل على حد أيا كان مين حتى لو أبويا
هو أنا قولتلك إتحايل عليا جاي تقعد يبقي خلاص
يا بت والله العظيم بحبك مبحبش أشوفك متضايقه وبعدين وحشتيني مرتين مرة بتاعت النهاردة ومرة بتاعت إمبارح
نينينيني ماشي أنا مبعرفش أزعل منك أصلا حظك حلو عشان أنا بحبك أكتر ما إنت بتحبني بس إوعي يا تامر تستغل النقطة دى ضدي أو تيجي عليا عشان عارف إنك مهما هتعمل هفضل أحبك إياك تظلمني
عيب يا بت الكلام ده مقدرش أزعلك ولا تهوني عليا أصلا
تفتكر الفرح بتاعنا هيبقي عامل إزاي ؟
هيبقي أحلي فرح اتعمل في مصر كلها عشان مافيش ٢ فاهمين بعض قدنا ولا فى ٢ بيحبوا بعض زينا
يا سيدي يا سيدي بقيت بتقول شعر كمان
لو مش هقول شعر فيكي إنتي أجمل بنت في حياتي هقوله في مين غيرك ؟
حبيبي ربنا ميحرمنيش منك ابدا
ولا منك يا قمري ها تحبي نروح فين ؟
مش هقدر أخرج معاك غير لما عادل يبقي عارف
ليه هو حضرة الظابط معين عليكي مراقبة ولا إيه ؟
لأ بس لازم يبقي عارف
هو أنا هخطفك ده إحنا هنقعد في مكان عام وبعدين سهلة إتصلي خدي الإذن منه
مش هينفع إنت عارف عادل لازم أبقي مكلماه قبلها بإسبوع على الأقل مقدرش أتصل بيه دلوقتي وأقوله بعد اذنك أخرج مع تامر دلوقتي
هو أخوكي ده عايز مني ايه ؟
ممكن تتصل ب بابا وتعدي علينا فى البيت شوية
لأ مش هعرف أقعد معاكي في البيت أنا نفسي في ساعة واحدة نبقي لوحدنا وفي أي مكان تختاريه نادي كافية مطعم
طيب ما إحنا قاعدين أهو فى الكلية لوحدنا
يا سلام عشان كل دكتور يشوفك يصبح عليكي أو دكتورة تفصلك مني وتاخدك وتفضل تتكلم معاكي بتاع ساعتين
أعملك إيه طالما مافيش حاجه عجباك ؟
قولتلك أخرجي معايا لوحدك
خلاص إستني بقا لما استأذن من عادل وبابا لازم يبقوا عارفين إني هبقي معاك
طيب أنا ماشي هتيجي أوصلك في طريقي ولا دي كمان عايزة إذن ؟
هروح لوحدي يا تامر أنا لسه مخلصتش محاضرات أصلا قعدت معاك عشان متزعلش وسيبت محاضرتي شغالة فوق عشان تعرف بس إنك أهم عندي من أي حاجة تانى
متشكرين يا ستي تقدري تطلعي تحضريها وكإني مجيتش
نفسي أعرف إنت ليه عامل زي العيال وبتقفش على كل حاجة ؟
خلي بالك من نفسك سلام
بالرغم من إننا مخطوبين ولكن بحسه مراهق مش قد المسؤولية وإن بعد الجواز يوم ما أجي أتكلم معاه في حاجة تضايقه هيسيب البيت ويمشي لكن بالرغم من كل ده أنا بحبه لكن مش عامية عن عيوبه عارفاها كويس أوي لكن حتى عيوبه حبيتها أيام خطوبتنا كانت بتعدي ولكن كل يوم كانت بتحصل مشكلة جديدة من تحت الأرض وهو اللي بيعملها مش أنا بابا وعادل بدأوا يتخنقوا منه مع إني معظم الأيام كنت بداري إننا زعلانين وكنت بدافع عنه واطلع نفسي الغلطانة كل ده عشان بحبه بس لما إتكلمت مع إصحابي نصهم نصحني عشان أسيبه والنص التاني قالولي ده شيء طبيعي إن يبقي فيه ضغط عليكم إنتوا ال ٢ لأن ميعاد الفرح بيقرب وخصوصاً إن تامر كان مستهتر فإنه يبقي مسئول دي حاجة كبيرة وصعبة عليه المشكلة إن أغلب خناقتنا كانت إنه عايزنا نقعد لوحدنا رافض يجي البيت عشان عادل أو بابا بيبقوا قاعدين معانا فكانت طلباته نخرج لوحدنا وهبقي أرجعك البيت تاني أو أجيلك الكلية وتسيبي محاضراتك وتبقي معايا اينعم أنا بحبه لكن مستحيل هعمل حاجه زي كده عشان أرضيه اللي مكنتش عامله حسابي عليه إنه بدأ يتغير ويبعد عني بشكل كبير حتى مكالماتي والمسدجات مش بيرد عليها كان بيشوفها بس مافيش أي رد خلاني قلقت عليه جدا لأن دي حاجه تافهه ومش مستاهلة إنه يعاقبني بالقسوة دي أنا بحبه ومستاهلش منه كده بقيت أروح الكلية وأنا مش مركزة مستوايا الدراسي بيقل بشكل ملحوظ بالنسبة للدكاترة لأنهم عارفني كويس بقيت على طول سرحانة بدخل المحاضرات والسكاشن وبعد ما بتخلص بكتشف إن أنا في دنيا تانية خرجني من شرودي صوت مايا وهي بتقول
إيه يا بوسي مالك ؟ بقالك كام يوم مش عجباني وتقريباً الكلية كلها ملاحظة وبعدين هو تامر مبقاش يعدي عليكي ليه ؟ هو إنتوا متخانقين ؟
إضطريت غصب عني أقولها على كل حاجة من الأول ولكني اتفاجئت لما لاقيتها بتقول
طيب يا بنتي وفيها إيه لما يقعد معاكي لوحده مش خطيبك ؟ على فكره ده من حقه
كسر حقك إنتي وهو لأ طبعاً
إنتي مش بتثقي فيه ؟
كشخص اه كأخلاق مستحيل
طيب والعمل ؟
معرفش أومال أنا بقولك ليه ؟
بصي روحيله وصالحيه وأعتقد يعنى لما يشوفك في بيته ده هيبقي أكبر إثبات إنك بتثقي فيه وبتحبيه
نعم ؟ أنا مستحيل أعمل كده إذا كان خناقتنا كلها إنه عايز يقابلني لوحدي متخيلة لو كان طلب مني طلب زي كده كنت هعمل ايه ؟ كنت رمتله الدبلة في وشه
والراجل عشان محترم وبيفهم في الأصول مطلبش منك كده مش ربنا قال هَلْ جَزَاءُ الإحْسَانِ إِلا الإحْسَانُ ٠ يبقي الراجل بيتكسف وإنتي بتشكي فيه بقا ده ينفع برضو ؟
متحاوليش يا مايا الموضوع ده اتقفل وبعدين مالك بتدافعي عنه كده ليه ؟ هو انتي روحتيله قبل كده ؟
ما تحترمي نفسك يا مهزقة إنتي أروح معاه فين ؟ أنا بتكلم على أساس إنه شبه سامح خطيبي ما أنا بروح أقعد مع سامح في البيت ومبيحصلش حاجة
سامح ؟ هو انتي اتخطبتي امته أصلا ؟ وبعدين مش شايفه حاجة في إيدك يعنى
أنا عندى حساسية من الدهب وبعدين اتفقت معاه هبقي ألبس حاجة لما نتجوز مش شرط دهب المهم ركزي معايا وسيبك من خطيبي دلوقتي
برضو لأ
خلاص قولي لأونكل وعادل
مقدرش لأنهم لو عرفوا حاجة زى كده هيموتوه وخصوصاً إنه مزعلني من فترة اسكتي اسكتي إنتي مش عارفه أنا كنت بداري عليه إزاي الفترة اللي فاتت عشان ميعرفوش لأ وياريته قدر كمان الباشا عاملي مقموص وواخد على خاطره
طيب يبقي مافيش حل غير اللي قولتهولك
ما هو أنا مقدرش أروح الشقة ونبقي لوحدنا شكلي هيبقي عامل إزاي قدامه ؟ أقل حاجة هنزل من نظره
بالعكس ده هيقدر تضحيتك وثقتك فيه
هعملها إزاي دي ؟ أنا متعودتش أخبي حاجة على أهلي هحس إني مرتكبة جناية
إنتي مكبرة الموضوع أوي كده ليه ؟ يا بنتي مش مستاهلة كل التفكير ده
اللي إنتي بتطلبيه مني ده صعب أوي
يالهوي على دماغك بعد كل ده ولسه مقتنعتيش ؟ إنتي عايزة تنقطيني ؟ طيب اقولك على حل حلو ؟
بقولك ايه إنتي حلولك كلها زي الزفت متتكلميش تاني
اسمعي بس إيه رأيك لو أجي معاكي ؟
عند تامر ؟
اه وبكده ميبقاش ليكي حجة عشان مش هتكونوا لوحدكم
لأ لأ ده كده بقت أنيل بنتين معاه لوحدنا ؟ لأ يا مايا بلاش
يا بنتي يعني هو هيكتفنا ويغتصبنا
بعد زن كتير من مايا وافقت غصب عني لأن مكنش قدامي حل غيره جيت على نفسي عشان أرضيه خبيت على بابا وماما واخويا عشان ميإذوهوش كنت مرعوبة بالرغم إن مايا معايا حاسة إني عامله حاجة غلط بتلفت حواليا لعادل أو حد من اصحابه يشوفني وصلنا وقبل ما مايا ترن الجرس مسكت ايدها وقولت
ما بلاش يا مايا أنا قلبي مقبوض تعالي نرجع
نرجع إيه يا بنتي ؟ إحنا قدام البيت عايزة تلفي وتمشي بعد كل ده إوعي إيدك دي ومتخافيش ما أنا معاكي أهو
رنت الجرس وأنا قولت
أهو محدش فتح يلا بقا دي أكيد إشارة من ربنا
يلا إيه ده الواد ملحقش يقوم من على الكرسي أصلا في إيه يا إبتسامة ما تصبري شوية الله
توتري كان بيزيد مع ضربات قلبي وكنت هفقد وعيي في اللحظة اللي شوفت تامر فيها قصادي خبطت مايا فى ضهرها لما ضحك وقال
بسبوسة ؟ لأ أنا مش مصدق عينيا ده بجد ولا أنا بحلم ؟
ردت مايا عليه وقالت
لأ يا سيدي بجد مش بتحلم مافيش اتفضلوا ولا إيه ؟
اه ينهار أبيض اتفضلوا طبعاً أنا آسف بس لما شوفت بوسي قصادي حسيت إني نسيت الكلام
الله يسهلوا يا عم ماشي
دخلنا وكنت ماسكة في ايد مايا زي العيال الصغيرة أما هي فكانت باردة بطريقة محدش يستوعبها معرفش إيه الثقة اللي عندها دي لما قالت
في إيه يا بنتي مالك ماسكة فيا كده ليه ؟ هو أنا هسيبك وأجري
الله يخربيت شورتك المنيلة إنتي تخرسي خالص لحد ما نمشي مش عايزة أسمع صوتك
تامر خرج ومعاه كوبايتين عصير وقال
اتفضلوا مشروبي المفضل أحلي مانجا لأحلي بنتين