حب مزيف
مايا خدت الكوباية وبدأت تشرب كان نفسي ألطشها بالقلم على وشها عشان تفوق لكن تامر بصيلي وقال
إيه يا حبيبتي مبتحبيش المانجا ولا إيه ؟
رديت عليه بتوتر وقولت
لأ يا حبيبي بحبها بس أنا مش قادره أشرب حاجة
طيب ولو قولتلك عشان خاطري
صدقني يا تامر مش عايزة
بصلي كده وهو بيبتسم وبعدها قام ورجع ومعاه كانز وقال
اتفضلي
تعبت نفسك برضو مش عايزة
أكيد الكانز مقفول محطتش فيه حاجة زي العصير عشان متدوخيش
حاولت أغير الموضوع لأن بصراحة مازلت مش واثقة فيه فقولت
حضرتك بقا مبتردش عليا ليه ؟
عشان الاقيكي قدامي زي دلوقتي مثلا
تامر أنا بتكلم بجد إنت عارف بقالك قد إيه مش بتكلمني ؟ حتى مسدجاتي مبتردش عليها ؟ ولا بتيجي عندنا حتى الكلية بطلت تشوفني فيها
إنتي عارفة ليه ؟
لأ مش عارفه عرفني إنت
أنا اتخنقت من الوضع السخيف ده مش عارف أقعد أتكلم معاكي كلمتين على بعض مبقتش قادر أستحمل
والحل يا تامر ؟ إنت محسسني إننا أول ناس نتخطب
نبقي نتقابل هنا
نعم ؟ تصدق أنا غلطانه إني قلقت عليك وجيت عشان أشوف مالك عادل أخويا كان معاه حق يلا يا مايا بعد اذنك
مسك إيدي وقال
إستني رايحة فين بس ؟ هو أنا جيت جنبك ولا عملتلك حاجة عشان تمشي ؟ يا حبيبتي كل اللي أنا أقصده هو إني لما بعدي عليكي فى البيت مش بيسبونا لوحدنا لازم عمي ولا عادل يبقي قاعد معانا وأنا بتكسف مبعرفش أتكلم معاكي بحريتي لا أقولك بحبك ولا أمسك إيدك وبصراحة أنا خطيبتك رسمي قدام الناس كلها عشان نبقي فى النور مش مستخبيين
طيب يا حبيبي أصبر شوية لحد ما نتجوز وأكيد هانت يعنى
يا حبيبتي إزاي ؟ المفروض إن أيام الخطوبة دي أجمل أيام هنعيشها فى حياتنا عايزة تضيعيها علينا لأ وكمان عايزاني أوافقك
هو إنت يا تغضب ربنا يا إما تتقمص ؟
أنا قولتلك وجهه نظري وأعتقد من حقي أزعل ولا إيه يا مايا ؟
بصراحة يا بوسي أنا شايفه إن تامر كلامه مظبوط وخصوصاً بقا شهادة حق هقولها مش عشان أنا أعز صديقة ليكي معاه حق لما واحدة زي القمر زيك وفي أنوثتك تبقي قدامه أكيد بيبقي عايز يقولك كلام كتير زي إنك وحشتيه وإنه طول الليل بيفكر فيكي هيعمل كده إزاي قدام اونكل يعنى ؟
هو ده العقل قوليلها بالله عليكي اقنعيها عشان هي محسساني إني أزبل واحد في الدنيا
أنا كمان يا تامر غصب عني ولازم تقدر موقفي مقدرش أفضل أخبي على أهلي لو على كده خليك زعلان مني أحسن لأن مش هستحمل العذاب النفسي اللي هتحط فيه بسببك وبعدين أنا مبحبش أعمل حاجة أنا مش مقتنعة بيها وضد مبادئي ودي كانت أول وأخر مرة أجيلك هنا فيها يا تامر ويا نتقابل في الكلية زي ما كنا بنتفق أو نتقابل في البيت عندنا قرر وشوف هتعمل ايه سلام
خدت مايا ونزلنا كنت متوقعه إنه هيكلمني واتساب يشكرني أو يقولي كانت لفته حلوة منك أي حاجة كتقدير للي أنا عملته بس بكل أسف الناس بقت تشوف الحاجات الحلوة اللي محدش في حياتهم بيعملها غيرك إنت شيء عادي بل بالعكس ده حق مكتسب ليهم وإنت مجبر عليه وكإن كل شخص خذلهم في حياتهم بيخلصوه فيك إنت وبيستردوا حقهم على حسابك الموضوع أشبه إنك كنت هتقابل إصحابك فى كافية والطريق كان واقف وأول ما وصلت لاقيتهم خلصوا قعدتهم اللطيفة وقالولك حاسب على المشاريب وسابوك ومشيوا سبحان الله وكإنه كان مقدر ليك تقابلهم عشان تحاسب على غلطات غيرك بس نقول إيه البني آدم بطبعه نمرود مش بيحس بقيمة الحاجة ولا بيجري وراها غير لما يشوف غيره خدها منه شيء محزن جدا إنك لازم تكون الشخص اللي بيبدأ كل يوم في الكلام لأن ببساطة لو مبدأتش تفتح الشات عشان تسأل ساعتها أعرف إن دي كانت بداية النهاية لصداقتكم أو علاقتكم ببعض ٠ تامر إستمر على الوضع السخيف اللي كان عليه لحد تقريباً ما عدي شهر كامل من غير ما نتكلم وبرضو أنا اللي كنت بحاول وهو مكنش بيرد لحد ما نيروز فاجأتني وأنا قاعدة في مكتبة الكلية وقالت
إيه ده يا إبتسامة هو إنتي وتامر فركشتوا امته ؟ إنتي كويسة ؟ بصراحة الله يكون في عونك الموقف اللي إنتي فيه صعب أوي
ضحكت كده وبصيتلها بإستغراب وأنا بحاول أجمع هي عرفت منين أصلا إننا متخانقين ؟ مايا من النوع الكتوم اللي لما بتعرف حاجة بتخليها سر زي ما هي فقولت
لأ يا بنتي فركشنا إيه ؟ مين اللي قالك الكلام ده ؟ إحنا شدينا بس مع بعض زي أي ٢ مخطوبين
إزاي الكلام ده ؟ إمبارح كانت خطوبة تامر
تنحت كده شويه وبعدين قولت
ههههههههههه إيه الهزار السخيف ده دمك تقيل أوي على فكره الحاجات دي مافيهاش هزار تامر مستحيل يعمل فيا كده
ابتسامة أنا مبهزرش معني كده إنك متعرفيش مين العروسة ؟
نيروز إنتي بتتكلمي بجد ؟
بقالك قد إيه مش بتفتحي سوشيال ؟
كتير تقريباً شهر أو ٣ أسابيع ما إنتي عارفاني لما نفسيتي بتتعب بقفل تليفوني وأي حاجة ممكن توصلني بالناس واختفي لحد ما نفسيتي تتحسن ساعتها ببدأ أظهر تاني
طيب إفتحي الفيس وهتتأكدي من كلامي هتلاقيه منزل صورته معاها
اللي هي مين بقا ؟
تامر خطب مايا
إيه ده إن شاء الله مقلب وانتوا عاملينه فيا ؟
مقلب حجز عشانه قاعة ٥ نجوم واتفق مع فوتوغرافك وعزم كل الناس دي والتاج اللي عامله ليها على الفيس وجهه نظرك إنه لسه مقلب ؟ معتقدش
لأ أنا حقيقي مش مستوعبه إزاي يعني ؟ حبيبي وصديقه عمري ؟ أكيد فى حاجة غلط أنا مستحيل أهون عليهم بالطريقة دي بالعكس ده أنا قدمتلهم كل حاجة حلوة وأي حاجة كانوا بيحلموا بيها كنت بحققهالهم بس هي الخيانة مبتجيش غير من أقرب الناس ليك صعب عدوك يضربك في ضهرك لكن صاحبك وحبيبك بيستناك تلف عشان يحدفك من أعلي تله مستحيل اللي بيكرهك يقدر يإذيك زي القريب منك ضربته بتيجي في مقتل مينفعش تداويها نيروز كملت وقالت
بجد إنتي مكنتيش تعرفي ؟
لأ طبعاً مكنتش أعرف إزاي خبيتي عليا حاجة زي كده ؟
صدقيني يا إبتسامة أنا كنت فكراكي متغيرة بسبب كده أهم حاجة هتعملي إيه دلوقتي ؟
هعمل ايه يعنى يا نيروز فى الموقف اللي زي الزفت ده ؟ شايفة إن ده وقته أصلا ؟
إنسيهم يا إبتسامة هم ال ٢ ميستاهلوش تبقي فى حياتهم اعمليلهم بلوك وخرجيهم بره حساباتك إعتبريهم صفحة وإتحرقت
إنتي بتتكلمي إزاي ؟ عايزاني أنسي حب ٣ سنين فى ثانيه ؟ وأنسي صديقه حياتي وعشرة العمر كله فى لحظة ؟ بقالنا أكتر من ١٥ سنة إصحاب بنعمل كل حاجة سوا مكناش بنفارق بعض بتيجي تبات عندي وبتلبس هدومي وبتاكل معايا عايزاني أمحي كل ده أول ما أغمض عيني ؟ ده أنا مكنتش بشتري حاجة لنفسي غير لما بجيب منها ٢ عشانها وتقوليلي بمنتهي البساطة اعتبريها صفحة وإتحرقت ؟ أخرجها من حياتي وأنسي خيانتها ؟
طيب هتعملي إيه يعنى ؟ هتقتليهم ؟
ده شوية عليهم الموت بالنسبة ليهم رحمة