حب جديد
_إهدي يا مجنونة بلاش تتسرعي وتاخدي قرار في لحظة غضب تندمي عليه العمر كله
_سيبيني يا نيروز من فضلك لوحدي
_تعالي طيب أوصلك البيت وبعدها وعد هسيبك
_نيروز لو سمحت
_مقدرش يا إبتسامة إنتي بتطلبي مني المستحيل عايزاني أتخلي عنك وإنتي فى الحالة دي ؟ كفاية إني كنت السبب في إنك عرفتي المصيبة دي
_ولما تفضلي معايا يعنى هيفسخوا الخطوبة ؟
_بوسي إنتي لازم تستوعبي إن المشكلة مش في إنهم يكملوا مع بعض ولا لأ ؟ إفهمي إن تامر ومايا أندال ولو هو فكر وحاول يرجعلك إوعي تغلطي في حق نفسك بالشكل ده حتى لو لسه بتحبيه دوسي على قلبك وسيبي عقلك هو اللي يحكم لمرة واحدة في حياتك خليه ياخد قرار هيحدد مصير حياتك وهقولهالك تاني بلاش القرار ده يبقي فى لحظة غضب لأن في الأول
وفي الأخر محدش هيندم ولا هيدفع تمنه غيرك لوحدك والأحسن ليكي تعرفي عادل وسيبيه يتصرف لأنه أكيد اتعامل مع أشكال زي تامر ودلوقتي إتفضلي عشان تروحي معايا يلا
نيروز وصلتني لأني كنت منهارة ولسوء الحظ عادل كان أجازة اليوم ده إتصدم لما شافني بالمنظر ده وقال:
_إيه ده مالك ؟ إيه اللي حصل ؟ إتكلمي ردي عليا
نيروز إدخلت وقالت:
_لو سمحت يا عادل ممكن تهدي ؟ وهي هتفهمك على كل حاجة لما تبقي مستعدة لكن بلاش تضغط عليها دلوقتي
_أيوه يعني إيه الكلام ده ؟ إنتي كده قلقتيني أكتر
_إطمن يا عادل أختك تمام وبمليون راجل محصلش حاجه هي نفسيتها تعبانه اليومين دول بسبب ضغط الإمتحانات
_مش عليا يا نيروز دي أختي وأنا عارفها مهما كان عندها ضغط فى الكلية مبتنزلش دمعة لأنها قد المسؤولية اللي حطت نفسها فيها شوفي كدبه غيرها عشان أقدر أصدقها
نيروز بصيتلي وقالت:
_طيب إدخلي جوه إنتي يا إبتسامة وسيبيني أنا وعادل لوحدنا
مسحت دموعي في الوقت ده وبصيت لعادل وأنا بقول:
_هقولك أنا يا عادل شكرا يا نيروز على كل اللي عملتيه معايا النهاردة بس أنا أفضل إن أنا اللي أقول لأخويا أحسن ما يعرف من بره
_زي ما تحبي بعد إذنكم أنا إتأخرت ولازم أنزل خلي بالك من نفسك وإبقي طمنيني عليكي
عادل قعد قدامي وهو بيقول بعصبية:
_تسمحي تفهميني بقا دموعك دي نازلة ليه ؟ إيه الحاجة اللي مستاهله وحضرتك عملالها قيمة عشان دمعه واحدة تنزل من عينيكي ؟
_أنا سيبت تامر
_أحسن هو ده يتزعل عليه أصلا ما في ستين داهيه أنا عارف كنتي بتحبيه على إيه حبيبتي إنتي تستاهلي واحد أحسن منه مليون مرة بس سيبتيه ليه ؟ أنا مستغرب لأن إنتي بتعشقيه ده أخر قرار كنت متوقع أسمعه منك ولاحصل حاجه وإنتي مخبية عليا ومش عايزة تقوليلي ؟
_لأ صدقني إحنا مختلفين أنا خدت القرار ده بعد تفكير كتير وعلى فكرة انا لسه بحبه لكن بكل اسف الحب مش كل حاجه لأن انا لو اتجوزت تامر هكمل حياتى وانا ندمانة عشان اكتشفت انه مينفعش يبقى اب
_طيب والله كويس انك اخيرا فوقتى من الغيبوبة اللى كنتى مدخلة نفسك فيها وفكيتى السحر اللى كان عملهولك
_الحمدلله بعد اذنك أنا هدخل أنام شوية عشان المحاضرات كانت رخمة أوى النهاردة
_طيب يا حبيبتى نتقابل بالليل وأنا هحاول أخد بكره أجازة نسهر سوا
_تمام يلا تصبح على خير
دخلت الأوضة وفضلت أعيط مش مصدقة ان صاحبة عمرى تخونى وتبيعنى بالرخيص حقيقى حاسه ان أنا بحلم فى كابوس وحد هيدخل يصحينى منه ليه عملوا معايا كده ؟ كنت حابسه نفسى طول اليوم مش عايزة أكل ولا أتكلم مع حد الوقت عدى لحد ما عادل رجع بالليل وخبط على باب أوضتى وهو بيقول :
_مساء الفل والورد والياسمين على أحلى بوسى فى الدنيا دى كلها إيه اللى مقعدك هنا ؟ الكلام ده مينفعش يلا يا ست هانم قومى معايا أنا جبتلك معايا الشيبسى والعصير اللى بتحبيه وهنشغل فيلم رعب ونخربها للصبح
_هههههههه مافيش فايدة فيك هتفضل طول عمرك عيل
_هكبر على إيدك إنت يا حلو يلا بقا هاتى إيدك
_حاضر يا حضرة الظابط
خرجت معاه وكان جايب حاجات قد كده لب وسودانى وبيبسى ربنا ميحرمنيش منه بمجرد بس ما يحس ان أنا زعلانة أو الدنيا ضايقتنى
بيتصرف من غير ما أطلب منه فعلا اللى عنده أخ بالدنيا كلها حبيت أنكشه فقولت:
_إيه ده كله يا أستاذ إنت ؟ على كده بقا ناوى تاخد منى سلفه عشان تكمل بقيت الشهر
_شايفه بنتك يا ماما ده بدل ما تبل ريقى بكلمه حلوة عشان عايز اطلعها من المود اللى هى فيه تتلامض عليا
ردت ماما عليه وقالت :
_ناقر ونقير هتفضلوا زى القط والفار عمركم ما هتكبروا أبدا
قعدنا نهزر وبصراحه كانوا بيحاولوا يعملوا كل اللى يقدروا عليه عشان ميدونيش مساحه أفكر فى تامر وأنا متابعه معاهم الفيلم جاتلى مسدج على
الواتساب من رقم غريب فتحتها وإتفاجئت لما لاقيتها بتقول :
_آنسة إبتسامة مساء الخير أول حاجة بعتذر لو بكلمك فى وقت غير مناسب ومتأسف لأن الوقت متأخر بس أنا كنت عايز أطمن عليكى وأقولك على حاجة مهمه أنا عرفت اللى حصل وللأسف شوفت البوست على الفيس ياريت متضايقيش نفسك عشان واحد ميستاهلش اصلل إنك تفكرى فيه إنتى نجمة عالية أى حد يتمنى يطولها أو إنها تظهر فى حياته أما مايا
مافيش داعى أتكلم عليها لأنك أكيد دلوقتى عرفتيها على حقيقتها وإن كل اللى كانت بتعمله قصادك ده تمثيل يعنى إحمدى ربنا إنه بعدك عنها وكشفلك نيتها واللى فى قلبها الطيور على أشكالها تقع ومن غير زعل هم أكتر اتنين لايقين على بعض الوسخ بيدور على الوسخ اللى زيه عشان النضيف المحترم هيخليه يشوف وساخته أكتر إنتى تستاهلى واحد أحسن منه
مليون مرة يعاملك على أساس إنك ملكة . فى حاجة كمان عايزك تعرفيها وأعتقد جه وقتها أنا بحبك من أول يوم دخلتى فيه الكليه وأنا هموت وأكلمك عشان أقولك قد إيه انا معجب بيكى وإنك دايما فى خيالى وأنا بذاكر , باكل , حتى لما كنت باجى أنام كنت باخدك معايا فى أحلامي اللى نفسى نحققها سوا على فكرة أنا مش من الناس اللى بتحب تتسلى يومين
وتخلع لأن دى مش من صفات الرجولة عشان كده عندى إستعداد أجى أقابل بابا فى أى وقت تحدديه أنا بحبك من اول يوم شوفتك فيه فى الكلية حسيت وقتها انى شوفت ملاك حد صعب يتكرر مرتين نسخه أصليه مينفعش يتاخد منها كوبى انا اسف يمكن مش من حقى اقولك الكلام ده لكن مش عايزك تزعلى على حد ميستاهلش ولا كان يحلم فى يوم من الأيام انه يمسك ايدك مبطلبش منك تردى عليا ولو عايزة تعملى بلوك للرقم برضو مش هزعل انا حبيت بس ابقى جنبك فى الوقت ده