رواية ضحية إمرأة الفصل التاسع9 بقلم زينب سعيد ابراهيم
الفصل التاسع ( جرح قديم)
_وبعدين معاكم بقا إنت تدعى عليا ومراتك تدعى عليا هو فيه إيه يلا منك ليها ؟
_مراتى ! أوام عملتيها مراتى ده إحنا لسه مقرأناش الفاتحه إتقى الله
_ما إحنا طالعين نقرأها أهو يا دولا وبعدين إضحك وبطل تنفخ لأن نيروز بصه علينا من فوق فلم نفسك ومتفضحناش
_ما هو إنتى السبب
بابا إدخل وقال :
_وبعدين فى شغل العيال بتاعكم ده إنتوا مش ناويين تكبروا بقا ده إنت طالع تخطب يا جدع
_خلاص يا بابا حقك عليا أنا أسف إتفضل
حضرتك
طلعنا وطبعاً نيروز هى اللى فتحتلنا الباب سلمت عليا أنا وبابا وماما أما عادل بقا فقالتله :
_إنت قدامى بجد ولا أنا بحلم ؟
_لأ أعتقد إنك صاحيه
_تعتقد ؟ عمق الكلمه قفلنى إتفضل
عادل دخل وإتكلموا فى التفاصيل بتاعت الشبكة والمهر والحمدلله بابا نيروز رحب جداً إنه يناسب أسرتنا وحددوا ميعاد الخطوبة إنه هيبقى الاسبوع الى بعد الجاى وطبعا نيروز كانت زعلانه جدا كان نفسها الخطوبة تبقى دلوقتى حتى لو من غير معازيم مجنونة مافيش فى دماغها غير عادل . نزلنا من عندهم وعادل مرضيش يرجع معانا البيت وتقريبا كان
مكتئب الاسبوع كله وتجنب تماما إنه يرد على إتصالات نيروز بحجه ضغط الشغل وإنه مش فاضى
لحد ما يوم الخطوبة جه وروحنا أنا كنت بستنى اليوم ده عشان كنت متأكدة إنى هشوف مشهد رومانسى مشوفتوش فى أى فيلم أو مسلسل لكن بصراحه كان فيه شخص موجود ضيع عليا اللحظة دى روحت ناحيه نيروز وشديتها من دراعها وأنا بقول :
_نيروز إلحقى بصى كده
_عايزة إيه منى يا إبتسامة ده يوم خطوبتى سيبينى بقا
_إيه اللى جاب نادر هنا ؟
_أنا اللى عزمته
_يا حيوانه
_بت إحترمى نفسك ولا يعنى هتسوقى فيها عشان هبقى مرات أخوكى
_يا شيخة إتوكسى هو فين عادل أصلا
نيروز بصت وراها وبعدين قالت :
_عجبك كده أهو أخوكى ما صدق وراح يقف مع إصحابه سيبينى بقا
خرجت أقف فى البلكونه شوية لكن نادر جه ورايا وقال :
_عقبالنا
_ههههه ياه ده إنت مصمم بقا
_عليكى إنتى
_شكلك شخص مثابر يا بختك مبتيأسش عندك طاقة تعافر وعندك أمل تحقق اللى بتحلم بيه ربنا يوفقك
_إنتى حلمى اللى نفسى يبقى حقيقة يعنى أفهم من كلامك إنك مبتحلميش ؟
_هو إحنا بنحلم ليه ؟
_عشان يبقى عندنا هدف نكمل عشانه وعشان نحقق الأحلام اللى فى خيالنا
_أنا بقا مختلفة عنك إحنا بنحلم عشان نخسر اللى بنتمناه عارف سموه حلم ليه ؟ عشان بمجرد ما بتصحى من النوم أو تقلق عشان تشرب الحلم بينتهى بيخلص فى لحظة
_للدرجادى معندكيش أمل فى أى حاجه ؟
_وإيه الفايدة النتيجة دايما محسومة إسمحيلى أقولك إنك غلطانة الدنيا فيها حاجات كتير ممكن ناخدها ونعوض اللى خسرناه
اللى بيروح مبيجيش أغلى منه
زى تامر كده