رواية ضحية إمرأة الفصل الرابع عشر14 بقلم زينب سعيد ابراهيم
( إستحقار وفقدان ثقة)
_محصلش أقسم بالله محصلش
مسك دراعى بعنف وهو بيصرخ وبيقول :
_أومال إيه معنى الكلام ده ؟
_معرفش
وبدأت أحكى لعادل كل اللى حصل اليوم ده وإنها كانت فكرة مايا وجت معايا يعنى مروحتش لوحدى وكمان رفضت أشرب حاجه هناك وبعدها قولت :
_ده كل اللى حصل ده إحنا حتى مكملناش ربع ساعة يبقى إزاى اللى هو بيقوله ده حصل ؟
_وهو بيقولى أختك كانت جامدة عندى فى الشقة مسكت فى رقبته وكنت هقتله لكنه قال : نزل إيدك يا باشا عشان مضطرش أعلى صوتى وإنت ليك سمعتك وأختك ما شاء الله هتبقى عروسة
_عمل كده ليه ؟
_شوفى إنتى بقا
_مش كفاية اللى عمله كمان مش عايز يسيبنى فى حالى
_تخيلى يقول لنادر الجملة دى بس ساعتها بدل أختك هتبقى خطيبتك
_طيب والعمل يا عادل ؟
_سيبينى أتصرف بس قبل ما أتصرف لأخر مرة هسألك لو فى أى حاجه مخبياها عليا فى موضوع الزفت ده لازم أعرفها فورا عشان أنا مش عايز مفاجآت
سكت شوية وبعدين قولت :
_بعد ما خطب مايا كلمنى وطلب منى أرجعله الشبكه وكل حاجته وإننا نتقابل لوحدنا بس أنا خدت نيروز معايا عشان كنت خايفه منه بس مافيش حاجه تانى إنت متعرفهاش
_نيروز تانى دى ليله أمها سوده يعنى إنتى كدبتى عليا لما سألتك عن شبكتك وقولتيلى إنك بعتيها عشان مش عايزة تحتفظى بحاجه منه ؟
_حقك عليا أنا أسفه بس كنت خايفه عليك
_إنتى مش حافظة غير الجملة دى كل ما تعملى حاجه غلط تتحججى بيها خايفه عليا من إيه من الصايع ؟
_من إنك تإذيه فتترفد
_أنا مش عارف أقولك إيه ؟ متقوليش لحد أى حاجه حتى بابا وماما أنا قفلت الباب عشان ميسمعوش مش عايز صورتك تتهز قدامهم كفاية عليكى إنك نزلتى من نظرى
_يا عادل أنا .....
_بس متتكلميش مش عايز أسمع منك حاجه
فى الوقت ده ماما خبطت علينا وفتحت الباب وهى بتقول :
_إيه يا ولاد فى حاجه ولا إيه صوتكم جايب لحد بره
؟
_عادل بصلها وقال :
_مافيش حاجه يا ماما
كملت وقالت :
_طيب يلا عشان نادر جه وقاعد بره
بلعت ريقى وبصيت لعادل وخرجنا مع بعض يا ترى إيه اللى جابه ؟ تامر قاله وجاى يفسخ الخطوبة ؟ كان فى مليون سؤال فى دماغى لكن إنتهوا أول ما شوفت إبتسامته وقال :
_إيه يا حبيبتى كنتى نايمه ؟
_هزيت دماغى بـ لأ
فقال :
_مالك ؟
عادل بصِلى وقال :
_ما تقوليله ولا تحبى أقوله أنا ؟
_لأ إتفضل قوله إنت
أما نادر فمكنش فاهم ضحك وهو بيقول :
_إيه يا جماعه ما تفهمونى فى إيه بدل ما أنا عامل زى الأطرش فى الزفه كده
عادل قال :
_أنا مش عارف بصراحه إنت هتعمل إيه لما تعرف بس لازم تعرف
_فى إيه يا عم عادل وقعت قلبى
وأنا وشى عمال يصفر وقلبى عمال يدق كلها ثوانى ونادر يعرف ويسيبنى
كمل عادل وقال