رواية للرجال أحكام الجزء الثاني من خطه غير مدروسه الفصل الثامن عشر 18بقلم تسنيم المرشدي

 الفصل الثامن عشر 18

بقلم تسنيم المرشدي 

أنا موافقة علي كتب الكتاب'

_ كانت الجملة كفيلة تخلي عمر ينط من مكانه من كتر الفرحة ، أميرة ضحكت بعفوية علي تصرفه وحاولت تهديه :- 

في ايه مش كده 

_ عمر وقف عن الحركة وبصلها بعدم تصديق لكلامها :- 

هو ايه اللي مش كده انتي مش طبيعية لا يمكن التغير ده كله مرة واحدة ، كتير عليا والله

_ أميرة ضغطت علي شفايفها بإحراج ومعلقتش علي كلامه ، عمر سحب نفس وخرجه براحة وهو بيعيد موافقتها جوا عقله وكل مرة يضحك بعفوية كأنه بيسمعها منها لأول مرة

_ بصلها بعتاب وقالها :- 

مش عارفة يعني تقولي بدري شوية ما انا كنت قدامك طول اليوم في الكلية اشمعنا الوقتي ؟

_ أميرة ردت عليه بتلقائية :-

عشان مكنتش مرتبة ومحدش يعرف قراري ده ، انا حسيت ده حالا لما شوفتك بس ، وبعدين هتفرق ايه بدري من الوقتي ؟

_ عمر بصلها بتهكم علي سؤالها الساذج ورد عليها بعفوية :- 

تفرق طبعاً ، مفيش مأذون موجود في الوقت لكن لو من بدري كنت عرفت اجيب واحد وانا جاي 

_ أميرة ضحكت بصوت عالي علي كلامه اللي مفشلش مرة يضحكها بأسلوبه البسيط العفوي اللي بيخطف قلبها من صدق حبه ليها 

_ مسلم خرج مع رقية وعمر بصله وسأله بفضول :-

انت مشرب اختك دي حاجة صح ؟

_ مسلم لوهلة مستوعبش كلامه وسأله بتلقائية :-

حاجة! لأ هشربها ايه ؟

_ عمر وزع أنظاره بينهم وردد بفرحة :-

يعني اللي سمعته منها ده حقيقي وهي في كامل قواها طيب الحمد لله

_ مسلم بص لاميرة وغمز لها :-

انتي قولتيله ايه ؟

_ أميرة وقفت وبصتلهم بإحراج لأنها مرتبتش قرارها معاهم وممكن تواجه رفض ، سحبت نفس وردت عليه بتردد :-

وافقت علي كتب الكتاب

_ أميرة ابتسامتها اترسمت علي وشها بارتياح لما شافت سعادتهم ظهرت علي ملامحهم وتصرفاتهم ، رقية حضنتها جامد وقالتلها بحب :-

مبروك يا حبيبي

_ مسلم شاور لها بإيده تيجي في حضنه ومجرد ما حضنته عيطت جامد ، اكتر حضن حاسس بيها وعاش معاها كل فترات حياتها بحلوها ومرها ، قد ايه ممتنة لوجوده في حياتها 

_ مسلم اتفاجئ بعياطها وربت علي ضهرها بحب وحاول يهديها وهو فاهم مشاهرها المتلخبطة في الوقت ده :- 

ششش اهدي.. خلاص 

_ عمر قلبه اتقبض أول لما سمع نبرتها اتهزت وعيطت ، أتأثر بعياطها وعيونه لمعت بحزن وردد :-

لو كتب الكتاب اللي خلاكي تعيطي بلاش المهم متزعليش

_ أميرة عدلت وقفتها وهزت راسها برفض :-

مفيش حاجة بس حسيت إني عايزة اعيط

_ كلهم ضحكوا عليها ماعدا عمر اللي كان زعلان بسبب دموعها اللي شافهم وطول الوقت كان بيحاول يهزر معاها علي أمل ينسي منظرها وهي بتعيط..

_ اتعشوا مع بعض في جو لطيف بيكسره حكاويهم من وقت للتاني ، بعد ما خلصوا العشا عمر بص لمسلم وقاله :-

ها هنبدأ منين ؟

_ مسلم ضحك بعفوية ورد عليه يشرح له حقيقة الموضوع :-

انا كنت بقولك كده عشان تيجي تاخد فرصتك مع أميرة شوية أنا عارف ان الحج منشفها عليك جامد

_ عمر رد عليها بعفوية :-

ابوك طلع صعب اوي بس والله كله يهون عشان خاطر أميرة 

_ رقية بصت لاميرة ومقدرتش تسكت :- 

يا سيدي يا سيدي ، يابختك

_ أميرة وشها احمر جدا وبصت لعمر بعتاب :-

ياريت تبطل كلامك ده وخصوصاً قدام الاتنين دول بالذات

_ عمر استنكر كلامها وقالها بثقة :- 

أبطل ايه انا بتكلم قدامهم عشان دول اللي مسموحلي أتكلم قدامهم ، استني وشوفي بعد كتب الكتاب محدش هيقدر يمسك لساني قدام أي حد 

_ أميرة عيونها وسعت بذهول عليه بسبب كلامه ورددت :-

أنا رجعت في كلامي..

_ صوت ضحكهم كان عالي علي كل كلام عمر وأميرة ، عمر أصر أنه لازم يساعدهم في البيت بأي حاجة ومسلم وافق تحت ضغط كبير منه..

_ اليوم انتهي بسلام عليهم كلهم وكانت سهرة لطيفة اتمنوا تتعاد تاني في اقرب وقت ، رقية دخلت الأوضة بعد ما وضبت أكبر جزء بمساعدة أميرة ، بدلت هدومها ولبست فستان خلفيته سودة وعليه ورد احمر طويل للركبة محدد بطنها اللي ظهرت بوضوح ، سابت شعرها وحطت لمساتها في الميك اب ، قعدت علي السرير وحطت الهاند فري في الموبايل وبدأت تختار أغنية رومانسية  ..

_ مسلم خلص اخر توضيب في البلكونة وفرشها ودخل الأوضة ، أبتسم لما شافها متألقة علي غير عادتها الفترة اللي فاتت بسبب انشغالها في تجيهزات البيت وتعبها في آخر الليل بسبب جهدها ..

_ قرب منها وهي وقفت اول ما شافته ، حطت له طرف من السماعة في ودنه وشاركوا اغنية ( من أول دقيقة ) مع بعض وهما بيرقصوا سلوا ، مالت علي صدره وسندت عليه وعاشت مع الأغنية في لحظة جميلة بينهم ..

_ كانت بتبص له من وقت للتاني وهي حاسة بفرحة كبيرة جوها ، ممتنة للحظات اللي بتقربهم من بعض اكتر ، حاوطت رقابته بايدها وغنت مع كلمات الأغنية كأن الأغنية مخصوص ليه..

_ الأغنية خلصت وهو بصلها بحب وهمس قدام شفايفها :-

وحشتيني..

_ أول ما نطق بالكلمة دي رقية حست بحركة غريبة جواها ، بصتله بفرحة لأنها تقدر تشاركه حالياً اللي بتحس بيه بسهولة ، مسكت أيده وحطتها علي بطنها وعيونها كانت عليه عشان تشوف ردة فعله ..

_ مسلم حس بحركة غريبة تحت أيده ، لوهلة خاف وسحب أيده وهي ضحكت بعفوية عليه وحاولت تطمنه :- 

ده البيبي ، علي فكرة مش بحس بحركته غير في وجودك ، كأنه بيكون سامع صوتك وبيتحمس ويتحرك 

_ مسلم كان متفاجئ بكلامها وهي مسكت أيده تاني وحطت علي بطنها وقالت له بصوت طفولي :-

هاي يا بابي متخافش مني انا بحبك 

_ مسلم ضحك بحماس شديد وانحني عليها باس بطنها واتكلم كأنه بيرد عليه بنبرة لطيفة جدا :-

وانا كمان بحبك اوي

_ عدل وقفته تاني وبص في عيون رقية برغبة وافتقاد :- 

بقولك وحشتيني..

_ رقية ردت عليه بنبرة ناعمة وهي بتتعلق في رقابته بابتسامة رقيقة :- 

وانت كمان وحشتني اوي اوي اوي

_ مسلم بعد عنها وبصلها لما افتكر تصرفها معاه وقت ما كانت في بيت اهلها ، بصلها بحدة وهي استغربت تحوله وسألته باستفسار :-

بعدت عني ليه؟

_ مسلم ضيق عيونه عليها وردد :-

مش كنتي عايزة تعرفي عملتي ايه في الليلة في نمنا فيها في بيتكم

_ رقية هزت راسها بفضول وهو قالها :- 

تعالي بقا لما اعرفك يعني ايه تقربي مني وبعدها تسبيني وتنامي 

رقية ضحكت جامد وهي بتحاول تستوعب كلامه :- 

أنا قربت منك؟ ازاي يعني مش فاهمة؟

_ مسلم فك زراير قميصه واتحرك واجبرها تتحرك هي كمان معاه لغاية ما وصل لمراده ...

__________________________________________

_ عمر مقدرش يستني اكتر من كده خوفاً أن أميرة ترجع في كلامها وحدد ميعاد تاني يوم  يتقابلوا فيه يختاروا الشبكة مع بعض 

_ قدام محل الدهب ، عمر قرب من أميرة وقالها :- 

أي حاجة تعجبك متتردديش أنك تقوليلي عليها 

_ أميرة هزت راسها برأسها بموافقة ودخلوا المحل ، أميرة وعمر قعدوا قريب العامل اللي هيفرجهم علي الموجود عشان يكون سهل عليهم ينقوا الدهب 

_ رقية وقفت مع أميرة ومسلم وقف ورا عمر ، وبقيت العيلة كانت قاعدة في صالون مخصص للعائلات بيتكلموا مع بعض ..

_ رقية عجبها خاتم وانحنت علي أميرة تشاور لها عليه :-

شوفي ده حلو اوي 

_ أميرة لبسته والاتنين انبهروا بجماله علي أيدها ورقية رددت بإعجاب كبير :- 

تحفة 

_ أميرة بصت للخاتم بفرحة وقلعته وهمست لها :-

شكله بيقول انه غالي بلاش 

_ عمر كان متابعها باهتمام وسألها باستفسار :-

حلو ده قلعتيه ليه ؟

_ أميرة شاروت علي واحد تاني وردت عليه :-

عاجبني ده اكتر 

_ عمر هز راسه بتفهم وكملوا تنقية الشبكة ، بعد مدة بص لاميرة بزهق وقالها :- 

الظاهر مفيش حاجة حلوة تليق عليكي 

_ أميرة بصت في الأرض بخجل شديد وعمر بص لصاحب المكان وقاله :- 

ممكن تورينا أطقم كاملة

_ أميرة انحنت علي عمر مسكت دراع تلحقه :-

استني بس طقم ايه ده غالي اوي 

_ عمر بص علي أيدها اللي عليه ورفع عيونه عليها وعاتبها :-

وايه يعني مفيش حاجة تغلي عليكي

_ أميرة اتفاجئت من رده وعدلت قعدتها وهي بتحاول تهرب من نظراته اللي مش بتفشل أنها توترها ، اختاروا طقم كامل رقيق وكانت أميرة حريصة أنها تنقي حاجة متكنش غالية اوي ..

_ رقية كانت بتشاركها باهتمام وحب ، جذب انتباها خاتم معين ' خاتم الزواج ' واللي بيكون غالباً ألماس ،  ركزت مع تفاصيله لدرجة أنها تخيلته علي أيدها وابتسمت بعفوية 

_ مسلم كان متابع نظراتها وضحكتها اللي ظهرت وهي بتبص علي أيدها كأنها لابسة الخاتم فعلا ، شعور وحش جدا حس بيه وقتها ، هو ازاي مهتمتش لحاجة زي دي يقدمهالها ..

_ ملامحه اتشدت بضيق وقعد بعيد عنهم وعيونه علي رقية وهو بيلوم نفسه بسبب نظراتها اللي أثرت فيه ..

_ رقية لاحظت أنه بعد عنهم وراحت قعدت جنبه وسألته باهتمام :-

انت تعبت من وقوفك ولا ايه ؟

_ مسلم سحب نفس وحضن أيدها بإيده وقالها :- 

لا عادي بس حسيت اني مليش لازمة يعني 

_ رقية بصتلة باستنكار وردت عليه تعاتبه :- 

هو مين ده اللي ملوش لازمة ده انا حياتي كلها علي بعضها كده ملهاش قيمة من غيرك

_ مسلم ابتسم لها ورفع أيدها باسها ورد عليها بلطف :-

ربنا يخليكي ليا ، بس انا اقصد يعني وقوفي معاهم ملوش لزوم مش بعمل حاجة يعني 

_ رقية هزت راسها بتفهم وفضلت قاعدة جنبه لغاية ما كلهم خلصوا وخرجوا برا المكان ، عمر دور علي موبايله في جيوبه وبصلهم :- 

تقريباً نسيت موبايلي جوا هدخل اجيبه ..

_ عمر دخل وطول جوا ، مسلم كان هيدخل يشوفه أتأخر ليه بس عمر قابله علي الباب ، ضيق عيونه عليه وسأله باستفسار :- 

انت بتعمل ايه كل ده ؟

_ عمر رد عليه يبعده عن الحوار :-

كان فيه غلط في الحساب كنت بظبطه ، يلا نمشي..

_ أميرة بصت لعمر وقالت له باحراج :- 

عمر ..

_ عمر كان بيدوب اول ما يسمع إسمه منها رغم أن نطقها للاسم عادي ، قرب منها ورد عليها بنبرة متيمة :- 

قلب عمر

_ أميرة ضحكت بإحراج  وقالت له بإمتنان :- 

شكراً 

_ عمر رد عليها بعدم فهم :-

هو عفواً بس ليه ؟

_ أميرة وضحت سبب امتنانها :- 

عشان كل اللي بتعمله عشاني..

_ عمر غمز لها ورد عليها :-

أنا معملتش حاجة ، اللي عملته ده ميجيش ربع اللي هعمله 

_ مسلم ادخل بينهم وقالهم :-

كفاية همس لغاية كدا مش معني أني ديموقراطي وسايبكم تتكلموا لوحدكم تزودوها والله أكلم لكم الحاج مسعد يجي يتصرف معاكم

_ عمر رد عليه بسرعة يمنعه :- 

لا لا قلبك ابيض ، اختك عندك اهي 

_ أميرة بصت لعمر بدهشة ومسلم حب يرخم عليهم ووجه كلامه لاميرة :- 

شوفتي اهو باعك في ثانية 

_ عمر اتكلم ينفي كلام مسلم :- 

ده انا بايع الدنيا كلها ومش شاري غيرها انت بتقول ايه بس!

_ مسلم ضحك بصوت عالي وسقف بايده :- 

ده أنا اتثبت يابني 

_ عمر شاركه ضحكه وهزاره عكس أميرة اللي عيونها مترفعتش من علي عمر وهي بتعيد كلامه بحب ، حست بندم جواها أنها مقبلتوش من زمان ..

__________________________________________

_ في نهاية الأسبوع واليوم المعهود اللي كله كان بيحضر له بفارغ الصبر ، أميرة واقفة قدام المرايا بتبص علي نفسها ، بتاخد نفسها بصعوبة من شدة التوتر اللي هي فيه ، معقول هي قبلت عمر بجد؟ 

_ كلها دقايق وتكون علي اسمه! ، هي فعلا جاهزة أنها تخلي العلاقة جد بالرسمية دي ، أيدها كانت بتترعش جامد وحاسة أن الجو برد رغم أن الجو حر النهاردة عن أي يوم ..

_ ضربات قلبها سريعة بصورة غريبة معقول ده من الحماس ولا من الخوف؟ ، خرجت من شرودها علي صوت الزغاريد اللي عرفتها أن عمر وعيلته وصلوا ، قلبها اتقبض مجرد ما سمعت صوت عمر وهو بيتكلم برا ..

_ دخول رقية خلاها تخرج من دوامة أفكارها اللي مش بتنتهي ،  رقية قربت منها وهي مبتسمة :-

عمر جه وعيونه علي البيت كله غالباً بيدور عليكي

_ أميرة قعدت علي كرسي التسريحة وملامحها اتشدت بخوف ، رقية قربت منها وهي مستغربه حالتها وسألتها باهتمام :-

انتي خايفة ولا أنا شايفة غلط؟

_ أميرة هزت راسها بتأكيد وعيونها لمعت :-

أنا متوترة اوي 

_ رقية ضحكت بعفوية وقربت منها ربتت علي كتفها بحب :-

طبيعي بس اللي مش طبيعي أنك تخافي ، عمر وجوده جنبك كفيل يطمنك

_ أميرة سحبت نفس وقامت وقفت وسألتها باهتمام :-

شكلي حلو؟

_ رقية بصتلها بعدم تصديق وردت عليها بتلقائية :-

حلو بس ده يجنن 

_ أميرة ابتسمت لها برقة وبصت تاني علي نفسها في المرايا باهتمام ، كانت لابسة فستان أوف وايت ستان منفوش نفشة بسيطة وسادة مفيهوش اي رسومات رغم كده ما شكلها رقيق جدا مع لمسات الميك اب الخفيفة اللي حطتها ..

_ مسلم دخلهم الاوضة وبص لاميرة وقالها :-

يلا المأذون بيسأل عليكي 

_ أميرة قلبها دق جامد وبلعت ريقها بارتباك واضح جدا عليها ، مسلم لاحظ ملامحها اللي باين فيها الخوف وقرب منها واتكلم بنبرة حنونة :-

مفيش داعي للخوف ده كله ، علي عيني اجوزك يابت انتي بس الواد باين عليه بيحبك لأجل كدا بس هسيب الموضوع يمشي 

_ أميرة ضحكت وهو ضحك معاها وقالها :-

أيوة كده اضحكي شكلك بيكون احلي

_ أميرة قربت منه حضنتها بحب :- 

بحبك اوي 

_ رقية قربت منهم ورفعت حاحبها متصنعة الغيرة :-

علي فكرة ده جوزي وحضنه ده بتاعي أنا 

_ أميرة ضحكت جامد وبعدت عن مسلم ورقية قربت من مسلم وحضنته هي كمان وقالت له بلوم :-

وانت اي حد يجي يحضنك كده تحضنه انت محروم أحضان؟

_ مسلم وأميرة ضحكوا جامد علي كلامها ومسلم رد عليها :-

طيب ممكن نخرج الوقتي ونشوف حوار الاحضان ده بعدين 

_ رقية رفعت عيونها عليه ورفضت بميوعة :- 

تدفع كام؟

_ مسلم انحني عليها وباسها من غير احراج ورقية بعدت عنه بسرعة وهي محروجة جدا من تصرفه الوقح ، أميرة سحبت نفس بصدمة من تصرف مسلم اللي فاجئها بيه واتكلمت وهي خارجة :- 

أنا خارجة برا ..

_ رقية ضربت مسلم في كتفه جامد وهي بتعاتبه :- 

ايه اللي انت عملته ده ؟

_ مسلم رد عليها وهو خارج :- 

مكنتيش هتبعدي غير كدا 

_ رقية مقدرتش ترد عليه بسبب أنه خرج ، خرجت وراه وبعد دقايق المأذون بدأ في إجراءات كتب الكتاب بعد ما قال خطبته عن فضل الزواج وقيمته وعرف العروسين بواجباتهم اتجاه بعض ..

_ عمر كان قلبه بيدق جامد بحماس وكان بيقول ورا المأذون بسرعة لاحظها كل اللي قاعدين لدرجة أن المأذون كان بيضحك من بين كلامه بسبب تصرفات عمر ..

_ نهي كلامه بالدعاء لهم :- 

' بارك الله فيكما وبارك عليكما وجمع بينكما في خير ، زواج مُبارك إن شاءالله '

_ فايزة وكل الموجودين زغرطوا بفرحة وسعادة عمت المكان ، عمر قام من مكانه وعيونه علي أميرة اللي وشها كان احمر من شدة الاحراج ، قرب منها بسعادة كانت ملامحه بتتكلم عنها ومن غير ما يتردد شالها ولف وكأنه انتصر في معركة طالت مدة الحرب فيها.. 

_ نزلها وبصلها بهيام ، انحني وباس جبينها وهمس لها :- 

مبروك عليا يا روح قلبي

_ أميرة بلعت ريقها واكتفت بابتسامة رقيقة رغم أن قلبها كان بيدق جامد بسبب اللي عمله ، كلهم قربوا منهم وباركوا لهم بفرحة كبيرة كانت مالية قلوبهم ، عمر كان حريص أنه ميسبش أيد أميرة حتي وهو بيسلم علي صحابه وقرايبه ..

_ أميرة حاولت تسحب أيدها لما شافت طلابها جاين عليها بس عمر رفض وهمس لها :-

متبعديش عني 

_ أميرة ابتسمت له وبصت للبنات اللي باركوا لها بفرحة ، بنت منهم وجهت كلامها لعمر :-

يابختك بيها يا دكتور بس ياريت متاخدهاش مننا 

_ عمر رد عليها بثقة :-

لا أكيد هاخدها منكم اومال كاتب كتابي ليه؟

_ البنت ضحكت بعفوية وبعدت عنهم مع صحابها لكن نظراتهم عليهم ، أميرة طول الوقت كانت بتسمع همهمات بين الموجودين  

' يا بختها بيه '

' شوفي بيبص لها ازاي '

' شوفوا مش راضي يسيب ايديها '

' فرحان اوي بيها ' 

' عايزة واحد زي دكتور عمر والا مش هتجوز ' 

_ أميرة ابتسامتها مقدرتش تمنعها بعد ما سمعت كلامهم ، حست بفرحة  غريبة جواها كأنه فعلا عوضها ، قد ايه كانت ممتنة لوجوده ولحبه اللي محاولش مرة يخفيه قدام اي حد ..

_ رقية قربت من أميرة واتعلقت في دراعها وقالتلها :- 

فرحانة لك اوي 

_ أميرة ردت عليه بلطف :-

انتي حبيبتي يا روكا والله 

_ عمر لبسها الشبكة وطلع علبة من جيبه زيادة عن الشبكة اللي اختاروها مع بعض وفتحها ، أميرة اتفاجئت بالخاتم اللي عجبها يوم ما كانوا بينقوا الدهب ورجعته ، رفعت عيونها عليه وسألته باستفسار :- 

ايه ده ؟

_ عمر ابتسم لها ورد عليها بثبات وثقة :-

مينفعش يعجبك حاجة ومجبهاش 

_ أميرة سحبت نفس وخرجته براحة وهي بتستوعب جمال كلامه وأسلوبه وكل اللي بيحاول يعمله عشانها ..

 _ عمر لبسها الخاتم وبعد ما خلص رفع ايديها باسها بحب وهمس لها :-

بحبك

_ أميرة مردتش عليه وهو اكتفي بنظرات عيونها اللي مكنش حاسس فيها برفض بالعكس كان حاسس ان فيهم كلام كتير بس مش عارفة تقوله ، يمكن في الوقت المناسب هيقدر يسمعه منها ..

_ مجدي دخل البيت وهو بيدور علي مسلم ، مسلم لمحه ورحب  بيه بحفاوة كبيرة :- 

أستاذ مجدي نورت البيت 

_ مجدي رد عليه بإبتسامة سعيدة :-

منور بأهله الف مبروك ربنا يتمم لهم علي خير 

_ مسلم رد عليه بامتنان :- 

الله يبارك في حضرتك 

_ مسلم أتردد يسأله بس حس انه واجب عليه يسأل عن احوال رانسي :- 

الأخبار عندك ايه ؟

_ مجدي اتنهد ورد عليه برضا :- 

فيه تحسن وصلت الحمدلله بس ليه مكملين 

_ مسلم رد عليه بتمني لصلاح احواله :- 

ربنا يصلح احوالكم يارب 

_ مجدي ربت علي كتفه بإمتنان :-

حبيبي ربنا يخليكي ، تعالي لما نسلم علي العرسان ..

_ مجدي راح مع مسلم يسلم عليهم وبعد مدة الكل بدأ ينسحب من البيت لغاية ما الصالون فضي علي عمر وأميرة ، عمر فك البيبون ورماها بعيد عنه وردد :- 

اوووف البتاعة دي خنقة اوي 

_ التفت واتفاجئ بنظرات أميرة عليه ، هز راسه وسألها :-

مسمعتش صوتك النهاردة خالص ومقضياها ضحك وخلاص مش ناوية تقولي اي حاجة طيب 

_ أميرة قربت منه جامد ومن غير ما تردد حضنته ، عمر لوهلة مستوعبش اللي عملته وفضل باصص قدامه بعدم تصديق لفترة ، بلع ريقه وبصلها وهي في حضنه يتأكد من وجودها بقرب قلبه ..

_ حاوطها بإيده وضمها جامد ومال علي كتفها يعيش معاها اللحظة اللي هو لسه مش مصدق أنه عايشها فعلاً ..

_ أميرة بعدت عنه بس عمر مازال محاوطها بإيده ، مقدرتش ترفع عيونها في عيونه بسبب احراجها ، عمر رفع وشها بايده واتفاجئ بلون عيونها اللي يشبه الدم ، بلع ريقه وقالها بنبرة هادية :-

ده مش حلم صح ، يعني انتي بقيتي مراتي و واقفة في حضني!

_ أميرة عيونها بتلمع ومش عارفة ترد عليه بسبب ارتباكها ، عمر انحني عليها ولمس شفايفها بأيده وسمح لنفسه يلمسهم بجرأة أكبر ..

_ بعد عنها وعيونه عليها يتأكد انها مش مضايقة من قربه منها ، صوت سهير خلاهم يبعدوا عن بعض ، دخلت بعد ما حمحمت وهي مبتسمة وقالتلهم :-

عايزة الاكل ده كله يخلص 

_ عمر رد عليها بإمتنان ولطف :-

تسلم ايدك يا ست الكل أكيد هيتاكل كله عشان من ايدك 

_ سهير بصتله بفرحة وردت عليه :-

ربنا يخليك يا عمر انت بجد ذوق يابخت أميرة بيك 

_ عمر رد عليها وهو بيضم أميرة لحضنه :- 

انت اللي يابختي بيها 

_ سهير بصتلهم بحب شديد واتكلمت وعيونها بتلمع من الدموع لعوض ربنا لأميرة :- 

ربنا يباركلكم في حياتكم الجاية يارب 

_ عمر رد عليها بلهفة :- 

اللهم امين 

_ سهير خرجت وسابتهم ياكلوا مع بعض ، عمر كان بيأكل أميرة من وقت للتاني ، بعد مدة بصلها وقالها :- 

مش ناوية تأكليني طيب؟

_ أميرة ابتسمت واخدت آكل قربته منه وهو مترددش ياكله منها ، بص لفوق وهو مغمض عيونه بيستمتع بالاكل بتلذذ وردد :- 

الله الله أيوة كده الاكل بقا له طعم تاني 

_ أميرة ردت عليه وهي رافعة حواجبها بتعجب :-

يسلام!

_ عمر ضحك جامد ورفع أيدها اللي أكلته بيها وقالها :- 

تسلم لي الايد اللي اكلتني 

_ باس أيدها وهي اتكلمت بعفوية تعبر عن اللي جواها :- 

بحبك 

_ عمر بصلها بسعادة شديدة وعبر عن سعادته بصوت عالي وهو باصص فوق :- 

معتش عايز حاجة تاني يارب أنا كده أموت وانا مرتاح 

_ أميرة مجرد ما سمعت كلمة موت انهارت واندفعت فيه جامد :- 

متقولش كده تاني حرام عليك موت لا

_ عيطت جامد وهي حاسة بوجع جواها ، عمر اتفاجئ بانهيارها بالشكل ده ، هو ميقصدش خالص يوصلها لحالتها دي ، قرب منها واخدها في حضنه وهو ندمان :- 

أنا آسف مش قصدي والله  ، حقك عليا معتش هقول كده تاني 

_ عمر قدر يرجع أميرة لطبيعتها بعد مدة بسيطة بكلامه وندمه اللي حسيته منه ، عمر رفض أنها تبعد عن حضنه وبدأ يحكي لها من اول مرة حس بمشاعر جواه من نحيتها وهي كانت بتسمع باهتمام وسعادة ...

__________________________________________

_ مسلم أخد رقية يتعشوا برا ، بعد ما خلصوا اكل قالها :- 

بما اننا خلصنا كل اللي محتاجينه في البيت عايز أرجع العربية لاستاذ مجدي كفاية كدا ..

_ رقية وافقته علي قراره وهو قالها :-

تمام بعد ما نمشي من هنا نروح له الفيلا نسيبها هناك 

_ رقية هزت راسها بموافقة وبعد مدة مشوا من المكان وراحوا لمجدي الفيلا ، رحب بيهم بحفاوة واستغرب وجودهم في الوقت ده وخصوصاً أنه كان لسه معاهم ، حمحم وقالهم :- 

مش خير يا ولاد ؟

_ مسلم رد عليه يطمنه :- 

خير مفيش حاجة ، بس كنت جاي اسيب العربية قامت بواجبها معايا كفاية عليها كده 

_ مجدي استنكر كلامه وعاتبه بدافع الحب :-

عربية ايه اللي تسيبها إحنا في بينا الكلام ده ؟

_ مسلم رد عليه بسرعة :-

مفيش بينا تكلف عارف بس كتر خير حضرتك سيبتهالي كتير وانا بجد معتش محتاجها يعني متقلقش 

_ مجدي كان رافض أنه ياخد منه العربية بس إصرار مسلم أجبره يوافق ، مجدي هز راسه لما فشل يقنعه وقاله :- 

لسه مش بقدر عليك برده وبتغلبني بالكلام علي العموم يا سيدي هي موجودة وقت ما تحتاجتها متترددش انك تاخدها

_ مسلم ضحك ورد عليه بامتنان :- 

أكيد ، بعد اذنك 

_ مجدي وقفها قبل ما يمشوا وسألهم باستفسار :- 

انتوا هترجعوا ازاي ؟

_ مسلم رد عليه باختصار :- 

هطلب ابليكشن هيبعتلي عربية في خلال خمس دقايق 

_ مجدي هز راسه بتفهم وهما خرجوا برا ، رقية كانت بتتفرج علي المكان باهتمام ، وقفت عيونها علي حاجة معينة وبصت لمسلم بحماس وقالت له :- 

ايه رايك نعزمهم علي العشا ، عيلة لطيفة وبجد حبيتهم 

_ مسلم ركز عيونه علي نفس جهتها ورد عليها من غير تفكير :-

مفيش مشكلة ..

_ رقية ضحكت له بسعادة واتحركوا نحيتهم ، وصلوا للبوابة ومسلم قال للأمن :- 

لو سمحت عايز أقابل عمران الباشا 

_ الأمن سأله بعملية :-

حضرتك مين ؟

_ مسلم رد عليه يعرفه بنفسه :- 

أنا مسلم الليثي جاركم في الفيلا اللي جنبكم دي 

_ واحد من بقية أفراد الأمن جري علي مسلم ورحب بيه :- 

استاذ مسلم اتفضل 

_ وجه كلامه لصاحبه :-

ده أستاذ مسلم تبع استاذ مجدي المحامي 

_ مسلم ورقية دخلوا مع الأمن اللي وصلهم ل ليلي في التراس وقالها :- 

ليلي هانم استاذ مسلم عايز يقابل عمران باشا 

_ ليلي ابتسمت له وردت عيله :- 

طيب يا عامر روح انت 

_ ليلي بصتلهم ورحبت بيهم جامد :- 

نورتونا اتفضلوا 

_ رقية ردت عليها بحب وأريحيه :- 

بنورك ، بصراحة كنا جايين نعزمكم عندنا علي العشا بمناسبة أننا نقلنا في بيتنا الجديد ويشرفنا انكم تقبلوا العزومة 

_ ليلي رحبت جدا بالفكرة وردت عليها من غير تفكير :- 

 احنا اللي نتشرف بيكم يا قمر انتي ، تمام مفيش مشكلة فيلتكم الجديدة فين ؟

_ مسلم ورقية بصوا لبعض بإحراج ومسلم اللي رد عليها :- 

لا هي شقة مش فيلا علي بعد نص ساعة من هنا

_ ليلي هزت راسها بتفهم وقالت له :- 

طيب ايه رايك انت تيجوا انتوا تتعشوا عندنا هنا ، أصل ما شاءالله إحنا كتير اوي يدوب ناخد العمارة براحة 

_ مسلم ورقية ضحكوا وهو اعترض :- 

بس دي تبقي عزومتنا ازاي ؟

_ ليلي فهمته بأسلوب عفوي لطيف :-

لا شوف بقا طلاما قررتوا تبقوا صحابنا يبقي تنسي عندي وعندكم دي من قاموسك إحنا واحد وبيوتنا واحدة فإيه رأيك ؟

_ مسلم بص لرقية وهي هزت راسها بموافقة وقالت له :- 

معنديش مشكلة 

_ ليلي ابتسمت وقالت لهم :- 

تمام يبقي بكرة بإذن لله 

_ مسلم حمحم ووجه كلامه ل ليلي بإحراج :- 

بس ممكن تسأليهم في البيت الاول يعني ممكن يكون عندهم التزامات تانية 

_ ليلي ضحكت وقالت له :- 

مفيش التزامات ولا حاجة وحتي لو فيه نفضي لكن مخصوص

_ مسلم بصلها بإمتنان بس اعترض كلامها وقالها بإصرار :- 

متشكر لحضرتك بس برده معلش شوفي رأيهم الاول 

_ ليلي شافت إصرار مسلم وحبت تظهرله أن الموضوع في أيدها ، دخلتهم الفيلا وأمرت الشغالة تنادي عمران ، ضحكت بعفوية وبصتلهم :-

عمران أخويا قعد من الشركة من يوم ولاد ليلي مش بيعمل اي حاجة غير أنه قاعد جنبها بنشوفه بالصدفة كده لو نزل يلعبها 

_ مسلم ورقية ضحكوا وهي كملت هزارها :- 

آخر العنقود بقا 

_ مسلم رد عليها بعفوية :- 

ربنا يباركله فيها 

_ عمران نزل ورحب بيهم بحفاوة شديدة ، ليلي بلغته بالكلام اللي دار بينهم وعمران أتكلم بترحيب :- 

التزامات ايه بس احنا نفضي لكم مخصوص 

_ مسلم حس براحة بعد كلام عمران وأستاذن و

هو رقية ومشوا وهما متحمسين جدا لسهرتهم معاهم ..

 رجعوا البيت وهما مش مصدقين أنهم أخيراً وصلوا بعد اليوم الطويل ده ، قبل ما يتحركوا من قدام الباب سمعوا رن الجرس ، رقية عقدت حواجبها باستغراب ورددت :-

مين اللي جاي لنا الوقتي؟

_  مسلم هز راسه بمعني مش عارف وراح يفتح الباب وهو قلقان من الزيارة المجهولة في الوقت المتأخر ده ، عيونه وسعت بذهول لما شافها واقفة قصاده وردد :-

رانسي!

               الفصل التاسع عشر من هنا 

لقراءة باقي الفصول من هنا