رواية شبح الماضي
الفصل الاول1
بقلم رويدا راشد
"أبشع استغلال هو استغلال المشاعر"
سامر:في المحل يستنى في حاتم باش يسلمه الهدية ويسكر شوية وسمع صوت سيارته برا.
حاتم: هلا وغلا هلا بالحامل والمحمول...
سامر:هاك الهدية بدت مديرتلي شبهة في المحل كل ماتتعاركوا اتجيني تجري بديت نتحشم لما توقف قدام المحل ...
حاتم: بكل برود عادي قولها معاش نبي نخدملك
هدايا ....شن الاشكالية.
سامر: مش ناوي ايجوني جماعة المليشيات يخلولي المحل رماد وانت فاهم صاحبتك شن يطلع منها....
حاتم: معاش تشكيلي اتجيك بفلوسها هانت ايام ومعاش تلقى لمن تعطي الهدايا...
وهما يتكلموا لين وقفت سيارة تقوى قدام المحل.
سامر:تفضل هيا اذكر القط ايجيك ينط شرفت .
تقوى:معقولة ع خاطر مشكلة بسيطة هكي ادير وتكبر الموضوع راني توتو حبيبتك.
حاتم: انت تعرفي شن السبب كويس مافيش داعي نقعدو نعاود في الكلام.
تقوى: تعالى للإستراحة الليلة توا تلقاني نستنى فيك وراك تتأخر مافيش داعي نبعثلك من ايجيبك.
سامر: انا نسمع في الكلام وخفت كيف هو قادر يتكلم معاها بكل قوة هكي طلعت ركبت سيارتها وروحت قعدت ننصح فيه رد بالك ياحاتم مافيش اسوء من كره بعد محبة توقع انتقام من أي نوع....
حاتم: خليها هكي توا نعرف شن حلها اهيا.
سامر: وربي نشوفلك في نهاية ياصاحبي ماتتمناها حتى للعدو...
ياسمين:الو وينك من بكري نستنى فيك ..
..../شوية نوصل ياحبي.
ياسمين: ماطولش عليا.
روحت تقوى للحوش تجهز في روحها للطلعة ..
نهى: واضح من لبسك انك ماشية للفسوق للي تعودتي بيه مازال في فرصة انك ترجعي لربي ويغفرلك.
تقوى: من طلب منك النصيحة راني فايتتاك غير ع خاطر اهما للي داخل اقلها تعاني فيهم.
نهى: مع انك انسانة ماتستاهلش حتى اني نتكلم معاها لكن خطبني ولد عمك محمد .
تقوى: حدفت الروج من يدها قصدك علاء اكيد تبصري مجنونة انت تاخدي واحد مخروم حبوب مش عارف ليله من نهاره.
نهى: اهو ندفع في ضريبة افعالك من متوقعة بياخدني امام جامع مثلا اكيد مش رح يوقف قدام بابي الا السكار والحشاش.
تقوى: مريضة ضعيفة الشخصية خليك زي الكلبة اتعيشي مدلولة مع مرت عمك العقرب .
نهى: هيا طلعت وانا خشيت جنب امي وبوي وبديت نبكي .
صالحة: اسكتي سلم بنتي توا بوك يسمعك هو من غير شئ صحته يالله .
نهى: مش مدايرة حساب لراجل الاعمى هذا للي قطعوه الناس كلها بسبب سيرتها ولا احنا للي نقعدو نتسخفوا باش الكلام مايوصلش لي بابا انا تعبت لعند امتا بنقعد ندفع ضريبة غلط غيري انا صيانة نفسي ونمشي تحت الحيط ونقول يارب الستر ،لا حد قبل يخدمني ولا حد شاف لوجهي وهذا كله بسبب افعالها حسبي الله ونعمة الوكيل فيها في كل غلط تغلطه وانا ندفع ثمنه ..
صالحة: ادعيلها ربي يهديها سلم بنتي .
نهى: قداش دعيتلها ونصحتها وهيا ولا ع بالها بكل.
وصلت تقوى للإستراحة نزلت وقعدت تستنى في حاتم امتا يوصلها ...وين عطل عليها طلعت برا للبوابة.
كوكا برا جيبه انا ماعنديش وقت نضيعه وانا نستنى فيه.
طلعوا كوكا والحربي بالسيارة المصفحة باش يجيبوا حاتم للإستراحة طبعا في أقل من ربع ساعة كان حاتم قدامها...
تقوى: وهيا مقعمزة ودخن في الارقيلا متعها لازم يعني لين نبعثهم يبجيبوك قدام اهلك بشر مااتجيش الا بالعين الحمراء .
حاتم: امتا بتعقلي بس هذا للي نبي نفهمه ولا تحسابيني زي هلبا ناس ترفعي وتجيبي فيهم بجوك.
تقوى: قربت منه قصدك انت عقلك خلاك تتخايل انك خير منهم 🤣🤣🤣.
حاتم: مافيش مقارنة اصلا شتان بين الترى والثريا.
تقوى: وقفت اسمع الحوش وكملته من الاخير امتا بنتزوجو ...ليا اسنين وانا نستنى فيك.
حاتم: من الصدمة بعد كلامها معاش قدر يرد عليها اسمعي انت عارفة وضعك توا مش زي وضعك قبل.
تقوى: شن يفرق اها نسيت صح اصلا قبل كنت في حالي انت للي خليتني تقوى للي واقفة قدامك جبرتني ع حاجات ماكنتش مقتنعة بيها لين وليت نشوف فيها عادية تحت مسمى الغاية تبرر الوسيلة.
حاتم: شن تبي نقولك سمعتك ولت زي الزفت متوقعة اهلي يرضوا اني نتزوج وحدة متعت....وسكت ماقدرش يكمل الكلمة .
تقوى: قولها خليك قد كلامك وحدة متعت استراحات وسهريات اسمع هما كلمتين مافيش ليهم ثالث وانت تعرفني كويس نفعل مانهددش اما انك تاخدني لحمة وترميني عظمة ورب بعيدة عليك .
حاتم: خلي لكل حادث حديث .
تقوى: انت غبي متوقع روحك بتضحك عليا بكلمتين زي كل مرة لالا.
حاتم: خلي نروح توا ونوعدك مايصير إلا للي انت تبيه .
تقوى: حربي روحوا بيه وللي ايجئ اليوم قولوه مش رايقة ومانبي نشوف حد .
ركب حاتم السيارة معاهم وقالهم يحطوه في حوش سامر وهو توا يروح بيه لحوشهم باش اهله مايستغربوش في السيارة..
كوكا: انا مش عارف شن للي مخليها صابرة عليك لو تتطلقني عليك نفرمك.
الحربي: نشم في رائحة الخيانة طالعة منك وادعي ربي نطلع غالط لانه لو حق بنزردو بيك.
حاتم: يسمع وساكت لانه شايف مواقف وعارف انه كلامهم فعل مش هدرزة مدمنين وخلاص
احيانا الانسان يجهل حجم الكارثة للي هوا فيها لين يفيق بكف من الواقع ..نزل حاتم لحوش سامر كانت الساعة 2 في الليل والحكاية شتاء والناس ترقد بكري وقف قدام المربوعة وبدأ يخبط لين نفتح الباب.
سامر: فقت الساعة 2 وخوتي راقدين سحبت المسدس متعي وفتحت الباب وانا جاهز اي موضوع بنضرب طول.
حاتم: شن هذا لعبه ولا حق حول الهم من وجهي ونوض ولع سيارتك .
سامر: من مسلطك عليا تحلم بيا ولا كيف مفروض توا في حوشكم ولا غالط في الطريق.
حاتم: ولع السيارة توا نفهمك.
سامر: هذا الكلام للي يخوف فيا مدامه فيها توا نفهمك يعني تقوى في الموضوع طلعت ولعت السيارة وفي خاطري ان شاء الله ماينوض حد.
حاتم: شن هذا شكلك شاريه من سوق الجمعة بخمسة دينار.
سامر: شافله ع جنب لالا ،شاريه من سوق الشامخات 😒 ماهو لما تصاحب واحد اجرب زي حالتك ضروري تولي مجرم تمشي والسلاح تحتك ويالله تسلم .
حاتم: اهو اقلها تعيش جو انك شخصية وفي ناس ادور فيك.
سامر: عيشه بروحك ساد واضح من وجهك للي تقول ليمة مخلوع شن قتلك توتو متعك🤣🤣.
حاتم: فكني من الكلام النئ اهو للي تقول فيه
اسمعني الهانم تبي نتزوجها.
سامر: طبيعي الكلام هذا تقوله لانه حوشك للي تقول حوش وزير انت بانيه بفلوسها مخلصة حقه لحم .
حاتم:انت صاحب ولا عدو شن تقول تسمع في روحك.
سامر: نقول في الحق ايام نقولك فيق ع روحك راخو نهايته شن هذا كله انت شايخ فلوس ونفود وانت للي تفكر فيها توصلك لعندك .
حاتم: كيف بندير في ياسمين لو تعرف بقصة تقوى وربي لما تسيبني مانبيش نخسرها بنت عيلة وناس.
سامر: مرات نستحقر فيك تصدق توا ياسمين خايف عليها وتقوى دفيتها في الطاجين.
حاتم: كيف تقارنهم ببعض اصلا الفرق كبير.
سامر: حتى تقوى كانت بنت عيلة وناس وانت وطمعك في الفلوس ضحيت بيها راهو ذنبها في رقبتك ليوم تموت.
حاتم: عارف كان الحكاية مش ليل وصقع راهو قتلك وقفلي .
سامر: هو هذا كلام الحق مايبي حد يسمعه اسمع ياصاحبي يقولو فيها كل شاة معلقة مع رقبتها بتتحاسب بروحك راهو.
ثاني يوم الصبح فاقت تقوى شدت الهاتف تقلب في الفيس لين شافت منشور أحلى هدية من خطيبي ....
كانت الباقة للي هيا اهدتها لي حاتم وهو اعطاها لخطيبته ياسمين