رواية شبح الماضي
الفصل السابع7
بقلم رويدا راشد
"تكلب المكلوبة وماتكلش لحم درعانها"
كان الكل مصدومين وجاء الحربي وتقدم لي تقوى .
الحربي: السلام عليكم ياعمي.
بشير: تفضل ياولدي وسامحني الاصول نستقبلك في الباب لكن الله غالب قلة العيون واكيد عارف.
الحربي: ولا يهمك وربي يحفظك ويطول في عمرك يارب.
بشير: كيف حالك وحال اهلك وناسك .
الحربي: الحمدلله مانبيش نطول معاك في الكلام انا جاي نبي نطلب يد بنتك تقوى.
بشير: يكون خير ان شاء الله يارب وربي يكمل ع خير .
الحربي: خش علاء بالضيافة شربت وكنت خاطري نشد نقتله لكن مشيتها ع خير ع خاطر تقوى وبعد تفاهمنا في التفاصيل جيت بنطلع شدني بوها من يدي.
بشير: راهو تقوى امانة في رقبتك رد بالك مهما صار ضايقها ولا تزعلها راهي رغم جمالها للي متأكد انها مازالت محتفضة بيه رغم خسارتي لعيوني لكن ماعندهاش حظ.
الحربي: في خاطري مش محتاج توصي عليها بالله حطيت يدي ع يده نبي نطمنه حاضر ياعمي كوني متهني عليها.
بشير: ربي يقدم للي فيه الخير ياولدي ويرزقكم بالوقت الطيب.
نهى: واقفة تتفرج شن جاب الحربي وتشوف لباقة الورد بالله للي ماعنده حظ لايتعب ولايشقى.
صالحة: الدنيا بخوث يابنتي وكل واحد وربي شن كاتبله.
نهى: باهي معقولة تقوى تغلط وياخدها شخص زي هذا وانا للي في حالي نصيبي ايجيني زي علاء .
صالحة: استغفري ربي وهذا كله من الشيطان يوسولك ماتخليش ايمانك ضعيف هاذي اقسام ربي موزعها ع خلقه من وقت انخلقوا في الدنيا.
تقوى: شادة الباقة متع الورد وتتأمل فيها وكأنه اهتمام بسيط لامس شئ في قلبها.
وهيا سرحانة لين رن تليفونها كان المتصل الدولة.
الو
الدولة: شن طلعتي من الساحة يازعيمة.
تقوى: طالعة منها ليا اسنين غير انتم هذا وين عرفتوا.
الدولة: كنت متوقع الانسحاب هذا منك لكن تاخدي واحد يخدم عندك.
تقوى: اسمه يخدم معاي هاذي أولا ثانيا المهم انه راجل وسند ليا.
الدولة: ياستي مبارك.
تقوى: سكرت منه وقمعزت نفكر بيني وبين نفسي من وين بنبدأ وكيف بننسى للي عشته قبل كله .
" أن تستيقظ متأخرا أفضل من الإستمرار في السبات"
ياسمين: توا شن الخطوة الجاية للي لازم نديروها.
سامر: خلي نتفرجوا توا بس حطي رجل ع رجل وشوفي المركب وين بترسي.
ياسمين: خوفي كان ماتغرق بينا كلنا في النهاية.
حاتم: انا ادمرت انتهيت لاحوش ولا خدمة ولا أي شئ كيف بنكمل حياتي.
سامر: انا قبل نقولك مسكينة لكن توا بنعطيك الطريقة للي تخليك تنتقم منها بالصح.
حاتم: شن قصدك.
سامر: قبل لاتفكر تحارب عدوك لازم تعرف نقطة ضعفه.
حاتم: قعد يفكر ويفكر لين في الأخير قال بوها.
سامر: خلاص معناها الحل عندك .
حاتم: خلي نلفها يمين ويسار باش نعرف كيف الطريقة للي بنتتقم بيها.
الكوكا: الف مبروك ياصاحبي ورغم انه زواج شكلي لكن نعرف انه مجرد ماتنقال تقوى حرم معتصم تسوى عندك هلبا.
القط: ياسلامحتى الكوكا طلع يعرف يتكلم في جو الحب والمشاعر المنهج فاتني ياشباب .
الحربي: كان فرحان ومش مصدق روحه.
بعد أسبوعين بالزبط كانت فاتحة تقوى وفاتحة نهى رغم التفكك والبعد للي بينهم إلا كانت في اجواء فرح تقوى تساوى في زبون بوها وتعطر فيه .
صالحة: ربي يفوت اليوم ع خير يارب.
وفي اليوم للي كانوا بيقرو فيه الفاتحة للإثنين كانوا يستنوا في التحليل متع علاء.
نهى: خيره عطل نحس فيه حاجة.
وهما واقفين يستنوا لين شوية وخش علاء ووجهه متغير وقف بوه محمد.
محمد: خيرك شن فيك.
علاء: والدموع معبية عيونه انا مانقدرش نتزوج يابوي.
لطفية: تشوف ومش فاهمة شئ.
محمد: شن السبب.
علاء: انا مريض بالإيذز وهذا التحليل ...
لطفية من الصدمة اغمى عليها نهى تسمع وساكتة دموعها ينزلوا بلا صوت .
الفرح انقلب وبعد قريب نصف ساعة من الصدمة روح علاء واهله وانقرت فاتحة تقوى ومعتصم .
نهى: ههههه حتى الحشاش طلع ماعنديش فيه نصيب نقولك انا ماعنديش حظ بكل.
تقوى: احمدي ربي انت تعرفي المرض هذا شن نهايته الموت الموت البطئ.
نهى: انا نبي نموت اصلا انا نموت غير انتم مش حاسين بيا.
تقوى: انت اقوى منانك تنهاري ع خاطر واحد زي علاء لكن نوعدك انا انك رح تتزوجي معاي .
صالحة: ماعندهاش كلام ينقال واقفة تتفرج وخلاص.
علاء انسان قمة في الانحطاط كان هدفه يستغل نهى بجميع الطرق ....احيانا الإنسان يختار الإختيار الخاطئ ورغم هكي يتعلق بيه وهذا كله لجهله لخفايا الأمور.
ثاني يوم في الإستراحة
تقوى: معتصم بنقولك تعالى نبي نحكي معاك انت والكوكا.
الحربي: خليني الحربي معتصم حكم نسيته شوية وخاشين وراك.
خشوا الثلاثة
تقوى: فضي المخازن من البضاعة وجمع فلوسنا من السوق .
الحربي: ع شن ناوية بالزبط.
تقوى: خلاص نبي نبدأ حياة جديدة مع الشخص الصح للي يستاهل.
الكوكا: مش خايفة من ردة فعل التجار بعد يعرفوا الخبر اهو.
تقوى: اكيد مش رح يقدمولي الورد اقل شئ وابل من الرصاص ولكن خلاص ساد مليت أمجد انت كان بتكمل مزلت خوي وصديق غالي ع قلبي نسكرلك حسابك ونقولك ربي يسهلك.
الكوكا: انتم عارفين مانقدرش نخليكم ديري للي تشوفيه مناسب وللي بيا بيكم .
الحربي: هذا للي نستنى فيه منك ياحر.
طلعت تقوى من الاستراحة وبتروح وصلت رأس الشارع شافت زحمة قدام حوشهم وناس قدامه.....استغربت لكن عمرها ماتوقعت ايصير للي صار