رواية شبح الماضي
الفصل الثامن8
بقلم رويدا راشد
"ياريت العازه في مالي ماجتني في ناس غوالي"
تقوى: حسيت الدنيا صغرت في عيني وقلبي زاد نبضه نقرب من الحوش وخايفة وانا جنب الحوش شفت نهى تبكي....فقدت امي وبوي.
نهى: قتلهم قتلهم قدام عيوني...
تقوى: وانا كنت واقفة لين جيت مقعمزة من الصدمة خشيت لقيتهم غارقين في دمهم والشرطة جت قداش الدنيا تافهة وماتسوى شئ ياريتني كنت معاهم ياريت للي عشته كله يكون كابوس بنفيق منه .
نهى: تبكي وحضنت تقوى كان بيقتلني لكن مالحقش هربت منه ....علاش ياتقوى علاش.
تقوى: وانا نحاول نتماسك امسحي دموعك وراك تقولي لشرطة انك شفتيه انا عرفته من لكن ورب محمد لما يندم .
الناس بدت تزحم علينا وجاء معتصم والكوكا والقط .....كنت نتوقع كل شئ إلا انه ندفع ضريبة خبث وتلاعب ياسمين وسامر قررت ننتقم قبل مانسيب الكار للي انا فيه فات ايام العزاء ثقيلة بعد اسبوع تمت الزحمة والناس.
وانا مقعمزة مع نهى في الجنان نضموا لين سمعت صوت الباب انفتح لفيت ورايا.
حاتم: ربي يصبرك وعظم الله اجرك.
نهى: انهارت وبدت تعيط وتبكي هو هو اهو قتلهم.
ياسمين: ياروحي شكلها مش متقبلة موتهم لدرجة انها بدت تتخايل.
تقوى: بكل برود الدنيا عزاهم مش توا نقبله منك مسألة أيام ونقولك امتا .
ياسمين: عيب ماتكبر في دارك غير القرعة جايين واحنا كلنا اسف وحزن هكي تستقبلي ضيوفك.
تقوى: احمدي ربي مااستقبلتكش بالرصاص برا قبل مايصير شئ ثاني.
نهى: هو هذا للي قتل امي وبوي شن يبي منك.
تقوى: اسمعي يانهى الحياة تبي للي قلبه قوى
راهي غابة واحنا مالينا غير بعض يعني رجلي ع رجلك توا.
نهى: كيف بنقعدو في الحوش بعدللي صار انا نسمع في صوتهم نشوف فيهم في كل مكان .
تقوى: من قال بنقعدو بنطلعوا اليوم .
اخدو شن يبو من الحوش وطلعوا للإستراحة نزلوا الاثنين من السيارة.
الحربي: علاش نتصل بيك ماترديش ولا متعمدة تشغليني عليك.
تقوى: للي كنت تمثل ع خاطرهم وماتوا تقدر طلقني توا.
الحربي: ومن قالك كنت نمثل انا اصلا.
تقوى: انا تعبانة وضايعة ومش عارفة كيف نتصرف مش حمل لوم يامعتصم وراك تستنى مني حاجة راني نحس في نار والعة في قلبي.
الكوكا: انت ماتبيش كان هذا الندل من غدوا يكون ميت هو وأهله والكلبة للي معاه.
تقوى: احيانا الموت راحة للإنسان لكن انا نبيه يتعذب قبل مايموت مانبيش يوصلها بالساهل .
نهى: لازم يحس ياتقوى بللي حسيته .
تقوى: ارتاحي يانهى وهذوما بوي وامي زيك اكيد مش رح نرضى نخلي للي قتلهم عايش.
خشيت نفكر من وين بنبدأ تفكرت الخبره شديت الهاتف واتصلت بيها.
الخبرة: اهلا تقوى شن نحسابك سيبتي.
تقوى: ريتها كيف حتى بنتوب اتجيك شياطين تردك للوسخ تردك.
الخبرة: انتي عارفة الطريق هاذي معاش فيها رجوع وكان رجعتي لازم تدفعي الضريبة .
تقوى: انا للي كنت خايفة عليهم تحت التراب لكن توا هما للي بيخافوا.
الخبرة: باش نقدر نساعدك انا معاك .
تقوى: هذا علاش اتصلت بيك انا عرفت انه البنت للي اسمها ياسمين للي معاك تلعب ع الحبلين بين حاتم خطيبها وسامر صاحبه .
الخبرة: من اول عرفتها وسخة باهي كملي.
تقوى: نبيها تتزوج حاتم بأسرع وقت ممكن.
الخبرة: لكن انت عارفة انها مضروبة وقت التحليل بيطلع كل شئ.
تقوى: التحليل عليا انا نقدر بمعارفي وعلاقتي نطلعه نظيف وتعرفي ياخبرة لو يتم الموضوع ليك مني 50 أرنب وانتي تعرفي تقوى شن.
الخبرة: باهي وهيا شن بيطلعلها لو تزوجاته ..
تقوى: 20 يوم تقرأ الفاتحة وعشرين في موال ثاني في بالي وانت وشطارتك كيف تقنعيها عاد.
الخبرة: مفاتيحها عندي اعتبري الموضوع مسكر ياحبي .
فات الاسبوع الاول من دون اي جديد من طرف الخبرة فضيت البضاعة للي في السوق طلعت فلوسي من المصرف اعطيت كل واحد حقه وانا مرتاحة وللي قعد خديت روؤس وحطيت عليهم سواقين وخليت الباقي عندي .
الكوكا: اسمع يامعتصم نبي نقولك حاجة ومش عارف كيف نجيبهالك.
الحربي: جيبها زي الناس وانا في الايام السود فيهم.
الكوكا: انا عجبتني اخت تقوى وشكلي بنعقل وبنتزوج .
الحربي: وشن ع اساس انا راجل اختها وانت توا تخطب فيها مني ولاكيف.
الكوكا: نبيك تشوفلي رايها هيا شن .
الحربي: غدوا نسألها واعطينا وقت نفكروا ونعطوك الرد .
الكوكا: دمك ثقيل راهو .
القط: تعرفوا انا متأكد الفترة الجاية الاستراحة بتكون بحر دم.
الحربي: اسكت انت ياليلى عبد اللطيف 🤣.
القط: وربي انت تعرفني في الامور هاذي شن محنك هذا تحليل من شعوذة ياسطل توا التجار للي سحبتوا منهم الفلوس ورفعتوا عليهم الحماية معقولة بيمشوا الموضوع عادي.
الكوكا : سامع حاجة تكلم خلي نتغدوا بيهم قبل مايتعشوا بينا.
القط: قتلك تحليل وهذا السي حاتم للي بيهبل لانه رجع من الصفر متأكد انه مستعد يتحالف مع الشيطان نفسه باش ينتقم .
الحربي: كلامك فيه وجهة نظر صح .
سامر: غريبة ياصاحبي سكوتها رد بالك منها وخلاص توقع منها كل شئ.
حاتم: ماعندها مادير لانه بعد تزوجت الحربي الكل حاقدين عليها ورأس مالها الحربي والكوكا والقط.
سامر: لكن وقت يجد الجد الثلاثة اهما مستعدين يجندولها جيش.
حاتم : خلينا منها ياسمين تبي نتزوجوا حتى كان بالايجار.
سامر: انصدم من كلامه لكن عندك تكاليف العرس.
حاتم: الحب يصنع المعجزات ياثعلب الذهب منها وبتساعدني في الاثاث وخصوصا انها بدت تخدم .
سامر: ياسيدي ماعندي مانقولك غير ربي يهنيك .
بعد أسبوع ونص اتصلت الخبرة بي تقوى.
تقوى: بشري .
الخبرة: وتي معارفك تبي التحليل توا.
تقوى: اعتبره عندك تمشي ل..... وتلاقى وحدة تستنى فيها اسمها نسرين تقولها انا من طرف الخبرة وهيا اتم الباقي.
الخبرة: تمام ويوم الفاتحة بنجيك ناخد الفلوس.
تقوى: وفوقهم حبة مسك .
سكرت الخط وهيا فرحانة لانه للي تبيه صار خش عليها الحربي.
الحربي: نبي نحكي معاك.
تقوى:شن فيه .
الحربي: الكوكا يبي يخطب نهى شوفيها وردي عليا.
جاء طالع شدت يده.
تقوى: اليوم سمعت خبرين الاول احلى من الثاني.
الحربي: دوم بنطلع انا توا.
تقوى: مش من طبعه يكلمني هكي غريبة لكن تجاهلت الموضوع ومشيت نجري قلت لنهى.
نهى:بجديات تحكي قصدك.
تقوى: وربي بجد.
نهى: الحمدلله يارب وبعدها بكت بوي وامي ماتوا بغصتهم عليا مسامحتني ياتقوى ع للي كنت نقولك فيه.
تقوى: اصلا ماكنتش نعدل عليه كلامك نعرفك درويشة من يوم كنا صغار