رواية شبح الماضي
الفصل الرابع4
بقلم رويدا راشد
"فيه للي زلته مغفورة وفيه للي زلته فوق النخل منشورة".
تقوى: روحت للإستراحة وانا مش مصدقة للي عرفته يالا وفرت ع روحي الانتقام من انسان تافه زيه هوا.
الحربي: بتقعدي الليلة هنايا.
تقوى: إلا لو مش مرحب بيا .
الحربي: عيب مكانك وملكك غير استغربت سبب الجيه.
تقوى: تقدر تقول فرحانة وانا سواء كنت فرحانة ولا زعلانة مانلقاش نفسي إلا هنايا، لكن ماشفتش الكوكا في البوابة .
الحربي: طلع بيجيبلنا العشاء وجاي توا انا نستأذنك بنرجع للبوابة..
طلع الحربي للبوابة وفجأة وهيا واقفة تشوفله سمعت صوت رصاص وسيارة مألوفة فاتت بسرعة قدام البوابة طاح الحربي .
تقوى: حربي وصلته لقيته غارق في دمه لكن يتنفس ماتموتش ماتموتش ماعندي حد غيرك لمن ماشي ومخليني حربي وانا نحاول نركبه في السيارة ع جيت الكوكا.
الكوكا: صوت الرماية كانت ع الاستراحة.
تقوى: مش وقت كلام ارفعه معاي بسرعة رفعناها للعيادة رغم انه نزف هلبا لكن اماكن الاصابة ما كانتش خطيرة.
الكوكا: روحي ياتقوى الوضع مش معروف وين ماشي ،وجودك معانا مش رح ايدير فايدة وانا توا نتصل بيك نقولك شن ايصير معانا .
تقوى: بعقلك تبيني نروح ونخليه.
الكوكا: مافيه شئ يفيق من البنج والله نكلمك طول وعد.
تقوى: اول مرة نحس بخوف ع الحربي حسيت روحي بنخسر السند بنخسر الكتف للي نحط رأسي عليه ونحمله همومي، روحت للحوش ثاني يوم وانا بالي مشغول بشئ واحد من للي دار العملة .
عند سامر وحاتم في المعرض.
سامر: جماعة السوق كلها تتكلم ع الحربي قالو حصل رصاصتين وحدة في كتفه والثانية في رجله.
حاتم:قالوا الرماية صارت عليهم قدام الاستراحة نحس المقصودة تقوى مش هوا .
سامر: زعمك يكونوا جماعة الايذز ردة فعل لعملتها وهما ميتين ميتين.
حاتم: توقع كل شئ من الناس اهما ولكل فعل ردة فعل.
سامر: فخار يكسر بعضه المهم انت بعدت عليها بس .
حاتم: لالا، مرتاح منها ولاهي في حياتي وخدمتي والانسانة للي بتكون مرتي.
صالحة: اهلا لطفية نورتي تفضلي.
لطفية: زاد فضلك اهو وصلت جاية باش بنتفاهم معاك ع العرس.
نهى: طلعت سلمت عليها وبعدها رجعت داخل.
صالحة: هاذي الساعة المباركة.
لطفية: اسمعي ياسلفتي مارفع السماء ع الارض غير الحق وانا باش بنكذب عليك وبنقولك ولدي عنده وعنده لا،الذهب مش جايبين ذهب مغير الذبلة وخاتم.
صالحة: للي ينقص انا نزيده هاذي نهى الباهية ماتهونش عليا تطلع مزهودة بلا ذهب غيرها مش خير منها.
لطفبة: انت عندك باش تكسي بنتك انت حرة لكن انا قلت الحق وخلاص .
نهى: في خاطري حتى متع الحشيش والدوخة
استرخصني وكله بسبب اختي ...
روحت تقوى وهيا تعبانة خشت شافت بوها وبعدها قعمزت جتها امها وقاتلها للي صار كله.
تقوى: انا ناخدلها كل واغلى شئ وقوليلها منه هوا باش ماتحتسش فرحتها ناقصة.
صالحة: صحيتي وربي يهديك ويرزقك بولد حلال .
تقوى: سكتت ماعنديش جهد حتى نتكلم ونرد عليها انا تعبانة ونبي نرتاح، حطيت راسي ورقدت فقت ع الهاتف واصلتني رسالة ...كانت من رقم غير معروف يعني للي باعثه معبئ كرت تشفير الرقم
" تبي تعرفي من للي ضرب الرصاص راجعي الكاميرات"
فقت نجري لسيارة وطلعت للإستراحة أول مرة نخشها وانا بروحي بدون حماية ولا حد معاي قعمزت نراجع في الكاميرات في هاتف الخدمة للي خليته غادي وقت شفت السيارة انصدمت ....كانت سيارة حاتم.
حسيت الدنيا وقفت مش كافيه انه خاين وضيع حياتي ودمرها ايزيد يحاول يقتل للي معاي شهادة لله ظلمت عندي..اتصلت بالكوكا وسألت ع الحربي قالي فاق ..ولعت وع طول للعيادة.
الحربي: ماتخافوش العافن مايموتش راهو.
تقوى: شديت يده معناها خليك ديما عافن خفت نحساب روحي معاش بنشوفك.
الحربي: لالا، سلمت اهو .
الكوكا: شفت من رمى عليك.
الحربي: السيارة لي حاتم لكن للي يسوق متأكد مش حاتم اضاءة الشارع كانت عاكسة عليه صح ملثم لكن ملامح عيونه مش شايفهم قبل.
الكوكا: من ماكان يكون توا لما نشدوا الحقير حاتم يخاف ويعترف بروحه.
تقوى: خليه عليا انا توا نعرف كل شئ انت غير رد بالك من الحربي وبس هاذي مهمتك توا واصلا الدولة باعثلي رجال للإستراحة لين يرجع الحربي للصحته.
الحربي: بسرعة استغنيتي علينا .
تقوى: لا والله انتم عندي اكبر من مجرد اثنين يخدموا معاي بالعكس تعاملي معاكم كأنكم عيلتي، توا خلي بنروح عندي ماندير .
طلعت تقوى.
الكوكا: ساوي يدك للي تقول مكسورة.
الحربي: حول هاذي كانت شادتها تقوى جاي بتحط يدك عليها يامنجوس .
الكوكا: لالا ،منجوس حق للي قاعد معاك يامجنون تقوى.
سامر: هلا وغلا زيارة عمل ولا فضفضة .
تقوى: نبي باقة ورد محترمة وتبعتها للعيادة ....
واكتب في كرت حطه فيها سلامتك تسوى عندي الدنيا ومافيها.
سامر: لابأس من عندك مريض .
تقوى: ردت عليه بهزوة اه قصدك صاحبك ماقلكش لمن عاطي سيارته باش يرمو ع الاستراحة.
سامر: تحكي بجديات ولا تبصري انت كيف هكي صار وانا هذا وين سمعت مش عارف امتا بيعقلك بس .
تقوى: للي مايعقلش بروحه انا نعقله والله ضربته في الحربي مش رح تفوت ع خير بكل.
سامر: لكن انت متأكدة انه هو للي في السيارة .
تقوى: حتى لو مش هو المهم السيارة ليه شن في غيبوبة مايعرفش من يسوق في سيارته لكن قوله قتلك المعرض جايته حرقه زي الحوش رغم اني مش انا للي حرقته.
سامر: انت توا هدي روحك ومايصير غير كل خير ان شاءالله.
الكوكا: اسمع ياقط انا في موضوع شاغلني ونبيك تفريلي فيه وحقاتك عندي.
القط: ماتجيني إلا كان وراك مصيبة شن فيه .
الكوكا: الحربي انضرب برصاص والسيارة للي رمت عليه نعرفها ونعرف صاحبها .
القط: ومدامك تعرفه تتصل بيا علاش والله وعشت وجاء اليوم للي الحربي يعلموا عليه اخيه ع الوقت وخلاص اسد الجبهات ولا قطوس.
الكوكا: كملت نبح وانت زي المرأة العافنة الحربي بروحه قال للي في السيارة مش صاحبها .
القط: اه موضوع هكي لازم يتحرك المحقق كونان للي في داخلي .
الكوكا: ناقص عليك حشيش مايحشمك شئ لكن فكني من جو المجانين للي انت عايشه اهو المهم نستنى منك في هاتف وكيف ماقتلك حقك عندي.
القط: الحق ادفعه صدقة ع سلامة الحربي وانا اعطيني 24 ساعة نجيبلك المعلومة تامة يامعلم.
الكوكا: عارفك سيدها حتى انا هذا علاش اتصلت بيك .
سامر: وين وجه المصايب.
حاتم: خيرك انت شن تقول بالزبط شن تحس .
سامر: انت راك تلعب بعداد حياتك سيارتك لمن عاطيها البارح...
حاتم: كنت راقد في الاستراحة وهيا قعدا علاش.
سامر: جتني تقوى قتلي سيارة حاتم جت رمت ع الاستراحة والحربي مصاب.
حاتم: انا ناقص هبلت نحط راسي من راسها..
الكوكا: في الليل وانا مكسد رن الهاتف.
القط: للي ضرب الرصاص ......
الكوكا: مستحيل انت متأكد.
القط: زي مانشوف في وجهي في المرايا شن الموضوع....
الحربي: شن قلك