رواية تائه في قرية العاهرات الفصل الاول1بقلم روايدا راشد
كان يوم شتوي بإمتياز كنت صغير عمري 10 سنوات قاعد انا وخوي وأختي في حوشنا للي مفروض يكون لينا الملجأ الدافى للي يحمينا من ضيم الوقت ....مع الانسانة للي مفترض انها ام يعني كلمة ام لو بنحكي عليها لازم نكتب قاموس باش نوفيها حقها...
سالم: انت تعرفه الراجل للي يجيبلنا في الحاجات كل يوم.
ملاك: ماما تقول انه صاحب خالي محمد وخو يبعث فيه.
سالم: لكن علاش يخش لدار ماما ،ويقعد فيها بالساعات.
معز: كنت نسمع وساكت رغم صغر عمري لكن كنت نعرف للي قاعد ايصير كويس لانه الشارع علمني كل شئ.
هناء: توا صاحب خالكم جاي واحد يتكلم ولا يطلع من فمه حرف نقتله .
معز: كنت صغير ونخاف ،لكن ياماما علاش يخش للحوش مش غلط، بدون ولا فرصة جاني كف من امي ولا نقولكم هناء لانها ماتستحقش تكون ام .
هناء: كلب زي بوك يكفي انه خلاكم ولوحكم في الشارع زي الحيوانات انا للي تحملت مصاريفكم وفوقها جاي تحل في فمك نقتلك لو مازال تناقشني .
معز: نزلت لشارع وانا نازل لقيته راقي في درج العمارة شافلي نظرة خبث مستحيل ننساها. كأنه كان يقولي بيها انا نستغل في امك بكم كيسة وامك سومها رخيص....
صالح: اهلا خيره ولدك نازال في الصقع اهو.
هناء: خلك منهالمهم جبت للي وصيتك عليه ولا نسيته.
صالح: هو انا نقدر ننسى .
معز: نزلت قعمزت في الشارع رغم الصقع لكن الشارع ارحم بألف مرة من للي نشوف فيه في الشقة ...وانا مقعمز لعند مر عليا جارنا كان انسان خلوق.
مفتاح: شن مقعمزك في الصقع نوض خش لحوشكم وانت عارف الحكاية ليل.
معز: رفعت اكتافي في علامة رفض للموضوع خليني مانقدرش نخش للحوش متعارك مع امي.
مفتاح : باهي نوض روح امعاي للحوش.
معز: لالا،صحيت ياعمي شوية ونروح،نشوف في الكل مع اهلهم إلا انا نمشي لبوي يطردني نروح لامي نشوف الغلط ونسكت.
بعد تفكير قررت نروح وانا كيف بنرقى للشقة سمعت صوت عياط في حوشنا طلعت نجري وكانت الصدمة...
#تائه_في_قرية_العاهرات
الكاتبة:رويدا
الحلقة1
لازم نوضح انه الأحداث للي قاعدة نحكي فيها كانت في سنة2007 …اي قبل الأحداث بسنوات.
معز: بعد سمعت صوت العياط طلعت نجري لشقة وانا راكب في الدروج كان صالح نازل وايديه غارقات بالدم …خشيت لقيت اختي غارقة في دمها ملاك كانت مجرد جثة هامدة …
سالم:كان في زاوية من الحوش ومجمع رجليه لصدره ومتكور من الخوف.
معز: بديت نبكي نحاول نفيق ملاك لكن كان راسها ينزف واضح انه خبطة قوية للي قهرني انها واقفة تتفرج علينا من اي طينة مخلوقة للي قلبها ماقدرش ايحن ع قطعة منها من الغل كان قدامي فازا احدفتها بيها.
شوية وزحمت علينا والجيران تجمعوا تقرير الطبيب الشرعي بين انه سبب الموت انها طاحت ع راسها
ع أداة حادة.
ام مش متحركتلها شعرة ع بنتها للي ماتت واب جاء ثالث يوم حتى الغرباء كانوا احن منها ومنه مستحيل ننسى وقفت الجيران وعمي مفتاح فاتت ع موت ملاك شهر رغم الألم للي نحس فيه بسبب موت اختي إلا انه كان أجمل شهر معاش شفنا فيه وجه صالح .
سالم: انا معاش نبي نقعد معاها روح بيا معاك لحوشك.
بشير: وين بتروح معاي خليك مع امك وخوك انت عارف ماعنديش جهد نتحمل مصايبكم.
سالم:سكت وكله انكسار لا الاب راضي ياخدهم ولا الأم كانت تشرف انها تربيهم والضحية هو وخوه .
معز: مازال أثر الفازا للي ضربتها بيها مبين في وجهها وكان في خاطري نشوه وجها بالك معاش نشوفو خلقت صالح....
وفي يوم كنت في الشارع نلعب انا وسالم لعند شفت الحقير جاي لحوشنا كان مش خايف وكأنه صاحب الحوش سيبت الصغار وكنت ناوي نمشيله فجأة وين شافه سالم كان خايف وانهار وهو يبكي وكأنه الذاكرة فكراته في الليلة المشؤمة للي خسارنا فيها ملاك.
سالم: من الخوف تبولت ع نفسي أول مرة يصيرلي هكي مازال نتفكر كيف الصغار يضحكو عليا.
معز: شن فيك ياسالم علاش خايف منه تكلم .
سالم: ااااا هو السسسبب في موت ملااااك.
معز: خلاص حسيت نفسي بنموت معقولة مازال بتقابل الشخص للي قتل بنتها ....قررت وقتها نحط حد لكل شئ ...
قعدت نفكر كيف نتصرف لمن بنمشي مافيش حد ممكن انه نحكيله خاطي عمي مفتاح الراجل الطيب .
وامشيت لحوش طقيت ع الباب فتحتلي بنت من عمر ملاك.
عاتكة: من تبي انت ياوليد.
معز: انا راجل مش وليد نبي عمي مفتاح.
عاتكة: ضحكت عليه كيف يحاول يمثل انه كبير..
بعد دقايق طلع مفتاح ...
مفتاح: خش ياولدي.
معز: مانقدرش نخش لحوش حد بدون إذن من صاحبه.
مفتاح: فعلا المتربي من ربي، تعالى احكيلي شن فيه.
معز: انا ياعمي مفتاح نعتبر فيك أب رغم انه نعرف صعب تعتبرني ابنك بسبب صيت امي للي ولا،معروف بين الناس لكن والله لا أنا ولا سالم راضيين ع الشي للي يصير وحاولنا ونتواصلوا مع بوي ولكن مرته مستحيل تخليه يقبلنا في الحوش...
مفتاح: في حسرة واسف ع حال طفل يتكلم بعقلية شيباني من الظلم للي عاشه...
معز: نعرف انك القيم ع الجامع انا نبي الحجرة للي فاضية بنقعد فيها انا وخوي سالم لو ماعندكش مانع.
مفتاح: اكيد نوافق وماكلتكم وشرابكم عليا لعند ربي ياخد امانته....انت رح تكبر وتكون انسان صالح وعمرك ياولدي ماتيأس ربي يختبر في صبرك وهذا كله ربي رح يعوظك عليه خير.
معز: طلعت وانا فرحان بالخبر للي سمعته مشيت نجري لسالم وبشرته...
سالم: بالحق تحكي انت ولا تبصر...
معز: رقيت لشقة وانا فرحان خديت ملابسي انا وسالم خوي والكتب متعنا....تصدقوا انه امي ماكلفتش روحها تسألني حتى وين بتمشي ...
فاتت سنتين كانوا الجيران مش منقصين علينا شئ للي يشريلنا في ملابس وللي يجبيلنا في الماكلة ....
سنتين لا أمي ولا بوي سألوا علينا كنت نشوف في الرجالة راكبين نازلين لشقة ...كنا نمشوا للمدرسة مع عمي مفتاح وعاتكة معانا كنت نعامل فيها معاملة ملاك اختي وكان صقر خوها يتردد علينا كان من عمري نقرأ معاه ونلعب معاه.
كانت عاتكة أصغر مني بأربع سنوات مانعرفش شن سبب تعلقي بيها ممكن كنت نشوف فيها ملاك للي فقدتها وماقدرتش ننساها ...شقتنا بدت شقة دعارة ...
وبعد سنين كبرت وكنت خاش الصف التاسع
كنت الصبح في المدرسة والعشية في محل غذائية نخدم باش نكفي نفسي ونصرف ع خوي.
كانت سنة 2011 في بدايتها كنت فرحان بحكم اني كبرت واخيرا قريب نخش لثانوي ولا أنا ولا أي ليبي كان يفكر ولا يتخايل للي ممكن يصير....
جت الأحداث ونقلبت فيها حياتي بعد اربع سنوات استقرار .....
كانت في المدينة متعنا معسكر بعد المظاهرات وكذا بشهور بدأ الناتو يضرب في المواقع العسكرية ماكانش عندنا هاتف حسب الاخبار للي نسمع فيها من الجامع وقفت الدراسة ..
مفتاح: لازم نطلعوا المعسكر مش بعيد علينا واحتمال تضرر بعض المنازل .
صقر: كيف يابوي وين بنمشوا باهي....
مفتاح: نمشوا لخوالك .
معز: كان كل شخص يفكر في مكان يمشيله إلا انا ساكت ونشوف لخوي سالم خوالي بينا وبينهم اميال واصلا لو اعترفوا بينا....المكان الوحيد للي ممكن انه نمشيله حوش بوي بس .
بدينا نسمعوا في صوت الرصاص والتكبير اغلب اهل المنطقة طلعوا من حياشهم كنت في داخلي نتمنى نوقف قدام الشقة ونقولها اطلعي اهربي لكن شى بداخلي يقولي خلي تموت ونفتكوا من عارها.....
سالم: معز لازم نطلعوا قعدنا احنا وحوش عمي مفتاح بس الوضع معاش تمام.
مفتاح: اطلعوا معاي ياولدي للي بيا بيكم.
معز: لا والله ماصارت انا بنطلع لحوش بوي.
مفتاح: متأكد انه بيقبلك عنده.
معز: اكيد توكل ياعمي مفتاح وان شاء الله نرجعوا بعد تكمل المشاكل هاذي.
مفتاح: هاذي فتنة كبيرة ياولدي وربي يستر وخلاص.
سالم: طلع عمي مفتاح شفت لمعز خليتنا نمشوا معاه كان بوك رفض يقبلنا وين بنمشوا.
معز: ساد ماتحملنا اربع اسنين وخديت ملابسنا وطلعنا لحوش بوي للي حكم يالله تفكرت مكانه .
وقفت نرن في الجرس.
نرجس: من ع الباب...
معز: انا معز ولد البشير.
نرجس: فتحت الباب اما ريح قبلي حذفتكم علينا.
معز: نبي بوي موجود ولا،لا.
نرجس: بهزوة وهيا حاطة ايديها في وسطها بوك مش قاعد استناه قدام الحوش.
سالم: الربيع من فم الحوش يبان واضح انه بنرجعوا للأيام السود .
معز: اسكت واستنى بوك مش رح تكون اسود من الايام للي عشناها مع امك.
سالم: ماخير في ام الخير...
معز: قعدت نستنى لين روح العصر والضحك انه بوي ماعرفناش .
بشير: تفضل شن تبي ياولدي.
سالم: انا ولدك سالم وهذا ولدك معز يابوي...
بشير: معز وسالم شن جابكم وخيره شكلكم تغيير.
معز: جابنا الوقت اكيد اربعة اسنين فاتت وانت ماشفتناش فيها .
بشير: امكم وين.
سالم: قعدت ساكت معاش عرفت شن نقول.
معز: روحت لخوالي.
بشير: خشوا وردو بالكم اديرو مشاكل .
معز:فات الاسبوع الأول عادي جدا في يوم بوي كان بايت برا وانا في المربوعة سمعت صوت دوشة داخل قررت نخش نشوف وفتحت الباب
والصدمة لقيت راجل غريب في الحوش طلع
يجري .
نرجس: حرفت قبرك بإيديك ..
معز: ماكنتش نعرف فاش تفكر بدون ولا حرف رجعت للمربوعة ورقدت لين فقت ع دوشة وعياط بوي وهو يقول وينه.....
للي صار كان صدمة ليا كله يخطر ع بالي إلا ....انه..