رواية تائه في قرية العاهرات الفصل الرابع4بقلم روايدا راشد
#تائه_في_قرية_العاهرات
الكاتبة:رويدا راشد
الحلقة4
"سبحان الله بعد موت عمي مفتاح مرت الأيام كمر السحاب"
خالد: مستحيل نخليك بروحك لازم تروحي معانا للحوش.
نعيمة: لكن انا هذا حوشي وحوش صغاري صعب نمشي ونخليه.
خالد: بلا دلع زايد راجلك ومات لمن قعدة ولا تبي يلحقنا الكلام.
نعيمة: كنت رافضة انه نطلع من حوشي ولكن الله غالب ماباليد حيلة.
صقر: ماما بالله عليك مانبوش نمشو نعيشوا معاهم في حوشهم.
نعيمة: الله غالب ياولدي العدة تمت معاش نقدر نقعد توا شن بنقول.
عاتكة: ماما نبو نقعدوا حوشنا خير.
نعيمة: تسمعوا في خالكم من بكري ايعيط الله غالب توا تكبروا ونرجعوا لحوشنا.
صقر: قعدت ساكت مانبيش نحمل امي حمل فوق حملها...
معز: كنت مقعمز برا درت طاولة ونطيب في الشاهي ونبيع سبحان الله من يوم درت الطاولة والخيال معاش شفناه وكأنه يعرف انه ربي رزقني بمصدر دخل نشوف في صقر جاي ومتكدر.
صقر: بسلامة يارفيقي 🥺 بنطلعوا من الحوش.
معز: في خاطري موت بوك مازال مش متقبله
جاي انت باش تصدمني بكارثة جديدة...جمعت قوتي وطبطبت ع كتفه احنا مايفرقنا حد وقاعد انت خوي للي جابتهولي الظروف....
صقر: حضنت معز وسالم كنت نمشي ونلمس في حيوط العمارات الجامع وكأنه نودع حتى في الجماد للي في شارعنا بطريقتي هنايا كان بوي يصلي بالناس.
لفيت نتأمل في الشارع هنايا كنا نتجمعوا احنا والجيران وهنايا وين انحطت جثة بوي 🥺.
وانا نتأمل سمعت صوت عاتكة أختي.
عاتكة: صقر هيا تعالى خالي يستنى فيك.
معز: شفت عاتكة من بعيد قمت يدي في اشارة وداع مني قابلتني بإبتسامة للي يما كانت تفكر فيا بملاك.
سالم: ظلم الشارع مع طلعت حوش عمي مفتاح كنت نشوف في ملامح الجيران حزينة رافضين طلعوهم لكن مايقدر حد يعارض.
معز: الفترة هاذي كانت نهاية الأحداث وموت القذافي في الليلة للي طلعوا فيها حوش عمي مفتاح من الشارع وبالتحديد الساعة 2 في الليل سمعت صوت تخبيط بسيط ع الباب.
سالم: تسمع في للي نسمع فيه ولا انا نتخايل .
معز: اسكت نسمع زعمك من بيكون وفي الوقت هذا.
سالم: راك تفتح الباب انا خايف زعمك غولة يامعز.
معز: بنبرة غضب نحسابك وليت راجل لكن للأسف طلعت عيل.
سالم: ورحمة عمي مفتاح البلاد مش معروف وين ماشية راك تفتح الباب.
معز: وهو يتكلم صوت حد نزل من الدرج كان واضح انه يجري حذفت سالم ع جنب وفتحت الباب لقيت صخرة صوان بحجم كف اليد وتحتها ورقة ....
شفت الخيال طالع يجري وركب السيارة.
سالم: يراقب من بعيد بعيون مليانة خوف شن فيه يامعز.
معز: خش ومعاه الورقة المستغرب شن القصة فتح الورقة وبدأ يقرأ في الكلام المكتوب...
"بسم الله الرحمن الرحيم"
والله ع ماأقول شهيد نرجس مرت بوكم تخون فيه وتنتهك في عرضه ومستابيحة حرمة حوشه خلال غيابه ومهما كان انتم اولاده والدم عمره مايولي اميه .....لازم اديرو حل وتمشو اليوم .....والساعة .... عندها موعد مع عشيقها .....للي هويته رح تكون صدمة للكل
ولازم لازم ونكررها ترفعوا معاكم ناس كبيرة يكونوا شهود امشوا لفلان وفلان وفلان للي جيرانكم في الشارع مستحيل يردوكم....انقدو
بوك يكفي خسارة امكم....
معز سكر الورقة وكان عارف خيانة نرجس لبوه شئ مفروغ منه لكن هوية الشخص مجهولة.
سالم: شن بدير توا يامعز.
معز: ارقد انت انا بيطلع الصبح بنمشي لناس للي مذكور اساميهم في الورقة وبنطلب الفزعة.
سالم: انسيت اخر مرة شن دار فيك ياخوي بالك الرسالة فخ من نرجس باش اديرلك فيلم زي متع يومها.
معز: ذكي هلبا في حد بيفضح روحه.
سالم: وفي في رأيك حد يعرف التفاصيل هاذي كلها شن هو عايش معاهم.
معز: اكيد حد راصد تحركاتها واصلا كنت نستنى في اليوم للي تفوح فيه ريحتها وتنفضح قدام الناس كلها.
سالم: انا خايف عليك راهو لو تصيرلك حاجة نموت معاش عندي غيرك.
خالد: هاتي مفتاح الحوش متعك وينه.
نعيمة: اهو عندي علاش فيه حاجة.
خالد: مافيه شئ غير نفكر نتحول فيه انا وساميحة حوشنا ولا ضيق والعيلة كبرت.
نعيمة: من الصدمة معاش عرفت نرد.
طلعت مرته من وراه ....
ساميحة: حوش امك ضيق كيف ماتشوفي وحمادي مضايق هو ويزن من الضيق ولما قالي خالد انه بيروح بيك قلت اهو فرصة نطلعوا
احنا باش تاخدو راحتكم.
صقر: لكن هذاك حوشنا حقنا احنا كيف تسكنو فيه انتم.
خالد: شده من التيشرت متعه ناقص غير انت ياولد الطحلب تتكلم اصلا الحوش هذاك بانيه
بوك الخاين بفلوس الطاغية.
عاتكة: بابا مش خاين وانا نبكي ماقدرتش نسمع الاهانة ع بوي ونسكت.
نعيمة: خفت ع صقر منه انجبرت نعطيه المفتاح وكأنه نعطي في قطعة من روحي غصب باش مايضربش ولدي.
خالد: حيوانات ماتجوش غير بالعين الحمراء.
ساميحة: الله اكبر ياحبي هذا غنيمة كبر عليه.
عاتكة:في خاطري مفردات غريبة غنيمة نعرفها ياخدوا فيها المسلمين من الكفار بعد كل غزوة ولا معقولة للي قريناه شئ والواقع شئ ثاني حوشنا تعب بوي وعرقه ولا غنيمة...
"ويما من ممتلكات اغتصبت من غير وجه حق تحت شعار غنيمة"
طلع خالد ومرته فرحانين قعمزت نعيمة تبكي وهيا حاضنة صغارها ....
نعيمة: ياريتك ارفعتنا معاك لمن مخلينا لخوي للي ينهش في لحم صغاري حسبي الله ونعمة الوكيل.
عاتكة: كنا في صمت غريب رغم انه كنت متأكدة انه داخل صقر بركان ثأر.....
صقر: وربي حوشنا ناخده لو يبدأ اخر يوم في عمري....
نعيمة: خليهم ياولدي رزق الدنيا فاني لو يدوم راهو دام للي قبلهم.
عند بشير....
نرجس : طريق السلامة ياعيوني كم بتقعد يوم ياقلبي.
بشير: مش مطول حاجة خمسة ايام ان شاء الله
انا مستعد نخدم عمري كله المهم انت تكوني راضية.
نرجس: ربي يحفظك ليا ومايحرمنيش منك بكل.
معز: طلعت لواحد من للي كان اسمهم في الورقة عمي مختار...وحكيتله القصة من الألف إلى الياء والحمدلله رغم صغر سني ولكن عقلي كان راكز والناس واثقة فيا....
مختار: هذا كلام كبير ياولدي لازم نتأكدو قبل الله سبحانه وتعالى قال{يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ فَتُصْبِحُوا عَلَىٰ مَا فَعَلْتُمْ نَادِمِينَ} سورة الحجرات (6).
معز: هذا علاش جيتك ياعمي مختار باش نتأكدو من الكلام للي بين ايديا طلع صح اهو امنعنا شئ محرم في الاسلام وللي هو الزنا طلع كذب انروحو وكأنه شئ لم يكن.
مختار: بنضرة مليانه اعجاب والله ماغلط مفتاح الله يرحمه لما قال عقل شيباني في جثة طفل
ربي يكملك بعقلك المهم الموعد للي في الورقة غدوا بإذن الله انا نمشي لعمك صبحي وحسن ونجيبهم معاي .
معز: كنت نستنى في ثاني يوم بفارغ الصبر لين في وسط زحمة افكاري شفت سيارة وقفت قدام حوش عمي مفتاح قربت منها كان فيها عائلة رجعت للخلف وقتله تفضل ياعمي.
خالد: انت للي تفضل هذا حوشي توا .
معز: وجعني خاطري كيف عمتي نعيمة باعث الحوش كان فيه هواتف لكن انا مافكرتش ندير هاتفه باش نوفر الفلوس....
جاء الموعد المنتظر ركبت انا وعمي مختار وصبحي وحسن وتوكلنا ع الله كان الوقت مغرب والدنيا قريب اظلم طبيعة المكان للي فيه حوش بوي هضاب الارض مش مساوية والمنطقة سكانها شوية وكانت فيه مسافات طويلة بين الحياش.
حسن: توا مفروض انه الكلام بيصر .
صبحي: اسكت خلي انزيدو نصبرو شوية .
كنا مدرسين السيارة وراء هضبة كبيرة واحنا فوقها واخدين ساتر بالاشجار حوش بوي كان تحتنا يعني الخاش والطالع بنشوفوه....
مختار: فاتت ساعة يامعز شكله صاحب الورقة كذاب.....نص ساعة ونروحوا.
معز: غير اصبر شوية بس.
صبحي: لعب هو والله ماعاد قاعد ركب السيارة ولحقه حسن وبعدها مختار بعد قال لمعز هيا ومعز يدعي "اللهم ارني الحق حق وارزقني اتباعه وارني الباطل باطل وارزقني اجتنابه"
كيف كملت الدعاء وبننزل شفت ضوء سيارة قدام الباب متع السور نزلت نجري ضبحت عليهم
باش يشوفوا بعيونهم معاي .
مختار: لا إله إلا الله ربي يستر ربي يستر نزل صبحي وحسن وفعلا شفنا شخص خش .
حسن: ليه ربع ساعة داخل خلاص توا معز ومختار من الباب الخلفي ....وانا وحسن من الباب الامامي بينشد بالثابت ....
معز: وصار كيف مااتفقنا لكن التغير احنا خبطنا من الباب الخلفي باش هو يطلع من الامامي تكلمت انا افتحي الباب شفته للي معاك افتحي....
نرجس: بخوف ياحليلي انفضحت اجري انت اطلع من الباب الامامي خلي نفتحله انا....
وهو ع اساس شاطر فتح الباب وشدوه صبحي وحسن.
معز: غلطتت الخبيث بألف شفتي ربي كيف مايضيعش عنده حق ....
انهارت ودرات الجو وانا كان تفكيري كله من هوا الشخص اهو وصلت للباب الامامي وهيا قالها عمي مختار استري روحك الامن جاي لما وصلت فيه وشفت ملامح وجهه انصدمت.