رواية تائه في قرية العاهرات الفصل السادس6بقلم روايدا راشد
معز: شفت المنظر حسيت الدنيا وقفت جثة الطفل ع الأرض وكان واضح انه سبب الموت رصاصة صح انه طفل غير شرعي لكن وربي وجعني ونرجس جثتها جنب ولدها ونفس الشئ ميتة بالرصاص أما بوي كان شانق روحه
ماكنتش نعرف انه بيتصرف هكي طبعا كان فيه ورق مسكر عليه يده .....
مختار: البقاء لله ياولدي والشرطي قال انه الورق يخصك .
معز:شديت الورقة الاولى كان تنازل ع املاك بوي بيع وشراء ليا وكأنه كان ناوي يعوضنا ع غيابه بالشئ اهو الورقة الثانية كانت وصية وفضلت تقعد لين نكون مع سالم ....
شوية وسط الزحمة والدوشة سمعت صوت مألوف لفيت كان خالد...
خالد: جنب جثة بشير يضرب فيه برجله ويقوله ياجبان ماقدرتش تستقوى غير عليه هو
وامشى يجري يحضن في الطفل الميت.
معز: واضح من حرقة دمه انه ولده من حضنه ليه...
مختار: هيا يامعز بعد تكمل الشرطة الإجراءات
ايجئ وقت الدفن ساهل.
معز: روحت وانا في خاطري شن مازال بنشوف من الايام لو في العمر بقية عزمك بتقعد حياتي هكي نطلع من قصة نخش لقصة وألف فكرة وفكرة تعصف في دماغي ....
سالم: بديت نخاف نوقف نستناك نعرف مسبقا الاخبار ماتفرحش.
معز: قعمزت وناديته جنبي شوف ياخوي الدنيا هاذي فيها الباهية والعافنة تصدق لو نقولك اليوم بدأ عندنا رزق املاك ليا وليك.
سالم: شكله المقابلة كانت مع مارد المصباح.
معز: والله ماوقت ضحك قعمز بنقرالك وصية بوك .
سالم: الحمدلله مات وارتحنا منه.
معز:عيب الدم عمره مايولي اميه راهو...
" نعرف اني قصرت في حقكم وحق امك الله يرحمها سامحوني ياأولادي ع كل غلط درته معاكم وبالأخص انت يامعز يما ظلمتك وغلطتت فيك وكله كان بسبب الشيطانة للي
تزوجتها دمرت حياتنا ....مهما نكتب ونعبر مستحيل نمحي سنين الحرمان من ذاكرتكم
لكن ممكن رزق الدنيا يعوظكم ولو بجزأ بسيط كله نقلته بيع وشراء ليك يامعز نعرف انك مستحيل تظلم خوك ....والله الله في خوك سالم ماتخلو حد يخش بينكم وكان تبو الربح خالد راكم اتجو في طريقه انسان قاطع يده من ربي واكل حق الايتام وانا عرفت انه ولد نرجس مش خوكم قررت نريحكم من شرها الولد ربي يتقبله برحمته وهيا جهنم وبئس المصير ادعولي ربي يغفرلي ويرحمني ....راكم تنسوني من الصدقة تبرد عليا نار القبر"
معز كملتها وأول مرة نحس اني يتيم حق مقطوع من شجرة لا اهل امي مستعرفين بينا ولا اعمام بوي للي خالف شورهم وتزوج أمي بكيت بكيت لانه وقت للي حسيت فيه بحن بوي كان ميت ..
سالم: قداش ماانت طيب تبكي عليه نسيت للي داره فيك نفكرك يوم للي طلعنا وقعدنا راقدين في الشارع دير قلب ياخوي.
معز: ونسيت انت امك للي كنا نكرهوها كيف طلعت مظلومة وكله بسبب السحر ممكن حتى هو يكون نفس الوضع ماتخليش قلبك حجر اللين مطلوب قال تعالى
{فَبِمَا رَحْمَةٍ مِّنَ اللَّهِ لِنتَ لَهُمْ ۖ وَلَوْ كُنتَ فَظًّا غَلِيظَ الْقَلْبِ لَانفَضُّوا مِنْ حَوْلِكَ ۖ فَاعْفُ عَنْهُمْ وَاسْتَغْفِرْ لَهُمْ وَشَاوِرْهُمْ فِي الْأَمْرِ ۖ فَإِذَا عَزَمْتَ فَتَوَكَّلْ عَلَى اللَّهِ ۚ إِنَّ اللَّهَ يُحِبُّ الْمُتَوَكِّلِينَ } 159
آل عمران.
نعيمة: مقعمزة في الصالة لعند سمعت الجرس يرن طلعت فتحت الباب.
سمحية: ألف ألف مبروك ياعروسة.
نعيمة: بإستغراب كيف عروسة شن .
سميحة: اه نحساب خالد بلغك انه في واحد خطبك من خوك راجل مصنع امنع مش عارفة شن عجبه في وحدة زيك مش عارفة.
نعيمة: ومن امتا يعطوا في النساء من غير علمهم انا مستحيل نقبل بيه الكلام اهو...
خالد: ومن امتا بنات الاصول ليهم كلمة مع خوتهم .
نعيمة: انا ولدي راجل ثاني ثانوي ومانبيش نتزوج بعد راجلي.
خالد: انا عطيته كلمة وتمت مش جاي ناخد في رايك ديري في حسابك بعد اسبوعين العرس.
نعيمة: نحمد ربي انه وقت جاني صقر وعاتكة كانوا برا صغرت بيا الدنيا ع كبرها ومعاش عرفت كيف نتصرف لمن بنمشي ...ماليا حد غير السجادة والدعاء لا أكثر ولا أقل فات اليوم الاول ثاني يوم فتحت معاهم الموضوع ...
صقر: بصدمة اكيد تبصري ماما الكلام هذا مش حق.
نعيمة:ماتزيدوش عليا الهم راني للي فيا كافيني.
عاتكة: حسبي الله ونعمة الوكيل في خالي للي ماخلا مادار فينا هذا خالي ودار هكي والغريب شن بيدير....
نعيمة: ليلة طويلة ع قلبي للي مازال متعلق مع مفتاح راجلي للي مافرقني لحظة ولا غاب عن بالي.....رقدت وقبل آذان الفجر حلمت بمفتاح جاني وقالي ماتخافيش قريب اتجيني ...مكانك
مش معاهم مكانك معاي ...السر خليه في وصية لصقر.
فتحت عيوني كنت نتمنى يكون واقع تعبت السنتين فاتوا عليا تقول عقدين ....تفكرت الامانة للي حملهالي مفتاح زمان ..
نضت كتبت وصية وسلمتها الصبح لصقر الورقة
هاذي راك تفتحها ولازم تسلمها لمعز لانه للي فيها يهمه هو هو بروحه...
صقر: بعد عمر طويل ياغالية انا والله راضي انك تتزوجي المهم حسك في الدنيا.
نعيمة: الموت اقرب من اي شئ لينا ياولدي المهم انا سلمتك الامانة من بعدي.
مر اسبوعين وجاء اليوم للي كنت خايفة منه بعد التحليل وغيره من الاوراق سمعته يخبط ع الباب
طلعت نجر في رجليا زي للي رافعينه للموت سلمت ع صغاري وتاملت ملامحهم وكنت حاسة انه اخر يوم نشوفهم فيه....
معز: قررت نبيع الحوش الثاني للي مات فيه بوي ونشري بيه استراحة في مكان بعيد ع الشارع والمنطقة للي معاش عندي فيها حد ...بلغت
عمي مختار بالقرار للي خديته.
مختار: رغم انه عز عليا فراقك ياولدي لكن خالد الخسيس مافيش ثقة ربي يفتحها عليكم دنيا واخرة ويوم اضيق بيا الدنيا تفكر عندك اهل وناس في الشارع يفدوك بأرواحهم.
معز: بارك الله فيك ياعمي مختار والله مستحبل ننسى الجيرة الباهية والناس الطيبة...
في الوقت هذا جثة بوي اخدوها اعمامه ومنعوني نحضر الجنازة ونرجس وولدها دفنها خالد...
نعيمة: كان مكان سكن مسعود بعيد ع مدينتي
وفجأة وهوا في طريق شبه خالي من الحركة وواخد سرعة ....قررت ننهي حياتي وحياته نعرف انه غلط لكن هذا للي صار ....
هو يسوق وشديت منه الستيرسو جبدته بقوة لين فقد السيطرة ....وبعدها تمت حكايتي انا ومسعود.
صقر:بعد يوم من طلوع امي من حوشنا غصب جابوها جثة جثة قلبي تقطع ماكانش عندنا غيرها في الدنيا.
خالد: ماتت وريحتني منها .
عاتكة: كنت مقهورة لكن مانقدرش نتكلم نعرف شن بيكون مصيري .
بعد ثلاثة ايام من موت امي لقينا ظرف قدام الباب فيه مبلغ ومش بسيط ومعاه ورقة مكتوب فيها" كنت نتمى نكون معاكم لكن الظروف منعتني عظم الله اجركم في امكم ونصيحة لوجه الله اطلعوا من الحوش وابعدو بعيد خالكم مش ناوي ع خير..."
صقر: وتي روحك الفجر غدوا بنطلعوا وين اترسي بينا ترسي ياسرنا ظلم وقهر.
عاتكة: وين بتمشي انا معاك ياخوي للي كانت تربطنا بالحوش ماتت .
معز: شريت استراحة وبدون مانقول لحد ع مكانها كنت نجمع في حاجتنا ....وبنطلع ونسيت موضوع الخيال لعند ماجيت نفتح الباب ولقيته
قدامي ....
طلع يجري وانا وراه وقتها من قلب الظلام سيارة تيوتا جت تجري بسرعتها وضربت الخيال شفته طار الفوق وطاح ع الطريق...
هربت السيارة وانا جيت نجري كان جسمه ينفض وكانه الروح بتطلع منه ......نحيت الثام ع وجهه
وياريتني مانحيته كان ...