رواية العوض الجميل
الفصل الاول1
بقلم مناسك موسي
الثانية منتصف الليل ... الوقت الذي يجعل الانسان في دوامة تفكير لا حدود لها .. حيث الصراع مع الذكريات التي تخلف الآلام وقد تأتي متسلسلة واحياناً تأتي دفعة واحدة
..أخذت هاتفها الذي كان مقرونا بسماعة الأذن وضغطت على السماعة دون قصد .. فما لبثت قليلا إلا وسمعت أغنيتها المعهودة ...
عصمت بكري "ما باقي زول "
ما باقي زول اشكيلو هم مااا باقي زول اشكيلو هم
وابكيهووو بي دمعاتي دم ما باقي زول اشكليو هم
وزعت عمري على البشر سنتين هنا وسنتين هناك
وبكل طيب خاطر كمان انا لسه صابر يقولو هاااك
أسرعت متاب واغلقت هاتفها بعد ان انهمرت منها الدموع ..
اخذت نفس عميييق ثم قامت بفتح الهاتف مرة اخرى ولكنها سرعان ما عمدت على تغيير الاغنية فكان الملف يحتوي كل مجموعة اغاني "عصمت بكري "
فصاح عصمت بصوته الجهور
قالوو البريد ما بكره
لكن ده برضووو كلااام
القالو ما حبوووو
ولا عاشووو مرة غرااام
ما عرفوو ساااعة الليل والدنيا تبقى ظلاام
قلب البريد بحرق نيرانوو تبقى ضرااام
..بكرة الجروح بتطيب عذابي بنساااهو
حناني يااا ظالم وين تاني تلقاهووو...
إزدادت الدموع وأحست متاب بالعبرة تخنقها جدا
وما كان لها خيار سوى انها تجري مكالمة هاتفية مع صديقتها سلمى ♡
جاري الاتصال ...
متاب_ الوووو س س سلمى
سلمى _ اهليين توبة
متاب_معليش اعفي لي صحيتك من النوم
سلمى_لا ما مشكلة لكن بسم الله مالك في شنو؟؟؟ مالو صوتك تقيل كده؟؟ خير؟!
متاب_انا متضاايقة شديد والله ما قادرة ما قادرة اتحمل يااخ
سلمى_ يا لطيف .. كدي استهدي بالله ي بتي واستغفري ربك ♡ مالك متضايقة من شنو بالضبط؟؟؟
متاب_ ما بعرف انا حاسة بإني مخنوقة شديد بس
سلمى_ طيب اهدي اسي .. قادرة تحكي لي ؟؟
متاب_لا اصلا ماف حاجه انتي عارفة كل حاجه
سلمى_ طيب كنتي بتفكري في موضوع من مواضيعك القديمة صح؟؟؟
متاب_ صراحة ايوه ..وبعد فكرت جيت مسكت تلفوني بالسماعه ما قصدي اشتغلت لي اغاني كمان
والله كرهت روحي يا سلمىسلمى_يا بت الله يرضى عنك روقي كدي وقولي بسم الله
متاب_طيب بسم الله
سلمى_ قومي على حيلك يا متاب واتوضي وصلي ليك ركعتين بسسس لو ما قادرة ولو زدتيهم كمان تكوني ما قصرتي
وجيبي المصحف واقري السور دي : يس والرحمن وبعدها امسكي سبحتك واستغفري وصلي على النبي لحدي ما تنومي حبيبتي وانا بكرة ان شاء الله صباحات حا تلقيني في وشك ظابط؟؟ واسي لو ما الوقت اتأخر كان بتلقيني في وشك ..متاب_ الحمدلله عليك يا سلمى والله عاجزة عن التعبير بس ربي يخليك لي
وانا من دونك ولااا شئسلمى_ عايني حا تقعدي تتعولقي لي كده يا بتنا؟؟ انا نعسانة وماشة اواصل نومتي قطعتي لي الحلم ياخ والله كان رهيب كيف هههه
متاب_ههه خلاص خلاص واعفي لي بس عليك الله
سلمى_يا شابة قومي اعملي القلتو ليك ونتلاقى باكر ان شاء الله
متاب_ طيب يلا في امان الله
سلمى_ ربي يخفف عليك يا صحبتي♡يلا في امان الله
قفلت متاب الخط ومشت تتوضأ لقت امها في الحوش صاحية وقاعده في نص السرير،، قالت ليها:يمة صاحية مالك زي الوقت ده؟
امها_ مااا قادرة انوم مقلقة شوية يا بتي.. كدي انا خليني انتي مالك؟؟
متاب_يمة علييييك الله دعواتك بس دعواتك ♡
امها_ اجي بسم الله من متين انا كمان بتوصيني على دعواتي ليكم انتي واخوانك ديل دنيتي بدعي ليكم صباح ومساء، لكن قلقتي بي مالك في حاجه حاصله ؟
متاب_ لالا الحمدلله بس خصصيني بدعواك شديد الايام دي
امها_الحمدلله.. وحاضر ي بتي ربي يستجيب ان شاء الله .. انتي يا متاب كويسه ؟
متاب_ ايوه الحمدلله كويسة يا امي قدامك وواقفه اها
امها_مع انو الدنيا ظلام يا متاب لكن حاسه بيك زي الكنتي بتبكي ..
متاب_لالا ياخ زهجه ساي كده بس يمة وبتروح الدعوات بس
امها_ ان شاء الله ربي يتقبل..
ومشت متاب اتوضت وجات صلت وهي في الركعة التانية مع الركوع حست برجلها الشمال خدرت ، طوالي سجدت وبقت تبكي تبكي بي كل قوتها وبتدعي ..لقت روحها بتقول يا ربي تقبل توبتي ويا ربي انت عالم بكل صغيرة وكبيرة حصلت معااي في حياتي يا ربي تسامحني على كل شئ وتتقبل مني وترزقني كل الخير وترضى عني وتكتب لي الخير حيث تشاء وترضيني وتعوضني كل شئ يارب يارب يارب
وهي بتدعي وبتتنهد بس حست بي راحة وطمأنينة عجيبة جدا..
خلصت صلاة وهي دموعها لسه بتنزل ورا بعض .. اتناولت المصحف الكان جنبها وبدت تتلي بهدووء ومع كل آيه جسمها كان بقشعر جدا ودموعها كانت مالية عيونها لدرجة إلا تمسح الدمعة بعداك تشوف المصحف كويس.. خلصت وحمدت ربها وحست براااحة عظييمة ...شالت المسبحة ورقدت في مصلايتها وبقت بستغفر بصيغة "اللهم إني استغفرك واتوب اليك" وكانت مرتاحه وهي بستغفر قعدت في مصلياتها ديك لحدي وقت صلاة الصبح دخل قامت صلت ودعت وشالت سبحتها ورقدت في سريرها وبقت تستغفر وتصلي على النبي لحدي ما السبحة وقعت من يدها ونامت وهي مطمنة تماما
صحت على صوت سلمى وهي بتقول ليها: يا بت يا نوامة قومي كفاك هاا خلاص كملتي النوم ده .. البشوفك نايمة كده يقول لا عندها هم لا هموم 
قووووومي يابت قومي 
بالرغم من انها كانت لسه نعسانة بس مع سلمى النوم بطير من عيونها طوالي
فتحت عيونها وقبلت على سلمى وسلمت عليها فقالت ليها : ده شنو ده ؟ معقول الحلاوة دي كلها تبقى كده ! عاين العيون مورمة كيف ليه ليه حبيبتي ده منو البستاهل دموعك الغاليه دي ؟!متاب_والله يا سلمى تقولي شنو بس
سلمى_يلا يلا قومي غيري خلقتك دي والحقيني انا ح امشي اتونس مع ناس حبوبة و خالتي في البرندة خلصي وتعالي عشان حا نشرب الشاي سوا انا جبت ليك معاي بسكويتك المفضل
متاب_سلمى الحب
حاضر ثواني بس واكون عندك هناكسلمى_يلا بسرعه يا جميل
فعلا قامت سلمى ومشت عليهم .... بعد نص ساعة جات داخله متاب البرندة ...
سلمى_ شنو يا عروس ساعة ؟؟اصلو شنو هو؟؟
متاب_بخجل ياخ ما تقولي لي كده
..سلمى_هههه مجنونة ارح ارح خالتو جهزت الشاي♡
متاب "بهمس"_اسمعيني الورم ظاهر لسه؟
سلمى_لا كده عسسل واوعك تاني تبكي مفهوم
متاب_احم احم امي وحمودي وحبوبة كيف اصبحتو ؟
حمودي_انا كويس الحمدلله
امها_الحمدلله انتي كيف ؟ وعويناتك ديل من سهر امس ؟
متاب_ههه لالا نمت طوالي
امها_انا جيت بعديك بمسافه لقيتك بتصلي وجيت تاني بعد الصبح لقيتك نمتي
متاب_معقول يا امي ما حسيت بيك والله
سلمى_عارفة يا خالتي البت نظام شيخة وكده
امها_والله يا سلمى يا بتي قلقتني عليها جاتني نص الليل قالت لي يا امي دعواتك خلتني الليل كلو افكر وادعي ياربي تحفظها لي وتبعد عنها كل شر
سلمى_ايوا ايوا عايني بتتخجل كيف عاملة لي سماحتك دي ما شاء الله
متاب_خلاص ياخوانا الشاي وينو
حمودي_ يا توبة تلفونك وينو داير ألعب
امها_ يا ود ها تلعب من أصبحت كده !
متاب_ تلفوني في الغرفة هناك لكن بعد تشرب الشاي بعداك بديك تلعب
حمودي_سمح بشربوو اسي كلووو
متاب_اي فالح اخوي ...حبوبة حبوبة كيف اصبحتي
؟حبوبتها_احمد الله يا بتي كويسة
متاب_الله يديك العافية
حبوبتها_ قلتي شنووو؟؟
متاب_ قلت ليك الله يديك العاااافية..
"حبوبتها أضانها تقيلة شوية "
شربوا الشاي واتونسوا مع حبوبتها وامها وحمودي الكل همو كان يلعب بتلفونها بس
ام متاب_والله يا سلمى يا بتي انتي بت حلااال الليله عاملين ملاح صحبتك المفضل
سلمى_ خدرة؟
ام متاب_ ايوووه
متاب_اسمها مولوخية
ام متاب_شفتي يا سلمى الخدرة دي
متاب_ايوااا نظام مكاواة كويس كويس
ام متاب_العفو يا بتي .. اها يا سلمى دايرة اقرضها وياهو انا ورفيقتك دي بس وشايلة همها وعمك حاتم الله يديهو العافيه ما قصر ردمها لينا ردم
سلمى_معقولة يا خالتي لكن؟! دقيقة اكورك لسماهر اختي بالحيطه تجي تساعدنا
ام متاب_لالا ياخ الدنيا صباح وإحتمال أمك تكون محتاجه ليها في حاجه والبت ممتحنة كمان
سلمى_ابدا.. انتي عارفة أمي بتصحينا من بدري بنخلص ترتيبات البيت كلها وما بكون عندنا شئ تاني
متاب_سماهر ممتحنه خلوها بنتساعد عليها نحن بس
سلمى_هي غير القراية في البيت ما عندها حاجه ما بتصدق لمن اقول ليها ارح لناس توبة بلقاها طلعت قدامي
عشان كده كلها دقايق بس ما بتكلفها حاجهام متاب_الله يوفقها ان شاء الله ..خلاص طيب ناديها
متاب_يلا انا في المسافة دي حا امشي ارتب الاوضاع بهناك واجيكم
سلمى_حا تظبطي الغرف صح؟وانا حا امشي ارتب ليك الصالون
ام متاب_وانا حا اغسل عدة الشاي واجهز ليكم المكان
حمودي_وانا تدوني التلفون ألعب عشان ما اقعد ساي كده
متاب_خلاص اتونس مع حبوبة حبة يا حمودي وانا بخلص نضافة وبجيبو ليك معاي سمح
حمودي_حبوبة؟اسي اجي اتونس معاها اسمع ليك شخيرها
حبوبة_قلت شنو يا حمودي؟بتضحكو في شنو؟
حمودي_ارح يا حبوبة تمي لي قصة البت السمحه
حبوبة_ياتا؟؟
حمودي_البت السمحه والغول
حبوبة_سمح تعال يا وليدي اتمها ليك ..
حمودي "بهمس"_اسسسي دقيقه بس بتنوم
حبوبة_البت السمحه شعرها كان طوويل واسووود زي سواد الليل وكانت سمحه سماحه شديده خلاص وناس الحلة كلهم كانو كانوو كانوو بح بو ها ...
حمودي_نامت
بدل انوم انا بتنوم هيام متاب_عيب عيب يا حمودي دي امي انا ما برضى فيها
متاب_وكمان هي عيانة يا حمودي الله يديها لينا العافيه
حمودي_خلاص معليش
سلمى_يلا ارح عشان نخلص انا طالعه لي مشوار والله
كل زول مشى على شغلو واتلاقو بعدها في البرندة وسماهر جات وبدو يتونسو ويقرضو في خدرتهم ويضحكو مع سماهر ودراماتها مع الاساتذه في المدررسة ، وحبوبتهم تصحى وتتونس معاهم وتاني ترجع تنوم وتصحى فجأة تقول ليهم قلتو شنو؟ ، وحمودي طبعا استلم التلفون وبقى يلعب تاني لا حس ولا خبر