رواية العوض الجميل
الفصل الثالث3
بقلم مناسك موسي
متاب_يا يااا سلمى والله بطني وجعتني من التوتر انا ما قادرة ، بيت شنو ياخ واسي لو وافق؟؟سلمى_يا بت انتي معولقة؟ اسكتي وخلينا نشوف حا يقول شنو بس
متاب_يا ربي تستر
سلمى_ووبااا اهو رسل ... حا اقرأ ليك الرسالة انا :
-اهلين متاب والله انا اقول ليك نهايتو كده وبصراحة انا ما دايرك اتزوجك لاني شلت فكرة الزواج دي من راسي بسبب بسبب ... المهم عاوزين نحب بعض ونكون حلوين مع بعض قلتي شنو؟
سلمى_شفتي يا عسل انتي الواحد بتعرفيهو شاريك متين؟ لمن تقولي ليهو تعال البيت
واستمتعي بالرد بعداكمتاب_ليه قال كده ؟؟
سببو شنوو المنعو الزواج؟؟ زمان كنا بنحلم حتى بأولادنا سوا في شنوو؟ الحصل شنوو ياربي!!سلمى_وطبعا انتي كنتي بتتبسمي وصدقتي
.. عايني رسل رسالة تانيه-متاب ..حبيبتي
انسي الفات وخلينا نبدأ من الاول واوعدك حا اكون زول تاني خااالص .. بس انتي ارجعي لي وعندي طلب ارجوك اقبليهوسلمى_عينو قوية والله
متاب_رسلي ليهو طلبك شنو؟
سلمى_ان شاء الله دايرة تنفذي ليهو؟
متاب_لا بس دايرة اعرف
سلمى_طيب اها تم الارسال ..بالله عان الخفة قاعد في المحادثة
متاب_ دقيقة اسي برسل يدو سريعه في الكتابة
سلمى_قال ليك :
-اسمحي لي نتلاقى في اي مكان بعجبك وانا موافق لاني اشتقت ليك والله وداير اعتذر ليك عن كل الماضي بي طريقتي
بليييز بس يا متاب ما ترفضي لي الطلب دهمتاب_ اسوي شنو انا ياخ .. انا يا سلمى ما قادرة انسى الموقف ده لحدي الان ..شوفي نحن من اتخرجنا من الجامعه لحدي اسي دي حوالي 3سنة
بس طوالي بتذكر الحصل قدامنا مع ميادة .. والله كأنو حصل قدامي أسي ولحدي الان انا بتوجع وقلبي بوجعني لمن اتذكر الموقف دهسلمى_شوفي يا سلمى مؤيد ده واحد بتاع جرجرة وكلامو واضح عاوز يلعب ويقضي زمن ونحن ما فاضيين ليهو وانا كلمتك من زمان انو من شفت تعاملو مع مياده بقى كتير قلت ليك أبعدي منو.. بس انتي ولاااا كأنو الكلام مع حضرتك
متاب_الحب يا سلمى الحب اعمى
سلمى_لا ابدا الحب ما اعمى
عميانات انتن يا بنات حواء.. اصلا ما بتجرن الا ورا البطلع روحكن وبذلكن ويهين كرامتكن ..متاب_خلاص يا سلمى خلاص كفى ..
سلمى_وطي صوتك قبل ناس امك يسمعونا
انا عارفة الكلام ده حار عليك بس دي الحقيقة المرة يا متاب وانا والله خايفة عليك 
ما محتاجه اوريك انتي بالنسبة لي شنو ..فعشان كده الله يرضى عليك مؤيد ده تاني امسحي من راسك وما تعايني لأي حاجه حلوة لأنو الحلو والمر في النهاية بقى ماضي يا متاب ونحن ابناء الحاضر واصبري والله ربنا ما بنساك وابقي قريبة من ربنا وان شاء الله ربي حا يعوضك بما تمنيتي واكتر 
متاب_حاضر .. ان شاء الله يا سلمى ربي يكتب لينا الخير
سلمى_انا حا ارد على مؤيد ده وحا احظرو واوع يدخل ليك تاني انصاص الليالي وتقولي لي مسكين وحنني وبتاع سامعه الكلام ده؟؟ واوعديني ما تفكي الحظر لأي سبب ..الكلام ده نحن انتهينا منوو وما حا نرجع تاني خطوة ورا بس حا نرمي قدام
اتفقنا يا جميل؟متاب_ح ح حاضر
اوعدك يا سلمى 
يلا ردي ليهو واحظريهوسلمى_حلووو
..دقيقه عايني حا ارد كيف-معليش يا مؤيد انا ما لتقضية الزمن انا وراي مستقبل ولحدي هنا العفو والعافية .. سلام
متاب_كلام مختصر شديد
سلمى_يلا ولا حا ننتظر ردو بلوك طوالي ..
متاب_عايني ليهو يكتب الان ..
سلمى _تم الحظر.. هو الزيت وين
في يكتب الان ..تحسي انو زي القفلتي الباب في وشو ...يلا يلا قومي خلينا نمشي على الجماعه ديل نجهز معاهم الفطور عشان افطر واتخارجمتاب_طيب ارح ..دقيقة اديك الطرحة
سلمى_اخخخ منك الطرحة كانت وهمة عشان نجي هنا يا طيرة
متاب_هي نسيت والله
ارح ارح طيبواول ما طلعو من الغرفة سلمى جرت متاب من يدها وقالت ليها عارفه انك حا تكوني حاسة بي شنو اسي بس كمان عاوزاك تحسي اني جنبك وابدا ما حا اخذلك وعلى طول حا اسندك
متاب ابتسمت ليها ابتسامة نصر وقالت ليها ربي ما يحرمني ومن وجودك جنبي واتجهو سوا على البرندة .. سماهر جات طالعه البرنده وقفت في باب المطبخ وقالت لأم متاب اها جن جوز اللوز اسي كنا بنقطع فيهم ..وزي ما بقولو جبنا سيرة القط جانا ينط سلمى لسه ماسكه متاب من يدها وقالت لسماهر جوز اللوز الله لا فرقهم وديمة سند بعض متاب حست بالقوة اكتر ونظرات الفخر كانت في عيونا .. ام متاب قالت ليها اها جن يتطاقشن غايتو البنات ديل .. ، سلمى مسكت ام متاب من يدها وقالت ليها البنات ديل بكرة دي بجوهن عرسان وبتفقدوهن انتي وامي اصبرن بس ام متاب قالت ليها الله يجيب اليوم البنفرح فيهو بيكمواصلو ما مشكلة في بيوتكن بنجيكن متاب وسلمى بصوت واحد اللهم اميييييييييين سماهر ردت بي ضحكة عان البايرات ديلوبدت سلمى تسأل في أم متاب عن الفطور ..
سلمى_خالتي عاملة شنو الليله للفطور ؟
ام متاب_والله يا سلمى يا بتي عندي زبادي عاملاه في البيت سمح خلاص قلت لسماهر اعملو ملاح روب ول رأيك شنو؟
متاب_انتي عارفاها مجنونة ملاح الروب
سلمى_الله عليييك انتي ياخ ..بموت في الملاح ده انا بموووت
متاب_دايرين المولوخيه بس وانا بظبط الرز
ام متاب_لا الخدرة للغداء يا سلمى
سامعاني انتي؟؟؟سلمى_اي اي اصلا الخدرة سمحه لكن انا ما عندي ليها حاجه شديد الا بتك دي علمتني ليها بالرز
متاب_لا يختي لو ما عاجباك خليها طوالي اصلو ماف زول جابرك عليها
ام متاب_خلاص خلاص امرقن لي برة ما تتشاكلن فيني حا اسوي ليكم طلباتكم الاتنين..
سلمى_تسلم يدك يا خالتي
يلا انا ماشة بيتنا يا متاب اظبط اموري واجيكم لابسه افطر واطلع من هنا طواليمتاب_خلاص تمام
سلمى_توبة توبة زي ما اتفقنا
سماهر_غايتو سلمى اختي دي ما نصيحه انا ما عارفاها قرت صيدلة كيف!!
ام متاب_ونان عاجباك رفيقتها دي ؟ ما كلو الحال من بعضو
متاب_الله يسامحكم عشان لقيتوني براي مش ؟ كويس كويس.. يا سماهر من غير مطرود يلا بيتكم لمن الفطور يجهز بناديكم بالحيطه امشي الصباحيه دي استفيدي من وقتك كلها باقي ليك شهور بس يلا
سماهر_ما مشكله خليني اساعد خالتي وبرجع بعدين اقرأ ...
ام متاب_باقي ليك حا تقدري تقري بعد تاكلي ملاح الروب؟
والله الشافك رقدتي عندنا هنا ما كضبمتاب_بالضبط
يلا امشي استفيدي وانا حا اساعد امي سماهر_طيب حا امشي يلا لبعدين ..صحي يا متاب بعد الفطور جاياك تشرحي لي كيمياء يا حلوة
متاب_حاااضر
وطلعت سماهر ومتاب وامها بتونسو وشغالين في الفطور ، بعد خلصو مشت متاب نادت ناس سلمى بالحيطه ، ردت ليها خالتو سوسن قالت ليها خلاص انا زاتي جهزت فطورنا بنجيبو ونجي عليكم ،بعديها جو وفطرو كلهم سوا واصلا ده العادة كل يوم وعشان ابو متاب واخوها وائل وابو سلمى واخوها سامي بطلعو بدري ، وكل زول بمشي على شغلو ،ما بجتمعو الا يوم الجمعة في بيت ناس متاب
، خلصو فطورهم واي زول استلم سرير..خالتو سوسن_اللهم لك الحمد والشكر قوم يا حمودي جيب لي اغسل يدي.. والله صحي من فطر ..فتر..
حمودي_حاضر ..هاك يا خالتو غسلي عشان اغسل يدين حبوبة
ام متاب_وانا كمان ي ولدي
سماهر_وانا
متاب_وانا وانا
حمودي_ما شاء الله فيكم الخير ..سلمى؟
سلمى_لالا انا مسكينة طالعه
وتسلم يدك يا خالتي فطور من الموووت
ام متاب_بالهنا حبيبتي
متاب_قصدك ملاح روب من الموت مش
سلمى_خالتي فاهمة قصدي
متاب_شكرا للاحراج
سلمى_العفو
يلا يا اخوانا انا لو قعدت شوية حا تلقوني في سابع نومة ..يلا ودعتكم اللهخالتو سوسن وام متاب_الله يحفظك يلا
سلمى_اللهم اميييييين يارب
توبة بعدين تعالي لي في الصيدلية ما تنسي كويسمتاب_حاضر
حبوبة_المرق ده منو؟؟
متاب_دي سلمى يا حبوبة ..مشت الشغل
حبوبة_ايوا ومتاب انتي مالك ما مشيتي؟
متاب_انا بمشي الساعه 2 بعدين.. سلمى عندها مشوار اول
حمودي_حبوبة حبوبة.. انا ماشي احضر مسلسلتي دايرة حاجه ؟
حبوبة _لالا انا نعسانه بدور انوم
خالتو سوسن_انا زاااتي دايرة اخد لي غمدة شوية كده واقوم على موضوع الغدا كمان ، انا بعوس ليك الكسرة يا حنان بعدين
ام متاب_خلاص كويس ما تعملي حاجه الليله .. برسل ليك خدرة بعدين وانتي ارفعي لي الكسرة
خالتو سوسن_خلاص خير يا زولة ، انتي طبختيها؟
ام متاب_الحمدلله عملتها مع الفطور يختي ..عااارفة روحي كان اكلت الروب بقول الروب
سماهر_ والله بارك الله فيك يا توبة الحمدلله قريت لي ساعتين قبل الفطور ول كان اسي اكون ندمانة .. لاني اسي شايفاكم طشاش طشاش
حمودي_امي تاني كل يوم اعملي لينا روب عشان ارتاح من المراسيل الكتيرة دي .. وماشي احضر بمزاااج يلا
متاب_
حمودي يا مجنون .. يلا انا حا ادخل اغسل العدة دي وامشي انوم لي ساعتين كده وبجي اعمل الرز واصحيكم لصلاة الظهر تمامسماهر_تمام ..وانا حا امشي ارقد في غرفتك هناك مش المكيف شغال؟
متاب_شغال اي
خالتو سوسن_امشن دايرات جو المكيف اسي البرندة دي هواها مالوو؟؟ بارد يا يمة وسمح هوا طبيعي
ام متاب_بري الجيل ده جيل البرودة ما بجو برة الا الكهربا تقطع
متاب_ماا بنعرف ياخوانا نومو نومو يلا وسماهر انا بلحقك يلا ...
بعد خلصت متاب مشت الغرفة شالت تلفونها عشان تضبط المنبه اتفاجئت ب 40مكالمة فائته و12رسالة ..
قالت : بسسم الله الحاصل شنو يا الله ده منو القالب الدنيا دي كده؟!