رواية العوض الجميل
الفصل السادس6
بقلم مناسك موسي
وصلو البيت ولاقو سامي في الشارع واقف سلم عليهم ..وسلم على محمود واتونس معاه شوية .. سلمى قالت لمتاب: عايني ادخلي لي واتس سريع لانو مناداتك لي دي ماااا مطمنة
وياريت لو سجلتي لي ريكورد 
.. واي واحده دخلت على بيتهم.. متااب تلفونها كان طافي كهرباء فأول ما وصلت وسلمت على ناس بيتهم دخلت الغرفة ووصلتو في الشاحن وطلعت على ناس امها تشوف موضوع العشاء ... سلمى بهناك رتبت امورها وبقت منتظرة متاب وبتتصل في تلفونها مغلق
متاب اتونست مع ناس بيتهم ونست موضوع سلمى والونسة جرّت .. بعدها متاب رجعت الغرفة عاينت لتلفونها لقتو عامل95% قالت خلاص انتظروو يعمل 100%وافتحو .. ورقدت من غير ما تشعر نامت .. وسلمى منتظرة وقلقت عليها وما قدرت تناديها بالحيطة لانو الزمن اتأخر .. اصبح الصبح وجات ام متاب لغرفة متاب وصحتها لصلاة الصبح .. متاب صحت صلت ونامت راجعه .. صحت تاني على صوت وائل اخوها ..قال ليها: سلمى واقفه ليك بالحيطه..متاب_سلمى؟؟؟
وائل_اي صحصحي شكلها مستعجلة قومي عليها ..
متاب_طيب قول ليها قالت ليك جاية ..
وائل_طبعاا انا فااارغ وما عندي موضوع مش ؟ عشان اقعد اشتغل مراسل بينك وبين سلمى ..قومي امشي عليها براك..
متاب_طيب قمت اها
ومشت وهي لسسه نعسانه .. عندها سرير ملصقاه على الحيطة بتطلع فيهو ..طلعت ونادت يا سلمى ..سلمى ..
ردت ليها سلمى: ياخ لكن ساعه يا الملكة؟؟
متاب_والله نعاس شديد ..
سلمى_نايمة من صلاة العشاء ولسه نعسانه؟؟!
متاب_اي في حبة نعاس كده..
سلمى_بعد ده ؟ كدي اسي اصبحتي كيف ؟؟
متاب_الحمدلله وانتي كيفك؟؟
سلمى_الحمدلله تمام ...اسمعيني الشمار حماني النوم امس
متاب_شمار شنو؟؟
سلمى_لممن كنا في العربية ..
متاب_اهاااا اي صح... وووااي طبعااا
ما وريتك انتي ذااتك غياظه ما سألتيني
سلمى_ اسألك من شنو؟؟ اذا كان انتي حضرة سيادتك قافلة تلفونك وانا راجياك في الواتس واضرب في تلفونك الليل كلو
والله المرتبطين ما زيي امس ..كنت مقلقة عليك شديد ياه ..متاب_احححي
الشمار يا سلمى شمارات 
عن دكتور امجدسلمى_اججججش يا يمة تتجازي انتي
والله نسيتوو .. اها احكي الحصل شنووو؟!متاب_الحصل انو دكتور امجد طلع شاب ووسيم جدا جدا
سلمى_انتي جاااده؟؟
متاب_لا دقيقة انتي بتتخجلي مالك
سلمى_ههههه لا العفوو ..المهم ما تركزي معاي ..
متاب_غايتو مبدئيا كده ظاهر عليهو راقي ياخ
سلمى_هيبة الصيادلة
متاب_اتخيلي يا سلمى قال لي ساكنة وين؟
سلمى_اححححا اها طوالي كده بدينا؟
متاب_تبقي صحبتي كيف لو ما كان فهمنا وااااحد
سلمى_كييف؟
متاب_انا كمان قلت في سري بدينا ..
سلمى_اها اها وقال ليك شنوو؟؟
متاب_بري طلع قصدو شريف وعاوز يوصلني البيت لانو سايق..
سلمى_يا لطييف وكمان سايق؟؟
متاب_اااي وانا قلت ليهو معاي صحبتي وبنرجع بي عربية خاصه ..
سلمى_ايووووه ده الكلام الصاح ..عربية خاصة دي عزززة ..
متاب_بسم الله كمان ده شغلي يا بت
قلتها بطريقة كده ظابطه ..قطعت ونستهم خالتو سوسن ام سلمى ..
خالتو سوسن _يا بنات صباح الخير.. ان شاء الله خير تضحكن كده من الصباح ..
متاب_صباح الخير يا خالتي
دي بتك المجنونة دي قطعت لي حلاة نومةسلمى_امي كيف اصبحتي؟ البت دي ما تشتغلي بيها .
خالتو سوسن_متاب ناس امك اصبحو كيف؟؟
متاب_ما عجبني ليك الاحراج يا روحي
والله يا خالتي صدقي ما مشيت عليهم من سريري وجيت على بتك دي .. سوقيها ما محتاجه ليها في حاجه؟؟خالتو سوسن_بري ما محتاجه ليها
سلمى_شووووو
اخخخ يا قلبي..متاب_كويس كويس
سلمى_كده حبايب حبيبتي انا..
متاب_يلا انا لعلانه وما عاوزة معاك كلام يلا نازلة منك بث
سلمى_واحلاتي يا ناش ..فديتو الزعوول .. يلا يلا امشي لو دايرة تواصلي نومتك نتلاقى بعدين الفطور تمام..
متاب_انتي خليتي فيها نوم تاني
خلاص تمام بناديكم بعد يجهز ..سلمى_تمام يلا
متاب_يلا ..
ونزلت متااب واي واحده مشت صبّحت على ناس بيتهم وشربو الشاي واي زول طلع على شغلو...
جهز الفطور في بيت ناس متاب ونادت سماهر بالحيطه وجابو فطورهم وفطرو كلهم مع بعض...وائل جا داخل بعد الفطور خلص ..
ام متاب_كنت وين انت يا فلان؟
وائل_مع صحبي يا حجه... السلام عليكم خالتو سوسن .. سماهر كيفكم؟
سلمى_وانا ممنوعة من الصرف ؟
وائل_انا اتصبّحت بيك من اصبحت
خالتو سوسن_الحمدلله يا ولدي انت كيف؟ والقراية كيف؟ عاد المرة دي دايرين تمنينات ول تسعينات
سماهر_البجيبا ليك منو؟ وائل؟؟؟
متاب_الشغلة جابت ليها استهتار يا اخوي ..شد حيلك
وائل_هههه ليييه مالي انا يا سماهر
سماهر_كمان مالك؟ اسي البوديك تباري من الصباح مع صحبك شنو؟ الصباحيه دي استفيد من زمنك ياخ ..
وائل_ياخ قعدة البيت صعبة
بعدين انا كنت مدروش لي تلاته يوم ما شفت الشارع ده بي عيني..ام متاب_واسي جايي تعوض مش؟
حمودي_يا جماعه رايكم شنو نعمل تحدي بين سماهر ووائل؟ البجيب نسبة عاليه نعمل ليهو احتفال؟؟ بي حفلة عديل كمان..
خالتو سوسن_حلاتك يا حمودي انت عسسسل ياخ
حبوبة_حفلة لعرس منو؟؟؟اااا؟؟
متاب_لالا يا حبوبة
احتفال قصدو لسماهر ووائل البجيب نسبة كبيرةحبوبة_ايوااا.. متين ؟
ام متاب_بعد امتحنو يمة ..
حبوبة_ان شاء الله تنجحو وتجيبو الدرجات العاليات .. وتدخلو احسن الكليات .. ويا وائل تسوق اجمل العربات .. ويا سماهر نشوفك اسمح الطبيبات ..بركة الحي ال ما مات .. خالق الاحياء والاموات يا اولادي افرح بيكم واحضركم ..
كلهم_امييييييييين يارب
خالتو سوسن_بعد دعوات حبوبة دي مفروض ما اشوفكم قدامي انتو الاتنين ..
وائل_طيب خلوني املأ امدرمان دي وبعداك بمشى اقرأ ان شاء الله..
سلمى_ارح خلاص انا بخت ليك الفطور..
متاب_لالا انا بختو ليهو ما مشكلة
وائل_يا السمحات انتن ما تتعازمن لي ارح ادوني الطقة دي خلينا نمشي على القراية دي ..
ام متاب_قاادر الله .. اريتو يدوم الحماس ده
سماهر_يلا يا جماعه انا ماشة بيتنا ..
خالتو سوسن_اقعدي ما تمشي ..خليني اشرب الشاي مع خالتك حنان ونمشي سوا ..
سماهر_سلمى مش انتي حا ترجعي معاي عشان حا تشرح لي رياضيات قبل تطلع الشغل ..
سلمى_اي صحي .. انت يا وائل تعال اشرح ليكم سوا
حمودي_كيف يعني؟ سماهر علمي ووائل ادبي كيف يشرحو ليهم سوا ..
سلمى_في ابواب مشتركة يا حمودي
حمودي_ايوااا
وائل_طواالي .. انا اصلا الرياضيات دي ما عندي ليها حاجه ..
سلمى_خلاص افطر وتعال لينا في بيتنا بهناك تمام
وائل_ حاضر يا دكتورة
سلمى_ احم احم .. الليله الشرح حا يكون بمزاااج
دخلت سلمى لمتاب في المطبخ وقالت ليها ظبطي الاوضاع واعملي الشاي للجماعه الطيبين عشان انا عايزة اشرح للشباب ديل في بيتنا بهناك ..
متاب_عديلة .. بعدين ما تتأخري لمن تجهزي اعملي لي رنة عشان نطلع بدري شوية المواصلات دي ما مضمونة ..
سلمى_خير وبركة يا ستي