عدى اكتر من شهر
فاروق اللى هيتجنن وعايز ياخد الشركه والمصنع من رغد ورهف باى طريقه ومش عارف .
شهيرة اللى حاولت تانى وتالت مع رهف عشان توافق على مازن بس رهف مصممه على رايها .
رغد اللى خوفها بيزيد على رهف من فاورق كل يوم .
حسن وحمزة اللى كل همهم الشغل .
اولفت اللى اتحججت ان بيتهم هيقع وجالهم قرار بازاله عشان تفضل عايشه فى بيت البطل.
ـــــــــــــــــــ★ــــــــــــــــ
فى شركه الصاوى .
مؤمن راح على مكتب فاروق ووقف قدام السكرتيرة الخاصه بيه:فاروق بيه جوا ؟
السكرتيرة:لا يافندم فاروق بيه لسه على وصول.
مؤمن:طب هاتيلى فنجاه قهوة وانا هستناه على مايجى.
السكرتيرة:حاضر.
السكرتيرة مشت ومؤمن دخل المكتب وطلع من جيبه مايك صغير جدا وحطه تحت المكتب عشان محدش يشوفه وخرج بسرعه قبل السكرتيرة ماتوصل .
السكرتيرة جت ومعاها القهوة اخدها مؤمن:شكرا انا هشربها فى مكتبي لما فاروق بيه يجي عرفينى .
السكرتيرة:حاضر يافندم.
مؤمن راح على مكتبه وكلم رغد:كله تمام حطيت المايك فى مكتبه .
رغد:تمام يامؤمن لما نشوف اخرتهم ايه؟
مؤمن:طب افرض اتفقو فى اى مكان تانى .. فى ڤيلتهم مثلا.
رغد:معرفش بقي يامؤمن انا قولت نسمع اى حاجه عشان اطمن .
مؤمن:ان شاء الله يارغد اهدى انتى بس.
رغد:حاضر ... سلام بقي.
مؤمن:سلام.
ــــــــــــــــــ★ـــــــــــــــــ
فى حارة البطل .
حمزة وحسن فى الورشه بيتممو على البضاعه والخشب اللى كانت عبارة عن اوض نوم واطفال وسفره بكراسي وصالونات
قبل ماتتحمل عشان تروح معرض المعلم فتحى .
حسن:الله ينور يارجاله ولا غلطه .
حمزة:حسن انت مش شايف اننا المفروض نروح مع البضاعه ؟
حسن:لا الرجاله موثوق فيهم متقلقش والمعلم فتحى هيكون فى استقبالهم.
حمزة:اللى تشوفه .
البضاعه اتحملت والعربيات بدات تتحرك على القاهرة .
حمزة:طب كدا كله تمام .
حسن:تركيزنا بقي يبقي على اوض النوم اللى هتتعرض فى المعرض الجديد .
حمزة:الاوض كلها واقفه على التشطيب ياحسن .
حسن:طب تمام ... تعالى نرجع البيت لان ست الكل مبطلتش رن عشان نروح ناكل معاهم.
حمزة:لا روح انت اتغدى معاهم انا هفضل هنا مع الشباب.
حسن بصله:مالك ياحمزة غريبه اول مرة ترفض تاكل معانا ؟!
حمزة:مافيش حاجه ياحسن .... انا هفضل هنا اتمم على الشغل وهاجى لما اخلص.
حسن:مش عايز تروح عشان مرات خالى صح ؟
حمزة:وهى مرات خالك هتعملى ايه يعنى؟!
حسن:لا تعمل كتير ياحمزة مش كدا ياصاحبي انت مابتعرفش تكدب عليا.
حمزة:خلينى هنا احسن ياابو على.
حسن:طب ايه رايك هكلم الحاجه تبعتلنا الاكل هنا ومش هروح.
حمزة:بس كدا مرات عمى هتزعل منك ياحسن.
حسن:لا متقلقش انا هخليها تبعتلنا اكل لينا ولشباب كمان وناكل سوا من زمان معلمنهاش .
حمزة:تصدق فكرة حلوة والشباب ماهيصدقو ده الكل بيعشق اكل هدهد.
حسن ضحك وكلم والدته وقالها وهى رحبت جدا وبعد شويا بعتت الاكل مع محمد اللى بعته حسن عشان يجيب الاكل وقعدو حمزة وحسن وكل الشباب اللى فى الورشه اكلو سواا وضحكو وهزرو كتير وبعد ماخلصو اكل الكل رجعو على شغلهم تانى .
ــــــــــــــــــــــ★ـــــــــــــــــــــ
فى المستشفى رغد قاعده فى مكتبها والباب خبط .
رغد:ادخل.
الباب اتفتح ودخل مازن وقعد على الكرسي وحط بوكيه ورد احمر على المكتب كل ده . ورغد بتبصله:نعم!!
مازن:يعنى جاى وجيبلك ورد وتقوليلى نعم ... مافيش شكراا ياميزو.
رغد بسخريه:ميزوو !! ....لا مافيش شكرا ياميزو وخد وردك وامشي يلا مش فاضيه للعب العيال ده .
مازن:انتى بتسمى حبي ليكى لعب عيال يارغد .
رغد:حب ايه يابابا ... هو مش انت من يومين كنت جاى تتقدم لرهف ولا انت هتفضل ورانا واللى توافق اهلا وسهلا.
مازن:اولا انا ماليش دخل ولا كنت اعرف ان بابا هيطلب ايد رهف .... ثانيا بقي انا مش بحب حد غيرك يارغد انتى بس اللى فى قلبي .
رغد:مازن بص هما كلمتين وبس تسمعنى وتحطهم حلقه فى ودنك ماشي.
مازن:وانا كلى أذان صاغيه اتفضلى.
رغد:اذا كان انا ولا رهف مش هنكون ليك ولو فكرت تيجى هنا مرة تانيه وتعمل الفيلم العبيط ده وورد وحب وكلام فارغ هطلبلك الامن يرميك برا المستشفى ... فاتفضل اخرج بكرامتك احسنلك.
مازن بصلها وكان مضايق منها جدااا وقام عشان يخرج ووقف لما رغد نادت عليه ولف بصلها:نعم!
رغد:خد الورد ده اديه للى ناوى تسهر معاها النهارده .
مازن رجع اخد البوكيه بعصبيه وخرج من المكتب ومن المستشفى كلها ورغد ضحكت:قال حب قال تك وكسه ياميزو.
وكملت شغلها .
بقلم الكاتبة جنات
ــــــــــــــــــــــ★ـــــــــــــــــــــ
مازن راح الشركه ودخل مكتب ابوه وهو متعصب وقعد على الكرسي وفاروق بصله:مالك متعصب كدا ليه؟!
مازن بصله:انا موافق.
فاروق باستغراب:موافق على ايه مش فاهم.
مازن:نخلص من رهف.
فاروق:ورغد؟
مازن:لا ... احنا لما نخلص من رهف هنكون كسرنا رغد كسرة عمرها ومش هتقدر تقوم منها ووقتها هنقدر ناخد الشركه والمصنع والمستشفى كمان .
فاروق:تصدق فى دى انت صح .
مازن:ووقتها هتكون ليا غصبن عنها .
فاروق:خلاص سبنى افكر كدا عشان اعرف هنخلص منها ازاى .
مازن:اللى اعرفه ان رهف مش بتخرج من الڤيلا .
فاروق:حتى لو جوا اوضتها هخلص منها .
مازن:وياريت يبقي معاها البت الصغيرة بنت مؤمن عشان نبقي كسرناهم هما الاتنين وميقدرش يساعدها.
فاروق:ده ايه الدماغ السم دى ياواد.
مازن:تربيتك يافاروق باشا.
فاروق ضحك:بس بلاش امك تعرف باللى بخطط ليه.
مازن:ليه؟؟!
فاروق:لانها رافضه الفكرة وقال ايه خايفه يترد فيك .
مازن:ماهى كانت موافقه ايه اللى حصل؟
فاروق:غيرت رايها فجاه كدا وطلعت الامومه اللى جواها .
مازن:خلاص نبقي نتفق فى كل حاجه هنا بعيد عنها.
فاروق:تمام وانا هفكر واشوف هنوصل ايه .
مازن:وانا كمان هفكر معاك والحل الانسب ننفذه.
فاروق:حلو اوى.
مازن:انا همشي بقي .
فاروق:تمام .
مازن مشي وفاروق ضحك بخبث وكمل شغله تانى .
بقلم الكاتبة جنات
ــــــــــــــــــــــ★ـــــــــــــــــــــ
فى اخر اليوم.
حمزة وحسن رجعو البيت كان الكل متجمعين فى الدور الارضي .
حمزة وحسن:السلام عليكم.
الكل:وعليكم السلام ورحمه الله وبركاته.
هدى:حمدلله على السلامه ياولاد اتاخرتو ليه النهارده.
حسن:كنا بنحمل شغل ياست الكل .
محمود:ربنا يقويكو ياولاد ويعنيكو يارب .
اولفت:ربنا يقويك ياحسن وتحمى مالك ومال ابوك من اللى طمعانين فيه.
اولفت نهت كلامها وهى بتبص لحمزة اللى اضايق جدا منها والكل لاحظ نظرتها ليه .
حسن:متشغليش بالك يامرات خالى كل اللى بيشتغلو معانا بيخافو على مال الحاج محمود كأنه مالهم هما ومحدش طمعان فى ماله .
حسن بص لحمزة وشايفه مضايق وحط ايده على كتفه:وبعدين انا مستحيل اشيل هم ولا حمل الشغل لوحدى طول ما فى ضهرى اخ مستعد يفدينى بعمره كله .
حمزة بصله بامتنان:تسلم ياصاحبي .
محمود:ربنا يبارك فيكو ويخليكو لبعض ياشباب.
هدى:يارب ياحبيبي ويبعد عنكو ولاد الحرام وعيون الوحشه ... قومى ياحنين حضرى لقمه لاخواتك يلا .
عزة:انا موجوده هحضرلهم ياعمتى .
حسن:لا متتعبيش نفسك ياعزة ... ابقي طلعلينا الاكل فوق فى شقتى يانونه.
حنين:حاضر ياابو على .
الشباب طلعو كل واحد غير فى شقته وبعدها حمزة طلع لحسن .
حسن:اوعى تزعل من كلامها انت عارفها بترمى كلام وخلاص .
حمزة:لا مش زعلان ياحسن متقلقش .
حسن:وبعدين ياض هو انا اقدر استغنى عنك دانت اخويا وصاحبي وسندى فى الدنيا.
حمزة ضحك:ربى اللى يعلم انت ايه عندى يا
بطل.
حسن:حبيبي ياصاحبي.
الباب خبط وحسن قام يفتح وكانت حنين وشايله صنيه الاكل:احلى عشا لاحلى ابطال فى الدنيا .
حسن اخد منها الصنيه:تعالى بقي كلى معانا.
حنين:وانا اقدر اقول لا بردو .
قعدو كلهم اكلو سوا وضحكو وهزرو كتير .
حنين:اوعى تزعل من مرات خالى يازومه انت عارف طبعها بترمى طوب مش كلام .
حمزة:انا والله خايف فى مرة افقد اعصابي وقتها الحاج محمود ومرات عمى هيزعلو منى .
حسن:طنشها ياحمزة ولا كأنها بتتكلم يكون احسن.
حنين:اومال انا اعمل ايه طب انتو بتخرجو لكن انا فى وشها هى وبنتها طول اليوم وبسمع منهم كلام كتير وبرمى ورا ضهرى وماما تقولى معلش ضيوفنا نستحملهم ....دانا لما بطلع اعطى الدروس للولاد بنتها بتطلع ورايا لما زهقت ... بقولك ايه ياابو على ماتساعدهم فى موضوع البيت ده خليهم يتوكلو من عندنا .
حسن:البيت زى الفل مافيش فيه حاجه هى اخداها حجه عشان تفضل هنا مش اكتر .. وانا عرفت الحاج وقالى معلش نستحمل عشان خاطر ست الكل.
حنين:ربنا يصبرنا بقي على مايمشو .... قال صحيح ياابو على اخبار رغد ايه؟!
حنين غمزت لحمزة اللى كتم ضحكته .
حسن باستغراب مصتنع:رغد مين؟
حمزة:طب بذمتك عينك فى عينى كدا مش فاكر رغد مين ... الدكتورة ياابو على.
حسن:وانا هعرف اخبارها منين .
حنين:يعنى مسالتش عليها تعرف مرتبطه ولا سنجل كدا يعنى.
حسن:لا مسالتش ومش هسال وخفى على المسا بقي.
حنين:يوه بقي مافيش واحد فيكو عايز يفرحنى ويخلينى البس فستان سواريه فى فرحه .
حمزة ضحك:انتى كل طموحك تلبسي فستان سواريه يابت .
حنين:اه مانا هابقي اخت العريس بقي ... واللى هيبقي عريس فيكو هو اللى هيفصلى فستانى على حسابه انا بقولكو اهو .
حمزة:انا معنديش مانع بس تيجى بنت الحلال.
حنين:اسعى ياخويا وانت هتلاقيها ولا هى هتيجى لحد عندك مثلا .
حسن تفكيره راح لرغد وقوتها اللى تقريبا شاغله راسه من وقت ماشافها .
حنين شاورت لحمزة على حسن .
حمزة:اللى واخده عقلك يابطل.
حسن بصله بحده:انتو هتنامو هنا ولا ايه .
حنين:احنا اطردنا يازومه ...يلا انا هنزل انام بكرامتى تصبحو على خير .
حمزة ضحك:انا جاى معاكى سلام ياابو على .
حسن:سلام ياخويا .
حمزة نزل شقته وحنين كمان وحسن نام .
ــــــــــــــــــــــ★ـــــــــــــــــــــ
رغد قاعدة مع رهف فى المرسم .
رغد:انتى بجد مصدقه كلامك ده ... ده مؤمن سامعهم بودانه انهم عايزين يخلصو مننا.
رهف:ياستى مايمكن يكون فهم غلط وبعدين انتى شوفتى بنفسك رضي بوصيه بابا ومعلمش حاجه وعدى اكتر من شهر على الكلام ده .... طنط شهيرة كل يوم تتصل تطمن عليا ومابقيتش تجيب سيرة موضوع مازن خالص.
رغد:ماشي يارهف انا وانتى اهو والزمن طويل وهيبان مين فينا اللى غلطان .
رهف:يلا نطلع ننام بقي .
رغد:يلا .
كل واحده من البنات راحت اوضتها ورغد فتحت فونها عشان تسمع وتعرف فاروق كان بيعمل ايه فى مكتبه النهارده وقلبها دق بخوف لما سمعت كلامهم عن رهف ولارا وكانت هتجنن .
رغد:ياولاد الايه عايزين تكسرونى انا ومؤمن بموتهم .... ورهف تقولى فاهمين غلط والله انتى طيبه يارهف ....بس مش هاقبل ان شعره واحده بس منك تتمس وانا وانت والزمن طويل يافاروق الكلب انت وابنك .
رغد فضلت تفكر كتير وبعدها نامت من التعب .
بقلم الكاتبة جنات
ــــــــــــــــــــــ★ـــــــــــــــــــــ
تانى يوم رغد اول ماصحت كلمت مؤمن يجيلها وخرجو سوا عشان رهف ماتعرفش بكلام عمها وراحو قعد على النيل.
ومؤمن سمع كلامهم وكان مصدوم ومش متخيل انهم يدخلو طفله صغيرة فى خططهم الخبيثه .
رغد:هنعمل ايه انا خايفه اوى عليهم ؟!
مؤمن:مش عارف يارغد ... طب تيجو تعيشو فى الڤيلا عندى.
رغد:انت مش سامع بيقوله لو فى اوضه نومها هجيبها ... احسن حاجه انهم هيتفقو على كل حاجه فى الشركه عشان نعرف خططهم ايه ...عايزة اعرف ناوين على ايه عشان نقدر نتصرف.
مؤمن:اطمنى يارغد ربنا معانا وان شاء الله هيحمى رهف ولارا.
رغد:يارب يامؤمن.
مؤمن بتفكير:طب ماتمشو من الفيلا خالص وروحو مكان ميقدرش يوصلكو.
رغد:ازاى والمستشفى وبعدين انا مش عايزة اهرب يامؤمن انا مش جبانه.
مؤمن:عارف انك مش جبانه يارغد بس خافى على رهف وعلى لارا هما حطوهم فى دماغهم .
رغد:انت عندك حق بس هنروح فين .
مؤمن:ندور على مكان محدش يعرفه غيرنا .
رغد:تمام هفكر واقولك .
مؤمن:صح لازم تلمى اى حاجه مهمه او ورق يخص الشركه او المصنع او المستشفى وتاخديهم معاكى.
رغد:انا هبدأ اعمل كدا من دلوقتى ومش هعرف رهف حاجه.
مؤمن:ليه؟!
رغد:لان رهف ببساطه شايفه اننا ظلمينهم ... وانك فهمت اللى سمعته غلط وكمان انا مستحيل اخوفها واسمعها كلام فاروق .
مؤمن:طب ماتيجى نبلغ عنهم ونقدم التسجيل ده لشرطه.
رغد:الشيطان اللى زى فاروق مستحيل يقعد دقيقه فى السجن وهيخرج باى طريقه ووقتها شره وحقده هيزيد ناحيتنا .
مؤمن:عندك حق .
رغد:انا هروح المستشفى وانت روح الشركه وخليك مفتح تمام ... هى لارا فين؟
مؤمن:فى المدرسه.
رغد:تمام .
رغد ومؤمن كل واحد راح على شغله وجواهم خوف كبير اوى على اقرب حد ليهم .
ــــــــــــــــــــــ★ـــــــــــــــــــــ
فى حارة البطل .
المعلم منصور جايب ناس عشان يهدو بيت الشهاوى ومعاهم المعدات بتاعتهم.
حسن من وراه:انت بتعمل ايه يامعلم منصور ؟!
منصور:بص ياحسن انا هكمل مشروعى واوعدك لما يظهرو اصحاب البيت هابقي اديهم نصيبهم يابنى.
حسن:نفس الكلام بردو وانا هرد عليك نفس الرد طول مااهل البيت مظهروش مش هيتشال منه طوبه فاهم ... انا بتكلم معاك بالعقل يامعلم منصور المرة الجايه هيبقي بالقانون وانت عارف انا لو كلمت مراد هيجى وهيعمل ايه لانك عايز تهد عقار مش ملكلك ولا ايه.
منصور خاف من كلام حسن:يعنى انا هفضل موقف مشروعى لحد مايظهرو .... وبعدين ماهو لو عايزين البيت كانو باعوه لكن هما شكلهم ناسينه اصلا ده بقاله سنين السنين محدش قرب منه ولا فتحه.
حسن:مايخصناش يامعلم خلص الكلام اتفضل مشي الناس دى يلا وامشي من هنا.
منصور:ماشي يابطل .
منصور اخد الناس ومشو وحسن رجع على ورشته .
بقلم الكاتبة جنات
ــــــــــــــــــــــ★ـــــــــــــــــــــ
منصور دخل محل الجزارة بتاعه وكانت مراته محروسه قاعده:رجعت يعنى زى كل مرة بيمشي اللى فى دماغه هو.
منصور:هددنى هيكلم مراد صاحبه انتى عارفه وقتها هيحبسونى عشان عايز اهد حاجه مش ملكى ياوليه.... ووقتها هشرف مع المحروس ابنك فى السجن.
محروسه:حبيبي يابنى ياضي عينى اتحبس بسبب اللى مايتسمى حسن .. بكرة يطلع ويوريه المجدعه على اصولها.
منصور:يبقي عايزة ابنك يرجع التخشيبه تانى مش كدا.
محروسه:تف من بوقك ربنا مايكتبها عليه تانى.
منصور:يبقي تخليه يشيل حسن البطل من راسه احسنله.
محروسه:يطلع هو بسلامه ووقتها يحلها الف حلال.
ــــــــــــــــــــــ★ـــــــــــــــــــــ
فى بيت البطل .
حنين كانت على السطح خلصت دروس للاولاد وبتسقى الزرع بتاعها.
حنين حست بحد وراها وكانت مفكراها امها واتفاجأت بعزت ابن خالها:فى حاجه ياعزت؟!
عزت:كنت جاى اشم شويا هوا .
حنين:انت عارف ان مافيش خد بيطلع السطح غيرى ياعزت .
عزت:بصراحه كان فى حاجه عايز اتكلم معاكى فيه ياحنين.
حنين بصتله:حاجه ايه دى ؟
عزت:بصراحه انا معجب بيكى اوى وعايز اطلب ايدك لجواز وعايز اعرف رايك الاول .
حنين اتفاجأت بكلامه:انت زى حسن اخويا ياعزت وبعدين انا مش بفكر فى الموضوع ده ولو سمحت انزا بقي عشان مينفعش حد يجى ويلاقينا واقفين كدا واظن مترضهاش لاختك ولا ايه.
عزت بضيق:اكيد عن اذنك.
حنين:اذنك معاك .
عزت نزل وحنين كملت اللى بتعمله .
ــــــــــــــــــــــ★ـــــــــــــــــــــ
مرت الايام ورغد بدات تلم الورق والحاجات المهمه وحطيتهم كلهم فى شنط ونقلتهم لڤيلا مؤمن ومحدش كان يعرف ابدا حتى رهف .
ورغد كانت بتعمل كل ده بليل ورهف نايمه او بنهار وهى فى المرسم .
وكل يوم رغد ومؤمن بيسمعو خطط فاروق ومازن اللى مرة يخططو انهم يضربو رهف عن طريق قناص ومرة انهم هيولعو فى الڤيلا وهى فيها وفى كل مرة كل واحد بيقول رايه بيزيد الخوف فى قلب رغد ومؤمن على رهف ولارا .......
الفصل السادس
مرت ايام كتير والوضع كما هو عليه .
رغد ومؤمن بيحاولو يعرفو فاروق ومازن بيخططو لايه ... رغد جمعت كل الحاجات المهمه ونقلتها فى سريه تامه لڤيلا مؤمن وبدون علم رهف .
حسن وحمزة اللى كل تركيزهم فى الشغل ... وحمزة اللى مضايق جدا من تلميحات اولفت ليه بس اللى مصبره حب الحاج محمود وهدى وحسن وحنين .
اولفت اللى بتحاول وبتبذل كل جهدها عشان حسن يتجوز عزه وعزت يتجوز حنين وده طبعا طمعا فى الفلوس مش حباا ليهم .
ــــــــــــــ★ـــــــــــــــ
يوم جديد على الكل.
فى المستشفى وتحديدااا فى مكتب رغد ومؤمن قاعد معاها .
رغد:يعنى معقول مش عارفين نلاقى مكان فاروق ميعرفش حاجه عنه.
مؤمن:احنا كان ممكن ناجر او نشترى بس اكيد هيتعرف من بياناتكو وبسهوله هيقدر يوصل ليكو .... ده حتى ڤيلا جدك الله يرحمه امى ووالدتك كانو باعوها.
رغد برقت:ازاى راح عن بالى !
مؤمن:ايه هو؟
رغد:بيت جدو الله يرحمه يامؤمن ... ماما كانت دايما تحكيلى انها اتولدت فى بيت عادى جدا مش فى ڤيلا وانها عاشت فيه احلى ايام .
مؤمن:يعنى هما باعو الڤيلا وهيسيبو البيت القديم بذمتك.
رغد:تخيل بقي انهم كانو معتزين جدا بالبيت ده وانه لسه موجوده وحتى مفتاحه ماما كانت محتفظه بيه.
مؤمن:وهو فين البيت ده؟
رغد:معرفش عمرى ما روحته .... بس ماما كانت بتحكيلى انهم اتولدو وعاشو كتير فى اسكندريه.
مؤمن:سهل جدا هكلم مراد وهو اكيد هيساعدنا.
رغد:مراد وهو بيعمل ايه فى اسكندريه انا بقالى كتير اوى ماشوفتوش.
مؤمن:مراد من يوم الترقيه وهو اتنقل اسكندريه ومن وقتها وهو هناك ... اكيد لما اطلب منه المساعده مش هيتأخر.
رغد:وهو يقدر يتأخر اصلا.
مؤمن ضحك:على رايك ... انا هروح الشركه وهابقي اكلمه.
رغد:لا هاتلى رقمه وانا هكلمه .
مؤمن:اوكى ... اكتبي عندك .
رغد:تمام .. يلا روح شغلك .
مؤمن:سلام .
مؤمن خرج ورغد رنت على رقم مراد بس مردش .
بقلم الكاتبه جنات
ــــــــــــــــ★ــــــــــــــــ
فى ڤيلا جمال الصاوى .
رهف دخلت المرسم ومعاها لارا ومغمضه عينيها .
رهف:فتحى يالولى .
لارا فتحت ولما شافت لوحه مرسومه بصورتها وهى فى حضن مؤمن فرحت جدا واتنططت من الفرحه وحضنت رهف بحب:مرسي يارهف بجد حلوة جداا .
رهف:انا وعدك هرسمك انتى وبابي ووفيت بوعدى اهو .
لارا:احلى رهف فى الدنيا ... انا هاخدها اعلقها فى ڤيلا بابي هو اكيد هيفرح بيها جداا.
رهف:اكيد ياروحى انا هغلفها كويس عشان تفاجئ بيها بابي اوكى.
لارا:اوكى ده هيفرح اوى .
رهف:اكيد ياروحى ... ايه رايك نغلفها سوا؟
لارا:موافقه يلا.
ــــــــــــــــ★ــــــــــــــــ
فى حارة البطل وتحديدا فى بيت البطل .
كان هدى واولفت فى المطبخ بيجهزو الاكل عشان الغدا .
اولفت:بس انا زعلت اوى ياهدى لما عزت قالى انه فتح الموضوع مع حنين وهى رفضت واحرجته.
هدى:الجواز قسمه ونصيب يااولفت وبعدين هو غلط لما اتكلم مع حنين المفروض كان اتكلم مع الحاج او مع حسن ... انتى عارفه لو حسن شم خبر عن الموضوع مش هيسكت وانا مرضاش الاخوات يعملو مشكله سواا.
اولفت:هو بس كان عايز يعرف رايها عشان لما يفاتح الحاج يبقي مالى ايده انها هتوافق ياهدى .
هدى:حصل خير وانا مقدرش اغصب عليها يامرات اخويا ... وبعدين مالهمش نصيب في بعض يااولفت ربنا يبعتله بنت الحلال اللى تستاهله .
اولفت لوت شفايفيها بسخريه:يارب ياختى ..... بس اوعو تكونو هتجوزوها لحمزة.
هدى:حنين وحمزة لا ريحى قلبك حمزة بيعامل حنين زى اخته بظبط .
اولفت:اه قوليتلى ... وهو مش ناوى يتجوز ولا ايه؟
هدى:معرفش يااولفت وبعدين دى حياتهم وهما احرار ... خلينا ياختى نركز فى الاكل شكلنا كدا هنتاخر ومش هياكلو على المعاد.
اولفت بضيق:امممم يلا ياختى.
هدى اتنهدت بضيق من اولفت ومن تدخلها فى حياه الولاد وهى اصلا مضايقه منها بسبب معاملتها لحمزة وكلامها اللى بترميه زى الطوب وبتكون قصدها عليه وهو مستحمل عشان ميزعلهاش هى والحاج .
ــــــــــــــــ★ــــــــــــــــ
فى ورشه البطل .
حسن وحمزة بيتابعو الشغل مع الشباب ودخل مراد عليهم:اهلا بشباب عيله البطل.
حسن وحمزة ضحكو.
حمزة:فينك غطست كدا ومحدش شافك ؟
مراد:ياعم الشغل واخد كل وقتى مانتو عارفين .
حسن:تعالى نقعد جوا فى المكتب .
حسن نادى على محمد واحد من الشباب اللى معاه فى الورشه:محمد هات ٣ قهوة مظبوطه بسرعه.
محمد:امرك يابطل .
الشباب دخلو المكتب وحسن قعد مكانه ومراد وحمزة على الكراسي جمب المكتب واتكلمو كتير ومحمد جاب القهوة .
حمزة:الله صحيح الواد محروس عملتو معاه ايه.
مراد:اخد سنتين زى صاحبه.
حمزة:حلال عليه والله .
مراد:بس جابر قرب يخلص مدته وهيطلع.
حسن:يأنس وينور .
مراد بص لحمزة:شكل البطل مش ناوى على خير؟
حسن:طول ماهو بعيد عننا احنا هنفضل بعيد عنه.
حمزة:ياعم احنا ناس فى حالنا مش بتحب المشاكل .
الباب خبط ودخل واحد من الشباب:عايزينك يامعلم حمزة.
حمزة قام:هشوف عايزين ايه وهجيلكو تانى .
فى الوقت ده فون مراد رن برقم غريب:ياعم الرقم ده رن عليا كتير.
حسن ضحك:طب ماترد ولا خايف يكون بيعاكسو.
مراد ضحك:مقبوله منك يابطل.
مراد رد:الو.
رغد:كل ده عشان حضرتك ترد.
مراد:مين معايا ؟
رغد:وكمان مش عارف صوتى تصدق خسارة فيك تعبي فى العمليه بتاعتك.
مراد:اوبااا اهلا اهلا بالدكتورة .
حسن بصله لما قال كلمه دكتورة وجه فى باله رغد واللى عملته فى المستشفى وابتسم وفاق على صوت مراد:هو انا اقدر انساكى ياحضره الدكتورة بردو .
رغد:طب كويس ... انت عامل ايه؟
مراد:بخير والله طمنينى انتى عليكى انتى والرسامه بتاعتنا عاملين ايه؟
رغد:بخير يامراد والله ... وصح مبروك على التريقه ياسياده الرائد ... عارفه انها متاخرة بس انا مشوفتكش من وقت عزا بابا وماما الله يرحمهم.
مراد:ربنا يرحمهم ... وعلى العموم ياستى الله يبارك فيكى .
رغد:صح نورة عامله ايه؟
مراد:نورة كويسه الحمدلله وقربت تولد كمان .
رغد:ماشاء الله .. ابقي وصلها سلامى لحد مااشوفها .
مراد:يوصل يادكتورة.
رغد:بصراحه كنت عايزاك فى خدمه ومؤمن قال هيكلمك وانا قولتله لا هكلمه انا .
مراد:صح هو عامل ايه والله واحشنى الواطى مبقاش يسال فيا.
رغد ضحكت:مانت كمان واطى ومش بتسال عليه.
مراد:تصدقى صح ... سيبك منى ومنه خدمه ايه اللى عايزاها وانا رقبتى سدادة.
رغد:انا بدور على بيت جدو صالح الله يرحمه اللى اعرفه انه فى اسكندريه اكتر من كدا معرفش.
مراد:طب اسم جدك ايه بكامل عشان اقدر اوصل ؟
رغد:صالح الشهاوى .
مراد:طب متعرفيش فى انهو منطقه فى اسكندريه عشان نسهل شويا.
رغد:للاسف لا بس هو البيت باسمه يمكن كدا تقدر توصل.
مراد:خلاص هشوف الموضوع ده وهكلمك .
رغد:ياريت فى اسرع وقت يامراد لو سمحت .
مراد:حاضر يادكتورة والله متقلقيش .
رغد:ماشي يامراد وبجد شكراا جدا ليك.
مراد:ياستى ابقي اشكرينى لما الاقى البيت .
رغد:انت صح يلا سلام بقي .
مراد:سلام .
مراد قفل وبص لحسن اللى كان مركز فى الورق اللى قدامه:انت شكلك من فاضي .
حسن:لا انا بشوف تصاميم الاوض الجديده مش اكتر .
مراد:ياعم مش عارفه انا معرفتكش من قبل مااتجوز ليه عشان حاجه بيتى .
حسن ضحك:فى الجوازة التانيه وعليك خير .
مراد ضحك:انت عايز نورة تجرى ورايا مش كدا مش بعيد تقتلنى .
حسن:ربنا يخليكو لبعض ويقومها بسلامه.
مراد:اهى قربت تولد وهتنور حياتى احلى بنوته.
حسن:تيجى بسلامه وتتربي فى عزك ياصاحبي.
مراد:تسلم ياابو على ومقبوله منك ياعم عفش بيتها كله لما تيجى تتجوز.
حسن ضحك:هى تيجى وتكبر ياعم وانا موافق.
مراد:همشي انا بقي عشان ورايا مهمه قوميه جداا ... لو منفذتش اللى هى عايزاه احتمال تخطفنى وتبعينى اعضاء مجنونه وانا عارفها .
حسن ضحك:ربنا معاك بقي.
مراد:لو خلصت شغل بدرى هابقي اجى اسهر معاكو.
حسن:تمام هنستناك.
مراد:سلام.
حسن:سلام.
بقلم الكاتبه جنات
ــــــــــــــــ★ــــــــــــــــ
عدى اليوم ومراد كلم ناس معارفه عشان يقدر يوصل للبيت والكل بدا يساعده .
بليل مراد وصل الحارة عشان يسهر مع الشباب زى ماقال لحسن ولما وصل كان حسن واقف مع منصور وشكله مضايق .
مراد قرب منهم:فى حاجه ياحسن؟
منصور:اهو سياده الرائد نساله بقي.
مراد:خير؟
منصور:الوقت ياباشا البيت ده بقاله سنين واقف كدا ومحدش من اصحابه بيسأل عليه ولا نعرف مكانهم وانا اشتريت الارض اللى جمبه عشان ابنى عمارة هنا فى الحارة ... وحسن مش راضي يخلينى اهد البيت ده عشان ابدا المشروع.
مراد:انت عايز تهد بيت مش بيتك ولا تعرف اصحابه فين عشان تبني عمارة يامنصور؟
منصور:مانا ياباشا لو اصحابه ظهرو هديهم الفلوس اللى يطلبوها.
مراد:مافيش حاجه اسمها كدا يامنصور تستنى لما يظهر اصحاب البيت ووقتها تشترى منهم البيت وتبدا مشروعك.
منصور:ولو مظهروش ياباشا؟!
مراد:متعملش اى حاجه ولا تيجى جمب البيت اصلا لكن لو قربت منه وقتها هقبض عليك وبنفسي يامنصور.
حسن:اهو سمعت بنفسك يامعلم؟!
منصور بصلهم بضيق وسابهم ومشي.
مراد ضحك:انت شكلك مش هتخلص من الراجل ده وابنه.
حسن:سيبك تعالى نقعد على القهوة شويا .
مراد:اومال حمزة فين؟
حسن:راح مشوار تبع الشغل وزمانه جاى.
مراد بص للبيت:غريبه ياجدع كل البيوت اللى فى الحارة انتو عارفين اصحابهم اشمعنا البيت ده؟!
حسن:معرفش الحاج قالى انهم كانو عايشين هنا ولما ربنا فتحها عليهم نقلو وعاشو فى ڤيلا فى اسكندريه ومنصور اخد العنوان من الحاج وراحلهم وعرف انهم باعوها من زمان.
مراد:امممم.
حسن:خلصت المهمه القوميه ولا لسه؟!
مراد ضحك:لا لسه يابطل .
حسن طلب شاى ليه ولمراد .
حمزة وصل وقعد معاهم:هو المعلم منصور مش ناوى يبعد عن بيت ده بقي ؟
مراد كان بيشرب وبص لحمزة لما اتكلم:هو منصور مهتم اوى بالبيت ده ايه !
حسن:عشان مساحته كبيرة ويعتبر معظم مساحه العمارة اللى ناوى يبنيها هتكون على ارض البيت ده.
مراد:طب هو اصحابه سابينه من زمان يعنى؟
حمزة:من واحنا صغيرين مشو من هنا.
مراد:راحو فين يعنى ماتو؟
حسن:الله اعلم زى ماقولتلك محدش يعرف عنهم حاجه.
مراد:مع علينا ياعم ... انتو مش هتعشونى ولا ايه انا جعان؟!
حمزة:وحياتك وانا .
حسن ضحك:عايزين تاكلو ايه؟
مراد:هتعزمنا يعنى ده ايه الكرم ده!!
حسن:طول عمرى ياباشا.
مراد:يبقي كباب وكتفه يامعلم.
حمزة:اوبا بقاااا.
حسن ضحك وطلع فونه وكلم مطعم يبعتلهم الاكل .
بعد شويا الاكل وصل والشباب اكلو وسهرو سوااا وبعدها كل واحد رجع على بيته.
بقلم الكاتبه جنات
ــــــــــــــــ★ــــــــــــــــ
حسن وحمزة راحو البيت وكل واحد طلع شقته .
حسن اخد شاور ولبس بنطلون قطنى ووقف فى البلكونه اللى بيحب يقضي فيها معظم وقته ... قعد على الكرسي ورفع رجليه على سور البلكونه وسند راسه على الكرسي وغمض عينه وفجاه رغد احتلت تفكيره زى كل يوم من وقت ماشافها .
بعد شويا فتح عينيه لما سمع جرس الباب
حسن اخد التيشيرت من على الكرسي ولبسه وراح يفتح واتفاجأ بعزة قدامه ولابسه بجامه صيفى وضيقه جدا عليها وفارده شعرها وعامله ميكب .
حسن بحده:انتى ايه اللى مطلعك هنا؟
عزة بدلع:كنت زهقانه قولت اطلع السطح شويا وشوفت نور شقتك من ازاز الباب عرفت انك صاحي قولت اشوفك لو عايز حاجه؟!
حسن:لا مش عايز منك حاجه ولو عوزت اكيد مش هطلب منك .... وتانى مرة متخبطيش على الباب ده طول مانا هنا .... وانزلى غيرى القرف ده معندناش بنات تطلع السطح بالمنظر ده ... يلا انجرى على تحت.
عزة اضايقت من طريقته بس متكلمتش لانها خافت من عصبيته او حد من البيت يعرف انها طلعت خبطت عليه ونزلت وحسن قفل الباب ودخل قلع التيشيرت ودخل ينام .
ــــــــــــــــ★ــــــــــــــــ
عزة نزلت وكانت سايبه باب الشقه مفتوح ودخلت اتفاجأت بحنين واقفه قدامها
عزة:انتى صحيتى امته؟
حنين:ايه اللى طلعك فوق؟
عزة:كنت طالعه اشم شويا هواا.
حنين:وهوا ده فى شقه حسن ؟!
عزة بتوتر:لا اصل انا شوفت نور شقته قولت يمكن محتاج يتعشي .
حنين:حسن لو عايز اكيد هيطلب منى ياعزة ... بابا لو عرف انك طلعتى خبطتى على حسن وهو لوحده هيضايق ... وانا ميرضنيش يكون فى مشكله بين بابا وحسن بسببك.
عزة:المفروض يكون عندك ثقه فى اخوكى؟!
حنين:لا ثقتى فى حسن وحمزة كبيرة جدااا ... بس ماعنديش ثقه فيكى بصراحه.
حنين سابتها ودخلت اوضتها وقفلت الباب وعزة كانت هتنفجر من الغضب ودخلت الاوضه اللى بتنام فيها هى واولفت امها اللى كانت صاحيه وسمعت كلام حنين .
اولفت:انا قولتلك حسن مش هيفرق معاه الشويتين اللى انتى عملاهم دول ومش هيعبرك ماصدقتنيش.
عزة نامت على السرير وهى متعصب:اما نامى انا مضايقه .
اولفت:نامى ياختى .
بقلم الكاتبه جنات
ــــــــــــــــ★ــــــــــــــــ
مرت الايام ورغد متابعه كلام فاروق ومازن اللى لسه بيخططو ومش عارفين يوصلو ازاى لرهف .
فى مكتب مراد فى القسم .
الباب خبط ودخل واحد اللى كان مكلفه يعرف البيت فين .
مراد:هااا يااشرف عرفت المكان؟
اشرف:ايوا ياباشا ومش هتصدق فين ؟
مراد:فين ؟!
اشرف:فى حارة البطل .
مراد:انت بتهزر !!
اشرف:اه والله فى حاره البطل وهو نفسه البيت اللى منصور عايز يهده .
مراد:معقول ...... تشكر يااشرف .
اشرف:انت تؤمر ياباشا.
اشرف خرج ومراد مسك فونه ورن على رغد
اللى كانت قاعده فى مكتبها فى المستشفى وردت عليه .
مراد:اهلا بالدكتورة.
رغد:دانا قولت انك نسيتنى والله.
مراد:وانا اقدر بردو ... عرفتلك البيت فين.
رغد:فين؟
مراد:فى حارة البطل.
رغد بصدمه:نعم فى حارة انت متاكده؟!
مراد:اه والله والغريبه انه كان قدامى وانا معرفش بس لما كلفت راجل تبعى هو اللى جبلى العنوان .
رغد:وحارة دى كويسه يعنى ولا زى الحارات الشعبي ومشاكل وكدا.
مراد:لا ماتقلقيش الحارة كويسه وهى تحت مسؤليتى ومن المناطق القريبه من القسم اللى انا فيه .... وبعدين عيله البطل اللى الحارة على اسمهم هما اللى مسؤلين عنها وكلمتهم ماشيه ومش بيرضو بالظلم ابداا .
رغد:ربنا يستر .
مراد:انتى بقي بتسألى علي مكانه ليه ؟!
رغد:عشان هعيش فيه انا ورهف الفترة الجايه .
مراد باستغراب:وهتسيبو القاهرة والڤيلا طب ليه؟!
رغد:شويا ظروف يامراد اكيد هابقي اعرفك لان الكلام مش هينفع على الفون ... قولى بقي هتبقي تيجى معايا اروح اشوف البيت .
مراد:اكيد طبعااا شوفى عايزة تروحى امته وانا معاكى.
رغد:خلاص هظبط كل حاجه وهابقي اكلمك ووصل سلامى لنورة .
مراد:اكيد يوصل يادكتورة .
مراد قفل ورغد سرحت شويا:حارة البطل .... فى حارة ياجدو دانا اللى قولت هيبقي بيت فى مكان راقى فى اسكندريه. .... بس صح ماما كانت بتقول انهم كانو على اد حالهم وجدو كبر شغله شويا شويا لحد مانقلو الڤيلا .... يلا حاره حارة اهو احسن من فاروق وابنه .
رغد كلمت مؤمن وعرفته انها هتروح تشوف البيت وكان معترض لانه فى حارة وكان عايز يروح معاها وهى رفضت عشان فاروق ميحسش بحاجه لما يغيب عن الشركه وطمنته ان مراد هيكون معاها وقفلت معاه وكلمت مراد تانى وعرفته انها هتيجى بكرة اسكندريه عشان تشوف البيت وقفلت معاه وكملت شغلها .....