رواية نجوم سرمدية الفصل العاشر10بقلم سبأ النيل
دة كل الحصل مع عبدو من هو صغير وللان .. للحظة دي ابوهو مفتكر انو مخطوف او ميت .. عبدو كل ما يتذكرو او تجي سيرتو حالتو بتتدهور .. بتعب نفسيا وجسديا لدرجة انو ممكن يمرض .. العذاب الكان متحملو من ابوهو للان ما قدر يتخطاهو .. انا وعوض حاولنا ننسيهو الحصل معاهو بشتى الطرق ووفرنا ليهو كل شي ممكن يحتاجو في يوم من الايام بس لسة فضل ابوهو هو نقطة الضعف الوحيدة في حياتو والي مفروض يكون نقطة قوة بالنسبة ليهو ... مسحت الدموع النزلت من عيونها وعاينت لي وابتسمت وانا الدموع تنزل واحدة ورا التانية زي المطر البصب في قزاز عربية ...
كان موقف غريب .. اتذكرت يوم قالي ربنا مرات بيديك حاجة وياخد منك حاجة .. مافي انسان كامل الكمال لله .. وقتها ياداب وقع لي قصدو .. فعلا عبدو اذكى بكتير من انو تطلع كلمة منو وهو ما قاصد بيها حاجة معينة .. اتذكرت مساعدتو لي دايما .. لمن كان بيهتم بي مشاكلي ويفتش لي حلول كانها مشاكلو .. معاملتو معاي ومع الناس ومعارفو الكتار .. كان بيدي الحاجة الهو فاقدها ودة تصرف نادرا ما يحصل من زول .. صحي ناسو واصحابو ومعارفو كتار بس انا اكيدة انهم ما قادرين يملو الفراغ الجواهو .. ولد صغير لسة ما قفل ال 15 سنة عاش معاناة مع اقرب انسان ليهو وسندو في الدنيا ... دي نقطة صعب تتخطى ..
الجو بقى هادي .. لا انا قادرة اتكلم ولا خالتو عوضية قادرة تحكي زيادة .. ماف واحدة فينا كانت بتعاين للتانية .. كل واحدة كانت بتتذكر في ذكرياتها .. بعد سكوت استمر لمدة وجيزة .. سمعنا صوت عبدو جاي نازل من فوق .. عايننا الاتنين تجاه السلم، كان جاي ومعصمو وكتفو مربوطين بي شاش ولابس فنيلة نص كم بيضا وبعاين لينا بي استغراب لغاية ما وقف قدامنا .. عاين لخالتو عوضية وتاني عاين لي وقالينا مالكم بتبكو يا جماعة الحصل شنو .. خالتو عوضية قشت عوينها وضحكت وقالت ليهو اتذكرنا حاجة بس .. قاليها حاجة شنو؟ عاين لي وقاليها ودي مالها جامدة كدة ! ... حرك يدو قدام وشي وقالي هي براءة انتي كويسة .. هي الووو بتعايني وين ...
كنت شايفة حركتو بس صوتو كان بعيد .. كنت بتخيل شكلو وهو صغير وكيف كان بيتضرب بالنار والسكين ويتجرح بالمشرط ويتسب .. لمن يئس عاين لي خالتو عوضية وقاليها امي ، البت حكيتي ليها قصة حليمة البعاتية ولا شنو اتشنجت كدة .. عاينت لي وقالت ليهو اااي تصدق ردة فعلها زي تسابيح بت مهند .. عاين لي بخيبة امل وقالي بت طول وعرض تخافي من قصص خيالية .. نحن مفروض نخاف منك وانتي بتتحاومي لينا بليل بعيون الكدايس بتعاتك دي ، انا اصلا شاكي انك متحولة ما انسانة .. امي حبوبي وين عايز ابلعها عشان مصدع ماشي انوم .. قالت ليهو واي نسيتها يا ولدي النمشي نجيبها ليك .. قامت عشان تجيبها ليهو وهو قعد مكانها وعاين لي مسافة وانا لسة سرحانة وبفكر .. عاين يمين وشمال لقى المسند شالو ونشن تمام وفكاني بيهو ...
انا اتخلعت واصلا كنت مفتكراهو فات من السرحة واخدت لي شهقة طويلة وختيت يدي في خشمي .. ضحك ضحكة خفيفة كدة وقالي قلبك خفيف .. كنت عايزة اتكلم لكن تاني سكتت .. قالي مالك انتي يابت امي قالت ليك شنو لمن بقيتي مؤدبة كدة .. انتي جادة انك اتأثرتي بقصة حليمة البعاتية ... سكتت شوية وقشيت عيوني وقلت ليهو اااااي ومالي ما بتاثر بيها قايل ما عندي قلب مع الناس ولا شنو .. يا ولدنا انا عندي تلاتة قلوب عديل ... سكت وهو بعاين لي بخشم شبه مفتوح ونص ابتسامة وفجأة فك الضحة لمن رجع لي ورا ... صفق تلاتة صفقات وهو لسة بضحك وقالي تلاتة قلوب ليييه قلبتي اخطبوط ولا شنو .. هدا شوية من الضحك وقالي وبعدين لو عندك تلاتة قلوب كنتي ح تكوني فصيحة كدة ...
جات خالتو عوضية وقالت ليهو ضحكنا معاك .. قلت ليهو هي يا ولد هي بطل قلة ادب عشان ما اقوم ادك بي سفنجتي دي .. شال الحبوب والكباية من خالتو عوضية وقاليها يا امي البت دي عندها سلك فاصل .. قلت ليهو يفصل ركبيك قايلني بلستيشن لمن تقول عندي سلك فاصل .. والله انت العندك صامولة فاكة .. ضحك وقالي يعني انتي ما بلستيشن بس انا مكنة صاح .. خير يا زولة .. بلع حبتو وقام على حيلو وقالي وانتي ماشة في الشارع حاول ما تتسكعي لينا جنب الكلاب عشان ما تقتلي ليك ولد ناس .. قلت ليهو طير من وشي يا ولد .. فات وهو بيضحك .. خالتو عوضية ضحكت وقالت لي مهند يموت ويخلي عبدو يضحك بالطريقة دي .. قلت ليها اي لاحظت حتى صحي يا خالتو هم الاتنين بشبهو بعض في التصرفات .. قالت لي اي عشان مهند كان على طول معاهو عشان كدة شال من تصرفات عبدو ... قلت ليها قصدك عبدو الشال من تصرفات مهند .. ابتسمت وقالت لي لالا عبدو تصرفاتو اصلا كدة .. قلت ليها سبحان الله .. قالت لي براءة يا بتي ما تحاولي تحسسي عبدو اني وريتك بموضوعو عشان ما يزعل ... قلت ليها لالا ما تخافي ان شاء الله ما بحسسو بحاجة ...
رجعت البيت جهزت الغدا وقعدت اتغدى مع ابوي سالني اها موضوعك لسة ؟ .. قلت ليهو للصراحة ما عارفة خليهو مرة تانية .. قالي البريحك يا بتي ما تشيلي هم متى ما حبيتي تحكي لي تعالي واحكي لي .. ابتسمت وقلت ليهو ربنا يحفظك لي يا ابوي ..
بعد خلصنا رفعت الصينية وغسلت العدة وبعد خلصت جاني اتصال من رقم غريب .. رديت قالي الو السلام عليكم معاي ايسكريم براءة ؟ .. قلت في نفسي ايسكريم براءة كيف يعني .. قالي الو .. قلت ليهو ايوا معاك اي معاك براءة .. قالي انا جربت الايسكريم بتاعك قبل كم يوم وعجبني شديد .. انا واهلي واقاربنا طالعين رحلة للحديقة زي اربعين نفر كدة .. قالي انتي بتعملي اربعة نكهات صاح .. قلت ليهو وانا بحاول استوعب في المكالمة دي اا ا اي اربعة .. قالي خلاص عايز لي 160 قطعة بحساب اربعة قطع بي اربعة نكهات لي كل نفر ... الحساب كم والتوصيل كيف .. طق قفلت الخط في وشو خلعة ساي ... دقيت على عبدو بعد جرسين رد .. قلت ليهو الحق في واحد دق لي قال عاوز يطلب مني ايسكريم عشان عندو رحلة عائيلة وانا ما عرفت اسوي شنو وقفلت الخط في وشو ..
قالي يا هبلة قفلتي في الخط في وشو ليه دة زبون .. قلت ليهو هي ياولد احترم نفسك .. قالي ما وقتك انتي كمان .. ارجعي ليهو وقليهو الرحلة متين وقولي ليهو التوصيل حسب المكان .. قلت ليهو ما بعرف .. قالي نحن خاتين رقمك في لوجو في كل كيس مفتكرة ليه يعني .. قلت ليهو ما عارفة ياخ .. دخل علي اتصال تاني قلت ليهو عبدو دة شكلو هو .. قالي دخليني في المكالمة انا بتكلم معاهو .. قلت ليهو طيب .. الزول قالي الو شكلو شبكتك كعبة الخط فصل .. عبدو قاليهو ايوا معليش معاك عبدالباقي قول لي طلبك اسجلو ليك .. الزول قاليهو ايوا انت شغال معاهم يعني .. قاليهو ايوا .. الراجل وراهو طلبو وعبدو سجلو واتفقو على المكان وزمن التسليم وسعر التوصيل وقفلو على كدة ... عبدو قالي الفرصة جات لحدي عندك .. لو زول اتصل عليك تاني اتصرفي معاهو نفس تصرفي دة تمام .. قلت ليهو طيب بس ح اعمل شنو اسي .. قالي بشرح ليك بعدين اسي اعملي القلتو ليك .. قلت ليهو طيب ...
قفلت الخط كدة ما امداني اتحرك من مكاني التلفون تاني رن رقم غريب .. رديت جاني صوت بت قالت لي ايسكريم براءة .. قلت ليها ايوة .. قالت لي عايزة اطلب كمية لبعد يومين وقلت احجز من بدري .. قلت في نفسي ياربي قايلاني مزحومة ولا شنو .. قالت لي الو .. قلت ليها ايوا ايوا اتفضلي ح اسجل طلبك .. جبت الكراس والقلم .. قالت لي عندي قعدة مع صحباتي عايزة لي 60 حبة على تلاتة نكهات .. قلت ليها طيب .. متين قالت لي بكرة ان شاء الله العصر كدة .. التوصيل كيف .. قلت ليها حسب المكان .. قالت لي طيب .. حددنا سعر الطلبية وسعر التوصيل .. قفلت كدة جاني تلفون من عبدو قالي الكمية الح نعملها بكرة 300 قطعة لو جات طلبات اكتر من كدة ارفضيها .. قلت ليهو طيب .. قالي الموضوع بدا يظبط ..
{لا تدري لعل الله يحدث بعد ذلك امرا}...