رواية نجوم سرمدية الفصل الثالث عشر13بقلم سبأ النيل
قلت ليهو مالك يا ابوي .. عاين مسافة ما بين عايز يتكلم وماسك نفسو .. جات خالتو عوضية ومعاها عبدو طالعين .. قلت ليها اقعدي شوية يا خالتو .. قالت لي يا ريت يا بتي لكن مهند جاي يتعشى معانا هو وبتو قلت امشي اعمل ليهم الاكل البحبوهو .. قلت ليها طيب لو احتجتي لي حاجة انا قاعدة .. ربتت بي يدها على كتفي وقالت لي يديك العافية انتي ارتاحي يا بتي .. يلا يا محمد معاك سلامة .. ابوي قاليها ما قصرتي والله ..
طلعو بي جاي ابوي دخل بي جاي .. قفلت الباب ولحقتو .. قعد في السرير ووقفت انا جنبو قلت ليهو ابوي في شنو مما جيت شكلك متغير .. الحصل شنو؟.. رفع راسو عاين لي وقالي ما حصلت حاجة يا بتي بس تعبان شوية .. ما اقتنعت بي كلامو وقلت ليهو لا انا حاسة في حاجة حصلت معاك ... سكتت شوية كدة وقلت ليهو عمو عثمان قاليك شنو .. قالي بي سرعة ح يكون قالي شنو يعني يا بتي ما قالي اي حاجة .. صحي يا براءة انا بفكر اشوف لي شغل بدل ما انا قاعد في البيت كدة ساي .. هنا انا اقتنعت انو عمو عثمان سمعو كلام .. قعدت قدامو ومسكت رجلينو وقلت ليهو لالالا يا ابوي شغل شنو انت ما بتستحمل الشغل ح تتعب وتمرض وتعذب نفسك ساي .. بعدين نحن مكتفيين الحمدلله وامورنا ماشة كويس ماف داعي تشتغل ..
قالي يا بتي ما معروف يمكن يجي يوم ونحتاج القروش دي .. انا كلمتك من بكرة ح انزل اشوف لي شغل .. سكتت مسافة وانا بعاين ليهو وقلت ليهو عمو عثمان قال عايز قروشو صاح ... عاين لي بي صدمة مخلوطة بي استغراب شديد وقالي شنو .. قلت ليهو دة عمو عثمان جاب ليك سيرة الدين الانت اتدينتو منو وقاليك ترجعو ليهو عشان كدة انت عايز تشتغل صاح .. قالي انتي .. انتي عرفتي الكلام دة كيف .. قلت ليهو يعني دة الحصل! .. قالي الكلمك منو بالكلام دة .. قمت وقعدت جنبو في السرير وقلت ليهو عمو عثمان لاقاني قبل فترة وحكى لي بي موضوع القروش الانت اتدينتها منو وقالي اذا ما رجعتها ليهو ح يشتكينا ويسجنك كمان ..
كنت قادرة اشوف الصدمة في عيونو .. قالي متين حصل الكلام دة ولييييه ما وريتيني .. قلت ليهو ما كنت عايزة اوريك عشان ما تشيل هم ساي وتقولي عايز اشتغل زي ما حصل اسي .. بعدين ما تشيل هم يا ابوي انا جمعت تلت ارباع المبلغ باقي لي بس حاجة بسيطة ونتمو ونديهو ليهو ... قالي يعني الزمن دة كلو كنتي انتي الشايلة الهم وبتجمعي في المبلغ .. قبل قدامو وختا يدو في راسو وقال غير الهموم ما جبت ليك حاجة يا بتي ... مسكت يدو وقلت ليهو ما تقول كدة يا ابوي دي ابتلائات بتعلمنا الصبر والاجتهاد ولا ما كدة .. انت مش كنت بتقولي الدنيا امتحانات واختبارات وما بنجح فيها الا شديد العزيمة .. عيونو رغرغو وقالي لكن .. قلت ليهو ما لكن ولا حاجة .. بعدين انا قلت ليك القروش شبه جمعتها كلها يعني المشكلة شبه انحلت عشان كدة ما تشغل بالك بيها كتير ..
مسح عيونو وقبل علي سلم علي في راسي وقالي ربنا يحفظك يا بتي ويديك على قدر ما عايزة .. ضحكت وقلت ليهو يلا خلاص ما تقلب الجو درامي ياخ عشان انا جعانة وح تكون شينة لو اكلنا بعد ما نبكي .. ضحك مسافة وبعدها سكت فجاة وملامحو تاني اتغيرت .. قالي الراجل الاسمو عثمان دة ما يكون بتعارض ليك كتير .. قلت ليهو والله بلاقيهو مرات مرات بالصدفة ولمن الاقيهو غير سيرة القروش ما بجيب وكمان جايب رقمي من وين ما عارفة مكرهني حياتي .. ابوي دة بس زي الشرر في عيونو .. قلت ليهو بي استغراب مالك يا ابوي .. قالي الراجل دة عينو ما تشوفك تاني ولو دق ليك ما تردي عليهو ولا تتكلمي معاهو .. انا خلاص الموضوع دة بقى عندي .. قروشو اللميتيها ليهو دي انا بسلمها ليهو طيب؟! .. كان بتكلم بي لين وغضب في نفس اللحظة .. ما فهمت مالو بس قلت ليهو خلاص طيب .. احسن زاتو تكون ريحتني منو ومن نقتو .. ابتسم وربت على كتفي وقالي الله ينور عليك يا بتي .. قومي انتي صلي عشان الزمن ما يفوت .. قلت ليهو حاضر قايمة ...
تاني يوم الصباح بي وشي على الروضة .. باقي يومين بس واخلص تدريس في الروضة وكمان باقي يومين عشان ادي الراجل قروشو .. اديت الحصص بتاعتي وخلصت مشيت شلت القروش . وانا طالعة على الباب سمعت صوت بناديني ..قبلت وراي لقيتها وصال بتاشر لي من بعيد .. جاتني وسلمت علي .. قالت لي امس جيت وما صادفتك كالعادة يعني قلت احتمال نتطاقش جنب الباب .. ضحكت وقلت ليها لو جيت كنا اتطاقشنا .. بس امس كنت تعبانة شوية وما قدرت اجي .. قالت لي سلامتك الف سلامة مالك .. قلت ليها ارهاق بس ما حاجة خطيرة .. قالت لي ما تشوفي شر يارب ..
اثناء ما نحن بنتكلم كدا جا ولد صغير كدة تقريبا بقرا في المستوى الاول في الروضة ... كان جاي من بعيد وقاليها وصااااااال ... عاينت وراها ولقتو جاي كسلان كدة .. جا وقف وقاليها امسكي الشنطة .. قالت ليهو يا ولد انت قايلني خدامة تحتك شنو كل مرة امسكي الشنطة امسكي الشنطة احترم نفسك .. قاليها تقيلة ياخ .. شالتها منو وقالت ليهو الشنطة اخف من وزن الكتاب يا كذاب .. ضحكت وقلت ليها دة اخوكي .. قالت لي اي والله مطلع عيني شافع قليل ادب .. عاين يمين وشمال وقاليها تسابيح وين انا تعبت ماشي البيت انوم .. مع سؤالو دة جات تسابيح جارية وحضنت وصال وقالت ليها خالتو خالتو عايني الليلة ادونا شنو ..
عاينت ليهم بإستغراب وقلت معقولة وصال خالة تسابيح؟ .. تسابيح عاينت لي وقالت لي ماما عسلية ؟ انتي لسة قاعدة ؟ .. وصال عاينت ليها وتاني عاينت لي وقالت لي بالله دي انتي ماما عسلية ؟! .. ضحكت وقالت تسابيح بتحكي لينا عنك على طول .. قلت ليها بالجد ؟ .. قالت لي ايوا وبتقول انو عايزة عيونها تكون عسلية زيك كدة .. ضحكت وقلت ليها سبحان الله ما اتوقعتك تكوني خالتها .. تسابيح متميزة في الفصل ماشاء الله ربنا يحفظها .. الولد الصغير قالينا خلاص انا زهجت ماشي البيت .. ضحكنا .. تلفون وصال رن .. ردت وقالت اها وين الليلة .. يامهند عليك الله ما تجنني .. اي مشيت اجيبهم .. ما خلاص بقت شغلة هي كل مرة انا اجيبهم انا وراي جامعة والله ما فاضية ليك .. ما ترشيني .. خلاص تمام .. طيب مع السلامة ..
قفلت الخط وقلت سبحان الله يعني وصال اخت مهند ؟! .. صدفة غريبة .. قالت لي رايك شنو بقيت خدامة عند ولدين .. ضحكت وقلت ليها استحملي عشان لقمة العيش .. ضحكت لمن دمعت .. سلمنا على بعض وطلعنا .. مشيت بإتجاه الموقف .. وانا ماشة سمعت صوت بوري قمت زحيت من الشارع .. تاني سمعت الصوت وصوت بت بتنادي .. قبلت وراي لقيتها وصال .. وقفت العربية جنبي ونزلت الشباك القصادي وقالت لي براءة؟ .. شارعنا واحد ولا شنو ؟ .. ماشة وين .. قلت ليها ماشة {...} .. قالت لي انا بمر بي هناك اطلعي اوصلك قلت ليها لالا ماف داعي .. قالت لي اطلعي يا بت نتونس بدل معاي القردين ديل .. عايزة زول بنفس مستوى ذكائي الفكري .. ضحكت وقلت ليها طيب .. قالت مصطفى نط ورا مع تسابيح فضي لي الكرسي دة سريع .. رجع ورا وركبت معاهم واتحركنا ....
قالت لي انتي يا براءة ما عندك اخوات ؟.. قلت ليها لا والله انا وحيدة امي وابوي .. امي متوفية وياهو قاعدين انا وابوي .. قالت لي يعني انتي الكل في الكل .. ضحكت وقلت ليها ايوا .. قالت لي انا عندي تلاتة اخوان بس انا البت الوحيدة .. قلت ليها ماشاء الله .. مصطفى طلع راسو بين الكرسيين وقالي انا واحد من اخوانها ... قالت ليهو اتشرفنا رجع راسك دة .. ضحكت .. عايزة تتكلم كدة تلفونها رن .. قالت لي ثواني عن اذنك .. حركت ليها راسي .. ردت وقالت الو نعم .. ياخ بطل نقة الشارع زحمة ... خلاص كلم امي .. ... يا مهند عليك الله وديها .. اي انا .. سكتت وعاينت في شاشة التلفون وقالت المعفن قفل في وشي .. ضحكت .. عاينت لي وقالت لي عاملني مهزلة .. ارح نتبادل الادوار .. اكون انا بت وحيدة وانتي عندك اخوان .. قلت ليها لالا شكرا .. ضحكت وقالت لي ما اتوقعتها منك ..
نزلت منها في الزلط البدخل على بيتنا وتميت الباقي بي رجليني .. وانا ماشة في الشارع على البيت لاقيت عبدو كان شايل شنطة كبيرة مغلفة وماشي على البيت .. سلمت عليهو وبقينا ماشين .... قلت ليهو جاي من وين .. قالي مشيت اشتريت شنطة سفر عشان العندي صغيرة .. قلت ليهو اممم عشان تسافر ! .. قالي لالا عشان اتزحلق بيها ... قلت ليهو المهون علي السفرة دي هي قلة ادبك دي .. قالي ما قلة ادب ولا حاجة لكن انتي بتسألي اسالة غبية .. قلت ليهو خلاص اسكت مني .. ضحك وسكت شوية كدة وقالي على فكرة ح افقدك .. كنا وصلنا ووقفت قدامو .. قالي اكتر حاجة ح افقدها غبائك دة .. رفعت ليهو حاجبي .. ضحك وقالي ما عشان قلنا عيونك حلوة ترفعي لي حواجبك .. قلت ليهو يا حاسد ..
على العموم انا ما ح اقدر ادير الشغل زيك بعد ما تسافر .. صحي انا الكبيرة لكن انت الفاهم .. قالي انا عارف انك ح تقدري تديري الشغل براك .. بعدين هو شنو ما ايسكريم بس .. ما ح اقوليك ح ما ح تواجهي مشاكل .. لا انتي ح تواجهي وكتير .. بس خلي عندك عزيمة .. الدنيا تكفتك بي جاي تكفتيها بي جاي زي المجنومة .. ما من اول عائق تقعي وتنكسري .. على الاقل قولي عبدو ما كان ح يرضى اني استسلم ... قلت ليهو لكن اذا كانت اول مشكلة بدونك اكيد ما ح اعرف اتصرف .. بقوليك الصراحة انا .. سكت شوية .. دخل يدو في جيبو وطلع لوحين شوكلاتة .. فتح واحد ختاهو في خشمو واداني واحد ....
قالي اكليها .. عاينت ليهو بي استغراب وفتحتها اكلت منها .. قالي حسستك بي شنو .. قلت ليهو امممم ادتني طاقة وحلوة كمان .. قالي اذا اختفت بتقدري تكملي حياتك بدون الطاقة البتديك ليها .. قلت ليهو اكيد ما شرط .. قالي كمان بتقدري تكملي حياتك بدون الطاقة والدعم البديك ليهم انا او اي زول تاني قريب منك .. انتي عارفة انو الشوكلاتة دي يمكن ما تلقيها في يوم .. كمان اعرفي انو انا او الناس ديل ممكن ما تلقيهم في يوم .. عشان كدة تكوني جاهزة تكملي حياتك بدون اي انسان ....
طلع لي لوحين تاني واداني ليهم .. ابتسم ابتسامة خفيفة وقالي يلا امشي البيت .. دخل وبقيت انا واقفة وساكتة ...... اخدت نفس طويل وطلعتو .. مشيت البيت لقيت ابوي نايم .. عملت الفطور وصحيتو فطرنا سوا وصلينا الضهر ... بعدها دخلت ختيت القروش مع قروش الراجل وخلاص باقي بيعة واحدة بس واكمل ليهو المبلغ ... عديت القروش ودخلتها في الدولاب ومشيت غسلت العدة وجيت اخدت لي نومة طويلة .. صحيت على صوت تلفوني برن .. مديت يدي شلتو وفتحت الخط وقلت الو .. جاني صوت عبدو قالي صباح الخير يا استاذة .. قلت ليهو وانا خلاص عايزة انوم تاني .. في شنو يا عبدو .. قالي شنو هو الفي شنو قومي ارح تعالي نجهز الطلبية .. انا لو سافرت انتي ح تكسري حنكها يعني ولا شنو ...
قلت ليهو يووه طيب جاية ... قمت استعدلت في السرير وجاتني سرحة .. سمعت اذان العصر بأذن .. قمت على حيلي مشيت غسلت وشي واتوضيت وصليت ... بعد خلصت رقدت في المصلاية وكانت باااردة .. قلت بس انوم خمسة دقايق .. غمضت عيوني كدة التلفون رن .. رديت عبدو قالي عليك الله ما تنومي تاني ارح خلصينا .. قعدت اتلفت قالي انا في البيت ارح خلي الكسل ... قلت ليهو طيب جاية .. قمت ولميت المصلاية ومشيت كلمت ابوي .. طلعت ومشيت جهزنا الطلبية وكان في كم طلبية من الصفحة لي بكرة جهزناهم .. طلعنا حقات الليلة العملناهم امس وجا بتاع التكتك رفع الصبارة عشان يوصلها للعنوان ..
بعد ساعتين جا راجع وجاب لي القروش .. عبدو قالي نقول مبروك .. كدة بي اعتبارو الدين اتحلى ... حرفيا انا دمعت لمن استوعبت انو طلعنا من موضوع القروش دة ... عاينت لي عبدو .. قالي اوعك تقولي لي اي حاجة .. دة تعبك انتي كمان .. قلت ليهو شكرا ليك ياعبدو .. لو ما انت ما عارفة كان ح يحصل شنو .. ابتسم وقالي ما تشكريني .. اشكري الله لانو هو الوفقنا في الموضوع دة ..
رجعت البيت ودخلت القروش مع اخواتها واخيرا القروش تمت .. اخيرا الهم دة اتشال من اكتافي .. مشيت عشان اكلم ابوي لقيتو نايم ... قلت ما مشكلة بكلمو بكرة .. تلفوني رن لقيتو عمو عثمان .. قلت يا سبحان الله .. شكلو حسا بي قروشو ... اتذكرت ابوي قالي ما تردي عليهو .. بس قلت اكلمو اني لميت القروش وح اديها ليهو بعد بكرة في الموعد .. رديت وقالي الو .. قلت ليهو الو وعليكم السلام .. قالي براءة القروش بكرة تصلني .. استغربت وقلت ليهو مش مفروض بعد بكرة ؟ .. قالي يا زولة انا عايزها بكرة دي ولو ما جبتيها ح اسجن ابوكي ... سكت كدة وقال الا لو ح توافقي بالحل التاني ...
استغربت يعني نحن متفقين على بعد بكرة .. يجي يقولي بكرة ؟ .. شكلو عايز يدخلني في حتة ضيقة .. قلت ليهو طيب بكرة بكرة .. ابوي بكرة بجيبها ليك .. قالي بي صوت عالي شنوو؟! .. قلت ليهو شنو الشنو ؟ .. قال بي تمتمة كدة يعني لميتو القروش؟ .. قلت ليهو ايوا وبكرة بتصلك .. قالي ل ل لكن ... قلت ليهو لكن شنو .. قالي قدرتي تجمعيها كيف .. قلت ليهو دة ما مهم ..المهم انها ح ترجع ليك .. يلا مع السلامة .. قالي لحظة .. بس انا قفلت الخط في وشو ... بعد شوية تاني دق لي قلت ليهو ايوا .. قالي بي ضحكة كدة طيب جيبو لي القروش بكرة في السوق انا مافيش في البيت ... قلت ليهو في السوق؟ .. لكن ابوي ما بقدر يمشي المشوار دة كلو ... قالي خلاص جيبيهم انتي .. قلت ليهو انا .. قالي اي .. سكتت شوية وتاني قلت ليهو طيب تمام .... قالي بس اتذكري اذا القروش بكرة ما جاتني ... بي وشي على القسم و .. قلت ليهو طيب طيب فهمت ...
مشيت صحيت ابوي وكلمتو وبعد الحاح حتى وافق اني اوديها بي شرط اني اسوق عبدو معاي .. دقيت لي عبدو كلمتو قالي خير ما مشكلة .. رقدت وانا مرتاحة وراسي رايق وقلت الحمدلله اخيرا اتخلصت منو ... صليت العشا ورقدت نمت .. صحيت نص الليل بي صوت كركبة .. قمت ولقيت باب الصالة فاتح .. استغربت وقلت ابوي صحى ولا شنو .. قمت على حيلي وفتحت نور الصالة وطلعت برا .. مع ختت رجلي في عتبة باب الصالة شفت زول تلب من البيت على الشارع بالحيطة .. كهربة سرت في جسمي .. واول حاجة خطرت على بالي هي القروش ...
دخلت جوا جري وفتحت الدولاب ويديني برجفو .. نزلت الملابس كلهم دفعة واحدة وهنا كانت الصدمة ... القروش مافيشة .. القروش اختفت .. او بالاصح اتسرقت ... غالطت نفسي ونزلت باقي الملابس من الدولاب وفرتقتهم لكن ما لقيتهم .. قعدت قبلي في الارض بحاول استوعب .. لمن استوعبت الموضوع بقيت ببكي .. القروش ما كانت هينة .. بس ليييه الليلة .. انا اسي اعمل شنو .. ابوي ح يودوهو السجن؟! .. ح يتعب لو دخل السجن وهم ما عندهم رحمة ... بكيت بكيت قدرتي ... حسيت روحي ضايعة ... انا عملت كل حاجة عشان اجمع القروش دي 14 يوم هالكة نفسي ونفسياتي عشان اجمعهم ...
الساعة كانت واحدة وقعدت في مكاني داك للساعة 3 .. حرفيا مخي اتشل .. اشتغلت شغل اضافي وفتحت مشورع ووفرت نص مبالغ كل يوم عشان اقدر اجمعو .. يجي في لحظة بس كدة يختفي .. يتشال بي كل سهولة؟ .. ..... بقيت افكر ح اعمل شنو .. ح اتصرف كيف .. يئست والله .. راسي شطب .. بس كل حاجة ولا ابوي يدخل السجن .. قمت على حيلي مشيت اتوضيت وانتظرت الفجر يأذن ... بعد ما اذن صليت .. الصباح لمن اصبح وديت لي ابوي الشاي في السيرمس لقيتو نايم .. .. ختيت ليههو ورقة مكتوب فيها انا طلعت .. بجي قبل الفطور إن شاء الله .. .. طلعت وانا مقررة اني ح امشي الاقى عمو عثمان واتكلم معاهو واشرح ليهو الحصل ... ان شاء الله يتفهم ويديني مهلة تانيةاقدر الم ليهو فيها قروش ...
حرفيا طلعت وانا محطمة وخاتة احتمال انو يوافق بعيد شديد .. انا ممكن اعمل اي حاجة ولا اني اشوف ابوي مجرور ومجدوع في السجن المعفن دة ... طلعت وقفلت باب البيت براحة ... قبلت وراي لقيت عبدو خاتي كرسي قدام باب بيتهم وخالف رجلو وبشرب في الشاي .. الزمن كان بدري بس دي عادتو .. كان سرحان وبتأمل بي عيونو لغاية ما لمحني ... استعدل وعاين لي بي استغراب .. ختا كباية الشاي ووقف على حيلو .. انا اتحركت مشيت .. سمعتو بنادي بس ما رديت عليهو .. جا جاري وقف قدامي وقالي براءة! .. اصبحنا واصبح الملك لله .. ماشة وين من الصباح .. عاينت ليهو بدون ما اتكلم .. قالي مالهم عيونك ديل حمر كدة ؟! .. انتي كنتي بتبكي ؟! .. براءة بتكلم معاك انا في شنو ؟!
دموعي نزلت غصبا عني ... قالي يا بت بسم الله مالك الحصل شنو ... قلت ليهو القروش .. قالي قروش شنو .. قلت ليهو قروش الراجل اتسرقت من البيت .. عاين لي بي صدمة وقالي كيف .. قلت ليهو صحيت بليل لقيت الحرامي دخل البيت وسرق القروش .. القروش كلها اتسرقت .. ودموعي نزلو زيادة وزيادة .. سكت مسافة وتاني قالي طيب اهدي ... اسي انتي ماشة وين ... قلت ليهو ماشة الاقي عمو عثمان واكلمو بالحصل .. ما عرافة ردة فعلو ح تكون شنو بس لازم اكلمو ... قالي طيب طيب اهدي .. انتظريني اغير واجي امشي معاك .. قلت ليهو لالا انا ماشة براي ... قالي يا بت انتظري اسي بجي سريع نحن اصلا متفقين نمشي سوا صاح ؟ .. قلت ليهو طيب .. طيب ما تتاخر ..
جرا سريع دخل البيت غير ملابسو واتاخر شوية بس جا طالع ومشينا سوا .. دقيت ليهو تلفون قلت ليهو انت وين ... ضحك وقالي في المحل بتاعي .. مالو صوتك كدة ااا وبقى يضحك .. قلت ليهو انا جاية في الشارع .. قالي طيب اسرعي ... عبدو قالي روقي ما ح يعمل حاجة ... وصلنا المحل ولقيناهو قاعد بشرب ليهو في سجارة .. قعدنا وقالي دة منو كمان .. عبدو قاليهو وح تفرق بي شنو .. قلت ليهو عبدوو .. سكت .. عمو عثمان قالي اها وينا القروش .. قلت ليهو اتسرقت .. ضحك ضحكة طويلة كدة وقالي شنو؟ اتسرقت ؟! .. اتسرقت متين؟! .. قلت ليهو امس ... عبدو كان بعاين ليهو وقاليهو ومالها ردة فعلك باردة كدة .. عمو عثمان قاليهو لالا ولا حاجة .. افتكرتها بتهظر طبعا ..
{لا تدري لعل الله يحدث بعد ذلك امرا} ..