رواية نجوم سرمدية الفصل السادس عشر16بقلم سبأ النيل
صلوا على النبي🖤
تاني يوم صحيت الفجرية والجو كان بارد شديد .. عن نفسي ما كنت عايزة اقوم من السرير لكن لازم اقوم اصلي وبعدين اقبل على مشاوريري الكتيرة الليلة .. قمت وطلعت الدفاية من الدولاب ولبستها لفيتها كويس وطلعت اتوضيت ومشيت صحيت ابوي عشان يصلي .. صليت الفجر وبعد ما خلصت مشيت سويت الشاي ورصيت البسكويت ورفعتو مشيت على ابوي .. ختيت الصينية والسيرمس وعاينت كدة لقيت ابوي قاعد في المصلاية لسة .. قلت ليهو ابوي تعال اشرب الشاي .. قالي اقعدي جاي جاي ... مسافة ما هو جا وقعد كنت انا كبيت الشاي وقعدنا نشرب .. قالي شغلك ماشي كيف يا بتي .. قلت ليهو عال العال الايام دي الشغل كتير بس .. قالي ما يكون عندك مشكلة كدة ولا كدة داسة علي ؟ .. ضحكت وقلت ليهو لالا ما تخاف وحتى لو في مشاكل بتكون بسيطة وان شاء الله بحلها .. قالي ربنا يوفقك يا بتي والله تعبتي كتير .. قلت ليهو اللهم امين يارب .. قالي اها ما فكرتي ترجعي تكملي الجامعة ؟ .. ختيت الكباية وفردت ضهري على الكرسي وقلت ليهو والله يا ابوي كان نفسي اكملها بس زمنها فات .. قالي لكن القراية ما عندها زمن .. قلت ليهو فعلا لكن طريقي البديتو دة عايزة اكملو للاخر .. ما اظن ح اقدر اوفق بين الجامعة والشغل .. قالي لكن يا بتي الشهادة مهمة شديد .. قمت على حيلي ورفعت صينية الشاي وقلت ليهو انا ما مابياها وان شاء الله لو ربنا خاتي لي فيها قسمة بتجي ...
مشيت غسلت العدة ورشيت الحوش وقشيتو وجهزت الفطور لي ابوي كانت الساعة عملت 6 وربع .. على طول مشيت طلعت لي عباية طلعة كبدية كدة عايزة اكويها مسكت المكوة وماشة على كوبس الكهربة فجأة المروحة وقفت والكهربة قطعت .. بقيت واقفة ماسكة المكوة والعباية وبعاين ساي .. قلت لي نفسي استاهل عشان تاني اكوي بدري بدري .. طبقت العباية ورجعتها الدولاب ومشيت رشيت العريشة لي ابوي عشان يقعد فيها مسافة الكهربة تجي ورجعت طلعت العباية الرمادية المكوية .. استحميت واتجهزت وطلعت برا الساعة 6و45 دقيقة تماما ومع طلعتي لمحت عربية وصال جاية .. وقفت قدامي مشيت ركبت قالت لي صباح الخير .. قلت ليها صباح النور .. الليلة عملتيها كيف وظبطتي الموعد .. قالت لي يخس عليك انا لمن اتاخر بكون عشان ظروف بس .. تسابيح قالت لي هييي كذابة قامت بدري عشان تمشو تشوفو فستان العرس .. عاينت ليها بطرف عيني كدة وقلت ليها ظروف قلتي لي ... قالت لي خلو الكلام الكتير ح نتاخر على مدرستكم .. اتحركنا وصلنا تسابيح ومصطفى للمدرسة ومنها اتحركنا على المحل .. مشيت على طول فتحت المحل والعمال والعاملات جو داخلين بعدينا بعشرة دقايق ... اتفقدناهم كدة وطلعنا على المكتب .. قلت لي وصال انا طالعة .. قبلت عاينت لي بإستغراب وقالت لي طالعة ؟ ماشة وين؟ .. قلت ليها مشوار .. قالت لي عارفاهو مشوار مشوار على وين .. قلت ليها لمن ارجع ان شاء الله بوريك .. جيت طالعة قالت لي طيب اقيفي اوصلك .. قلت ليها لالالا انتي خليك قاعدة لو حصلت اي حاجة حليها انا ما بتاخر .. قالت خلاص تمام ...
طلعت وركبت المواصلات من طرف الشارع ونزلت في المستشفى الجابو فيها ال 33 حالة الاتسممت .. بقيت واقفة والناس ماشة وجاية وانا بتلفت ما عارفة اعمل شنو .. وقفت لي واحدة من الممرضاات الحايمات ديل وسالتها منهم .. قالت لي اي طلعوهم تاني يوم طوالي .. قلت ليها الحمدلله وكيف هم اسي .. قالت لي حالتهم اتحسنت واعتقد حاليا بكون ما عندهم حاجة .. قلت ليها طيب سبب التسمم شنو لي ناس قدر كدة .. عاينت لي شوية بدون ما تجاوب بس تاني قالت لي كان عندهم عزومة واكلو لحم فاسد .. اظن بتاع الملحمة غشاهم .. قلت ليها لا حولو ولا قوة الا بالله معقولة .. قالت لي اي والله .. قلت ليها الكلام دة مدون ولا حاجة؟ .. قالت لي اي مكتوب في التقرير .. قلت ليها ممكن اخد نسخة منو .. سكتت تاني شوية وقالت لي انتي بتبقي ليهم ولا شنو؟ .. قلت ليها االا بس انا نظمت ليهم التحلية من المحل بتاعي وغلبنا نعرف سبب التسمم شنو .. قالت لي لكن الدكتور وراهم سببو شنو .. قلت ليها برضو للتاكيد لو حصلت اي مشكلة .. قالت لي طيب اتفضلي انتظريني وانا بمشي اجيب ليك نسخة واجي ..
اخدت نفس طويل وقلت الحمدلله كنت متاكدة انو سبب التسمم حاجة تانية .. لكن ليه هم مصرين اني انا السبب في حين انو الدكتور كلمهم .. ح يستفيدو شنو يا ربي .. يمكن عايزين يستفيدو من الحاجة دي لصالحهم .. الممرضة جات وادتني التقرير وقالت لي حمدالله على سلامتهم خليهم المرة الجاية يتاكدو من ملمس اللحمة قبل يعملوها لانو الريحة ممكن يدسوها .. قلت ليها ان شاء الله، يديك العافية .. شلتو وجيت طالعة من باب المستشفى وانا ماشة كدة لمحت مهند جاي من برا .. لمن شافني جاني وقالي براءة؟ .. مالك عندك شنو في المستشفى .. ما تكوني عيانة .. قلت ليهو لالا كويسة الحمدلله ما عندي حاجة .. قالي طيب جيتي المستشفى ليه .. قلت ليهو جيت اشيل تقرير التسمم حق الناس العملو لي مشكلة الاسبوع الفات .. سكت شوية ركز في كلامي و قالي بإستغراب يعني هم جابوهم هنا ؟ .. قلت ليهو اي .. قالي طيب ليه ما كلمتيني انا ما شغال هنا .. كنت بجيبو ليك .. عاينت ليهو بغباء وقلت ليهو نسيت والله .. ما مشكلة خلاص المهم جبتو .. عاين كدة وقالي وصال جات معاك .. ضحكت وقلت ليهو لالا حرستها المحل وطلعت قالي خير يا زولة .. عاين في ساعتو وقالي خلاص تعالي اوصلك مش راجعة المحل؟ .. قلت ليهو اي لكن ماف داعي برجع براي ما اشغلك .. قالي تشغليني شنو بعدين انا طالع مشوار بس منتظر امجد يجي طالع ... المكان الماشين ليهو بي شارع المحل بوصلك في شارعنا ..قلت ليهو طيب تمام ..
وقفنا شوية وبعد خمسة دقايق كدة جا امجد طالع .. سلم علي وقالي مالك قاطعة خبر .. قلت ليهو مع الشغل بس والله كيفك انت وكيف ناس البيت .. قالي كويسين كلهم بسلمو عليك .. قلت ليهو بسلمو علي ؟ ضحك وقالي بإعتبارهم بسلمو عليك ... مهند قاطعنا وقالينا ما خلاص يا جماعة ارح اطلعو .. قلت ليهو اها طيب طلعنا ... طلعنا ونحن في الطريق كنت بصور في التقرير لي عبدو .. امجد لمحني وانا بصور قالي براءة بتصوري في شنو .. مهند قاليهو دة تقرير تسمم .. في ناس عاملين ليها مشكلة واتهمو المحل بتاعها انو السبب ليهم التسمم في حين انو التقرير بقول عكس كدة .. قاليهو ياخي؟ .. وليه ما كلمتني .. قاليهو طلع من بالي والله .. قالي وبتصوري فيهم ليه .. قلت ليهو عايزة ارسلهم لي عبدو عشان يتصرف .. قالي ليه ترسليهم لي عبدو الولد لسة ما فاهم في الحاجات دي مدا لي يدو وقالي جيبيهم انا بحلها ليك .. عاينت ليهو وتاني عاينت لي يدو وسكتت مسافة وقلت ليهو لالا ماف داعي والله تسلم كتير .. قالي يا بت جيبيهم عبدو ما بكون فاضي او اديهم لي مهند .. بقيت ساكتة ساي ... مهند قاليهو ما تخليها يا امجد تعمل العايزاهو .. عبدو هو الوحيد البتكون واثقة من تصرفاتو وما هي براها حتى انا .. امجد عاين ليهو وقفل يدو وجراها عليهو وقبل قدامو وقالينا عجيب امركم .. المهم لو احتجتي مساعدة ما تترددي ..
وصلوني المحل وقبل ما انزل مهند قالي ماشين انتي ووصال تختارو الفستان الليلة صاح .. قلت ليهو اي .. قالي محتاجين حاجة ؟ .. قلت ليهو لالا ابدا بنمشي ونرجع سريع .. قالي اذا الفستان وحاجاتو ح يتلتلوكم انتو اختاروهو وانا بجي ارفعو بعدين منهم .. قلت ليهو لالا ماف داعي وكويس انو وصال عندها عربية بنرفعو ورا ما ح يعذبنا بإذن الله .. قالي خلاص تمام خلو بالكم ..
نزلت وانا ماشة على بوابة المحل لاقاني بتاع الدلفري .. وقفتو قبل ما يمشي وقلت ليهو احمد كيفك .. قالي اهلا براءة كويس انا الحمدلله كيفك انتي .. قلت ليهو كويسة والله .. امك بقت كيف ان شاء الله الازمة ما قامت عليها تاني .. قالي لالا الحمدلله بقت كويسة بفضل الله ثم بفضلك انتي ما قصرتي معانا .. قلت ليهو عيب ياخ ما تقول كدة .. اها قرايتك ماشة كيف تالتة دي شد فيها حيلك ومتى ما تحتاج اجازة عشان تقرا كلمني .. قالي ان شاء الله ما بتقصري .. قلت ليهو يلا عشان ما تتاخر على الزباين .. حرك راسو وابتسم بمعنى كويس ودور فات .... مشيت على باب المحل جات وصال طالعة خلعتني .. قلت ليها بسم الله مالك يا بت .. قالت لي ارح نمشي نجيب الفستان ياخ لو اتاخرنا تاني ما بمقدر امشي معاك .. قلت ليها الزمن لسة بدري ... جرتني من يدي وركبتني العربية وختت لي الحزام وقفلت الباب وجات ركبت ودورت وانا دة كلو مخلوعة .. عاينت ليها وقلت ليها دة شنو دة دة اسمو خطف .. قالت لي لمن تخلي مواسيرك دي ح استشيرك المرة الجاية ..
اتحركنا على محل الفساتين ودخلنا سلمنا على ست المحل وبقينا بنشوف في الفساتين واحد ورا التاني .. ووصال ما بتاشر لي الا على الفساتين الطويلة من تحت .. قلت ليها وصال الفستان دة بعدين ح تلبسيهو انتي ما تختاري ليك جبل عشان تقعي بيهو في نص العرس .. قالت لي انتي عارفة يا براءة .. قلت ليها شنو .. قالت لي ما عارفة مخي كان وين لم قلت ليك تختاري معاي فستان عرسي .. ربتت على كتفها وقلت ليها معليش حبيبتي ابقي اتعلمي من اخطائك ومشيت خليتها واقفة تعاين لي وانا اتفرج في الفساتين .. بعد شوية سمعتها بتنادي فيني اتلفت عليها قلت ليها ايوا .. قالت لي واي يا براءة شوفي الفستان دة سمح كيف .. عاينت ليهو وفعلا كان رهييب شديد .. بس لم نزلت بنظري لي تحت لقيتو كمان طويل وفاري شديد .. عاينت ليها بطرف عيني وقلت ليها اسالك سؤال يا وصال .. قالت لي اها .. قلت ليها انتي مهند ح يقيف وين مع الفستان دة .. قالت لي وهي بتتأمل في الفستان ما فرقت ماف داعي يقيف زاتو .. قلت ليها الله!؟ .. في عرس بدون عريس .. انتبهت من سرحتها وقبلت علي وعبست وقالت لي لكن هو قالي اختاري الفستان البعجبك انا اعمل ليهو شنو .. قلت ليها قاليك البعجبك ما البمحي وجودو .. قالت يوووه لكن انا حبيت الفستان دة .. مسكتني من كتفي وبقت تلولح فيني وقالت لي علييك الله يا براءة رفعت عيوني بي يأس وقلت ليها طيييب طيب مدام حبيتيهو خلاص انا حبيتو .. فرحت شديد وبقت تحضن فيني وتقولي شكرا شكرا شكرا ..
اخترنا الفستان وطلعنا برة كانو بدخلوهو لينا في العربية .. قلت لي وصال فرحانة ليك شديييد انتي ومهند حرفيا اكتر اتنين لايقين على بعض .. قالت لي لايقين على بعض لدرجة انك كنتي قايلاهو اخوي .. ضحكت وقلت ليها اعمل شنو البعرفني انو ود خالتك شنو كل حاجة كانت بتوحي لي انو اخوك .. قالت لي نظرية ما عندك يا هبلة .. قلت ليها لوووو سمحتي .. قالت لي اها سكتنا ... رجعنا المحل وبقينا متابعين مع الطلبياات .. بالعصرية رسلت احمد بتاع الدلفري يمشي يشتري غدا لي ابوي كالعادة لاني برجع متاخرة .. بعد خلصنا صرفنا للعاملين البشتغلو باليومية وقفلنا المحل ورجعنا البيت ... نزلت من وصال ولم فاتت كنت عايزة ادخل البيت بس حسيت اني مصدعة والبيت ما فيهو بندول .. طوالي مشيت على الدكان جبت لي بندول وجيت .. مع انو ما بروح لي الصداع بس ما كان عندي حيل امشي الصيدلية .. دخلت سلمت على ابوي وصليت المغرب ولم جيت ابلع البندول لقيتو مافيش .. مسكت راسي وقعدت افتش واخلاقي ضاقت في النهاية مشيت عملت لي شاي ووديت كباية لي ابوي وجيت انجدعت في السرير وانا بشرب ..
سمعت صوت رسالة في تلفوني لم فتحتها لقيتها من رقم غريب كان مكتوب فيها .. "السلام عليكم براءة محمد .. نحن بنعتذر ليك عن الاتهام الوجهناهو ليك ولي محلك عن تسمم 33 فرد الاسبوع الفات .. وصلنا تقرير بسبب التسمم الحقيقي وحبينا نقوليك انو ما ح تكون في حاجة ضدك بإذن الله .. العفو " .. حسيت زي الجسمي رخا والصداع كانو نزل في هيئة موية .. جاتني رسالة نازلة من عبدو كاتب فيها " انا اتصرفت ما تدخلي في حسابات مع زول " .. ابتسمت تلقائيا لاني كنت متاكدة انو ح يحلها .. كتبت ليهو "قريتك انا اكيد ح تتصرف " .. ما كان متصل يحليلو الضغط عليهو زايد .. قفلت التلفون وقمت صليت العشا ونمت طوالي ..
{لا تدري لعل الله يحدث بعد ذلك امرا} ..