رواية نجوم سرمدية الفصل الاول1بقلم سبأ النيل
ياربي على وجع الضهر المبكر دة ... معقولة ياخ ياداب 18 سنة ويجيني وجع ضهر ووجع ركب كمان ... سرحت شوية كدة وقلت لنفسي لكن الما بجيبهم شنو ...غايتو الحمدلله ... قفلت البتجاز وكبيت الشاي في السيرمس وطلعت كباية وصينية ومشيت غرفة ابوي دقيت الباب او شبة الباب لانو كان منتهي وقلت ليهو ابوي قوم ختيت ليك الشاي في العريشة .. صلي الفجر واشربو انا طالعة ..
قالي كدي تعالي مستعجلة كدة مالك .. دخلت وقلت ليهو يا ابوي اتاخرت .. قالي صباح الخير اول شي .. قلت ليهو صباح النور .. قال لي خليك انتي الليلة انا بقيت كويس وح اطلع اشتغل .. جيت وقفت قدامو قلت ليهو يا ابوي عليك الله الموضوع دة اتناقشنا فيهو امس وقلت ليك المرض بتاعك دة ما بيستحمل الارهاق بعدين انت عندك ازمة كمان وشغل المصنع دة ما بينفع معاك تاني .. قالي خلاص سكتت .. طيب وانتي راجعة اغشي معاك المصنع بتلقي عمك عوض الله جيبي منو قروش الشهر دة وقولي ليهو ابوي قاليك لو بقيت كويس بجي بشتغل تمام ..
قلت ليهو امشي اقوليهو اديني قروش؟ .. قالي اي .. قلت ليهو يا ابوي موضوع القروش دة امرقني منو عليك الله .. عارفني عندي حساسية من المواضيع المتعلقة بالقروش دي ... قالي ترضي ابوك العيان يمشي يجيبهم .. قلت ليهو انت بتحاول تحسسني بالذنب ؟ .. قالي شبه كدة ... قلت ليهو طيب كويس انت قوم صلي واشرب الشاي انا بعدين بجيب معاي الفطور ما بتاخر .. قالي كويس الله يرضى عليك يا بتي ...
طلعت وقفلت الباب بالترباس ومشيت بيت الجيران رنيت الجرس فتح لي ولد صغير عمر 14 سنة كدة .. قلت ليهو عبدو امك قاعدة؟ .. قالي اي قاعدة اتفضلي .. قلت ليهو لالا ماشة انا مستعجلة قوليها براءة قالت ليك اديها الصبارة ... قالي كويس ادخلي اكلمها .. قلت ليهو بنتظرها انت اسرع .. قالي كويس ..
دخل جوة عدت زي دقيقة كدة لقيت خالتو عوضية جات شايلة الصبارة .. قالت لي براءة بتي صباح الخير قلت ليها صباح النور يا خالتو ان شاء الله كويسة .. قالت لي كويسة انا الحمدلله .. ادخلي يا بتي اشربي ليك كباية شاي الزمن بدري .. قلت ليها مرة تانية يا خالتو اسي اتاخرت والله .. قالت لي طيب يا بتي بدل الجرجرة والشغل المتعب دة كان سمعتي كلامي وشلتي مني القروش انتي زي بتي والله .. قلت ليها لالا يا خالتو ما تزعلي مني لكن انا احسن لي اشتغل عشان اقدر ادعم نفسي بنفسي في المستقبل وما ابقى انتكالية .. قالت لي غايتو كلامك عين العقل والله لكن برضو لو احتجتي اي حاجة بتلقيني قاعدة كويس؟ ... قلت ليها حااضر ...
شلت منها صبارة الايسكريم .. كنت ببيع ايسكريم عشان اقدر اوفر حق الاكل والشراب لي ولي ابوي .. ابوي كان شغال في مصنع اسمنت بس الاسبوع الفات تعب فجاة تعب شديد وعمو عوض الله صاحب المصنع ساقو وداهو المستشفى والدكتور قال انو قلبو ضعيف وكمان جاتو ازمة ومنعو من الاجهاد والتعب عشان ما يضر صحتو وحالتو تتدهور .. من اليوم داك وانا منعتو تماما يشتغل بعد نقاش طويل وقلت ليهو انا كبيرة بما فيه الكفاية عشان اقدر اشتغل واشيل المسؤلية دي ..
وقفت سنتي الاولى في الجامعة عشان ما ح اقدر اكمل مع الظروف المارين بيها دي ... بقيت بعمل ايسكريم وببيعو وبما انو ما عندنا تلاجة في البيت ف كنت بوديها عند خالتو عوضية بليل وبجي اشيلها بالصباح ..
على الرغم من انها زولة طيبة وظريفة وبالها طويل وبتعتبرني زي بتها الا اني كنت بتحرج شديد لمن اودي ليها صبارة الايسكريم واجي اشيلها الصباح بدري .. بس الواحد لازم مرات يتجاهل المشاعر دي عشان يقدر يتجاوز الهو فيهو ...
مشيت كالعادة لموقف العربات .. ختيت صبارتي وقعدت .. لفيت الطرحة في وشي عشان الغبار وعشان الشباب الجنهم معاكسات كمان .. شوية شوية بدت الحركة تظهر في المواقف من طلاب لي عاملين وموظفين كلهم بدو يطلعو والناس بدو يشترو مني .. كنت بشوف كل انواع الناس .. التلاميذ الكل يوم بشترو مني .. والجايبة صحبتها تجرب لاول مرة .. والرجال الي الشمس ضربتهم .. والبشتري لي اولادو .. و و و و ...
بعد اذان الضهر الصبارة شبه فضت .. شلتها وقمت راجعة ... وطبعا ما بركب مواصلات ، بقيت بتمشى في الشارع والافكار تاخدني وتجيبني .. ياربي ح اطول في الشغلة دي ؟ .. لو ما الظروف النحن فيها دي كنت ح اكون عايشة كيف؟ .. طيب ح اقدر اغير حالتنا دي بدون ما اكمل قرايتي ؟ .. نفضت الافكار دي من راسي ومشيت على المصنع ... سألت من عمو عوض الله قالو لي انتظريهو في مكتبو فوق ... طلعت المكتب وبقيت منتظرة ...
قلت في سري اسي يا ابوي خاتيني في موقف محرج زي دة ليه .. اسي اقوليهو شنو ، ابوي قاليك اديهو مصروف الشهر؟ .. ولا اقوليهو ابوي رسلني عشان القروش ؟ ... يوووه يا براءة بطلي تخلف هو انتي جاية تشحدي ؟ ما جاية تشيلي حقكم .. قولي ليهو ادينا قروشنا وخلاص .. لالالا قروشنا دي شنو كمان قصدي قروش ابوي .. ولا اقوليهو .. قطع تفكيري صوت الباب وهو بيتفتح ..
دخل عمو عوض الله وهو بتكلم في التلفون .. وقفت على حيلي .. اشر لي بي يدو قالي اقعدي ثواني وبجيك .. قلت ليهو كويس .. طلع وانا قعدت .. اخد زي تلاتة دقايق كدة كمل مكالمتو وجا داخل .. قالي براءة بتي كيفك ان شاء الله كويسة .. قلت ليهو كويسة انا الحمدلله كيفك انت .. قالي الحمدلله في احسن حال .. ابوك بقى كيف ان شاء الله ما تعب تاني .. قلت ليهو لالا الحمدلله صحتو اتحسنت .. قالي كنت عايز ارسل ليهو قروش الشهر مع محمد لكن دامك جيتي هاك اديها ليهو وقولي ليهو بجيك بكرة اشوفك تمام ... قلت ليهو حاضر ان شاء الله .. استاذن انا طيب .. قالي اشربي ليك حاجة .. قلت ليهو المرة الجاية بإذن الله .. قالي خلاص خلي بالك يا بتي .. قلت ليهو ان شاء الله ...
طلعت واخدت نفس وقلت الحمدلله الجاب سيرتها براهو .. غايتو القروش دي يوم ح تجيب لي مرض ...
سمعت صوت عمو عوض الله وهو بناديني .. قبلت لقيتو طلع وهو شايل ليهو علبة دوا .. قالي عليك الله وانتي راجعة اغشي خالتك عوضية اديها دوا الحيرقان دة قبيل دقت لي وقالت عندها حرقان جبتو ليها لكن ح ارجع البيت متاخر .. قلت ليهو حاضر ولا يهمك ان شاء الله ح اوديهو ليها .. قالي خلاص خلي محمد يوصلك قلت ليهو لالا ماف داعي .. قالي اسمعي كلامي يا بتي انا زي ابوك وبعدين شمس الضهرية دي حارة وهو ماشي يجيب لي حاجات من جنب البيت خليهو يوصلك في شارعو ..
سكتت شوية وقلت ليهو طيب حاضر ... مشيت خميت صبارتي ورفعتها في العربية ورا وركبت جنبها .. اتحركنا وبعد ربع ساعة وصلت حتة قربية للبيت .. نزلني هناك ومشى بي شارع تاني .. مشيت رنيت على جرس بيت عمو عوض الله فتح لي عبدو .. قلت ليهو انت يا ولد المقعدك للان في البيت شنو مش عندك مدرسة .. دخل يدينو في جيبو وقالي اي لكن الليلة عندنا اربعة حصص انجليزي .. رفعت حاجبي وقلت ليهو ومالو الانجليزي ان شاء الله .. قالي ما بحبو ولا بفهمو ولا عندي ليهو حاجة .. ضحكت وقلت ليهو على حسب علمي انت شاطر .. قالي بإستثناء الانجليزي ...
قلت ليهو مش ممتحن تامن السنة الجاية .. مفروض تشد حيلك فيهو عشان ترفع مستواك .. نزل راسو وحرك نظارتو وتاني عاين لي وقالي صدقيني ابا لي .. ضحكت وضربتو في راسو قلت ليهو حاول تحبو وح تنجح فيهو .. كدي اسي خالتو عوضية قاعدة .. قالي اي نايمة .. قلت ليهو خلاص هاك اديها الدوا دة اداني ليهو عمو عوض الله وقوليها قاليك ح يتاخر الليلة .. قالي حاضر ..
مشيت بعديها على الدكان جبت فطور واكياس ايسكريم ورجعت البيت .. لقيت ابوي نايم جهزت الفطور ومشيت كنست العريشة ورشيتها وفرشتها كويس .. ختيت الفطور ومشيت صحيت ابوي .. قام وسألني جيتي متين .. قلت ليهو قبل شوية قوم غسل وشك ختيت الفطور .. قالي ان شاء الله .. قعدنا نفطر قلت ليهو ابوي ختيت ليك القروش تحت المخدة الجنبك دي وعمو عوض الله قال ح يجيك بكرة ... قالي كيف لقيتيهو ان شاء الله كويس .. قلت ليهو كويس بسلم عليك .. قال الله يسلمو يا رب .. اها انتي كيف عاملة والشغل المشية والجية تاعبنك ؟ .. قلت ليهو لالا ما تاعبني ولا حاجة والشغل بسيط اغلب الوقت بكون قاعدة .. قالي لكن كدة بجيك وجع ضهر .. قلت ليهو لسة ما جاني لمن يجيني بكلمك .. قالي ما صدقتك .. ضحكت وقلت ليهو خلاص اخدني على قدر عقلي ..
قالي وقرايتك يا بتي انا ما دايم ليك دايرك تقري عشان تنفعي نفسك قبل كل شي ... قلت ليهو الله يطول في عمرك يا ابوي وما تخاف الله قاعد وانا متوكلة عليهو ..
خلصنا فطور ورفعت الصينية وعملت القهوة شربتها مع ابوي .. هو رجع نام وانا مشيت صليت نافلة وبقيت قاعدة في مصلايتي ومتكلة على الحيطة .. كنت تعبانة شديد لاول مرة امشي واجي مسافات كبيرة برجليني واقعد مسافات طويلة .. اسبوع واحد طلع عيني .. كنت شايلة هم قرايتي وشايلة هم ابوي وشايلة هم المصاريف ..
بقيت سرحانة وعيوني شوية ترغرغ وتاني تجف .. كنت غريبة غريبة .. هادية لدرجة سامعة انفاسي .. الهم الفيني زي الحجر المختوت على قلبي .. والهم بزيد كل ما اتذكر انو دي لسة البداية .. ختيت يديني في وشي مساافة واخدت نفس وقلت ربنا يهونها من عندو ... قمت لميت المصلاية وطلعت غسلت العدة ورشيت الحوش طلعت مرتبتين ومسكت لي كباية موية وبقيت قاعدة متربعة في السرير وبفكر وبشرب في الموية .. كنت عايزة اعمل لي شاي بس اتذكرت انو السكر ما ح يكفي لشاي بكرة .. وسرحت من جديد ..
شوية كدة سمعت الباب بدق .. لبست توبي ومشيت فتحتو لقيتها خالتو عوضية .. قلت ليها اهلين اتفضلي خشي ..
دخلت مشيت اجيب ليها موية قالت لي خليها يا بت كما ساكنة جنبكم ما عجزت انا عشان اعطش في المسافة دي ... ضحكت وقلت ليها اسي القاليك عجزتي منو و غمزت ليها وقلت ليها ولا الفي راسو ريشة براهو بتحسس .. ضحكت وقالت لي اها قمتي على قلة الادب .. يا سلام ياخ شوفي رشة الحوش مع العصرية تفتح النفس كيف .. انا قلت لي عوض الله الحوش ما تعملو سراميك لكن راسو قوي وما سمع كلامي .. قلت ليها كتر خيرو العايز يبقيكم راقيين .. قالت لي انتي في صف منو .. رفعت يديني و قلت ليها محايدة .. حركت راسها بخيبة امل .. قالت لي كنت جاياك في موضوع .. قعدت وقلت ليها ان شاء الله خير ..
قالتي لي لالا خير .. عبدو دة امتحاناتو قربت وما ناقش الحبة في الانجليزي وبما انك قارية لغاية اولى جامعة اكيد عندك انجليزي كويس .. قلت ليها ايوا .. قالت لي خلاص عايزاك تقريهو وتديهو حصص تقوية عشان لمن يصل تامن يكون فل الفل في الانجليزي ...
سكت شوية كدة بفكر قلت ليها خلاص خليهو يجيني بالعصرية اصلا بكون فاضية ما عندي حاجة .. قالت لي الله يرضى عليك يا بتي .. اها الحصة بي كم ... قلت ليها حصة شنو وبي كم شنو يا خالتو الله يرضى عليك عبودي زي اخوي ما عاي .. قاطعتني وقالت لي لالا يا برآءة ما باخد من زمنك بدون مقابل ..
قلت ليها يا خالتو انا اصلا بكون فاضية في الزمن دة و .. قالت لي لالا يا تاخدي مقابل تعبك يا انا بخليهو كدة ولا بشوف ليهو استاذ تاني ولا اي حاجة وخليهو يرسب في الانجليزي .. قلت ليها لكن .. قالت لي كلامي وقلتو .. اخدت شهيق وزفير كدة وقلت ليها خلاص طيب دامك مصرة ما فرقت .. وقفت على حيلها وقالت لي خلاص بكرة ح يجيك العصرية تمام .. قلت ليها كدي اسي اقعدي متين جيتي .. قالت لي طالعة مشوار والله سلمي على ابوك .. قلت ليها الله يسلمك ..
طلعت وقفلت الباب وراها سمعت صوت ابوي بناديني .. مشيت ليهو قالي دة منو الفي الباب .. قلت ليهو دي خالتو عوضية طلعت اسي بتسلم عليك .. قالي الله يسلمها .. ان شاء الله عافية .. قلت ليهو بكلمك بعدين اسي انا ماشة اجيب حاجة نتغدى بيها قوم صلي وارقد برة لغاية ما اجي .. قالي خير ..
لبست توبي وطلعت الدكان جبت لي كم حاجة .. وانا راجعة شايفة لي زول بعلق ليهو في اعلان في العمود الجنب بيتنا .. بقيت واقفة منتظراهو يفوت عشان اقراهو وهو حالف ما يتحرك .. مشا على عربية كدة قلت خلاص عايز يفوت واتحركت .. تاني جا طالع وشايل ورق ولزاق في يدو .. عقدت حواجبيني وقلت شكلو مطول ح اشوفو بعدين .. جيت مارة بجنبو قالي يابتنا .. انا قلت بتنا دي لي انا ؟ .. قالي هي بتكلم معاك .. قبلت عليهو قلت ليهو نعم ..
قالي بيت عوض الله وين .. اشرت ليهو بي يدي على البيت وقلت ليهو هداك ليهو .. قالي تمام .. خما ورقو دخلو العربية وقفلها وفات على البيت .. قلت في نفسي عمو عوض الله عندو ولد كبير وانا ما عارفة ولا شنو .. ضربت راسي وقلت هبلة يعني ح يكون ما عارف بيتهم بي وين .. بعد شوية حسيت بالكيس الفي يدي خفيف رفعتو كدة لقيتو فاضي .. اتخلعت عاينت في الارض لقيت الحاجات مكشحة ومالية الدنيا ..
جاني هبوط وقلت ديل وقعو بي وين كمان .. يا الله ياخ ضيعت قروشهم اسي اجيبهم من وين .. طلعت القروش الفي جيبي لقيتها شوية .. قلت ارجع البيت اشيل من ابوي واجي راجعة .. شلت هم المشوار لانو الدكان بعيد .. في وقفتي دي لقيت عبدو جاي خاشي بيتهم .. قلت ليهو عبودي .. عاين لي اشرت ليهو يجي .. قلت ليهو تعال امشي لي الدكان الكيس اتشرط والحاجات وقعت وباظت شوف عينك .. قالي طبيعي يتشرط وانتي رابطاهو قدر كدة ومدياهو قوة شد .. عاينت ليهو بإستغراب وقلت ليهو قوة شنو .. قالي شد .. قلت ليهو انا اشوف انك تبطل فلسفتك دي .. قالي عايزة شنو .. قلت ليهو بتختصرني يا قليل الادب .. قالي جاي من الكورة فتران ياخ .. قلت ليهو اقيف لي هنا اجيب ليك القروش واجي ..
مشيت شلت من ابوي القروش واديتها ليهو وفات .. كنت عايزة ادخل بس لفت نظري الاعلان القبل شوية ...
{لا تدري لعل الله يحدث بعد ذلك امرا} ..