رواية نجوم سرمدية الفصل الثاني2بقلم سبأ النيل
وقفت قدام العمود وبقيت بقرا في الاعلان بتمعن .. كان طلب توظيف استاذ/ة عربي كبديل لمدة شهر في روضة اسمها الوجد .. فكرت في الموضوع شوية كدة وطلعت تلفوني وسجلت الرقم .. دخلت ومشيت كلمت ابوي بالاعلان الشفتو وقلت ليهو ح ادق ليهم بكرة تلفون اشوفهم اذا لقو استاذ ولالا .. اذا ما لقو ح امشي ، احسن لي بكتير من شغلانة الايسكريم دي .. قالي احسن بكتير فعلا لكن ليه بكرة دقي ليهم الليلة ما تضيعي الفرصة من يدك .. قلت ليهو ابوي الصباح رباح خليها لبكرة .. قالي خليها لمن تضيع منك .. تشوفي الفرصة قدام عيونك وتأجليها .. الفرصة لمن تجيك انتهزيها واقلعيها لانها ما ح تجي تاني بالساهل .. عشان كدة اسمها فرصة .. احتمال تجي مرة واحدة في العمر ..
ضحكت وقلت ليهو حقو يشغلوك في السياسة بتنفع صدقني ، طيب ح ادق ليهم اسي دي .. الباب دق مشيت فتحتو لقيت عبدو جاب لي الحاجات .. قلت ليهو بكرة تجيني بدري ، امك كلمتك صاح؟ .. قالي آي كلمتني .. قلت ليهو خلاص ما تتاخر .. قالي كويس ..
شلت منو الحاجات ومشيت ختيت الغدا .. اتغدينا ومشيت اتوضيت وصليت المغرب وبقيت بسبح .. الجو كان بارد شديد .. شوية كدة اتذكرت اني مفروض اتصل على الروضة .. شلت التلفون من فوق التربيزة وربعت رجليني وقعدت في المصلاية ... رنيت عليهم لغاية ما الخط فصل ماف زول رد ... تاني رنيت برضو فصل وماف زول رد .. عاينت للتلفون بضيق وقلت دامكم عايزين ناس ما تردو طيب ديل شنو ديل ... نزلت التلفون وعاينت قدامي مسافةوانا زامة خشمي بخيبة امل ..
الليل نزل .. قمت ورفعت المصلاية ومشيت جهزت الايسكريم وعبيتو في الاكياس ودخلتو الصبارة .. لبست عبايتي وشلت الصبارة وقفت جنب الباب وقلت لي ابوي ماشة اودي الصبارة وجاية .. قالي كويس ما تتاخري .. قفلت الباب وتربستو ومشيت لبيت خالتو عوضية رنيت الجرس .. شوية كدة والباب فتح وطلع لي الشاب القبيل السالني من البيت .. بقيت ساكتة وهو عاين لي كدة وقالي اتفضلي .. قلت ليهو ااا خالتو عوضية قاعدة؟ .. قالي اي قاعدة جوة تلقيها في الصالة .. وقف على جنبة وبقى يعاين لي وانا داخلة وشابحة صبارتي معاي ..
دخلت جوة لي خالتو قالت لي براءة بتي كيفك تعالي اشربي معانا شاي المغرب .. قلت ليها ياريت ياخالتو لكن ابوي قالي ما تتاخري .. قالت لي ابوك انا بكلمو انتي اقعدي ليك زمن ما قعدتي اتونستي معاي .. قلت ليها لكن .. قالت لي ما لكن ولا حاجة اقعدي خمسة دقايق بس .. قلت ليها كويس عشان خاطرك بس .. قالت لي حبيبتي تعالي اقعدي حداي .. بقت تنادي يا مهند .. مهند .. جا الشاب داك وقاليها نعم يا خالتي .. قالت ليهو شيل الصبارة دي دخلها جوة المطبخ .. قاليها حاضر .. شالها دخلها وبقيت بتونس معاها ..
سالتها من عبدو قالت لي كان مع مهند في الجامع وغشى الدكان بكون جآي .. انتي ما ناوية تنزلي جامعة؟ .. قلت ليها اسي ماف طريقة يا خالتو انتي عارفة .. قالت لي عشان كدة انا قلت ليك نمشي انا وعمك ندفع ليك رسوم السنة دي طيب عشان ما تفوتك .. قلت ليها لالا يا خالتو ماف داعي انا عايزة اقعد عشان اخلي بالي من ابوي .. قلت لي يا بتي .. قلت ليها يا خالتو اسي خليني باخد فترة كدة ووعد اول ما اكون عايزة انزل بديك خبر ..
قالت لي خير يا بتي .. امك الله يرحمها كانت ما بتقصر مننا والله بتشبهيها شديد .. زولة حارة وقلبها ابيض وانتي اخدتي منها الصفات دي .. حركت راسي براحة و قلت ليها ربنا يرحمها ويجمعنا بيها في الجنة .... ختت يدها في راسي وقالت لي ربنا يحفظك يا بتي ..
سمعنا صوت بقول احم احم .. عاينت لقيتو عبدو .. قالينا الجو شاعري زيادة عن اللزوم .. ضحكت و قلت ليهو انت الليلة لاقيتك اكتر مما بشوف وشي .. قالي حاجة طبيعية لانك ممكن يوم كامل ما تشوفي وشك .. قلت ليهو انا فلسفتك دي بتجيب لي اعصاب .. قالي اسي الفلسفة وين .. امو قالت ليهو الباب بدق امشي افتح لي ابوك جا .. قلت ليها انا زاتي ماشة بعد دة .. قالت لي متين هو .. قلت ليها ابوي براهو في البيت .. قالت لي خلاص تمام زوريني خلي الجفا .. قلت ليها حاضر من عيوني ..
طلعت برة لقيت عمو عوض الله داخل قالي رجلي حارة ولا شنو .. قلت ليهو لالا ياخ من قبيل قاعدة انا .. قالي ابوك امسى كيف .. قلت ليهو كويس الحمدلله .. قالي سلمي لي عليهو .. قلت ليهو يوصل ان شاء الله .. طلعت مشيت البيت .. لقيت تلفوني مجدوع في السرير شلتو ختيتو في الشاحن .. لمن شاشتو نورت لقيت مكالمات فائتة من ناس الروضة .. طوالي رجعت ليهم ..
قالي لي السلام عليكم جاتنا مكالمات من الرقم دة .. قلت ليهو ايوا لقيت اعلان مطلوب استاذ/ة عربي للروضة كبديل ولقيت الرقم دة في الاعلان .. قالي ايوا صاح انتي عاوزة تشتغلي يعني .. قلت ليهو اي .. قالي مكملة دراسة .. قلت ليهو لالا وقفت في اولى جامعة بي سبب ظروف كدة .. سكت شوية كدة حسيتو بكتب وتاني قالي .. طيب تمام شغل الروضة ما محتاج شهادة تخرج شديد .. بما انك وصلتي الجامعة معناها مستواك كويس .. اسمك منو .. قلت ليهو براءة محمد .. قالي طيب يا براءة في اتنين تانين عايزين الشغل برضو .. انا ح اسجل رقمك واذا حالفك الحظ ح تجيك مكالمة مني .. قلت ليهو طيب تمام .. ختيت يدي في نصي ورميت التلفون في السرير .. قلت عسى ولعل اشتغل ياخ هي زاتها كلها شهر .. عاينت للتلفون تاني وشلتو ختيتو في الشاحن ..
تاني يوم بالصباح طلعت بدري مشيت رنيت جرس خالتو عوضية .. شلت الصبارة واتحركت على الموقف .. وانا ماشة في الشارع كدة وقفت جنبي عربية .. عاينت ليها شكلها ما غريب علي .. فعلا طلعت حقت الولد الاسمو مهند داك لمن نزل منها وجا علي قالي لحظة .. قلت ليهو نعم .. طلع قروش بسيطة من جيبو ومداها لي وقالي امس اكلت من الايسكريم دة تلاتة حبات .. هاك دة حقهم .. عاينت للقروش الفي يدو وتاني عاينت ليهو وقلت ليهو ما مشكلة اعتبرهم مجان واتحركت من جنبو .. بقا واقف وبعاين لي بي استغراب .. دخل القروش في جيب البنطلون وركب وفات ...
قلت في نفسي دة منو كمان ياربي ولدهم وكان مغترب ولا قريبهم .. وقفت وقلت وانا مالي ياخ خليني ابيع العندي دة سريع عشان ارجع بدري اقدر اخد لي نومة قبل ما عبدو يجي .. قعدت في مكاني المعروف وبديت ابيع شوية شوية .. لمن خلص شلت الصبارة وجيت راجعة البيت .. غشيت الدكان كالعادة جبت الفطور مشيت البيت عملتو وفطرت مع ابوي .. صليت ورقدت نمت .. صحيت مع اذان العصر استحميت واتوضيت صليت الباب دق .. فتحتو لقيتو عبدو .. حرك نضارتو كدة وقالي صباح الخير .. ضيقت عيوني وقلت ليهو صباح الخير الساعة 3 ؟ ..
قالي عشان كنتي نايمة ... قلت ليهو وعرفت كيف .. قالي الارتخاء الفي عضلات جفونك .. سكتت وبقيت برمش بي حيرة .. قلت ليهو ادخل ادخل خلينا نبدا .. مشا سلم على ابوي وجبت طربيزة وكرسيين ختيتهم تحت الشجرة وبديت اقريهو .. قبل اذان المغرب بشوية خلصنا ... قالي والله بتقري كويس اول مرة الانجليزي يلفت نظري .. قلت ليهو افو دي قدرات .. ضحك وطلع قروش من جيبو وختاها في الطربيزة وقالي حق الحصة .. قلت ليهو دي خالتو عوضية صاح .. قالي اي وقالت لي ما اشتغل بيك كتير لو اتكلمتي تاني .. قلت ليهو طيب .. وانت ماشي شيل معاك الصبارة .. وقف على حيلو وقالي كويس جيبيها لي .. مشيت جبتها ليهو شالها وفات ..
بقيت شغالة بالحالة دي كل يوم .. بالصباح اطلع ابيع وبالعصرية اجي اقري عبدو .. ما جاني تلفون تاني من ناس الروضة من اسبوع كامل ونسيت الموضوع اساسا .. كنت مدية عبدو تمرين ومنتظراهو يحلو .. بعد خلص بقيت مركزة و بصحح فيهو .. قالي براءة .. وانا بعاين في الكراس قلت ليهو اممم .. قالي اديني تلفونك ادق تلفون .. رفعت عيني وقلت ليهو عايز تدق لي منو .. قالي لي امي طلعت الصباح مشوار وقالت لي ادق ليها من تلفونك لمن اجي هنا .. قلت ليهو تلقاهو جوة امشي شيلو ..
مشا وبعد شوية جا وقف قدامي ورافع لي التلفون باصبعين وقالي دة تلفونك؟ .. رفعت عيني بإستغراب وقلت ليهو اي .. مسكو كويس وعاين ليهو وتاني عاين لي وقالي نوكيا دواسات ؟ .. قلت ليهو لالا سامسونج لكن عندو سوء تغذية .. قالي ظريفة لكن .. قلت ليهو ما اظرف منك .. شالو ومشا اتكلم مع امو وجا ختاهو في الطربيزة وقعد .. سند ضهرو على الكرسي وعاين للسما مسافة كدة وانا مشغولة بالتصحيح وقال ح تجي مطرة ... غمضت عيوني وختيت القلم في التربيزة وقلت ليهو مطرة في عز الشتا .. دي اول مرة اسمع بيها .. قالي عايني للسما .. عاينت ليها عادية وتاني عاينت ليهو قلت ليهو فيها شنو .. قالي محملة .. والجو متغير .. قلت ليهو سمح ركز خلينا من السما ... فتحت الكتاب كدة طق طق طق المطرة نقطت في الصفحة الفتحتها .. طبعا بقيت ما بين مستوعبة وما مستوعبة وانا بعاين للكتاب .. قالي كلام القصير ما بتسمع .. كانت رشة خفيفة ووقفت ..
بعد سكتت مسافة قلت ليهو انت يا عبدو .. قالي اممم .. قلت ليهو عمرك كم .. قالي 14 .. قلت ليهو بتعرف الحاجات دي من وين يا ولد .. قالي الله خلقني كدة .. اتحيرت في امرو ..
بعد خلصنا طلع من جيب بنطلونو اليمين قروش ومن الجيب التاني برضو قروش .. وخت كل واحدة بي جهة .. عاينت ليهو وقلت ليهو دي عرفناها .. التانية دي حقت شنو .. قالي مهند ود عمتي كل يوم بشيل من الايسكريم بتاعك كم قطعة لمن تختيهو عندنا وبديني القروش اديك ليها .. انا كنت بلمها ليك لنهاية الاسبوع عشان تعمل ليك قيمة محسوسة لاني لو اديتك ليهم كل يوم ما ح يكون العائد المادي بتاعها عندو قيمة ...
عاينت ليهو بنص عين وشلتها لقيتها بتجيب قيمة نص الصبارة بتاعة اليوم .. قالي بعدين انتي يا براءة حاولي توسعي الشغلة دي بدل كل يوم شابحة صبارتك في عز الشمس وجايبة لي نفسك وجع الضهر المعذبك دة .. قلت ليهو بتقول في شنو انت وبعدين منو القاليك عندي وجع ضهر .. طلع نظارتو وختاها في الطربيزة وقالي كل شوية بتقولي رجلي نملت يدي نملت ما يقارب ال 4 مرات في كل حصة .. والانا عارفو انو تنميل الاطراف واحدة من اعراض الانزلاق الغضروفي الضاغط على العصب .. بتحركي يدك لفوق شديد املا انو الشد الح يحصل يشد الضهر عشان بتحسي بالم فيهو .. بعدين بتقعدي من 3 لي 4 ساعات بتبيعي ايسكريم بدون دعامة للضهر او حتى حيطة تنتكلي عليها .. وعلى فكرة لو خليتيهو بدون عناية لفترة طويلة ح يعمل ليك تشوهات في العظام ..
بعدين كلامي واضح وسعي شغلك وحركي القروش في صالحك عشان ما تفضلي ماشة وجاية كل يوم زي سيد اللبن .. بقيت مبحلقة فيهو وما عرفت اقول شنو .. بعد مسافة قلت ليهو يعني اعمل شنو .. ابتسم وقالي ح تحتاجي راس مال .. ختيت يدي في التربيزة ومسكت راسي قلت ليهو لحظة لحظة لحظة .. راس مال شنو يا ولد انا عايزة افتح شركة ؟ .. كما ايسكريم .. قالي الشغل كلو بيكبر .. ايسكريم تسالي فول .. كلو بيبقى في العالي اذا انتي ما استهونتي بيهو .. بعدين الايسكريم دة عندو مشتقات ممكن تستغليها انتي مستغلة جانب واحد بس .. قلت ليهو عبدو ما فاهماك .. رجع في الكرسي وبقا بعد بي يدو وقالي ح تحتاجي اعلان وتسويق وتطوير لمنتجك دة .. وترقية عامة .. و .. قلت ليهو بس بس بس .. سكت وعاين لي مسافة ..
قلت ليهو كلامك دة غريب انت لسة صغير انا ما عارفاك بتفكر في شنو .. قالي بفكر في مصلحتك .. ولا ما كدة يا عمو محمد .. رفعت راسي لقيت ابوي وراهو بمسافة .. قاليهو صح عليك يا شاطر .. ابوي قالي براءة اجيب ليك معاي كباية شاي ؟ .. قلت ليها ل ل لالا يا ابوي شكرا .. حرك راسو وفات المطبخ .. عاينت ليهو تاني وقلت ليهو عرفتو وراك كيف يا ولد .. قالي حسيت بكتلة في محيطي .. بقيت مسطحة قلت ليهو نحن في مسلسل ولا حاجة .. هي انت شنو .. ضحك ضحكة ولد عمرو 14 سنة وقالي كل زول عندو سر مع الله .. سر ما بيعرفو الا هو وربو .. لبس نظارتو تاني وقالي اسمعي كلامي وحاولي نفذيهو وانا ح اساعدك .. صدقيني بإذن الله ح تنتقلي انتقالة كبيرة ولو بعد حين ... قلت ليهو ط ط طيب بس ح نعمل شنو .. مسك القلم والدفتر وبدا يكتب بيدو الشمال لانو كان اشول .. وانا بس بعاين ليهو وحصل عندي ايرور في مخي وما فاهمة حاجة ..
"لا تدري لعل الله يحدث بعد ذلك امرا"