رواية حوديت من الظلام الفصل الاول1بقلم عمرو علي
- صباح الخير يا حبيبي
= انتي مين يا زبالة انتي
انت اتجننت ولا ايه ، حد يقول ل امه كدا
= اه صح مينفعش ، انتي مين يا نصابة يا حرامية
لا دا انت اتجننت رسمي ، مالك يا حمزة
= حمزة مين و ايه الأوضة المعفنة دي
دي أوضتك يا حبيبي
= بقا دي أوضتي انا ، دا انا حازم الحديدي
يكونش قصدك حازم الحديدي رجل الأعمال
= ماهو دا انا
لا بقا انا مش فاضية للكلام دا ، انا هروح اعمل الاكل
" حمزة مين و أوضة مين و امي ايه دي ، مين الزبالة دي ، و ايه القرف اللي انا فيه دا ، اكيد دا مقلب من صحابي ، زعقت وقولت
لو حد بيهزر هزار سخيف يسكت عشان والله ما هرحمه
" خلصت الجملة ولقيت حد داخل عليا الأوضة
مالك يا حمزة بتزعق ليه
= انت مين
انا مين!! ، انا جاركو هنا في الشقة ، انا ابوك يلاا مالك
= ابويا مين ، انا ابويا ميت
يبقا امك عندها حق ، أنت اتجننت بجد
= ممكن تسيبني شوية
حاضر يكش تفوق
" يعني ايه ، انا اتحبست هنا ، لا لا كل دا حلم و هصحا منه ، و هرجع ل شركتي وحياتي تاني ، وحشتني اوي الحياه دي ، مكنتش كملت الجملة و سمعت
يا حمزة ، انزل هات الفول قبل ما الراجل يقفل
فول!!!!
" ايه الفول دا ، هو لسة في حد بياكل فول ، خرجت الصالة ، تأملت شكل البيت ، بيت شكله بسيط ، مرتب إلى حد ما ، اللي اسمه ابويا دا كان قاعد في الصالة ، بس سمعتها وهي بتقول
يا حمزة الراجل هيشطب ، روح بسرعة
" فول ايه اللي اجيبه دا ، بقا حازم الحديدي يروح يجيب فول اكيد لا
طب هو معندهوش دليفري
" لقيت ابويا زعق وقال
ما تنجز بقا يلااا عايزين نفطر
= حاضر
" نزلت من البيت ، بصيت على الشارع ، شارع عشوائي جدا ، و ايه البتاع الصغير اللي ب 3 عجلات دا ، هو ماشي بيه ازاي اصلا ، مكنتش مشيت كتير لان لقيت الراجل بتاع الفول ، وقفت عنده
ممكن لو سمحت تديني ب 5 جنيه فول
= عنيا يا عم حمزة
اتفضل
" خدته ومشيت ، رجعت البيت بسرعة ، اول ما دخلت لقيت بنت قاعدة في الصالة
صباح الخير
= صباح النور ، اذيك يا حمزة
أنتي مين
" لقيت امي خرجت تقريبا من المطبخ وبتكلمني
ايه هتفضل واقف عندك كدا كتير
= لا " قربت منها وكانت البنت قاعدة و بتبص عليا ب استغراب "
جبت الفول
= اه
كويس ، اقعد بقا مع امل لحد ما احضر الفطار
= امل مين
اللي قاعدة قدامك دي
= ايوا مين دي
دي خطيبتك يا حمزة مالك
= خطيبة مين ، انا اخطب المعفنة دي
" لقيت امل وقفت وقالت
انت بتقول ايه يا حمزة
= أنتي تبقي خطيبتي ازاي ، هو انا كنت اتعميت ولا ايه
شكلك شارب حاجة ، انا همشي ، ولما تفوق كلمني
" خرجت امل لكن امي كانت واقفة جنبي و بدأت تلومني
مالك يا حبيبي ، ايه اللي انت قولته ل امل
= انا مش عارف مالي ، انتو مش اهلي و لا دي خطيبتي ، انا هنا بالغلط ، انا معرفكوش ولا عمري شوفتكو
حبيبي احنا لازم نروح ل شيخ يشوفك
= بقولك ايه ، انا زهقت ، انا همشي بس لو عرفت ان حد باعتكو عشان تضحكو عليا ، اقسم بالله ما هرحم حد فيكو
" خرجت ، نزلت الشارع تايه ، مشيت لحد ما لقيت مواصلات ، ركبت و وصلت ل بيتي الحقيقي ، حاولت ادخل لكن الأمن منعني
انت عبيط ولا ايه ، انا حازم الحديدي وساكن هنا
= امشي من هنا يلاا بدل ما ابلغ البوليس
بقولك عايز ادخل
= هتمشي بالذوق ولا لا
" واقف متكتف ، مش قادر اعمل حاجة
افتكر بس ، انا ساكن هنا ، اسمي حازم
= مفيش حد هنا اسمه حازم غير حازم بيه الحديدي
دا انا والله
= اصدقك ازاي بقا وهو لسة داخل من شوية قدامي
طب ممكن تخليني اقابله
= اسف مش هقدر و اتفضل بقا
" يارب دا عقاب ولا ايه ، هو انا عملت حاجة وحشة في حد ، اكيد لا ، ازاي كل دا يحصل ، مكنش عندي مكان تاني اروحه غير البيت اللي انا كنت فيه ، روحت و اول ما دخلت من باب الشقة ، لقيت امي و ابويا و شيخ
اهو حمزة جه
= في ايه
" كنت مستغرب ، هما شايفيني مجنون بجد ، الشيخ بص عليا وقال
انا محتاج اقعد معاه شوية
" امي و ابويا سابوني معاه ، شاورلي اني اقعد جنبه ، روحت و قعدت
طبعا انت مستغرب يا حازم من اللي بيحصلك
= حازم!! ، انت قولت حازم ، أنت تعرفني صح ، قولي في ايه وايه اللي بيحصلي دا
للاسف انت ملعون
يتبع
حواديت_من_الظلام 3
بقلم : عمرو_علي
#روايات_واسكريبتات_مميزةالبارت التاني
انا محتاج منك مساعدة
= يلا يا راجل انت من هنا بلاش قرف
ابوس ايدك ، انا محتاج اعمل عمليه في القلب
= ابعد ايدك عن العربية عشان متتوسخش بقا
بالله عليك يا بيه انا هموت لو معملتش العملية دي
= روح اشتغل و بطل شحاتة بقا
الله يسامحك يا بيه
" مشيت بالعربية ، هو لسة القرف دا موجود في الشارع ، ليه ميتشالوش ونخلص منهم
هاااا افتكرت
= وهو اللي بيحصلي دا عشان مرضتش أساعده
اللي انت متعرفوش ان الراجل دا مات
" اول ما قال الجملة اتصدمت ، يعني الراجل كان محتاج عملية بجد
مات بسببك انت
= بس انا مكنتش اقصد
والبنت اللي كانت بتحبك وسيبتها
= عادي زي اتنين اتعرفنا على بعض و اختلفنا ومكملناش
لأ ، دا عشان انت محبتهاش أصلا ، الحقيقة اصلا يا حازم انك مش بتحب حد غير نفسك
= الكلام دا كدب ، و انت نصاب واكيد حد زقك عليا
لسة مش عايز تقتنع يا حمزة
= " ب زعيق " انا مش حمزة ، انا حازم
انسا حازم خالص ، أنت دلوقتي في بيت جديد و اسم جديد ، هنشوف هتعرف تحافظ عليهم ولا هتضيعهم زي اللي قبلهم ، سلام يا حازم
" لسة يبقوم ، لقيت امي و ابويا جايين
هاا يا شيخنا ، حمزة كويس
= كويس جدا ، خليكو جنبه بس وانا هعدي عليه تاني
" بص ليا قبل ما يمشي وقال
مع السلامة يا حمزة وخلي بالك من اللي قولته
" و مشي ، امي و ابويا كانو واقفين ، امي بدأت تتكلم
احضرلك الغدا يا حبيبي
= انا مش عايز حاجة ، انا داخل انام ومش عايز حد يصحيني
" ابويا كان لازم يشارك في الموقف و اتكلم
محدش يصحيك ازاي ، انت ناسي ان فرحك كمان أسبوع
= فرحي!!
اه فرحك ، انت ناسي ولا ايه
= معلش كان نفسي اعمله والله ، بس للاسف هيتأجل
" الكلمة كانت بمثابة الشرارة ، ابويا بدأ يزعق
يعني ايه يتأجل ، انت عارف البت دي مستنية بقالها قد ايه ، دا انتو مخطوبين بقالكو 6 سنين
= 6 سنين ولسة مستنية
نعمل ايه بقا بس البت بتحبك
= وانا مش بحبها
انت اللي كنت هتموت وتتقدملها ، جاي دلوقتي تقول مش عايزها
= اه ومش عايز اتجوز اصلا
اسمع يلاا ، انت هتتجوزها غصب عنك والكلام خلص على كدا
" دخلت اوضتي وانا متعصب ، اتجوز واحدة معرفهاش ازاي ، ومين دا اللي عايز يفرض رأيه عليا ، انا معرفش حد منهم ، انا نفسي كل دا يكون حلم و اصحا بقا ، تعبت من التفكير ونمت ، صحيت تاني يوم على صوت امي وهي بتخبط على الباب وبتصحيني
اصحا بقا يا حمزة
= صحيت خلاص
يلا عشان تفطر
" خرجت ، كانو قاعدين بيفطرو ، قعدت معاهم ، بس مش دا الفطار بتاعي ، انا فطاري حاجة تانية خالص إنما دا فول وبيض و جبنة وشاي ، فوقت على كلام ابويا وهو بيقول
ما تاكل يا حمزة ، كدا هنتأخر
= هنتأخر على ايه
على الشغل
= ايه دا ، هو انا بشتغل
" قولتها ب حماس وانا متوقع انه هيرد عليا اني بشتغل مش اقل من مدير بنك مثلا
اه يا حبيبي بتشتغل
= بشتغل ايه بقا
يا ابني انت جالك فقدان ذاكرة ولا ايه ، ما احنا عندنا ورشة النجارة تحت البيت
= يعني انا نجار
انت لسة اول مرة تعرف ، دا انت احسن نجار في المنطقة
" يارب لا يارب ، اكتر من كدا حرام والله ، كل دا يحصل بين يوم وليلة ، اروح فين دلوقتي ولا اهرب ازاي ، لكن امي اتكلمت وقالت
معلش يا حاج ، اديله اجازة النهاردة
= ليه
عشان ينزل مع امل يختارو العفش
" كنت قربت افقد النطق ، امل مين اللي هنزل معاها دي ، وعفش ايه اللي هختاره
يلا بقا يا حبيبي افطر بسرعة و انا هكلم امل عشان تيجي وتنزلو سوا
" هو انا هيجيلي نفس افطر بعد كل اللي سمعته دا ، لكن الصراحة كنت جعان ، كلت وبصراحة برضو الاكل عجبني ، لكن اللي عجبني هو قعدتهم معايا و انا بفطر ، بقالي كتير مفتقد الجو دا خصوصا بعد ما ابويا مات و امي مبقتش فاضية ليا اصلا ، خلصت اكل و امي قالتلي
يلا يا حبيبي قوم البس و انزل عشان امل مستنياك تحت
" البس!! ، مانا لبست فعلا ، دخلت وغيرت هدومي ونزلت لقيتها واقفة مستنية
كل دا تأخير
= دول 5 دقايق بس
حتى لو 5 دقايق ، هو مش انا واقفة مستنية ولا ايه
= بقولك ايه ، انا على أخري وكلمة كمان هقولك روحي أنتي لوحدك اختاري العفش
قول انك شايف واحدة غيرك
= ياريت كنت اشوف واحدة غيرك
وهي في واحدة تقدر تقربلك ، دا انا كنت قطعت الشبشب عليها
= شبشب!!
اه شبشب ، ويلا بقا عشان منتأخرش ورانا حاجات كتير
" بقا انا اتجوز واحدة تقولي شبشب ، ليه كدا ، استحملت و روحت معاها
ايه رأيك في دا
= اي زفت وخلاص
بتقول ايه
= بقولك حلو جدا اختيارك رائع
و الكنبة دي حلوة
= أحلى كنبة دي ولا ايه ، ممكن نخلص بقا
خلاص احنا خلصنا ، تعالى بقا اعزمني على ايس كريم
= كمان ايس كريم
يلا بقا يا حمزة متبقاش رخم
= يلا
" مشيت معاها وانا مبقاش فيا صبر تاني خلاص ، بس كنت بحاول ، شايفها بتضحك ومبسوطة وانا مش معاها ، انا مركز في حياتي اللي ضاعت لكن اللي مهون عليا اني حاسس اني بعمل حاجة كويسة ، روحنا ومن تاني يوم بدأت انزل اشتغل في الورشة ، قبل ما انزل كنت فاكر مش هعرف اعمل حاجة ، لكن نزلت ولقيت ايدي هي اللي بتتحرك وبتشتغل كأني اشتغلتها قبل كدا ، بقت حياتي مقتصرة على الشغل و ابويا و امي وطبعا امل ، بدأت اتعود على الحياه تدريجيا لإني معنديش حل تاني ، كالعادة صحيت في معادي و نزلت الشغل ، خلصت بعد تعب يوم طويل جدا ، كانت الساعة 12 ، قفلت الورشة و طلعت البيت ، دخلت الشقة ، اتعودت اني اول ما ادخل انادي على ابويا ،
يا بابا ، باابا
" الغريبة ان امي المرادي هي اللي ردت عليا
تعالى يا حمزة
" كان الصوت جاي من اأوضة ابويا ، دخلت الأوضة عنده لقيته نايم و امي قاعدة جنبه
في ايه
= ابوك تعبان يا حمزة
تعبان ماله عنده ايه ، يلا بسرعة نروح المستشفى
= ابوك محتاج عملية في القلب و لازم يعملها بسرعة!!
بقلم : عمرو_علي ..