رواية حوديت من الظلام الفصل الثاني2بقلم عمرو علي
ابوك تعبان يا حمزة
= تعبان ماله عنده ايه ، يلا بسرعة نروح المستشفى
ابوك محتاج عملية في القلب و لازم يعملها بسرعة!!
= بكام العملية دي
200 الف جنيه
= هو تعبان بقاله كتير
اه وكل شوية يأجل العملية عشان الظروف اللي احنا فيها
= متقلقيش يا ماما ، انا هتصرف
ابوك هيضيع مني يا حمزة
= مش هيضيع ، هيقوم و هيبقا كويس ، انا هنزل دلوقتي
" اول ما قفلت باب الشقة ، عيطت ، يمكن دا مش ابويا بس اتعلقت بيه ، حسيت معاه تاني بنفس الاحساس اللي كنت بحسه مع ابويا الحقيقي ، نزلت مش عارف اعمل ايه ، مخي واقف عن التفكير ، اجيب منين المبلغ دا ، بعد ما كنت بصرف أكتر من كدا ، بقيت مش عارف الم ربع المبلغ حتى ، جات في دماغي فكرة ، ركبت بسرعة و روحت على بيتي الحقيقي ، كنت هدخل لكن الأمن وققني
لو سمحت انا عايز اقابل حازم الحديدي
= انت تاني يلااا
ابوس ايدك ابويا بيموت و جاي عشان استاذ حازم يساعدني
" الراجل قرب مني وقال
ملقتش غير حازم الحديدي اللي تجيله عشان تطلب مساعدة
= ماله حازم الحديدي
ميعرفش الخير ولا هيساعدك ، هو مش بيحب غير الفلوس وبس ، لو كنت فاكر انك هتصعب عليه تبقا غلطان
" ماسك نفسي بالعافية عشان معيطش ، معقول الناس شايفاني كدا ، معقول انا وحش بالشكل دا
انت صعبت عليا عارف ليه ، عشان احنا غلابة زي بعض ف هحس بيك إنما هو لا ، أدخل
" رجلي مش شيلاني عشان ادخل ، بفكر ارجع لكن جه في بالي ابويا و العملية بتاعته ، جمدت قلبي و دخلت ، كنت ببص على كل حاجة كانت عندي وفجأة بقت مش بتاعتي ، الغريبة اني مبقتش عايز كل دا ، دخلت لقيته قاعد على الكرسي بتاعي اللي كنت متعود دايما اقعد عليه
انت مين و دخلت هنا ازاي
= انا جايلك عشان تساعدني ، ابويا محتاج عملية ومش عارف يعملها بسبب الفلوس
" كان باصصلي ب استهزاء
ليه ، هي العملية بكام
= ب 200 الف جنيه
بس
= اه
مبلغ مش كبير خالص ، روح اشتغل و جمعهم
= بالنسبة لينا مبلغ كبير مش هنعرف ندفعه
ماهو يا حبيبي انا مش برمي فلوسي على الارض ، كمان انت شكلك كداب
= تعالى معايا وشوف ابويا بنفسك حالته عاملة ازاي
" ضحك و قام وقف
ااااه دا انتو كلكو كدابين بقا ، اسمع يا ابني انا مش هعرف اساعدك ، روح شوف حد غيري
" اتعصبت وقربت منه
= بقولك ابويا تعبان ، انت معندكش دم ، كل اللي انت فيه دا بتاعي انا
بتاعك انت!! ، اطلع برا يا حبيبي بدل ما اندهلك الأمن
" كان بيكرر نفس كل اللي بعمله ، نفس التصرفات و ردود الأفعال ، كل حاجة شبهي ماعدا الشكل ، عرفت ان مهما اتكلم معاه برضو مش هيساعدني ، مشيت من عنده ، يارب ساعدني ، مستعد اعمل اي حاجة بس ابويا ميموتش ، لكن ازاي الفكرة دي فاتتني ، الشيخ هو الوحيد اللي يعرف كل حاجة ، كلمت امي بسرعة وخدت منها عنوانه ، و روحتله ، وصلت بيته ، كان بيت قديم من دورين ، طلعت السلم ، دخلت شقته ، سكوت في كل مكان ، لحد ما سمعته بينده عليا
تعالى يا حازم
" الصوت كان جاي من الأوضة اللي ورايا ، دخلت وكان قاعد في ايده سبحة و قدامه بخور ، اتكلم وقال
جاي ليه
= ابويا هيموت
ابوك مات اصلا يا حازم ، ولا يكونش قصدك ابو حمزة
= ايوا ابو زفت
ماله
= ماله ايه ، بقولك هيموت
كلنا هنموت يا حازم
= بس انا مش عايزه يموت ، اتصرف اعمل اي حاجة
وانت عايزني اعملك ايه ، دا قضاء ربنا
= هو دا الراجل اللي كان بيطلب مني المساعدة
لا
= طب ازاي هقدر اجمع المبلغ
دور و وانت هتعرف ، بس متحاولش تغير حاجة من اللي بيحصل
= يعني ايه
يعني انت عارف ان حازم مش هيساعدك وبرضو روحتله
= انت عرفت منين
و هو انا كنت عرفت منين انك حازم مش حمزة
= انت مين في الاخر بقا
مجرد دليل ، و يلا امشي عشان تلحق تجمع الفلوس
" مين يقدر يساعدني ، كل الطرق بتقفل في وشي ، لقيت امل بتكلمني
انت فين يا حمزة
= بحاول اتصرف في فلوس
بص انا عندي حل
= ايه
انت ممكن تاخد الشبكة بتاعتي ، هي ب 30 الف ، ممكن تدفعها مقدم للمستشفى وبعد كدا ربنا يسهل و نجمع الباقي
= لا يا امل مش هاخد الشبكة ، دي بتاعتك
يا حمزة مش مهم ، المهم ابوك يخف
= لا برضو ، اقفلي دلوقتي و هكلمك تاني
" حتى لو خدتها برضو مش هتكفي ، خلاص انا ممكن اشوف شغل تاني جنب الورشة ، كنت ماشي راجع البيت و بفكر ، لقيت حد بينادي عليا
ايه يا عم حمزة ، مالك مش بتكلمنا ليه
= انت مين أصلا
انا ابراهيم في ايه مالك يا حمزة
= معلش انا تعبان ومش مركز في اي حاجة
انا عرفت ان ابوك تعبان ، الف سلامة عليه ، بس انت هتجمع فلوس العملية ازاي
= مش عارف ، لسة بفكر
حابب افكرك ان عرض المعلم صابر لسة متاح
= عرض ايه
المعلم صابر هيديلك فلوس العملية بتاعت ابوك
= انت بتتكلم بجد
اه والله
= طب فين
فين ايه استنا ، مش عايز تعرف المقابل ايه
= ايه
هتوصل بضاعة ل ناس
= بضاعة ايه
بقولك ايه عايزك تفوق معايا ، المعلم عايزك توصل المخدرات ل صحابها مش أكتر من كدا
= يعني فلوس حرام
بس ابوك هيخف و يقوم تاني
= وانا دوري ايه في العملية دي
هتسوق العربية بس
هفكر
" مكملتش الكلمة و سمعت امي بتصوت ، جريت بسرعة على فوق ، فتحت باب الشقة و دخلت لقيت امي قاعدة بتعيط و ابويا....
مالك يا ماما
" مش بترد
ماما في ايه
" برضو مفيش رد ، قربت من ابويا
بابا حصل ايه
بابا رد عليا
هو نايم صح
قوم يا بابا رد عليا
بالله عليك ما تسيبني تاني ، انا ما صدقت لقيتك
" كان نفسي يرد لكن كان خلاص كل حاجة راحت ، قعدت جنبه دماغي بتلف مكنتش داري باللي بيحصل حواليا ، طبعا ناس كتير جات و يكلموني و انا مش سامع حد ، حتة من جوايا اتكسرت ، ليه يارب تعمل فيا كدا ، استغفرت و قومت ، بدأنا نغسله و روحنا عشان ندفنه ، طول الطريق قاعد ببص عليه لانها المرة الأخيرة اللي هشوفه فيها ، كلمته
عارف انا اه مش ابنك بس حسيت انك ابويا بجد ، حسستني تاني يعني ايه اب ، لكن كنت خليك معايا ، ليه تسيبني
" وصلنا و بدأنا ندفنه ، روحنا وكل واحد رجع بيته ، تمر الايام وانا قاعد مش عايز اعمل حاجة او مش قادر اعمل ، امي كانت بتتظاهر بالقوة لكن كنت حاسس بيها ، امل كانت جنبي طول الوقت بتحاول تهون عليا ، عدا شهر وخلاص لازم ارجع للشغل ، نزلت الورشة تاني ، لسة ببدأ شغل لقيت امل عدت عليا
شوف وشك نور ازاي لما فتحت الورشة
= كان لازم افتحها عشان نلاقي ناكل
المهم انك نزلت يا حمزة ، اسيبك بقا عشان تشتغل وانا همشي عشان متأخرش على امي
" بدأت اشتغل لدرجة اني كنت بشتغل عدد ساعات اكتر في اليوم عشان ارجع تعبان و انام من غير ما افكر ، و في يوم خلصت شغل وقفلت باب الورشة ، لقيت ابراهيم جاي
هاا هتعمل ايه
= في ايه
اقول للمعلم صابر انك جاهز
= لا ، السبب اللي كان هيخليني اعمل كدا خلاص مبقاش موجود
فكر في نفسك يا حمار ، لما تاخد الفلوس دي حياتك كلها هتتغير ولا عايز تفضل طول عمرك نجار
= انا عاجبني كدا ملكش دعوة
عشان حتى تعرف تعوض امك و تجبلها كل اللي نفسها فيه وكمان تتجوز امل
= خلاص سيبني افكر
" خلصت كلام معاه وطلعت البيت ، دخلت الشقة
ماما
" مفيش رد
ماما أنتي فين
" بدأت ادور في الشقة ، بفتح اوضتها ، لقيتها واقعة على الارض
ماما ، ماما فوقي
= كويس انك جيت يا حبيبي
" كانت بتتكلم بصعوبة
مالك ايه اللي حصل
= خلاص ماشية
ماشية فين ، يعني ايه ماشية
= سامحني يا حمزة ، انا عندي فشل كلوي بس مقولتش لحد عشان محدش يشيل همي كمان مكنتش عايزة اتقل عليكو
" عنيا اتجمعت فيها الدموع
اسندي عليا ، هنروح اقرب مستشفى
= خلاص يا حمزة مفيش فايدة
قومي بقولك
= خلي بالك من نفسك يا حبيبي
لا يا ماما ونبي ما تهزري ، بالله عليكي مش عايز ارجع لوحدي تاني ، قومي ونبي ، يا ماما قومي وقولي انك بتهزري معايا ، يا مامااااا