رواية نجوم سرمدية الفصل الثالث3بقلم سبأ النيل
بعد خلص كتابة قالي يلا عايني .. قربت من الدفتر وبقيت بعاين للشخابيط الراسمها، شي دواير وشي مربعات وشي خطوط مستقيمة ومتعرجة واسهم .. عاينت ليهو وقلت ليهو ما فهمت، دي شنو الجغمسة دي .. مسك القلم وبقا يأشر لي على الرسومات دي .. قالي دة المخزون .. ما مخزون البضاعة لا دة مخزون القروش المفروض يكون عندك قاعد بي جنبة عشان تبدي بيهو الشغلة بتاعتك دي او بصورة اوضح التوسيع لشغلك .. طيب انتي ح تستفيدي منو شنو ؟ .. ح تستفيدي منو في حاجتين والاتنين ضروريات شديد .. اول حاجة انك تجمعي ولو جزو بسيط من راس المال بتاعك الح تبدي بيهو .. عايزة اتكلم اشر لي بالقلم قالي ما تقاطعيني ..
قلت في نفسي والله يا هو الفضل يا براءة اخر الزمن تاخدي دروس من طالبك .. كمل وقال المخزون دة انتي ح توفريهو من دخل اليوم البجيك ... وعشان توفريهو مع مصاريف البيت الكتيرة مقارنة بالقروش البسيطة البتجيك صعبة .. لكن انا بوريك طريقة لازم تنفذيها بي حذافيرها ... بكرة بجيك قبل ساعة من الحصة عشان اوريك ح تعملي شنو بالظبط اسي الزمن اتاخر انا ح امشي ... قلت ليهو لحظة انت اسي فاهم الكلام البتقول فيهو دة ولا بتقبض من طرف بس لاني ما فاهمة اي حاجة ... وقف على حيلو وطلع نظارتو ختاها في جيب البنطلون وشال الكراس وقالي .. بكرة ح تفهمي كلامي دة كلو بإذن الله .. دة لو ما كان مخك دكوة .. رفعت حاجبي قلت ليهو قصدك شنو يا ولد .. قالي سلامتك .. انا ماشي يلا مع السلامة ....
عاينت ليهو لغاية ما طلع بي استغراب شديد وبقيت بفكر يا ربي انا كنت بتوهم ولا حاجة .. عاينت في الطربيزة لقيت الدفتر قاعد .. فتحتو وبقيت بعاين للشخبطة بتاعتو دي وبحاول افهم اي حاجة لكن غلبني .. رفعت حواجبي بإستنكار وجدعت الدفتر في الطربيزة وقمت اجهز الايسكريم عشان اوديهو ... بقيت بعمل فيهو وبعد ما خلصت قفلت الصبارة ... صليت العشا وشلتها وطلعت ماشة على بيت عمو عوض الله .. اثناء ما انا ماشة في الشارع لاقاني واحد من معارف ابوي وقفني وسلم علي وسال من ابوي ... قلت ليهو حاليا كويس الحمدلله .. قالي اسمعيني يا بتي .. ابوك دة قبل كم شهر كدة اتدين مني قروش وصراحة المبلغ ما هين .. وانا اسي محتاج ليها عندي سفرة قريبة .. وكل مرة بكلمو بقولي اصبر علي شوية وصبرت عليهو كتير .. لكن ما دفع لي ولا حتى جزو من المبلغ ...
طوالي اتذكرت القروش الدفعها ابوي لجامعتي فعلا ما كان البلغ هين .. سالتو انت يا ابوي جبت القروش من وين .. قالي ما تشغلي بالك انا اتصرفت بس وجبتها ..
الراجل قطع تفكيري وقالي انا بديهو اسبوعين لو ما دفع لي على الاقل نص المبلغ ح انجبر افتح فيهو بلاغ .. اتخلعت وقلت ليهو بلاغ كيف يعني .. قالي عديل كدة انا استنيتو كتير والله وصلي ليهو كلامي دة .. يلا مع السلامة .. بقيت بعاين ليهو لحدي ما فات .. وقفت في نص الشارع في الضلام داك وخفت شديد من انو ابوي يتسجن ... بس المبلغ كان كبير ومستحيل ابوي يقدر يسددو خلال اسبوعين .. اصلا مستحيل اكلم ابوي بالموضوع دة .. لازم انا بي اي طريقة ادبر ليهو نص المبلغ على الاقل يغض نظر عن موضوع الشكوى والبلاغ دة .. والافكار بقت تاخدني وتجيبني وحسيت انو ما بيدي حاجة وانها فجأة اتقفلت في وشي .. انا يا الله بقدر اطلع حق الاكل والشراب .. يطلع لي موضوع قدر دة .. ما قدرت امسك دموعي ... بقيت واقفة ماسكة الصبارة بيديني الاتنين وحاسة انو ما منها اي فايدة .. حاسة انها حاجة سخيفة وبسيطة وما ح تحل لي المشكلة دي .. سرحت بعيد بفكر في الجاي .. بفكر في الح يحصل لينا شنو .. ياربي نهايتنا ح تكون وين ..
انتبهت على زول بتكلم معاي .. الدموع كانت عاملة لي زي غشاوة في عيوني ما قدرت اشوفو كويس .. مسحت دموعي بطرف يدي وعاينت للزول تاني .. لقيتو مهند ود عمة عبدو ... انتبهت انو العربية واقفة قدامي ونورها منور فيني وهو واقف قدام النور عشان كدة ما شفتو كويس .. قالي انتي كويسة ؟.. قلت ليهو ها؟! .. قالي جيت ماشي بي جاي وكنتي واقفة في الشارع دقيت ليك بوري لكن ما اتحركتي .. قلت ليهو ااا ايوا م معليش ما انتبهت .. وزحيت ليهو من الشارع .. عاين لي مسافة قالي شايفك بتبكي ان شاء الله خير .. قلت ليهو لالا ماف حاجة بس الغبار وانا عندي حساسية وابتسمت وانا بقشقش في دموعي .. عاين لي مساافة وقالي حساسية ؟ .. قلت ليهو ا اي .. ضيق عيونو وعاين في الشارع وتاني عاين لي وقالي طيب عن اذنك .. قلت ليهو اتفضل .. ركب وفات وانا بقيت واقفة بعاين في الفراغ ..
اتحركت على بيت خالتو عوضية ورنيت الجرس فتح لي عبدو .. قالي الليلة اتاخرتي ما جبتيها بدري .. قلت ليهو امم اتمشيت شوية في الشارع .. قالي خشي .. قلت ليهو لالا ماشة هاك دخل الصبارة .. عاين لي مساافة وقالي مالك بتبكي .. قلت ليهو منو القاليك ببكي .. قالي عيونك .. الحاصل شنو بتبكي مالك .. قلت ليهو ما حاجة مهمة انا اصلا ببكي على البسوا والما بسوى .. قالي جادي انا .. قلت ليهو يا ود ما تبطل نقة ودخل الصبارة دي .. عاين كدة واخد نفس طويل وقالي طيب جيبيها كتر خيري البسأل .. شالها دخلها وانا رجعت البيت وطوالي اتجدعت في السرير ..
عرفت اني ما ح اقدر انوم .. بقيت الليل كلو افكر في الح يحصل وبالي مشغول شديد .. زي الساعة 1 ياداب غمضت عيوني كدة فجأة اسمع ليك كركبة جنب باب الشارع .. فتحت عيوني وانا مخلوعة .. قلت بسم الله الصوت دة شنو .. سكتت شوية قلت احتمال بتوهم تاني الصوت رجع .. بلعت رقي وقلت يمكن كديسة .. ايوا يا كديسة يا كلب .. رقدت وغطيت وشي ورجليني بس الصوت حماني انوم .. قمت براحة وولعت فلاش تلفوني النوكيا ونزلت على اطراف اصابعي ... عاينت في غرفة ابوي لقيت نورها مقفول معناها نايم .. طلعت الحوش برااحة براحة وصوت الكركبة بقى اعلى ..
وصلت الباب وبقت واقفة جنبو وبتصنت .. الصوت بقا بعيد شوية ووقف .. فتحت الترباس شوية شوية وجريت الباب .. طلعت راسي برا وعاينت يمين وشمال ماف حاجة .. ضويت بالفلاش برضو ماف حاجة .. قلت احتمال كديسة فعلا وجرت .. دخلت راسي وعايزة اقفل الباب سمعت صوت بقول بس بس ..
فتحت عيوني كبار وقلبي بقا بضرب شدييد .. طلعت راسي تاني وعاينت، الصوت تاني قال بسس بسس .. ما قدرت اتحرك .. تاني سمعت هي براءة عايني هنا .. عاينت مصدر الصوت جاي من ورا العمود .. بقيت مبحلقة في العمود ، فجاة طلع عبدو من وراهو .. لمن طلع انا كانو اتكشحت فيني موية باردة .. اخدت نفس طويييل وطلعتو وقلت ليهو بصراخ لكن بهمس .. يا زفت انت بتعمل شنو هنا نص الليل .. ختا اصبعو في خشمو وقالي هسس .. قلت ليهو هس في عينك تعال هنا .. جا وقف قدامي مسكت اضانو قلت ليهو بتتحاوم انصاص الليالي ليه .. قالي ااي ياخ فكي يدك حارة ..
قلت ليهو وقعت لي قلبي يا عواليق بتعمل في شنو هنا .. قالي فكي طيب ياخ عشان اوريك .. فكيتو وختيت يديني في نصي وقلت ليهو قول اها سامعاك .. مشا ورا العمود وجا شايل ليهو كيس ومداهو لي .. نزلت يديني وقلت ليهو دة شنو .. قالي امسكي .. شلتو وفتحتو لقيتو مليان شوكلت وشيبس ولبان وهتش كتير .. عاينت للكيس وتاني عاينت ليهو قلت ليهو دة شنو ... قالي وهو مغمض عين واحدة وبدعك في اضانو من الالم .. قبيل كنتي بتبكي وسالت امي قلت ليها لو كان عندي اخت وشفتها بتبكي اعمل ليها شنو .. قالت لي جيب ليها حلويات وشيبسيهات ومزاجها ح يتعدل .. عشان كدة جبتهم ليك ..
عاينت ليهو مسافة وقلت ليهو ما جادي .. قالي شايفاني شايل مايك وبقول نكات .. قلت ليهو شكرا يا عبدو ما عارفة اقوليك شنو وعيوني طوالي رغرغو .. قالي تبكي على البسوا والما بسوى .. قلت ليهو لكن الجايبك نص الليل شنو كان ممكن تديني ليها بكرة الصباح او في الحصة .. قالي لالا عشان ما تنومي زعلانة .. الواحد لمن ينوم زعلان او ببكي احتمال كبير يحصل ليهو خلل في الجسم او جلطة مفاجئة .. قلت ليهو دامك ح تبدا تتفلسف امسك كيسك وامشي البيت .. ضحك وقالي لالا خلاص ماشي عندي مدرسة بكرة .. فات وانا بقيت واقفة ومن بين كل الحاجات خطرت في بالي اية بدون سابق انذار .. الاية كانت
﴿ ولا تَخـافـي ولا تَحزَني ۖ ﴾♡︎ .. جسمي اقشعر .. ما عرفت من البرد ولا لاني حسيت بمواساة ربانية ..
تاني يوم طلعت متاخرة لاني كنت شبه يائسة .. شلت الصبارة وقعدت في الموقف وكنت سرحانة اغلب الوقت .. الشمس وصلتني وما كلفت نفسي اني اغير مكاني ... مسكت رجليني علي وبقيت راقدة فيهم مقبلة عكس الشمس بعاين ساي .. دموع و ضيق وحزن .. كئابة استسلام .. كلو كنت بحس بيهو .. كلو كان في راسي .. تلفوني رن عاينت للرقم لقيتهم ناس الروضة .. رديت .. الو ! .. الو السلام عليكم .. براءة محمد ؟! .. قلت ليهو ايوا معاك .. قالي بكرة ح تنزلي تشتغلي طوالي في الروضة .. الشغل لمدة 15 يوم بس .. المصروف باليوم نفس المبلغ الفي الاعلان .. ما رفعت راسي ولا ابديت اي ردة فعل .. المكالمة دي لو كانت قبل كم يوم كنت طرت من الفرح .. لكن اسي المبلغ بقيت شايفاهو ما بسوى حاجة ... قلت ليهو طيب ان شاء الله .. قالي بكرة تجي الساعة 7 صباحا كل يوم عندك حصتين عربي ... قلت ليهو تمام .. قفلت التلفون ورفعت راسي الهوا ضربني طق جاني صداع ..
رجعت البيت ماشة تحت الشمس والصداع عايز يشق راسي .. يا الله غشيت الدكان جبت الفطور عملتو وختيتو لي ابوي .. ابوي قالي ماشة وين يا بت ارح افطري .. قلت ليهو ما عايزة يا ابوي الحمدلله .. قالي مالك عندك شنو ؟ .. قلت ليهو مصدعة بس .. قالي لو ما اكلتي الصداع ما ح يخف لكن .. قلت ليهو لالا ح انوم لغاية بعدين كدة بروح .. قالي خلاص انا باكل وبخلي ليك لغاية ما تصحي .. ما تنسي تصلي .. قلت ليهو حاضر يا ابوي .. كان نفسي اقعد جنبو وابكي ابكي ابكي ويربت لي على راسي ويقولي كل شي ح يكون تمام ما تخافي .. لكن ما كنت عايزاهو يعرف حاجة عن الحاصل عشان حالتو ما تتدهور ويشيل هم .. قالي مالك واقفة يا بتي عايزة تقولي حاجة؟ .. ابتسمت ليهو ابتسامة بااهتة وحركت ليهو راسي بمعنى لالا .. ابتسم لي ورجع ياكل ..
عاينت ليهو مسافة ومشيت اتوضيت وصليت ونمت على طول .. ما بين صاحية ونايمة وشايفة غباش غباش ، ما بين حلم ولا حقيقة ما عرفتو .. حسيت بيد على جبيني وصوت حنين بقرا قران وبربت على راسي برااحة .. حسيت بيهو ابوي .. بعد خلص قال اللهم رب الناس ، اذهب البأس ، واشفي انت الشافي ، لا شفاء الا شفاؤك ، شفاء لا يعادل سقما .. غطاني وطلع .. وطوالي غرقت في النوم ...
صحيت والجو كان بااارد والارض صانة .. قمت واتربعت في السرير ودعكت عيوني .. سرحت مسافة وتاني رقدت نمت .. بعد شوية صحيت بقيت اغمض خمسة دقايق وتاني افتح لغاية ما صحيت كلياً .. مديت يديني شديد وقعدت بعاين زي دقيقتين كدة بعديها نزلت ووقفت في باب البرندة وبعاين للحوش .. بعد شوية استوعبت انو الواطة مغربت .. طوالي اذان المغرب اذن .. استغربت، معقولة انا نايمة الزمن دة كلو ... لقيت ابوي جاي وشايل مصلايتو شكلو كان جاي يصحيني .. قالي صحيتي ؟ اها بقيتي كيف شكلك كنتي فترانة شديد .. قلت ليهو كويسة الحمدلله .. انا نمت دة كلو .. ضحك وقالي اي حيرتيني كنتي نايمة بعمق كمان وظاهر عليك التعب ما حبيت اصحيك .. امشي صلي عشان المغرب ما يفوتك .. قلت ليهو حاضر .. قالي يحضر ليك الخير ..
فات واتذكرت لمن كان بيقرا لي قبيل وانا نايمة .. ابتسمت .. فجاة قلت ليهو ابوي لحظة .. قالي ايوا .. قلت ليهو عبدو جا هنا ؟ .. قالي اي جا وقلت ليهو مصدعة نايمة قالي خلاص خليها بجي بكرة .. قلت ليهو طيب تمام ..
صليت المغرب ومشيت ختيت الغدا وبقيت اتونس مع ابوي .. قالي شنو الليلة ما عاملة ايسكريم ولا قنعتي منو .. ضحكت وقلت ليهو لالا بكرة الصباح ح امشي الروضة عشان كدة ما ح اعملو الليلة .. قالي يعني قالو ليكي ح تنزلي تشتغلي .. قلت ليهو 15 يوم بس .. قالي ليه .. قلت ليهو بديل لي استاذ تاني .. قالي خير يا زولة اخير من عدمو .. بعد خلصنا مشيت جهزت عبايتي وانتظرت العشا اذن صليتو ورقدت نمت وانا حاسة انو في حاجة ح تحصل بكرة لكن شنو ما عرفتها ...
{لاتدري لعل الله يحدث بعد ذلك امرا} ..