رواية نجوم سرمدية الفصل الرابع4بقلم سبأ النيل
اصبح الصباح ... قمت بدري عملت الشاي وشربتو مع ابوي .. اتجهزت وطلعت على الروضة .. كانت بعيدة من البيت .. بعد ساعة تقريبا وصلت ووقفت قدام الباب وبقيت بعاين ليها بتمعن .. كانت طابقين وكلها باللونين البينك والازرق .. دخلت ولاقيت المديرة واتكلمت معاها وورتني اني ح ادرس في المستوى التاني .. كانو حصتين بس اتغيرت لحصة واحدة بس وبرجع البيت .. اتفقت معاها اخد المصورف باليوم وصراحة ما كان زايد عن صبارة الايسكريم بي كتير .. لكن برضو ارتاح شوية من البيع والقعدة والشمس والغبار دة حتى لو نص شهر .. ادتني كتاب المقرر بتاعهم الي كان كلو عبارة عن حروف وكلمات .. قلت في نفسي على الاقل ح ادّرس حاجة زي شراب الموية .. المديرة قاطعت تفكيري دة وقالت لي بس قبل ما تبدي حابة اقوليك انو الاولاد الح تدرسيهم ما بياخدو الفهم بي سرعة حتى كتابتهم ركيكة شديد ..
قلت ليها بس دي الحاجة المتوقعة من اطفال في الروضة .. قالت لي بس ما بالسوء دة .. قامت على حيلها وفتحت واحدة من الضلف الوراها وقالت لي على العموم انا كلمتك لازم تطولي بالك معاهم شديد لانهم لو ما ارتاحو ليك ما ح تقدري تنجزي معاهم في التدريس .. سحبت ملف اصفر وجات ختتو قدامي وقالت لي دي اساميهم واحد واحد ومستوى كل واحد فيهم من رقم واحد اعلى مستوى لغاية رقم عشرة ادنى مستوى .. شلت الملف وعاينت ليهو كان تلات ارباع الفصل في المستوى العاشر يعني كم نفر بس المستواهم كويس .. قالت لي بعدين قعديهم زي ما انتي عايزة حسب فهمك .. عاينت ليها ابتسمت لي وتاني عاينت في الساعة بتاعتها وصفقت صفقة خفيفة وقالت يلا يلا الزمن جا ح تمشي بي الممر دة على طول تالت فصل على شمالك ح تلاقي مكتوب فوقو المستوى الثاني ج .. بس ديل تبعك .. حركت راسي وقلت ليها طيب ....
مشيت على الفصل لمن قربت سامعة الضحك والكلام الملخبط وصوت اللعب .. وقفت في الباب وبقيت بعاين ليهم وهم شوية شوية بقو ينتبهو لي ويسكتو .. دخلت ووقفت قدام السبورة وهم مراقبني بنظراتهم الطفولية .. واحد منهم قالي انتي منو .. ابتسمت وقلت ليهم انا الاستاذة الجديدة الح تقريكم العربي .. اسمي براءة محمد .. واحد تاني قالي يعني ح نقوليك ماما براءة ... زميت خشمي وقلت ليهو اممم لالا قولو لي براءة ساي .. قالي لكن .. لكن البتقرينا بنقوليها ماما .. قلت في نفسي ماما وعمري 18 سنة .. على العموم قولو لي اي حاجة عايزنها ما فرقت .. حسيت بحاجة بتجر في عبايتي عاينت تحت لقيتها بت صغيرونة .. عاينت لي مسافة واشرت لي انز ليها تحت .. نزلت وبقت تعاين لي في عيوني مساافة وعقدت حواجبينها ..
عقدت ليها حواحبي زيها .. عاينت لي زمايلها في الفصل وتاني عاينت لي قمت عاينت ليهم بطرف عيني وتاني عاينت ليها .. قالت لي عيونك ما زينا لشنو انتي ساحرة؟ .. غمضت عيوني وحركت راسي وضحكت .. قلت ليها دي الحاجة المحيراك من قبيل .. هزت لي راسها .. قلت ليها عيوني عادية لكن ما زيكم عشان عسلية .. قالت لي عسلية كيف يعني .. قلت ليها بتعرفي الالوان .. قالت لي اي .. قلت ليها بس انا لون عيوني مختلف .. قالت لي عشان انتي ساحرة .. ضحكت ووقفت على حيلي وقلت ليها لالا انا ما ساحرة .. قالت لي طيب عيونك كدة ليه .. سمعت صوت ضحك من الباب لقيتها المديرة .. قالت لي نسيت اقوليك انو دمك ح ينشف من كتر الاسئلة .. قلت ليها باين كدة .. قالت لي اتحمليهم قدر الامكان انا ح الف على باقي الفصول التانية .. عاينت للبت وقالت ليها تسابيح اقعدي مكانك وخلي الاسئلة الكتيرة .. تسابيح فاتت قعدت وهي ابتسمت لي وفاتت ..
قبلت عليهم وانتكلت في الدرج .. مسكت لي قلم وبقيت بأشر وبسال فيهم واحد واحد عن اسمائهم وعايزين يبقو شنو لمن يكبرو .. الاكتشفتو انو نصهم دكاترة والنص التاني مهندسين .. قلت في نفسي دقتهم واحدة دايما .. شلت لي طبشيرة ومشيت على السبورة وكتبت حرف ال "ح" وعاينت ليهم قلت ليهم الحرف دة شنو .. زول عبرني ماف .. قلت ليهم ماف زول عارفو .. قالو لي لا .. كتبت ليهم حرف تاني وتالت ورابع وبرضو ما عارفنو .. حكيت حاجبي بالقلم وقلت ياربي الاستاذ الفات دة كان بقريهم شنو ما عارفين الحروف دي .. ختيت القلم في الطربيزة وبديت وقلت ليهم طلعو كتبكم وتابعو معاي .. بقيت اتهجأ ليهم في الحروف وبحاول احفظهم ليها .. بديت ليهم بي ستة حروف مع نطقها وتغير اشكالها في مواقعها المختلفة وصراحة لو ما الصبر العندي كنت فنيت الطربيزة هناك وشلت شنطتي وقمت طالعة ..
بعد ما زمن الحصة خلص قلت ليهم تقروهم في البيت وتجوني بكرة حافظنهم .. طلعت ولاقتني واحدة من الاستاذات سلمت علي وبقت تتونس معاي وسألتني من عمري وقرايتي وكلام كتير .. عزمتني فطور على اساس اول يوم لي هنا لكن اعتذرت منها وقلت ليها مرة تانية وبعد الحاح حتى خلتني .. مشيت للمحاسبة ادتني قروشي وطلعت طوالي على البيت .. لمن وصلت الحلة مشيت جبت فطور ومشيت البيت عملتو وقعدنا نفطر انا وابوي .. قالي اها الشغل كيف .. قلت ليهو وووب يا ابوي وووب عايز صبر صبر مبالغة بالذات مع الشفع ديل .. ضحك وقالي حاجة معروفة كنتي متوقعة شنو يعني .. قلت ليهو انت يا ابوي عارفني انا بي اتجاه والصبر بي اتجاه تاني خالص .. قالي اسي لو حصلت معاك مشكلة محتاجة صبر تقيل ما بتصبري .. عاينت ليهو وضيقت عيوني وقلت ليهو اديك الصراحة ؟ .. ما بقدر خلقي ضيق شديد ..
ضحك وقالي طيب وسعيهو عند الترزي .. عاينت ليهو ببرود وبقيت برمش براحة وقلت ليهو ابوووي .. ضحك وقالي الواحد ما يهظر يعني خلي روحك رياضية .. قلت ليهو الروح الرياضية ما ليها علاقة هنا .. سكت شوية وقالي عمر رضي الله عنه قال {وجدنا خير عيشنا بالصبر} .. كل ما كنت انسان صبور هادي ومتحمل كل ما حسيت نفسك في خير ورضى .. الله سبحانه وتعالى قال { واصبر صبرا جميلا} .. صبرا جميلا يعني صبر بكل معنى الكلمة مهما كنتي بتعاني .. ما ينسمع حتى الانين .. متماسكة .. انتي الفيهو دة ما بس الروضة و التلاميذ ديل .. لا كل العايشنو نحن محتاجين نصبر عليهو .. ما تتذمري ما تفاقمي الموضوع وما تتزهجي ولا تشتكي لي زول بي قرف .. يعني ح تشكي الله لي عبد؟! .. { واصبر صبرا جميلا . انهم يرونه بعيدا ونراه قريبا } .. الفرج ما بجي الا من بعد صبر .. والصبر اجرو كبير .. كبير شديد .. { انما يوفى الصابرون اجرهم بغير حساب}.. بطلعو ناس من القبور الى ابواب الجنة .. على طول .. ف بقيف ليهم رضوان (خازن الجنة) .. بقوليهم الى اين ؟ .. وين ماشين .. انتو لا وقفتو لي حساب ولا ميزان ولا لنشر ديوان .. ف بقولو ليهو يا رضوان .. نحن ما بنقيف لحساب ولا لنشر ديوان .. انت ما قريت القران ؟ ..
ف بقوليهم وفي شنو في القران .. بقولو قال ربنا { انما يوفى الصابرون اجرهم بغير حساب}.. بقول ليهم وصبركم كان كيف ؟ .. بقولو .. كنا اذا جهد علينا حلمنا .. الحلم(الصبر) .. واذا اسيئ الينا صبرنا .. واذا اعطينا شكرنا .. واذا اذنبنا استغفرنا .. ف بقول ليهم ادخلو الجنة فلا خوف عليكم ولا انتم تحزنون ..
في رايك مش المفروض الواحد لمن تصيبو مصيبة يفرح عشان ح يصبر صبر يدخلو الجنة بدون حساب ؟..
ودة كان الموضوع البقى شاغل تفكيري طوال اليوم .. انو ايوا طبعا .. فعلا لو دة جزاء الصابرين انا كنت ح افرح كنت ح اجهز نفسي للصبر .. حتى لو خلقي ضيق مفروض اطول بالي .. اتعلم الصبر .. بقيت لافة في البيت اغسل واكنس واشر ونفس الموضوع شاغل بالي .. بالعصرية كدة عبدو جاني .. قالي سلامتك عمو محمد قالي كنتي مصدعة امس .. قلت ليهو اي والله و شالتني نومة ونسيت انك ح تجي .. قالي ما مشكلة دة الارهاق .. على العموم نحن اتفقنا المرة الفاتت اني ح اجيك ابدر بي ساعة عشان اوضح ليك كلامي عن التوسعة .. اخدت نفس وقلت ليهو ماف داعي يا عبدو .. عاين لي بي استغراب وقالي ليه .. قلت ليهو انا شايفاها حاجة غريبة وما ح تزبط ... وبعدين انت لسة صغير ما تشغل راسك بالمواضيع دي .. بقى ساكت ساي .. قلت ليهو حتى الليلة نزلت شغل في الروضة وما ظنيت ح افكر في اقتراحاتك دي .. ما قصدي انها ما مهمة لكن الواحد لازم يكون واقعي شوية وانت ذكي بما فيه الكفاية عشان تفهم قصدي .. عاين لي مسافة ونزل عيونو وتاني عاين لي قالي انتي شايفة انو كلامي لطش وهبد ساي صاح ..
قلت ليهو لا ما كدة .. انت افكارك بعيدة وحلوة وكل حاجة لكن ما بقدر اضمن نجاحها 100% .. قالي يعني شايفة انو القروش البسيطة البتاخديها من دوامك في الروضة دة ح يحل ليك المشكلة الجاتك فجأة دي .. قلت ليهو مشكلة؟ ... ياتو مشكلة ... قالي الدين بتاع ابوك .. عاينت ليهو مساافة بي استغراب وقلت ليهو وانت عرفت كيف ... قالي نبدا الحصة عشان الزمن ح يفوت ...
{ لا تدري لعل الله يحدث بعد ذلك امرا } ....
يتبع ....
#نجوم_سرمدية5
#بقلم_سبأ_النيل
صلوا على النبي
قلت ليهو لا لحظة عرفت من وين انو عندي مشكلة .. قالي المهم عرفت .. قلت ليهو عبدالباقي .. قالي الحصة .. سكتت خليتو وعاينت ليهو مسافة وقلت ليهو طيب نبدا ... بعد ما خلصنا هو فات وانا بقيت الملم في الحاجات .. خلصت ومشيت شلت قروش من الدولاب ولبست توبي وقلت لي ابوي ماشة اجيب حاجات الشاي لبكرة .. قالي كويس ما تتاخري .. طلعت وقفلت الباب بالترباس ومشيت على الدكان .. اثناء ما انا ماشة لمحت الراجل العايز من ابوي قروش واقف في الدكان بشتري في حاجات .. قلت اسي لو شافني ح يسالني من القروش ... بقيت واقفة منتظراهو يمشي وهو واقف مع سيد الدكان بتناقشو في حاجة .. وقفو مسافة طويلة والزمن اتاخر .. سمعت صوت من وراي بقول بس بس .. اتخلعت و اتلفت سرعة وعاينت ..
لقيتو عبدو .. غمضت عيوني واخدت نفس طويل .. قالي مالك واقفة هنا .. قلت ليهو انت بتخلعني دايما مالك .. قالي كلها مرة واحدة ودي التانية .. وبعدين واقفة هنا مالك آخر الليل .. قلت ليهو انت مالك يا ولد انت .. حبيت اشم هوا وارجع ... عاين تحت بحركة بطيئة وتاني عاين لي وقالي وما لقيتي الا الكوشة تشمي فيها هوا؟ .. ذبابة انتي ولا حاجة؟ ... زميت خشمي وختيت يدي في نصي وقلت ليهو انت مشكلتك معاي شنو .. سمعت صوت من وراي بقول عبدو الجابك وراي شنو .. نزلت يديني براحة وقبلت وراي لقيتو قريبو مهند .. عبدو قاليهو امي نست تقوليك جيب معاك فلفل اسود عشان خلص وقالت لي امشي اجيبوا انا .. قاليهو خلاص انت ارجع انا بجيبو .. عاين لي وقالي السلام عليكم .. قلت ليهو وعليكم السلام .. عن اذنك .. عاين لي بأستغراب وحرك راسو بمعنى طيب ... مشيت منهم وقلت يووووه الراجل لسة واقف .. عاينت وراي لقيتهم الاتنين واقفين عبدو مدخل يدينو في جيوبو والتاني داك مدخل يد في جيبو والتانية شايل بيها كيس ويعاينو لي .. قبلت قدامي بي استغراب وقلت بشبهو بعض سبحان الله ..
وقفت في الدكان قلت السلام عليكم .. الاتنين قالو وعليكم السلام .. قلت ليهو آدم عليك الله اديني شاي وسكر ولبن .. قالي كويس ثواني .. الراجل عاين لي قالي مدام بتشتري اكيد لميتو لي قروشي صاح .. عاينت ليهو بإستغراب وقلت ليهو نعم .. قالي الدين بتاع ابوك جمعتوهو .. آدم بتاع الدكان كان بعبي في السكر عاين لي وتاني عاين ليهو .. قلت ليهو لا لسة لمن نجمعهم بنجيبهم ليك في باب بيتك .. قالي اسرعو لكن كويس واتذكري القلتو ليك .. يلا يا آدم انا ماشي .. قاليهو طيب تمام لي بكرة .. بقيت واقفة مكشرة وبقول دة شنو الراجل المستفز دة .. آدم جا وخت لي الحاجات وقالي الوقعكم مع الراجل دة شنو .. عاينت ليهو وقلت ليهو الوقعنا؟ .. قالي اي الوقعكم .. الراجل دة الحمدلله بس ما عايز اتكلم فيهو لكن حاولو تتحلو منو بدري بدري ودخل دكانو راجع .. بقيت واقفة وبفكر ياربي آدم قصدو شنو ..
شلت الحاجات واديتو القروش وقلت ليهو شكرا .. قالي العفو .. قبلت عايزة امشي ضربت في واحد والكيس اتشرط والحاجات اتكشحت ... قلت يا ربيييي يا ربيييي .. عاينت في الزول لقيتو مهند .. عاين للحاجات وقالي معليش ما قصدي والله .. غمضت عيوني واخدت نفس واشرت ليهو بيدي وقلت ليهو ما مشكلة .. بقيت واقفة وبعاين في الحاجات وانا بفكر ياربي اشيل حب الشاي ولا القط السكر .. قلت في نفسي خلي العولاق وامشي البيت احسن .. قبلت عايزة امشي سمعت صوتو بناديني .. قبلت عليهو مدا لي كيس .. قلت ليهو دة شنو .. قالي حاجاتك .. جبتها ليك عشان وقعو بسببي .. قلت ليهو لالالا ما مشكلة ما فرقت .. قالي لالا امسكي دة حقك ما عطاء مني والله .. قلت ليهو لا .. آدم قالي يا هبلة دة تعويض عادي ودة المفروض يحصل .. هو عاين لي ادم وتاني عاين لي وحرك راسو .. قلت ليهو طيب .. شلت الحاجات وهو فات .. وقفت شوية عاينت ليهو وتاني عاينت لي ادم و قلت ليهو وانت التاني .. اتخلع وقالي بسم الله مالي انا كمان .. قلت ليهو اكياسك الميتة دي غيرها وجيب اكياس زي الناس ... قالي طيب طيب يا شيخة ..
مشيت البيت ومما دخلت من الباب بقا همي في الراجل وقروشو .. مفروض بعد 13 يوم اديهو قروشو .. قلت في نفسي انا قروش زي دي في تلاتة شهور ما بجيها خلي 13 يوم ... طيب لو ما جمعتها ليهو معقولة ابوي يدخل السجن .. بقيت واقفة جنب الباب وسرحانة .. ابوي جا ماري شايل الابريق عايز يتوضى لقاني واقفة .. وقف عاين لي مساافة وقالي براءة ؟ .. انتبهت ليهو وقلت ليهو اي يا ابوي .. جا علي وقالي مالك واقفة هنا .. قلت ليهو اااا كنت بفكر في شغل الروضة وانو قروشو دي ما كافية .. قالي يا بتي اخير من عدمها .. حتى انا بديت احس صحتي بدت تتحسن وح انزل شغل و .. قاطعتو قلت ليهو لالا يا ابوي عليك الله اخر مرة قلت كدة وسمعت كلامك وصلت للموت وجيت .. انت خليك في البيت دة وانا بشتغل .. عاين لي مسافة وقالي طيب لكن لو حسيتي بي اي صعوبة كلميني تمام .. قلت ليهو ما ح احس بإذن الله اتطمن ..
مشيت دخلت الحاجات جوة وفتحت الدولاب عديت القروش اللاماها ما جايبة ولا ربع ربع المبلغ .. لميتها راجعة وجدعتها في الدولاب و قلت ربنا يهون .. بقيت واقفة وبعاين في الدولاب وخلاص عايزة ابكي خلعني صوت ابوي وهو بناديني .. مشيت وقلت ليهو يا ابوي قطعت علي اللحظة .. ضحك وقالي جنك دة ما بتخليهو .. قلت ليهو ناديتني لشنو .. قالي جيبي لي المصلاية .. مشيت جبتها ليهو وقالي كنتي عايزة تبكي ولا شنو .. قلت ليهو لالا كنت متخيلة نفسي سيدة اعمال كبيرة .. قالي اللهم امين .. الاذان اذن قالي يلا امشي صلي .. قلت ليهو حااضر ...
من الهم اليوم دة ما قدرت انوم .. صحيت تاني يوم الصباح ومشيت الروضة .. وصلت وسلمت على الاساتذة وبعد شوية دخلت الحصة .. بقيت بدرسهم وباخد وبدي معاهم .. صحي فهمهم كان شوية تقيل لكن اكتشفت انو خيالهم واسع والواحد لو اديتو موضوع ممكن يتكلم فيهو لي ساعات .. تسابيح قالت لي يا ماما عسلية .. عاينت ليها بإستغراب وقلت ليها ماما عسلية دي انا ؟ قالت لي اي .. قلت ليها ليه بتقولي لي ماما عسلية .. قالت لي انتي قلتي نناديكي بأي حاجة ما فرقت .. وقلتي عيونك اسمها عسلية .. ضحكت وقلت ليها طيب ما مشكلة .. اها عايزة شنو .. قالت لي حلقي واجعني .. جيت جنبها وقلت ليها من شنو .. قالت لي ما عارفة .. اتحسست حلقها كان طبيعي وقلت ليها حاسة بجفاف ؟ .. عاينت لي بطفولية وقالت لي كيف يعني .. قلت ليها عطشانة؟ .. قالت لي اي .. قلت ليها طيب ح امشي اجيب ليك موية كويس .. قالت لي كويس .. مشيت برة اجيب ليها موية لاقتني استاذة سعدية الامس وبقت تتكلم معاي ..
اتكلمت معاها شوية وشلت الموية ورجعت لقيتهم بتونسو ساي .. عاينت لتسابيح لقيتها راقدة في الدرج .. مشيت وقلت ليها سبوحة .. قومي اشربي .. ما ردت .. قلت ليها سبوحة .. تسابيح .. برضو ما بترد .. ختيت الكباية ورفعت ليها راسها لقيتها نايمة وما جايبة خبر .. اتحسست حرارتها لقيت عندها حمى .. حسيت بيد صغيرونة في كتفي عاينت لقيتو زميلها قالي ماما براءة تسابيح مالها .. قلت ليهو تسابيح عيانة انت اقعد مكانك وانا بجيكم اسي .. قالي حاضر .. شلتها وطلعتها برة وديتها مكتب الاستاذات .. استاذة سعدية قالت لي تسابيح مالها قلت ليها عيانة ما ح تقدر تكمل باقي اليوم .. قالت لي خلاص انا بضرب لي ابوها يجي يسوقها .. قلت ليها اي يكون احسن .. رقدتها في الكنبة الكبيرة وخليت معاها استاذتين ورجعت كملت باقي حصتي .. مشيت شلت قروشي وطلعت ...
وانا واقفة في الموقف بقيت بفكر يا ربي امشي برجليني واوفر قروش المواصلات؟ .. لكن المسافة بعيدة بالمواصلات بتاخد ساعة الا .. وقروش المواصلات زاتها ما ح تفرق بحاجة لو وفرتها .. لكن حتى لو حاجة بسيطة على الاقل تغطي جزو من القروش .. عزمت النية وبقيت ماشة برجليني في نص الشمس والغبار واصوات العربات صدعت شديد .. بعد ربع ساعة ما قدرت وقفت وقلت يا براءة انتي بتغشي على منو اركبي مواصلاتك ساي .. فعلا وقفت حافلة وركبت ولسوء سوء سوء حظي في مقعد واحد وجنب منو ؟ .. جنب الراجل العايز من ابوي قروش .. لو ما العربية اتحركت سرعة كنت نزلت .. قالي بت محمد؟ .. كيفك وابوك كيف .. قلت ليهو تمام الحمدلله .. بي ضحكة كدة قالي لميتو لي قروشي .. نظام هظار كدة .. لو ما مسكت نفسي كنت ركبت فيهو باب الحافلة دة .. ابتسمت ابتسامة مصطنعة وقلت ليهو هه لالا لسة .. ضحك وقالي ياخي .. طيب لميتو كم ؟ رفعت عيوني بنفاد صبر وقلت ليهو وانا بجز على اسناني من الغيظ انت ما تشيل هم البنلمو بنجيبو ليك .. قالي طيب طيب ..
الصداع عايز يشق راسي وهو يشيل ويورجغ ويتكلم .. انا بقيت سامعة صوتو بعيد وبعاين لباب الحافلة وقلت في نفسي ياربي لو نطيت ح اتكسر كتير ولا كم عضمة بس ؟ .. طق الحافلة وقفت في اخر محطة .. انا طرت طيران مشيت جبت الفطور وعلى البيت طوالي .. عملت الفطور وقلت لي ابوي ما عايزة ومشيت رقدت جوا ونمت .. بعد مسافة سمعت اصوات كتيرة في الحوش بتكلمو واصواتهم بقت عالية .. وصوت عربات واقفة ومدورة وونسة وما فهمت حاجة .. قمت براحة دعكت عيوني وبقيت بجمع والاصوات كانت بعيدة لكن شوية شوية بدت تجمع .. قلت خالتو عوضية ؟ .. نزلت من السرير ومشيت فتحت الباب ...
{لا تدري لعل الله يحدث بعد ذلك امرا} ..
يتبع ..
#نجوم_سرمدية6
#بقلم_سبأ_النيل
صلوا على النبي
وقفت في باب الصالة وبقيت بعاين في الحوش بإستغراب شديد .. شفت عمو عوض الله لابس ليهو بدلة وكان واقف جنب ابوي خاتي يدو في كتفو وبتكلم معاهو وجنبهم خالتو عوضية ومهند .. سالت نفسي يا ربي بعملو في شنو هنا .. سمعت صوت بتكلم معاي عاينت جنبي لقيت عبدو واقف قالي سلامتك ابوك قالينا مصدعة .. قلت ليهو وانا بعاين ليهو مرة وليهم مرة .. الله يسلمك .. الحاصل شنو .. عاين ليهم وقالي ابوي الليلة مسافر .. عاينت ليهو بإستغراب وقلت ليهو مسافر؟ .. مسافر وين ؟ وليه ان شاء الله خير .. قالي مسافر كندا عشان الشغل .. قلت ليهو يعني جاهو شغل هناك؟ .. قالي ايوا .. قلت ليهو ماشاء الله .. وح يرجع متين .. قالي احتمال بعد سبعة سنة .. قلت ليهو سبعة سنة عدييييل؟ قالي اي العقد بقول كدة .. بس ح يجي زيارات ويرجع ... قلت في نفسي سبحان الله لكن سبعة سنة دي كتيرة عديل .. قالي ابوك قاليك البسي عبايتك وتعالي سلمي عليهو قبل ما يمشي .. قلت ليهو ح يسافر متين .. قالي اسي ماشين نوصلو المطار ... قلت ليهو طيب ح البس عبايتي واجي ..
مشيت سريع سريع لبست العباية والطرحة وطلعت برة سلمت على خالتوعوضية الكان باين في ملامحها الزعل .. قلت ليهو دي شنو المفاجأة دي يا عمو كان تورينا من بدري .. ضحك وقالي جات فجأة والله .. قلت ربنا يوفقك وتوصل بالسلامة ح نفقدك في الحلة والله .. قالي ما تفقدي غالي يا بتي .. اتكلمنا معاهو شوية وقال بعد دة لازم يطلع عشان يلحق الطيارة .. طلعنا معاهو برا لقينا مهند منتظرو عشان يوصلو المطار .. سلمنا عليهو وودعناهو ومشو معاهو لغاية المطار ... بقينا انا وابوي واقفين قدام باب الشارع .. ابوي قالي يحليلو ياخ راجل طيب .. قلت ليهو اي والله ربنا يسهل دربو ... العصر اذن في وقفتنا دي دخلنا وصلينا ... بعدها عملت الغدا وختيتو .. ونحن بنتغدا ابوي قالي في حاجة شاغلة بالك ما ح توريني ليها .. عاينت ليهو وابتسمت ابتسامة خفيفة وقلت ليهو ماف حاجة بس صحتك الشاغلة بالي ... قالي ما هندا انا كويس ما شايفاني ... قلت ليهو خايفة تتعب فجأة وما اقدر اعمل حاجة .. قالي بإذن الله ماف حاجة بتحصل بس متاكدة ماف حاجة تانية شاغلة بالك؟ .. حركت ليهو راسي بمعنى لالا ... قالي الحمدلله لو حصلت معاك اي حاجة كلميني كويس .. قالت ليهو بعبرة حاضر يا ابوي .. ابتسم وقالي يحضر ليك الخير ..
بعد خلصت جبت لي ورقة وقلم ... قعدت قدام الطربيزة واخدت لي نفس طويل وقلت بسم الله .. وبديت احسب .. لو طلعت كدة في اليوم الفلاني ح اجمع ربع المبلغ في اسبوعين .. شخبطتها .. ما ينفع .. طيب لو عصرت على نفسي ووفرت قروش اكتر ف ح اجمع اكتر من ربع المبلغ في شهر .. لالالا شغلي الفي الروضة ح يخلص بعد 13 يوم .. وانا مفروض ادفع المبلغ كلو بعد 13 يوم .. دة شنو الحظ دة .. طيب راتب الروضة الباخدو لو ما اخدت منو حاجة خلال 13 يوم ح يجيب لي قريب نص المبلغ ... لكن لو ما شلت منو حاجة نحن ح ناكل من وين ؟ علاجات ابوي من وين؟ شخبطتها تاني ... طيب طيب طيب ... لو بعت ايسكريم بجانب شغلي في الروضة في فترة ال 13 يوم ح اجمع نص المبلغ بالظبط ... لكن مصاريف الاكل ح تستهلك قروش الايسكريم كلها وهنا مع قروش شغل الروضة بس ح ارجع والم قريب نص المبلغ خلال 13 يوم ... شخبطت الورقة كلها وكرفستها وجدعت القلم في الطربيزة وقلت يوووه ما ح تظبت ..
تكيت راسي على الكرسي الوراي وغمضت عيوني وبقيت خاتة يديني بين عيوني لاني كنت حاسة نفسي ح اصدع ... جاني هوا بارد خصوصا اني خاتة التربيزة تحت شجرة الليمون العندنا .. بقيت بحاول انضف راسي من الافكار الكتيرة دي .. بعد فترة حسيت برقبتي بدت توجعني .. فتحت عيوني لقيت زول واقف وبعاين للطربيزة القدامي وبحكم انو واقف قدام ضوء الشمس وانا مفتحة عيوني ياداب ما شفتو كويس واتخلعت وصرخت صرخة مكتومة وختيت يديني في خشمي وقربت اقع من الكرسي ... الكرسي رجع بي لي ورا ولحقت نفسي في اخر لحظة ومسكت في الطربيزة وجريت نفسي .. ختيت يديني الاتنين فيها وانا مدنقرة وباخد في نفسي .. رفعت راسي تاني ودققت في الشخصية طلع عبدو وكان واقف شايل دفترو واقلامو ومدخل يدينو في جيبو وبكل برود بعاين في ردة فعلي .. دنقرت راسي تاني وبقيت باخد في نفسي لاني حسيت انو قلبي قرب يطلع من مكانو ..
قالي بسم الله شفتي شيطان ... ضربت الطربيزة بي يدي وقلت ليهو عبدو ... رفعت راسي وكملت .. الف مرة قلت ليك ما تخلعني ما تخلعنييييي .. قالي اعمل ليك شنو لو انتي قلبك خفيف .. قلت ليهو بطرقيتك دي بتخلع القلبو حجر .. بعدين انت جيت متين ودخلت كيف اصلا .. قالي جيت اسي وابوك فتح لي الباب لانو حضرة سيادتك نايمة هنا وانا يدي قربت تتكسر وانا بدق في الباب .. مسكتو من اضانو وقلت ليهو بطل لائمة وقلة ادب ياخ بطل عشان ما اوري ليك خالتو عوضية .. قال اخ ياخ فكيني طيب خلاص معليش .. فكيتو واشرت ليهو على الكرسي وقلت ليهو اقعد .. خت حاجاتو وقعد .. قلت ليهو اشتغلت التمرين .. قالي اي .. اداني ليهو وبقيت بصحح فيهو .. مسك الورقة المكرفسة وبقا بقرا فيها .. قال اممممم قديمة .. رفعت عيوني من ورا الكراس وقلت ليهو نعم؟ .. شنو القديمة ؟ ..
قالي انتي وطريقتك .. نزلت الكراس ختيتو في الطربيزة قلت ليهو قصدك شنو .. رفع الورقة وقالي الطرق البتحاولي تجمعي بيها مبلغ كبير في فترة زمنية قصيرة دي قديمة ومدتها منتهية وفاشلة ومستحيل تنجح اصلا ... قلت ليهو لا والله ؟ ... قالي انا كلمتك قلت ليك ح اساعدك لو انتي بس سمعتي كلامي وجربتي على الاقل ولو لمرة ... غمضت عيوني واخدت شهيق وزفير واستعدلت في قعدتي .. قلت ليهو عبدو .. دي مسألة سجن .. ماف حاجة اسمها جربي .. التجربة دي ح تودينا في داهية ..
قالي دي المشكلة هنا .. بتختي نفسك في الحتة السليمة .. في منطقة الامان لانك خايفة من الخسارة .. شايفة انو ضمان دايم احسن من مخاطرة فيها نسبة فشل ونسبة نجاح .. وطول ما انتي ماسكك الخوف دة ومستهلكك للدرجة دي وما فكرتي ولو مرة تطلعي من منطقة الامان دي عمرك ما ح تتقدمي .. بقيت ساكتة ساي .. بعد شوية قلت ليهو لكن .. قالي لكن العواقب ممكن تكون وخيمة .. صاح .. طيب انتي ما شايفة انو طريقتك دي نهايتها معروفة .. قاعدة كدة وعارفة انك م ح تقدري تسددي المبلغ ومستنية تجي لحظة الواو والمفاجأة الح تغير ليك الوضع وانتي قاعدة في مكانك .. صح انو الله سبحانه وتعالى قال {ونرزقه من حيث لا يحتسب } لكن كمان قال { وان ليس للانسان الى ما سعى} .. لازم تسعي وتجتهدي اكتر وتحالوي .. لازم تطلعي من منطقة الراحة والامان المخلياكي في خوف وبطريقة غير مباشرة بتثبت انك ما متوكلة على الله .. خايفة من الح يجيبو ليك لو عملتي الحاجة الفلانية .. لكن { وان ليس للانسان الا ما سعى} .. انتي مسئولة عن السعي .. ما مسؤولة عن النتيجة .. ولو كان ايمانك قوي ح تعرفي انو النتيجة دي هي الخير ليك سواء كويسة او لا .. { ومن يتوكل على الله فهو حسبه} صح؟ ... وعسى ان تكرهو شيئا وهو خير لكم ...
هو سكت .. والجو بقى هادي .. لكن لسة صوتو راني زي الجرس في سمعي .. لسة صوتو مواصل رغم انو سكت وبقى منتظرني ارد .. ما عارفة حسيت بغرابة .. انو الولد دة بجيب الكلام دة من وين اصلا .. انو الكلام البقولو بصف الحالة الانا فيها بالظبط .. صح انا خايفة .. خايفة من المحاولة .. خايفة من التغيير .. الامان البسيط بالنسبة لي افضل من التغيير الممكن يجي بنتايج افضل بي مية مرة .. خلاني اشك انو هل انا بالجد ما عندي ثقة في الله وفي رحمتو وفي توفيقو والاهم كمان .. ما عندي ثقة في حكمتو .. نسيت انو حكيم .. نسيت انو مهما جاب لي من نتايج بس لي حكمة .. نسيت اني اسلم ليهو امري .. كيف خايفة من اقدارو وهو الرحيم .. خايفة اخطي خطوة جديدة ويديني حاجة عكس المتوقعاها في حين انها لهدف و لسبب ولحكمة .. لانو ما بسبب لي حاجة من فراغ الا ووراها سبيل سعادة متاخر .. سالت نفسي انو هل دي اللحظة المفروض احارب فيها خوفي .. اخاطر بالضمان وادخل منطقة الخيارات .. اخت الثقة في الله واعمل تغير ممكن يوديني تحت الارض او يرفعني للسما !!! ....
عاينت لي عبدو مسافة وقلت ليهو طيب .. طيب .. انا ح اخاطر ... ابتسم ابتسامة طفولية ولا كانو طلع منو كلام عجيب قبل شوية وقالي بالجد؟ .. سكتت شوية وقلت ليهو ايوا بالجد .. شال نظارتو ولبسها وقالي طيب انا ح اوريك نعمل شنو .. قلت ليهو حيلك حيلك .. اسي عندنا حصة .. قالي الزمن بدري ياخ الحصة بتنلحق .. جرا الدفتر ومسك القلم وقالي طيب شوفي .. متذكرة اخر مرة اتكلمنا في الموضوع دة وقلت ليك انك عشان توسعي شغلتك دي محتاجة لمبلغ تكوني خاتاهو بالجنبة .. قلت ليهو ايوا .. قالي قلت ليك ح تحتاجيهو لسببين صاح .. قلت ليهو اي قلت لي لي راس المال او حتى جزو بسيط منو .. قالي الله ينور عليييك .. قلت ليهو طيب والسبب التاني شنو ما قلتو لي .. قالي اول شي عندك مبلغ لاماهو ؟ .. قلت ليهو اي .. قالي مبلغ كويس .. قلت ليهو يعني .. قالي ح تشيلي نص المبلغ دة تشتري بيهو مواد تموينية للبيت لمدة شهر قدام .. والنص التاني لي راس المال ..
قلت ليهو هييي هيي هي .. مستحيل طبعا القروش دي خاتاها عشان اجمع عليها وادفع للراجل قروشو .. قالي دي الخطوة التانية بعد راس المال .. انك بجزو من مبلغ راس المال دة توقفي المصاريف البتصرفيها كل يوم على الاكل ويكون مكفيكي لفترة شهر ويمكن اكتر .. قلت ليهو لالالا يا عبدو انت مجنون ساي ما ح اضيع القروش دي من يدي .. قالي انتي مش قلتي ح تخاطري ؟ ولا ما واثقة ؟! ... سكتت وكان بعاين لي بنظرة شك .. غمضت عيوني براحة واخدت نفس وقلت ليهو طيب .. امري لله .. اسلم حياتي لولد ال14 سنة .. قالي بكرة بجيك واكلم عمو نمشي السوق ونشتري المواد التموينية عشان نبدا بالخطوة التانية ... قلت ليهو طيب ... وفي نفس الوقت في صوت داخلي بقولي الجاي شنو .... اول مرة اخاطر .. واول مرة اخت نفسي في لعبة مع الدنيا .. بقيت بعاين لعبدو وهو بكتب بيدو الشمال ومركز وقلت في نفسي .. بس ما معروف الله مرسل لي الاحداث دي لشنو ...
{لا تدري لعل الله يحدث بعد ذلك امرا} .....