رواية نجوم سرمدية الفصل الخامس5بقلم سبأ النيل
صلوا على النبي
تاني يوم بالصباح قمت كالعادة بدري جهزت الشاي وطلعت على الروضة .. دخلت الفصل وعلى غير العادة كان شوية هادي .. عاينت كدة وقلت ليهم وين تسابيح .. واحد زميلها اسمو عمر قالي ما جات الليلة انتظرناها وبرضو ما جات .. انتظريها لغاية ما تجي ما تبدي كويس ... عاينت ليهو وابتسمت ابتسامة خفيفة .. ختيت الكتاب وطلعت مشيت مكتب الاساتذة سالتهم منها .. قالو لي مما تعبت امس ابوها قال ما ح تجي عشان ترتاح في البيت .. رجعت الفصل وقلت ليهم سبوحة عيانة شوية اليومين دي ما ح تجي لكن بترجع قريب .. بانت ملامح الحزن في وشوشهم لكن ما كان بيدي حاجة ... خلصت الدوام وشلت القروش ورجعت البيت .. اثناء ما بنفطر انا وابوي الباب دق .. قمت وفتحتو لقيتو عبدو .. قلت ليهو عبدو ؟ مش مفروض تكون في المدرسة .. قالي قلت ليك امس اننا ح نأجز يومين وبعديها ح ننزل امتحانات .. قلت ليهو ايوا صاح نسيت .. لكن مالك جاي بدري الليلة، الحصة بعد الضهر .. رفع راسو فوق مع نفس طويل وبقا يتكلم تحت تحت .. قلت ليهو هي انت بتقول في شنو ؟! .. قالي عمو محمد قاعد .. قلت ليهو ايوا .. قالي زحي من الباب طيب خليني ادخل دي شنو دي .. قلت ليهو ما تتزهج فيني يا قليل الادب .. دخل ومشا سلم على ابوي مسافة اقفل الباب واجي لقيتهم بتونسو .. ابوي قاليهو تعال طيب يا ولد اكل مع عمك ما تستحي .. قاليهو والله يا عمو شبعان الحمدلله فطرت وجيتكم بي جاي ..
ابوي عاين لي وقالي تعالي تمي اكلك .. قلت ليهو انا شبعت اكل انت يا ابوي .. قالي بسم الله متين اكلتي اسي .. على العموم عبدو قالي ح تمشو السوق تجيبو حاجات للبيت .. طق اتذكرت .. قلت ليهو ايوا ايوا صاح .. قالي عايزين تجيبو شنو لكن .. قلت ليهو يا ابوي بدل كل مرة امشي الدكان واجيب الاكل والحاجات دي قلت اجيبهم مرة واحدة ويقعدو معانا فترة كويسة اصلا مشوار الدكان دة عمل لي وجع ركب .. ضحك وقالي سبحان الله اول مرة تفكري في حاجة كويسة .. عبدو ضحك وقاليهو اول مرة لسة بعيدة يا عمو .. قلت ليهو اسكت انت .. قالي انا قلت حاجة اسي .. قلت الحقيقة بس .. قلت ليهو عبدو ما تخليني اصلك .. قالي ح تعملي لي شنو يعني ح تجلديني؟ ...
عايزة اتكلم كدة ابوي قالينا بسس بسس بسس .. دة شنو دة زي الاخوان البتشاكلو في الورثة .. قلت ليهو يا ابوي الولد دة لسانو طويل .. قالي اصغر منك ياخ اسي لو عندك اخو قدرو كان عملتو نفس التصرفات دي .. قلت ليهو كان عملنا اكتر من كدة انت بس قول الحمدلله ... قالي خلاص انتو امشو السوق سريع وترجعو قبل المغرب تمام .. يا ولد عبدو كلمت امك انك ماشي السوق .. قاليهو اي كلمتها وصحي ذكرتني قالت ليك يا براءة خلي الجفا بتاعك دة واتطمني على خالتك دي يوم .. ضحكت وقلت ليهو سمح لمن ترجع قوليها قالت بتجيك في اقرب فرصة ..
لميت عدة الفطور وغسلتها .. لبست لي عباية وشلت قروشي الفي الدولاب عاينت ليها مسافة وانا ماسكاها .. قفلت الدولاب ومشيت وديت لي ابوي الحبوب والموية وقلت ليهو ما ح اتاخر يا ابوي ان شاء الله .. قالي تعالي لحظة .. قلت ليهو نعم .. قالي هاكي القروش دي لو القروش المعاك نقصو .. قلت ليهو لالا خليها عندك يمكن نحتاج ليها بعدين .. قالي يا بت امسكي لو ما احتجتي ليها تعالي رجعيها لي .. عاينت ليهو مسافة وشلتها منو وقلت ليهو حاضر يلا مع السلامة ... طلعنا ومشينا الموقف وعبدو فوت مواصلات السوق .. قلت ليهو ماشي وين يا ولد هدي ليها المواصلات .. قالي لالا السوق داك حاجاتو غالية انا بعرف لي سوق فيهو الحاجات رخيصة وبي سعر مقبول وعندي فيهو معارف .. قلت ليهو معارف؟ .. عندك معارف في السوق ؟ .. جزار انت ولا حاجة ؟ ..
قالي كنت بجي مع امي مرات مرات ولمن بقت ما بتقدر على المشاوير بقيت بجي براي .. ارح عشان ما نتاخر .. قلت ليهو طيب امري لله ... ركبنا المواصلات وبعد 20 دقيقة تقريبا وصلنا السوق .. عبدو بقا ماشي وانا ماشة وراهو زي الغبية ما عارفة ح نمشي وين .. وقف جنب محل كدة وقال السلام عليكم .. جا صوت من جوة بقول وعليكم السلام لغاية ما ظهر راجل كبير كدة .. عبدو قاليهو عمو بركات كيفك .. قاليهو ازيك يا عبدو شنو الغيبة دي .. قاليهو مع المدرسة بس والله .. قاليهو ربنا يوفقك كيف ابوك وامك ان شاء الله كويسين .. وبقو بتكلمو شوية .. بعد شوية قاليهو عليك الله يا عمو عايز لي شوال سكر وشوال ملح بسعر ظريف .. قاليهو جدا يا ولدي .. عاين لي وقالي السلام عليكم قلت ليهو وعليكم السلام .. عبدو قاليهو دي جارتنا جات تشتري ومن الليلة اعتبرها زبونتك .. قاليهو جدا تتفضل طوالي ...
فعلا طلع لينا شوال سكر وشوال ملح بسعر كويس شديد شديد .. عبدو قاليهو ادينا كمان قارورتين زيت تلاتة لتر وكيس توم وكيسين بصل بس يكونو جداد .. طلع لينا الحاجات وشلناهم ... الراجل ناداهو على جنبة وقاليهو يا عبدو عندي واحد جايب لي بصل بسعر رخيص شديد وبصل جديد وكميتو كتيرة لكن انا مسافر بعد يومين البلد وح ارجع بعد اسبوعين وما عايز اضيعو لكن كان جبتو وخليتو في المحل لفترة ح يبوظ والراجل قال بعد اسبوعين ح يرفع الاسعار تاني .. اعمل شنو اسي .. عبدو شال الكراس من الدرج وكالعادة بيدو الشمال بقا يكتب ويقوليهو في كلام .. قاليهو انت جيبو اشتري الكمية كلها .. الكمية دي ح تقسمها على ستة .. وانت تاجر وعندك معارفك في السوق .. ح تودي لكل تاجر جزو من البصل يخليهو عندو ويبيعو ليك .. بس اهم حاجة التاجر دة ما يكون البصل من ضمن الحاجات الببيعها عشان ما تخرب عليهو .. ح تطلب منو يبيعها ليك .. في منهم الح ياخد اجر مبلغ بسيط وفي منهم الح يبيعو ليك بدون مقابل .. بعد الاسبوعين تجي تاخد قروشك من الستة تجار وح يكون ربحك مظبوط وتعبك زيرو .. الراجل ضحك وقاليهو تصدق ما خطرت على بالي .. خلاص تمام انا ح اجيبو عشان هو حاليا بي نص السعر وح اعمل زي ما قلت .. اتكلمو شوية كدة وبعدين جو طالعين .. حاسبتو واتحركنا تاني بقينا ماشين مسافة
وقف عند بتاع فحم اخدنا لينا اكياس فحم ونفس الكلام ... بقينا ماشين وكل شوية يقيف يسلم على زول وياخد ويدي معاهو في الكلام ولا كأنو تاجر كبير .. اتعجيب والله من الولد دة سبحان الله دي كلها ارادة ربنا ... الاكياس كترت .. قلت ليهو يا عبدو لسة ؟ .. قالي خلاص بس اخر مكان .. قلت ليهو ماشين وين تاني .. قالي اصبري ح تعرفي .. بقينا ماشين لغاية ما طلعنا من السوق ودخلنا على حتة نضيفة كدة كلها مباني وهادية .. كان ماشي قدامي فجأة مشا على واحدة من المكتبات الكبيرة .. كان في مقاعد وطرابيز برة ... خت الحاجات برة وقالي اقعدي هنا انا اسي بجي .. قلت ليهو ماشي وين انت .. قالي داخل المكتبة دي سيدها صحبي عندي معاهو كم حاجة كدة ما بتاخر .. قلت ليهو طيب .. المكتبة كانت كبيرة وفخمة بكل معنى الكلمة تقريبا مكتبة قراءة وطباعة مدموجين سوا ومساحتها واسعة حتى انهم عاملين مجالس برة للقراء البجو يقرو ... بقيت بعاين لعبدو من الباب الزجاجي كان واقف مع بتاع المكتبة بسلم عليهو وبتكلمو في حاجة ...
سرحت بعيد وبقيت بفكر في الخطوة الجاية وفي المشاكل والتعب العايشة فيهو .. اتذكرت جامعتي وفكرت في اني ما ح ارجع اكملها تاني .. فكرت في حاجات كتيرة ... فجأة في واحد جا ختا لي عصير ليمون قدامي في الطربيزة .. اتخلعت وعاينت ليهو بي استغراب .. اشر لي على باب المكتبة الزجاجي لقيت عبدو بأشر لي من جوا بمعنى اشربي طلبتو انا ورجع تاني يتكلم مع بتاع المكتبة ... هزيت راسي للزول وحكيت راسي وقلت في نفسي ولد غريب خلاص .. بعد شوية جا طالع بطبز في تلفونو رفع راسو عاين لي وجا قالي خلاص خلصت .. قلت ليهو طيب ارح اتاخرنا .. قالي لحظة اكيد ما ح نمشي المواصلات شابحين الاكياس دي كلها معانا .. نحن يا الله قادرين نتحرك بيها .. قعد وعاينت ليهو بإستغراب وقلت ليهو يعني ح نمشي للبيت طيران ولا قصدك شنو ..
لوا خشمو وقالي ظريفة اخر ظرافة .. في بتاع تكتك بجيب ورق للمكتبة بنزلو هنا صحبي ساكن هناك جنبنا .. ح نرجع معاهو .. قلت ليهو يعني دة الموضوع البتتكلم فيهو من قبيل مع بتاع المكتبة .. جا الراجل خت كباية عصير تانية .. عبدو اشر ليهو براسو نظام شكرا .. قالي لا دة موضوع تاني ح تعرفيهو بعدين .. قلت ليهو واسي ح نعمل شنو .. مسك الكباية شرب مها شوية وقالي ننتظر صحبي بجي بعد شوية .. قلت ليهو صارحني يا ولد انت جاسوس؟ .. رسلوك عشان تراقبني ولا حاجة؟ بعدين بتعرف الخلق ديل كلهم من وين ؟ ..
انت كونان ولا حاجة ؟ .. انا الضحية صاح؟ .. قالي يا شيخة اتلمي عليك الله امور الافلام دي انسينا منها .. انا بس زول الله اداهو كم حاجة وشال منو كم حاجة .. عاينت ليهو بإستغراب وقلت ليهو وشال منك شنو .. عاين لي كانو ما كان متوقع السؤال .. ملامحو بهتت شوية وسكت ... فجأة التكتك جا وقف .. نزل منو ولد سلم علينا ونزل الورق ورفع الحاجات وركبنا ورا واتحركنا .. عاينت لعبدو لقيتو سرحان على غير العادة .. قلت في نفسي لازم اسال خالتو عوضية عنو لانو دماغو ماشاء الله تسوى بلد .. وصلنا ونزلنا الحاجات ودخلناهم جوة .. عبدو وقف اتكلم شوية مع صاحبو ودور فات .. قالي انا ماشي يا براءة .. قلت ليهو ماشي وين الحصة ..
قالي ما قادر تعبان خليها بكرة .. ماشي الدكان اجيب لي شيبس اجيب ليك معاي .. قلت ليهو لالا خلاص امشي البيت ارتاح وخليها لبكرة .. وقول لخالتو عوضية بجيك بعد المغرب .. حرك لي راسو بمعنى كويس .. ختيت يدي في راسو قلت ليهو مالك انت ما تكون جاتك ضربة شمس .. قالي لالا بس ح امشي اكل وانوم .. قلت ليهو طيب امشي ارتاح .. فات وبقيت واقفة شوية سمعت صوت ابوي قالي مالو عبودي شكلو ما كويس .. قلت ليهو ما عارفة يا ابوي قبيل كان كويس لكن فجاة زي التعب .. قالي بكون المشوار ارهقو قلت ليهو احتمال .. ارح اخت الغدا عشان تتغدا .. دخلت ووقفت في الباب عاينت شوية قبل اقفلو وادخل ...
{لا تدري لعل الله يحدث بعد ذلك امرا} ..
يتبع ...
#نجوم_سرمدية8
#بقلم_سبأ_النيل
صلوا على النبي
ختيت الغدا وقعدنا نتغدى انا وابوي ... قلت ليهو على فكرة القروش الاديتني ليها ما احتجتها وختيتها ليك في دولابك ... قالي غريبة ! .. وجبتو الحاجات دي كلها كيف بدون ما تحتاجي ليها ؟ قلت ليهو والله عبدو وداني سوق في حتة كدة الحاجات عندهم رخصية ماشاء الله حتى القروش الشلتها معاي فضل منها .. قالي والله ماشاء الله كويس انو مشا معاك .. قلت ليهو بعد شوية ح امشي لخالتو عوضية دي طولت ما مشيت ليها .. قالي كويس امشي وسلمي لي عليها واساليها لي من عمك عوض الله .. قلت ليهو حاضر ...بعد خلصنا شلت العدة وغسلتها واديت الحوش كنسة ورشيتو .. بعدها لبست لي توب ومشيت لخالتو عوضية .. دقيت الباب بعد مسافة فتحت لي هي .. قلت ليها بس ما تكوني نايمة وصحيتك .. ضحكت وقالت لي لالا بس ما سمعت الباب دقك براحة .. قلت ليها وعبدو وينو .. قالت لي من جا نام وتاني ما صحى للان .. ادخلي كدي ح نتكلم في الباب يا جافية ...
دخلت وقعدنا وقلت ليها والله يا خالتو بس مشغولة ما جفا ولا حاجة ... قالت لي عبدو قالي اشتغلتي في روضة .. عشان كدة بقيتي ما بتجيبي صبارة الايسكريم يحليلي كنت بسرق منها بعد العشا اقزقز بيهو ... ضحكت وقلت ليها هي كلها 13 يوم بس واخلي شغل الروضة .. قالت لي ليه ما عاجبك ولا في ناس بضايقوك .. قلت ليها لالا كويس والله لكن انا اشتغلت كبديل يعني الاستاذ ح يرجع تاني .. قالت لي ح ترجعي للتعب تاني .. قلت ليها الحمدلله بس ... قالت لي بتهون يا بتي ان شاء الله بتهون .. قلت ليها ان شاء الله .. صحي ابوي بسلم عليكم .. قالت لي الله يسلمو .. قلت ليها عمو عوض كيف .. قالت لي كويس ما عندو عوجة .. قلت ليها ح ينزل زيارة متين .. قالت لي كل تلاتة شهور .. قلت ليها ربنا يعينو .. قالت لي براءة يا بتي .. قلت ليها نعم ..
قالت لي عايزة اشرب شاي لبن من الكنتي بتعمليهو لي زمان لمن تجي .. ضحكت وقلت ليها انتي لسة فاكرة .. قالت لي وهو يتنسي عاد يا بتي ... غايتو عندك شاي بتعرفيهو براك ما حصل ضقتو عند زول .. قلت ليها جدا ما طلبتي حاجة .. قالت لي بتعرفي مكان المطبخ ولا اوصفو ليك .. قلت ليها انتي بتطردي فيني للمطبخ يا خالتو؟ .. ما اتوقعتها منك ... ضحكت وقالت لي بت بطلي هبل .. اكيد متذكرة مكانو .. ولو عملتي معاهو كيكة وبسبوسة ما تكوني قصرتي .. قلت ليها ما عايزة معاهو فشار وقهوة كمان واعمل ليك ناعم كدة معاهو شاي سادة .. ضحكت قالت لي خلاص امشي سوي الشاي وفي بسكويت في الضلفة التحت شمالك ختيهو .. قمت على حيلي وقلت ليها طيب انا ح اعملو واجي انتي اخدي راحتك البيت بيتك .. قالت لي من زوقك يا بنيتي ...
مشيت عملت الشاي جهزتو وجبتو ختيتو .. قعدنا نشرب وهي كل ما تاخد ليها رشفة تاخد ليها معاها سرحة .. انا بقيت بشرب وبعاين ليها ساي .. فجأة جاتني ضحكة قلت ليها يا خالتو انتي بتعملي في اعلان ولا حاجة؟ ، عشان يكون عندي علم يعني ... قالت لي قطعتي علي ذكرياتي ياخ .. قلت ليها دي شنو ردات الفعل الغريبة دي .. قالت لي الشاي بتاعك دة بذكرني بأيام ما كنت صغيرة .. في بيت اهلي معاي امي وابوي واخواني .. ايام جميلة شديد .. لمن كنت بلعب مع بنات الجيران ونمشي المدرسة سوا ونرجع .. كان عندي صحبتي بتشبهك كدة نفس العيون العسلية ونفس الصوت سبحان الله .. كانت حقارة خلاص لكن بعد فترة اكتشفت انها طيبة .. اخدت ليها رشفة تاني وقالت وايام الثانوي يا سلااااام .. غمضت عيونها وبقت بتحرك في راسها ساي .. ما قدرت امسك الضحكة وقلت ليها معقولة شاي يعمل كل دة .. قالت لي لازم تقطعي علي ذكرياتي .. كويس انك عملتيهو في سيرمس عشان اشربو بعدين براي .. بقيت بضحك واخدنا ونستنا وبعدها رجعت البيت ..
تاني يوم الصباح طلعت بدري ومشيت الروضة ... اديت الحصة بتاعتي والاولاد بقو بستجيبو بطريقة كويسة شديد .. بقيت بديهم فعاليات بتزيد الاستوعاب عندهم وبترفع درجة الفهم .. بقو بحفظو سريع وعموما مستواهم اتحسن .. اثناء ما انا شغاالة لقيت المديرة واقفة لي في الباب .. نادتني مشيت ليها سلمت علي بإبتسامة وقالت لي ماشاء الله مستواهم اتحسن شديد من المرة الفاتت .. قلت ليها اي الحمدلله كانو عايزين اهتمام اكتر وطرق تانية يفهمو بيها .. ابتسمت وقالت لي ودة كلو بفضلك .. الامهات مبسوطين شديد من التقدم والاهتمام الحاصل منهم في البيت للقراية .. قلت ليها تسلمي والله .. قالت لي انا كلمت المحاسبة بعدين لمن تمشي ح تديك زيادة نص المبلغ كشكر مني ومن الامهات .. ما امداني اقول حاجة لانها ختت يدها في كتفي سريع وقالت لي يلا انا عندي شغل وفاتت .. بقيت واقفة برا شوية واخدت لي ابتسامة .. حسيت بي يد صغيرونة بتجرني من عبايتي .. عاينت لقيتو عمر .. عاينت ليهو بإستغراب قلت ليهو اي يا عمر .. قالي تسابيح بتجي متين .. ختيت يدي في شعرو وقلت ليهو بتجي بعد كم يوم ان شاء الله ما تخاف .. قالي اصحابي رسمو ليها رسمة قلنا بنديها ليها لمن تجي .. قلت ليهو صحي؟ يا سلام ممكن اشوفها؟ قالي اي تعالي نوريك ليها .. ودخلت راجعة ..
بعد خلصت مشيت شلت القروش من المحاسبة وفرحت بأنو زادو لي المبلغ بالنص .. بالعصرية كدة بعد ما خلصت شغل البيت مشيت قعدت تحت الشجرة على اساس عبدو ح يجي بعد شوية للحصة .. بعد زمن حسيتو اتاخر مشيت عملت شاي وجبتو نشربو انا وابوي لغاية ما يجي .. بعد ساعتين كدة ابوي قالي شكلو عبدو ما ح يجي اليوم .. قلت ليهو ما يكون عيان .. قالي احتمال والله اصلا امس شكلو كان تعبان بكون عيان .. قلت ليهو ربنا يستر .. مشيت ختيت نص القروش في الدولاب وشلت حق المواصلات بس ختيتو بي جنبة ..
تاني يوم مشيت الروضة خلصت حصتي ومشيت الموقف ودوناً عن باقي الايام الليلة كانت المواصلات ماف .. الناس بسألو في شنو قالو السواقين عايزين زيادة ... قلت عليك الله دة زمن زيادة .. اريتها زيادة معقولة .. وقفت زمن طويل واتاخرت وشلت هم ابوي لانو مفروض يفطر وياخد الدوا بتاعو بعد الفطور عشان ما يتعب وكان تعب الازمة ح يجيهو ضيق تنفس ومع الازمة وما عندو بخاخ .. بقيت واقفة وما قادرة اعمل حاجة .. الساعة بقت 2 اتاخر الزمن شديد وفات .. وابوي ما عندو تلفون عشان ادق ليهو للاسف .. طوالي خليت المواصلات ومشيت برجليني مسافة طويلة .. تعبت وانا ماشة لكن ما قدرت اقيف .. صدعت تاني وبعد ساعة مشي جات حافلة ... وقفتها وركبت وبقيت على اعصابي ...
وصلت البيت ومشيت جري على ابوي لقيتو نايم في العريشة .. صحيتو بخلعة وهو قام مخلوع قلت ليهو ابوي انت كويس .. قالي انا كويس يا بتي اتاخرتي مالك .. اخدت لي نفس وقعدت في السرير قلت ليهو الحمدلله انك كويس ...قالي الاخرك شنو قلت ليهو المواصلات بس الليلة معدومة .. خليني اقوم اخت ليك الفطور .. مسكني قالي كدي قولي بسم الله فطور شنو انا فطرت .. قلت ليهو فطرت ؟ فطرت كيف ؟ .. قالي اتاخرتي قبيل وكان مفروض اخد الدوا .. دخلت المطبخ لقيت الحاجات الجبتوهم امس في بطاطس حمرت منها واخدت الدوا والدوا نومني وما جايب لنفسي خبر .. قلت ليهو ايوا صاح انا نسيتهم .. كتر خير عبدو فكرتو جات في وقتها .. سكتت شوية وقلت لابوي .. انت يا ابوي عبدو ما جا الليلة .. قالي لالا ما جا شكلو عيان بالجد .. قلت ليهو طيب انت تم نومتك شكلك لسة نعسان من الحبوب انا ح امشي اسال منو ..
طلعت طوالي ومشيت وقفت قدام بابهم ... عايزة ادقو كدة فجأة حسيت بصوت عربية وقفت وراي ... اذان المغرب اذن وركزت كدة طلعت عربية مهند .. نزل هو وخالتو عوضية .. قفل الباب القدام وفتح الباب الورا ومسكتو ليهو خالتو عوضية ... طلع وهو شايل عبدو الكان شكلو عيان شديد وفي فراشة في يدو بتدل على انو اخد درب ولونو كان اصفر باااهت ..
{لا تدري لعل الله يحدث بعد ذلك امرا} ..
يتبع ...
#نجوم_سرمدية9
#بقلم_سبأ_النيل
صلوا على النبي
وقفت مسااافة بعاين ليهم بي استغراب وهم جااين علي ... جو وقفو قدامي مهند قال السلام عليكم قلت ليهو وعليكم السلام وفتح الباب ودخل وهو شايل عبدو .. عاينت لي خالتو عوضية قلت يا خالتو الحاصل شنو مع عبدو حالتي اسي جاية اسأل منو .. قالت لي يسال منك الخير يا بتي والله امس تعب شديد وكان عندو حمى شديدة وبليل وديناهو المستشفى طلع عندو التهاب في الدم وملاريا ومناعتو ضعيفة ... قلت ليها يعني انتو من امس في المستشفى .. كان تدقي لي تلفون طيب ... قالت لي والله يا بتي الفي راسي زاتها طارت .. كدي خشي ما تقيفي برا ... دخلنا لاقانا مهند طالع قالينا رقدتو في غرفتو جوة انا طالع شوية وجاي ما بتاخر عن اذنكم ... خالتو عوضية فاتت المطبخ تجيب ليهو عصير وانا مشيت اشوفو .. لقيتو نااايم وظاهر في وشو المرض ..
ختيت يدي في جبينو اتحسس حرارتو لقيتو مولع عديل .. جات خالتو عوضية داخلة ختت العصير في الطربيزة .. قلت ليها يا خالتو حرارتو مرتفعة شديد جبتو ليهو خافض حرارة ؟ ... قالت لي اي اقيفي النجيبو .. مشت تجيبو وانا بقيت بصحي فيهو .. بعد شوية فتح عيونو عاين لي مسافة وتاني نام .. قلت ليهو عبودي قوم ابلع الحبوب واشرب العصير وتاني ارجع نوم ... تاني فتح عيونو وقام اتكل على السرير وبقى قاعد لغاية ما خالتو جابت الحبوب .. اديتها ليهو واديتو كباية الموية بلعها .. خالتو ادتو كباية العصير وقالت ليهو كملها فالح يلا .. بعد شربها رقد تاني ونام ...
طلعنا برا وقلت لخالتو انا ح امشي واجي اشوفو بكرة ... حنستني كدة بعد اقناع حتى مشيت .. ابوي قالي مالك اتاخرتي قلت ليهو لقيتهم جايين من المستشفى والولد عيان ... قالي سلامتو ياخ ما يستاهل ربنا يقومو بالسلامة ياخ مالو عندو شنو ... قلت ليهو ملاريا والتهاب دم .. قال يحليلو صعبات الاتنين سوا ربنا يعافيهو .. قلت ليهو ان شاء الله يارب بكرة بمشي اشوفو واشوف خالتو عوضية لو محتاجة حاجة اعملها ليها اخفف عنها شوية .. ابتسم وقالي ربنا يخفف عنك زي ما بتخففي عن الناس .. قلت ليهو اللهم امين يارب ...
تاني يوم الصباح مشيت الروضة .. وانا ماشة على الفصل كان جايط ... دخلت وقلت ليهم السلام عليكم .. هم جروها وعليكم السلام ورحمة الله تعالى وبركاته ... عاينت كدة لقيت تسابيح جات .. قلت ليها سبوحة حمدالله على السلامة ...قالت لي الله يسلمك .. قلت ليها يعني انتي سبب الجوطة دي كلها الليلة .. قالت لي دة عمر جاب لي لعبة ورسمة حلوة .. قلت ليها حظك انا عمر ما جاب لي حاجة .. قالت لي بقسم ليك من حقاتي .. ضحكت وقلت ليها لالا ديل حقاتك انتي احتفظي بيهم .. قلتي لي عمر شكرا ولالا .. حركت راسها بمعنى لا ... قلت عيب .. سالت الفصل اذا زول ادانا هدية بنقوليهو شنو .. قالو بنقوليهو شكرا .. هي ضحكت وعاينت لي عمر واصحابها وقالت ليهم شكرا ... اديتهم الحصة ورجعت البيت صليت الضهر وختيت الفطور .. بعدها نمت لغاية ما العصر قرب يأذن صحيت بصداع .. رقدت تاني شوية لغاية ما خف وقمت غسلت وكنست الحوش وطلعت المراتب ورشيتو .. بعدها كلمت ابوي اني ح امشي اشوف عبدو بقى كيف من امس ....
طلعت ومشيت رنيت الجرس فتح لي مهند .. قلت ليهو السلام عليكم قالي وعليكم السلام .. قلت ليهو خالتو عوضية قاعدة .. قالي اي قاعدة مع عبدو جوة اتفضلي ... دخلت وهو كان عايز يطلع فجاة قالي لحظة .. قبلت عاينت ليهو بإستغراب .. قالي انتي بتدّرسي في روضة اسمها الوجد ولا حاجة .. حركت ليهو راسي بإستغراب وقلت ليهو ايوا .. قالي خلاص تمام وطلع وقفل الباب .. رمشت بي حيرة وقلت طيب دة شنو اسي .. عرف من وين اني بدّرس هناك .. تاني اتذكرت وقلت ايواا صح هو الكان بعلق في الاعلان اكيد عندو معرفة بناس الروضة .. دخلت جوة لخالتو عوضية لقيتها جاية من المطبخ ... سلمت عليها و اتكلمت معاها شوية وقلت ليها ابوي بسلم عليكم .. قالت لي الله يسلمو يارب ..
سالتها من عبدو قالت لي والله اتحسن من امس لكن عملت ليهو شوربة وابا يشربها كلو كلو والدكتور قالي خليهو يشربها الفترة دي عشان ح تفيدو مع العلاج .. قلت ليها انا عارفاهو ولدك الراسو قوي دة .. فلسفة وقوة راس .. ضحكت وقالت لي شكلو مطلع زيتك .. قلت ليها مرات بقرب اجلدو .. بقت تضحك تاني وقالت لي يحليلك معذبك معاهو .. قلت ليها انا ماشة اشوفو واشيل ليهو معاي الشوربة ونشوف منو الراسو اقوا انتي الحقيني ... قالت لي سبحان الله زي امك بتختي عقلك بعقل الاصغر منك .. ضحكت وقلت ليها احيانا يستوجب نعمل الحاجة دي ..
جبت الشوربة ومشيت ليهو والباب كان فاتح .. راقد وساند ضهرو على المخدة في السرير ولابس نظاراتو وبقرا ليهو في كتاب .. ختيت الشوربة حتى ياداب انتبه لي .. طلع النظارة وقالي براءة؟ .. كيفك .. قلت ليهو كويسة انا كيفك انت .. قالي الحمدلله احسن من اليومين الفاتو ديل .. قلت ليهو انت يا ولد مش المفروض ترتاح دة شنو البتقرا فيهو دة .. عاين للكتاب وتاني عاين لي وقالي كتاب .. رفعت عيوني بسخافة وقلت ليهو عارفاهو كتاب .. قصدي كتاب شنو البتقراهو وانت عيان كمان .. قالي كتاب خيال علمي .. صفقت ليهو بإنبهار مزيف وقلت ليهو وااو وااو الله .. يا سلام على الذكاء .. ضحك وقالي اعمل ليك شنو اذا انتي انسانة ما عندك علاقة بالعلم والمعرفة .. عاينت ليهو بنفاد صبر وقلت ليهو المعرفة الوحيدة العارفاها انك لو ما شربت الشوربة دي ح تقول للدنيا السلام .. ضحك ضحكة استهتار كدة وقفل الكتاب والنظارة وختاهم في الطربيزة الجنبو وقالي ليه فيها عشبة الخلود السحرية .. خالتو عوضية جات داخلة وقالت لي اقنعيهو يلا وفاتت فتحت الشاشة الفي الغرفة وقالت لينا عندي مسلسل ما تتشاكلو وانا بحضر ...
قلت ليها بنحاول وشلت الشوربة مديتها ليهو وقلت ليهو امسك اشرب خلصني .. قالي ما عايز .. قلت ليهو يا ولد اشرب بتنفعك .. قالي يووه ما عايز ياخ مليانة فلفلية ليه الواحد ممكن يفكر انو يخت فلفلية في شوربة .. خالتو عوضية قالت ليهو نعععم قاليها ولا حاجة بهظر ... ضحكت وقلت ليهو انت عايز تعلمنا الطبيخ يا ولد انت امسك البتاعة دي وبطل قلة ادب .. قالي ابيت .. قلت ليهو والله؟ .. قالي اي .. قلت ليهو ابيت؟ قالي اي .. قلت ليهو احلف كدة ... سكت .. قلت ليهو عادي والله برجعها وتاني ما بجي .. قالي بتحاولي ترغميني .. رفعت يدي وقلت ليهو ابدا قلت ليك احلف بس .. سكت شوية واخد نفس ومدا يدو .. قلت ليهو مالك ... قالي جيبيها ياخ يعني ح يكون شنو .. ضحكت وقلت ليهو اعصابك ..
بقا بشرب وانا شلت الكتاب الكان بقرا فيهو و قعدت في الكرسي المواجه للسرير وبقيت بقلب وبحاول افهم حاجة او الكتاب عموما بتكلم عن شنو راسي جاط .. جاني صوتو وهو بقولي الواحد بيقرا عنوان الكتاب اول .. عاينت ليهو وقلت ليهو انت ما بتقدر تسكت خمسة دقايق بدون ما تتفلسف .. قالي بقدر .. قلت ليهو طيب لو اتحديتك تسكت خمسة دقايق بس خمسة دقايق وما تقول كلمة علمية واحدة بس ... قالي عادي بس انا ح استفيد شنو ..قلت ليها ولا حاجة .. قالي حاجة ما عندها عائد افادة لي اعملها ليه .. قلت ليهو وفلسفتك ليها عائد افادة؟ .. قالي ايوا طبعل بتديك معلومات .. قلت ليهو عليك الله اسكت .. ضحك وقالي طيب خمسة دقايق عشان تقتنعي ..
سكت وانا بقيت اقلب في الكتاب وقريت العنوان .. كان اسمو 《فلسفة كرستوفر نولان》بقيت اقلب شوية واعاين لخالتو الكانت مندمجة مع المسلسل شوية .. ما مرت تلاتة دقايق الا وجاني صوتو تاني قالي انتي يا براءة لون عيونك دة وراثة ولا طفرة جينية ... عاينت ليهو مسااافة وقلت ليهو خمسة دقايق عشان اقتنع صاح؟ ... ضحك وقالي الفضول ياخ .. قمت على حيلي وشلت منو صحن الشوربة وقلت ليهو رواثة يا اخوي وراثة اها ارتحت .. ضحك وقالي اسي انتي ماشة وين .. قلت ليهو انزل العدة دي المطبخ .. قالي خلاص وديها وتعالي عايزك في موضوع .. قلت ليهو طيب .. عاينت لخالتو عوضية وقلت ليها انا نازلة المطبخ عايزة حاجة .. قالت لي اعملي لينا شاي يا بتي نشربو سوا .. قلت ليها حاضر .. نزلت وغسلت العدة وضايرت المطبخ وعملت شاي وشلتو .. ذكرتني زمان لمن كنت بجيها مع امي وامي كانت ما بتخليني اشرب الشاي السادة عشان كنت صغيرة بس خالتو عوضية كانت حنينة علي وقالت ليها خليها تجربو بس وزادتو لي موية .. هي وامي كانو صحبات من زمن المدرسة سبحان الله بس لو الدنيا ما فرقتهم بفرقهم القدر ..
عملت الشاي واديت خالتو عوضية كبايتها وشلت كبايتي وجيت لعبدو وقلت ليهو اها موضوعك شنو .. قالي موضوعي انتي .. قلت ليهو كيف يعني .. قالي الشغل وقروش الراجل .. قلت ليهو انت عندك حيل للكلام دة يا ولد ... قالي انتي عندك زمن ؟ .. اخدت نفس وقلت ليهو طيب قول .. قالي القروش العندك .. نصها جبنا بيها المواد التموينية .. النص التاني دة ح يكون راس المال .. قلت ليهو دة مبلغ لي راس مال؟ قالي دة مشروع محتاج راس مال اكتر من كدة؟ .. قلت ليهو معاك حق .. طيب ح اعمل شنو انا اسي .. قالي متذكرة المكتبة المشينا ليها اول امس؟ .. قلت ليهو اي متذكراها .. قالي بعد بكرة ح تمشي ليها .. قلت ليهو انا؟ ليه ؟ قالي في عندو كرتونة ح يديك ليها ح نجيبيها .. قلت ليهو كرتونة شنو .. قالي انتي بس جيبيها ... قلت ليهو طيب .. وبعدين ...
فتح التلفون بتاعو وقبلو علي .. قلت ليهو دة شنو .. قالي وصفة من واحد صحبي ابوهو صاحب محلات تحلية ومخبوزات شغال في سان جيرمان هناك لكن هو بقرا هنا وح يسافر ليهو السنة الجاية ... فتحت عيوني وقلت ليهو انت جايب وصفة من محل في سان جيرمان؟ ... قالي ايوة ... قلت ليهو جايب لي وصفة من مدينة في فرنسا؟ .. كان مبتسم وفجأة ابتسامتو زالت حبة حبة وقالي فرنسا؟ .. قلت ليهو هي مش في فرنسا؟! غمض عيونو براحة وقالي لالا ما في فرنسا .. دي مدينة واقعة غرب الولايات المتحدة الامريكية وتابعة لولاية كاليفورنيا ... قلت ليهو ياخ ما مهم لكن جبتها كيف يا ولد ... قالي بعرف ابوهو وكان بتكيف لي عشان كدة لمن سألتو رسل لي احسن وصفة عندو .. بس برضو ح نحتاج للكركدي والعرديب ... قلت ليهو عبدو انت جادي .. قالي كل الجدية .. قلت ليهو طيب والجاي شنو .. ابتسم كدة وقالي الجاي احلا ...
{لا تدري لعل الله يحدث بعد ذلك امرا} ..