رواية نجوم سرمدية الفصل السادس6بقلم سبأ النيل
صلوا على النبي
تاني يوم مشيت الروضة كالعادة بس اثناء ما انا بدرس في الحصة تسابيح تاني تعبت بس المرة دي تعبت شديد .. ودوها المكتب ودقو على اهلها يجو يسوقوها .. قالت عطشانة مشيت اجيب ليها موية بس لمن جيت لقيتها مافيشة .. سالت منها قالو ابوها جا وساقها .. قلت لي واحدة من الاستاذات هي طوالي بتتعب كدة .. قالت لي اي والله ما عارفة عندها شنو بس كل اسبوع تقريبا بتتعب وبجو يسوقوها .. قلت ليها ما سالتو امها السبب شنو ؟! .. قالت لي امها اصلا متوفية قبل فترة ما طويلة وبعد ما اتوفت البت بقت تمرض كتير على الرغم من انو اهلها ما مقصرين منها في حاجة ... زعلت شديد عشانها والله خصوصا انها صغيرة وفقدت امها ... سرحت شوية كدة وانا بفكر بس نفضت الافكار من راسي ومشيت كملت باقي الحصة .. طلعت من الفصل ومشيت شلت القروش من المحاسبة ..
وانا طالعة من باب الروضة طقشتني بت داخلة وهي مستعجلة ... كانت بت سمحة كدة وعمرها يجي 21 او 22 ما عارفة ... مسكنا بعض عشان ما نقع وبعد ما استعدنا توازننا قالت لي معليش معليش ما قاصدة .. قلت ليها ولا يهمك ماف مشكلة .. جيت طالعة وهي داخلة بس وقفتني وقالت لي ثواني بس مكتب المديرة بي وين .. وصفتو ليها قالت لي شكرا ليك .. قلت ليها العفو ... انا طلعت بينما هي دخلت وهي شبه بتجري ..
وصلت البيت سلمت على ابوي وقلت ليهو ثواني اعمل الفطور ... قالي لالا ماف داعي .. وقفت وعاينت ليهو بإستغراب وقلت ليهو ليه .. قالي خالتك عوضية قبيل رسلت لينا صينية فطور قالت الليلة ضوقو فطورها .. وقالت ليك العصر تعالي ليها عشان تساعديها لانو المسا جاينها ضيوف .. قلت ليهو يحليها ما بتقصر .. طيب ح امشي ليها بعدين .. قالي خلاص تمام انا زاتي المسا جايني عمك سعيد بس قبل ما تطلعي اعملي لينا شاي .. قلت ليهو عمو سعيد رجع متين من البلد .. قالي ليهو تلاتة يوم كدة .. قلت ليهو طيب بجهزو ليكم وانا بعدين بجي بسلم عليهو .. قالي الله يرضى عليك .. بعد فطرنا كان في شوية ملابس وسخانة كدة لميتها وغسلتها ... ونضفت الحوش ورشيتو ..
اثناء ما انا برش في الحوش تلفوني رن .. جدعت الخرطوش وقفلت الماسورة ومشيت جوة لقيتو في السرير .. نشفت يديني من الموية ورديت .. جاني صوت بقولي الوووو معاي براءة .. قلت ليهو ايوا منو معاي .. قالي انا عثمان ما عرفتيني .. عقدت حواجبي بي استغراب وقلت ليهو عثمان ؟! .. عثمان منو ما بعرف لي زول اسمو عثمان .. قالي انا العاوز من ابوك القروش الاتدينها مني قبل فترة .. سكت مسافة وانا بجمع الكلام في راسي فجأة اتذكرتو الراجل العايز من ابوي القروش .. قلت ليهو عمو عثمان ؟ .. قالي اي انا عثمان ... زحيت التلفون من اضاني ورفعت راسي فوق وطلعت نفس بنفاذ صبر وقلت ياخ الراجل دة مالو شفقان كدة يا الله اعوذ بالله ..
جاني صوتو بنقنق من بعيد بسماعة التلفون .. ختيت التلفون راجع في اضاني وقلت ليهو ايوا كنت بتقول في شنو ؟ .. قالي قلت ليك كيفك انتي .. قلت ليهو انا كويسة الحمدلله .. خير ان شاء الله داقي لي ليه .. سكت كدة وتاني قالي ااا ايوا قلت اذكرك بالقروش بعد 11 يوم عشان ما تنسي محتاجهم .. ابتسمت وانا بجز على اسناني وقلت ليهو متذكرة كتر خيرك .. قالي ما كنت عايز اضغط عليك لكن محتاجهم .. قلت ليهو خلاص يا عمو طيب بعد 11 يوم انا متذكرة ما ح انسى ان شاء الله ح اجيبهم ليك .. قالي طيب كويس .. قلتي لي انتي كيف .. قفلت الخط في وشو وجدعت التلفون في السرير وانا غازة يدي في نصي وقلت كف ثلاثي الابعاد ان شاء الله دة شنو الراجل اللايوق دة ..
قبل العصر ما يأذن عملت شاي وقهوة لي ابوي وختيتهم ليهو في المطبخ وختيت ليهم الصينية والكبابي وقلت ليهو جهزتهم ليك في المطبخ قاعدات .. قالي بارك الله فيك امشي انتي ما تتاخري على خالتك .. قلت ليهو حاضر ... طلعت ومشيت لبيت خالتو عوضية ورنيت الجرس فتحت لي هي وسلمت علي وقالت لي كويس الجيتي يا بتي الضيوف قربو وانا شالتني نومة من بعد اذان الضهر .. ضحكت وقلت ليها دي ما شالتك نومة دي رقدتك وغطتك وغنت ليك نام نام .. قالت لي اصلو الهظار ما بتخليهو .. دخلنا جوة وقلت ليها اها عملتي شنو والباقي شنو ..
قالت لي جهزت العشا بس باقي شاي اللبن والكيكة وسلطة الجزر لسة ما عملتهم .. قلت ليها جيتيني في ملعبي .. قالت القى زيك وين انا .. قلت ليها ما ح تلقيي .. ابتسمت وقالت لي خلاص ابدي وخلي التشكير في نفسك عشان الزمن وما يداهمونا ... قلت ليها بخوفو للدرجة دي .. قالت لي ديل اهل عوض الله ناس ظريفين والله لكن معاهم راجل كدة عندو كافيهات معروفة هنا لازم ينظر في اي حاجة .. قلت ليها لازم يكون في زول فيهم دمو تقيل .. ضحكت و قالت لي غايتو بس ربنا يحلنا منو .. الجزر والفلفيلة والزبادي في التلاجة والضلفة الفوق ديك بتلقي فيها حاجات الكيك والشاي يلا استعجلي .. قلت ليها حاضر يا خالتو براحة طيب امسكي صوت ودقيني بعد دة .. ضحكت وقالت لي انا احسن اخليك براك يلا ..
فاتت وانا طلعت العباية والطرحة وكفكفت يديني ولفيت شعري واخدت وضعية الشيف ووقعت ليك خلط وتقطيع وبشر وعجن .. بعد ما خلصت من الكيكة ودخلتها الفرن قبلت على سلطة الجزر .. فتحت التلاجة وقعدت على ركبي طلعت الجزر والزبادي وختيتهم في المسطبة .. رجعت التلاجة وشلت لي كم جزراية تاني بي يد وقفلت باب التلاجة باليد التانية ومع قفلتي للباب لقيت عبدو في وشي ومن الخلعة خمشت الجزر كلو وفنيتو فيهو .. بينما هو كان واقف وما حرك ساكن وماف ولا جزراية جات فيهو .. عاين لي ببرود كدة وقالي قلبك خفيف ... ختيت اصابعي بين عيوني وقلت ليهو ليه يا عبدو ليه .. ليه ما بتعمل صوت .. ليه بتتحرك زي الاشباح .. وهو ولا شغال بي ولا سائل فيني برغي بقول في شنو .. فتح باب التلاجة براحة وطلع جك العصير وطلع كبايتين ورفع نضارتو في شعرو كدة وعاين لي قالي اكب ليك معاي ..
زحيت اصابعي شوية من عيوني وعاينت ليهو بطرف عيني وقبلت عليهو وختيت يديني في نصي وانا بحمر ليهو .. هو عاين لي مسافة وتاني قبل كبا العصير ودخل الجك التلاجة وشال الكباية ووقف عاين لي تاني اخد ليهو رشفة وقالي مالك .. قلت ليهو ملا .. ملاا .. وبعدين انت متين اصلا قمت من المرض عشان تقعد تتحاوم في البيت كدة .. قالي قل هو الله احد .. قلت ليهو انت ولد قليل ادب وراسك قوي وكمان لئيم ومسيخ انا ما عرافة اعمل ليك شنو بي مساختك دي اعلقك في طرف البلكونة دي والا ادخلك الفرن مع الكيكة دي ولا اعمل شنو .. انا ما لاقاني في حياتي واا.. ... كنت بتكلم وبهرج بينما هو بعاين لي ساي وبشرب في العصير بدون ادنى ردة فعل .. نزل نظراتو في عيونو ودخل يدو في جيبو وتاني رجع يشرب وبعاين لي وانا برغي وبرغي وبرغي وفجأة بدون اي مقدمات قبل وفات .. انا فتحت خشمي بصدمة وبقيت برمش ساي وقلت شووف الولد قليل الادب دة .. ماشي يا قليل الادب خليني افضى ليك بس وانا بأدبك ...
رجعت اشتغل تاني والكيكة جهزت طلعتها وزينتها وقطعتها .. جهزت السلطة ونزلتها وختيت الشاي وبقيت منتظراهو يجهز بس .. بقيت واقفة وبعاين ساي جات خالتو عوضية وقالت لي اها خلصتي .. قلت ليها اي باقي الشاي بس .. كنت واقفة جنب شباك القزاز والشمس في وشي عايزة اتحرك منها كدة خالتو عوضية قالت لي لالالا خليك واقفة .. قلت ليها بإستغراب ليه في شنو .. شبكت يدينها وختتهم تحت ذقنها وبقت تعاين لي زي الام البتتامل في ولدها .. قالت لي يا سلااام عيونك في الشمس حلوة يا بتي ذكرتني عيون امك الله يرحمها .. قلت ليها يا خالتو ياخ ما تخجليني انا عارفاهم حلوات شديد لكن يا زولة ما مشكلة شكري ساي .. نزلت يدينها وقالت لي انا اقول تمي الشاي دة وانتي ساكتة .. ضحكت وقلت ليها اين ذهب الغزل القبل شوية .. قالت لي ذلة لسان يلا يلا الضيوف زاتهم شكلهم وصلو ...
طفيت الشاي من النار وكبيتو في السرامس وجهزت الكبابي ورصيتهم وضايرت المطبخ سريع سريع ولبست عبايتي وطرحتي وعمتو عوضية نادتني عشان اسلم على الضيوف .. كان ظاهر عليهم حبابين وسلمو علي بي بشاشة .. كانو مرتين وراجلين وولد وبت .. واحدة منهم قالت لي ماشاء الله عسل عسل ربنا يحفظك مشبهاك على واحدة لكن ما متذكراها منو .. خالتو عوضية قالت ليها دي بت منال يا عواطف .. المرا عاينت لي تاني بملامح مصدومة ووقفت على حيلها وجات مسكتني وقالت لي انتي بت منال صاحبتنا الله يرحمها .. عيونها كانو مرغرغات قلت ليها اي .. عاينت لي مسافة وقالت لي اي والله نفس العيون .. سلمت علي تاني وباستني في خدي وقالت لي صحي والله بتشبهيها شديد .. سكتت شوية وقالت لي كنت بقوليها يا منال لمن اعاين في عيونك بحس اني بعاين في قزاز سبحان الله لمن شفتك حسيت نفسي بعاين في قزاز برضو ... المرا كانت متاثرة شديد وقربت تبكي وتبكيني معاها ..
خالتو عوضية حاولت تغير الموضوع وقالت ليها مهند وينو يا عواطف مالو ما جا .. خالتو عواطف بعد مسافة عاينت ليها وقالت ليها .. مهند؟! اي مهند جاي بقفل في العربية .. قالت ليها البنية كيف صحي ان شاء الله بقت احسن .. قالت ليها احسن بكتير الحمدلله .. مع كلامنا دة الباب فتح ودخل مهند وهو شايل ليهو بت صغيرونة كدة لمن ركزت فيها لقيتها هي زاتها بتعاين لي وعرفنا بعض في نفس اللحظة .. هي نزلت منو وسط استغرابو وجات جارية علي وحضنتني من رجليني وقالت لي ماما عسلية .. انا قلت بي استغراب تسابيح؟! .. عاينت لمهند تاني وقالت ليهو بابا بابا .. شوف دي ماما عسلية القلتها ليك ..
{لا تدري لعل الله يحدث بعد ذلك امرا} ..