رواية نجوم سرمدية الفصل التاسع9بقلم سبأ النيل

عبدو قالي الراجل دة انا ما متطمن ليهو .. قلت ليهو دة راجل شفقان ساي ما تشغل نفسك بيهو ... عاين للتفون كدة ورفع حواجبو رفعة خفيفة وزم خشمو وختاهو في الطربيزة وعاين لي وقام شال دفترو وتلفونو وقالي انا ماشي اصلي .. ما تفتحي التلاجة لغاية ما الايسكريم ياخد زمنو .. شبكت يديني وختيتهم لصق خدي وقلت وحلاتي حاضر امشي امشي ... حرك راسو بخيبة امل وطلع ... خلصت غسيل باقي العدة الكانت في الحوض ومشيت عشان اتوضى اصلي لقيت خالتو عوضية في الصالون قاعدة في الكرسي وبتصلي ... مشيت الوضاية اتوضيت وجيت انتظرتها لمن خلصت وسلمت وانتهت قلت ليها حرمل .. قالت لي جمعا .. قالت لي وهي بتقوم من الكرسي انتهيتو من جوطتكم دي .. ضحكت وقلت ليها ايوا خلصنا ورتبت ليك المطبخ زييي ما كان عشان ما تقولي قلبوهو لي رأسا على عقب .. قالت لي الحمدلله مهند قبيل قالي ما تدخلي المطبخ تقوم تجيك كباية طايرة .. ضحكت وقلت ليها كويس انك سمعتي كلامو .. قامت وانا وقفت صليت العصر عشان ما يفوتني .. 

لمن خلصت مشيت البيت سويت الغدا وقعدت اتغدا مع ابوي ... قالي اها عملتو شنو .. قلت ليهو والله يا ابوي انا ما عملت اي حاجة عبدو هو العمل .. لكن طلع الايسكريم حلو شديد ما بتقدر تتخيلو .. فيهو نكهة وقوام كدة حاجة فخمة بكل بساطة .. قالي ما شاء الله .. لازم اجربو يوم اعملي لي خصم .. رفعت حاجبي بصدمة كدة وقلت ليهو نعم؟ .. خصم ؟ هل انا بعرفك عشان اعمل ليك خصم يا استاذ محمد؟ .. تؤتؤ .. خصم ماف .. ضحك ضحكة عالية وقالي يا زولة .. بعد العشرة دي كلها ما بتعرفيني .. يا خسارة .. انتي شكلك ما بتعرفي رجل الاعمال محمد عبدالله .. ضحكت وقلت ليهو رجل اعمال وعايز خصم ؟ .. والله دي قصة .. ضحك كدة واخد ليهو سكتة بي ابتسامة وخت يدو في راسي وقالي ربنا يوفقك يا بتي .. مسكت يدو وقلت ليهو دعواتك بس يا ابوي ... 

بعد خلصنا ونسة مشيت غسلت العدة وقمت على الملابس غسلتها وكنست الحوش كالعادة ورشيتو وطلعت المراتب وفرشتها .. رقدت في واحدة من السراير البرا ولمست بي يدي الارض المرشوشة كانت باردة وحلوة ونمت بالطريقة دي ويدي في الارض .. صحيت على صوت تلفوني برن عاينت حوالي لقيت الزمن قرب للمغارب .. قمت واتربعت في نص السرير واتمطيت ولاحظت للتلفون لسة برن ... عاينت في اسم المتصل لقيتو عبدو .. فتحت الخط وقلت ليهو اي يا عبدو .. جاني صوت خالتو عوضية  .. قالت لي الو براءة بتي كيفك .. قلت ليها ايوا يا خالتو تمام انا الحمدلله .. قالت لي تعالي البيت .. رفعت راسي تاني عاينت للجو عشان استنتج الزمن قلت ليها الواطة مغربت مسافة اصلي المغرب الضلام بكون نزل .. قولي لي عبدو خليها لي بكرة .. قالت لي لالا ما العايزك عبدو انا عايزاك في موضوع .. قلت ليها موضوع؟ .. ان شاء الله خير .. قالت لالا خير انتي لمن تجي بتعرفي .. كلمي ابوكي واعتذري لي منو سرقناك منو كتير اليومين دي .. ضحكت وقلت ليها طيب بكلمو ... ح اصلي واجيك ان شاء الله ... 

قفلت منها ومشيت صليت المغرب مع ابوي وكلمتو وطلعت على طول ... قبل ما ارن الجرس الباب فتح عاينت بالجنبة لقيتو عبدو  .. قالي امي منتظراك جوة انا ماشي الدكان .. قلت ليهو طيب .. دخلت الصالون لقيتها قاعدة وخاتة ليها فشار وبتحضر .. لمن لمحتني شالت الرموت خفضت صوت التلفزيون واستعدلت في الكنبة وقالت لي تعالي .. قعدت زي قعدتها وهي شالت الفشار ختتو في نصنا .. قلت ليها الموضوع شنو العايزاني فيهو ...  قالت لي متذكرة الضيوف الجوني ديك .. قلت ليها ايوا .. قالت لي متذكرة الراجل المعاهم القلت ليك عندو كافيهات منتشرة في الخرطوم وبحب ينظر في اي حاجة .. سكتت شوية عشان استذكر قلت ليها ايوا ايوا اتذكرتو .. عاينت ليها بإستغراب وقلت ليها مالو .. قالت لي عندو محل اسمو شاي مقنن .. محل شاي وبسكويت وقهوة وكدة يعني كافيه لكن اساسو الشاي ... قلت ليها طيب .. قالت لي دق لي تلفون قبل شوية وقالي الشاي الشربو اليومداك العملو منو .. قلت ليهو عملتو البت الاسمها براءة ديك .. سكت شوية كدة وقالي قولي ليها انا ح اجي تاني يوم من الايام وعايزها تعمل لي نفس الشاي ولو كان بنفس الطعم والنكهة الشربتهم بيها لمن جيت بشريها انو ح يجيها شغل حلو شديد .... 

سكتت وانا بقيت ساكتة وبنعاين لبعض بدهشة وقلت ليها مااا جادة .. قالت لي كل الجدية .. قلت ليها خالتو عليك الله جادة .. قالت لي والله جادة يا بتي هو انا عندي حيل للهظار .. سكتت مسافة وقلت ليها يعني عايز يشغلني .. قالت لي ايوا باين كدة .. ابتسمت ابتسامة كبيرة وقلت ليها طيب قال ح يجي متين .. قالت لي ما حدد بس قالي متى ما جيت جيت بس اهم حاجة شرطي يتحقق .. 

قلت ليها خلاص يا خالتو لمن يجي انتي كلميني ... قالت لي كويس يا بتي انا متأكدة انك ح تشتغلي معاهو .. سكتت شوية كدة وقالت لي ما نفسك تعملي لينا شاي لبن بي بسكويت .. قلت ليها يا خالتو كفاية بقيتي بتشربيهو كتير خلاص ما كويس كدة .. ما زاد عن حده انقلب ضده .. حافظي على صحتك .. قالت لي سمح سويهو المرة دي والمرة الجاية بحافظ على صحتي .. حركت راسي بخيبة امل وقلت ليها طيب امري لله .. الجرس رن  قالت لي افتحي الباب بكون دة عبدو .. مشيت فتحت ليهو الباب ... قالي باقي عشرة دقايق ومدة الايسكريم تنتهي عشان نعبيهو وندخلو التلاجة تاني .. قلت ليهو تااااني ؟ .. قالي ايوا تااني ... مشينا المطبخ قالي عايزة تعملي شنو .. قلت ليهو شاي لبن لخالتو عوضية ... قالي شغلة هي شاي اللبن دة .. قلت ليهو معليش عشان انا محترفة فيهو وكدة هي ما بتقدر تقاومو .. عاين لي مسافة ومشا فتح الديفريزر طلع الايسكريم وعاين لي تاني قالي ح نعبيهو وندخلو تاني لي بكرة .. ختيت يدي في حنكي بي حيرة وقلت ليهو لكن ح نعبيهو كيف وهو جامد كدة .. قالي فكرت اننا نجيب علب ونعبيها فيهو لكن ح يكون تكلفة .. عشان كدة ح نستخدم اكياس الايسكريم بتاعتنا العادية بس عشان نعبيهو فيها بدون تعب ح نستعمل دي .. فتح الدرج وطلع منو اداة تزين الكيك بتاعة الكريمة .. عاينت ليهو وعملت اوك بي يدي وحركت راسي بفخر وقلت ليهو تربيتي ... خلصت الشاي ووديتو ولمن جيت ليهو بدينا فعلا نعبي في اكياس الايسكريم كيس كيس وكنا عاملين اكتر من نكهة واكتر من لون .. 

بعد خلصنا رصيناهم تاني وعاينت ليهم كدة عبدو قالي ما حاسة ابداع زي دة ناقصو حاجة ... ختيت يدي في حنكي وقلت ليهو اممم فعلا ناقصو حاجة .. عاينت ليهو بطرف عيني وقلت ليهو توقيعي صح؟ .. تلقائيا الابتسامة الكانت في وشو اتلاشت .. قالي انتظريني يا ام توقيع انتي ماشي اجيب حاجة وجاي .. قلت ليهو اتقبل الحقيقة مالك هربت الناقص توقيعي ... طلع خلاني بتكلم ساي ...  مسافة ما يجي رتبت الحاجات الجطناها وغسلتهم .. بعد شوية جا وهو شايل الكرتونة الجبتها من المكتبة ديك ... عاينت ليهو بإستغراب وقلت ليهو الكرتونة دي فيها شنو .. رفع شعرو بي يدو وعلق نظارتو في شعرو ومشى فتح الدرج طلع مشرط فتح بيهو الكرتونة .. طلع منها شريط طويييل مقسم زي مناديل الورق الملفوفة  ... كان كلو بالاسود وكل قسم فيهو شعار بالاصفر ... جرا منو جزو ومسكو بيدينو الاتنين وابتسم وقالي رايك شنو ... جيت قريب ولمن ركزت في الشعار طلع انو دة اسمي مكتوب بالعربي والانجلييزي ... عاينت للشريط وتاني عاينت ليهو قلت ليهو دة شنو .. قالي دة ال Logo (اللوجو) (الشعار) بتاعك .. بتاع المنتج حقك دة ... كل كيس ايسكريم ح يكون مطبوع فيهو اللوجو او الشعار حقك دة ومعاهو رقم تلفونك .. منظرو ح يكون زي قارورة العصير واحد ... رايك شنو ؟ ... حرفيا ما كنت قادرة اعبر ... سكت مسافة وقلت ليهو اقول شنو؟ ... قالي حلو؟ .. رحكت راسي مبعنى اي وقلت ليهو شديد .. 

بدينا نلصق في الشعارات كل كيس فيهو شعار ... كان احساس غريب .. تحس انك بالجد بتنجز في حاجة .. بعد خلصنا ودخلناهو التلاجة راجع عبدو قالي  بكرة ح نحتاج صبارتك تاني  نطلعو فيها .. بس المرة دي ما انتي الح تقعدي وتبيعي ... صحبي بتاع التكتك ح يجي يشيل الصبارة ويوديها لمكتبة السلام المشينا ليها المرة الفاتت الي هم اصلا صممو لينا اللوجو دة مجان .. بما انو المكتبة للقراءة كمان وفيها حديقة برا ف اكيد في قراء ح يطلعو يقرو فيها ولمن يشوفو الايسكريم ح يشترو .. بس اكيد ما بالسعر العادي .. السعر للكيس الواحد ح يكون ضعفين السعر الفات .. قلت ليهو لكن يا عبدو ضعفين سعر الكيس كدة كتير بالنسبة لي ايسكريم .. قالي السعر دة اولا  ح يشد الفضول العند الناس انو اشمعنى كيس ايسكريم بالسعر دة .. و ح يشترو للتجربة .. ولمن يضوقوهو ان شاء الله ح يتفاجئو بالطعم والقوام بتاعو وح يشترو كمان وكمان ولو ما عاجلا اجلا بإذن الله ... 

سكتت مسافة وكنت ما بين فرحانة ومذهولة وعايزة اضحك وعايزة ابكي ومشاعر كتيرة ملخبطة .. حسيتها بدت تفرج .. قلت ليهو عبدو شكرا ليك انت تعبت كتير وعملت حاجات كتيرة عشاني ما ح انساها ليك .. نزل نظاراتو من شعرو ولبسها وقالي ما تقولي كدة يا زولة انا عارف لو خليتك بمخك دة ح القاك في السجن ... دة كلو عشانك وعشان عمو محمد كمان و عشان الراجل النقناق دة ما يعمل ليكم حاجة .. وعشان انتي بت وحيدة لي ابوكي وسايقاك مشاعرك ما معروف تههبي تعملي شنو ... ضحكت وانا عيوني مرغرغة وقلت ليهو برضو بعد مساختك دي شكرا ليك كتير ... رجع شعرو الغزير لي ورا بحركة درامية كدة وقال كفاية شكر من العالم ياخ ما تشكروني انا عارف اني رائع ... ضحكت وقلت ليهو يا كافي البلا الواحد ما يكسر ليك تلج بكلمتين حلوات اصلا الكلام دة ما شبهك .. قالي الحسنة في المنعول ... اسي انتي ارجعي البيت وبكرة الصباح قبل ما تمشي الروضة جيبي الصبارة وامشي انا بملاها وبجي بتاع التكتك بشيلها يوديها المكتبة .. قلت ليهو طيب الح يبيع منو .. قالي عندي صحبي معرفة هناك شغلتو يراقب حديقة المكتبة عشان ما يحصل اي انفلات كدة ولا كدة وبكون بس قاعد في كرسيهو اليوم كلو .. كلمتو واتفقت معاهو قبل يومين ووافق ... 

قلت ليهو ما شاء الله انت العالم دة كلو معارفك .. ضحك وقالي هبة من الله ما تحاولي ما ح تلقيها .. قلت ليهو انت محتاج تربية من اول وجديد ... قالي اخخ اتذكرت امتحاناتي ح انزل امتحنها براي بعد يومين ... قلت ليهو كويس الادارة ادتك فترة راحة زاتو باقي بس تشد حيلك بالذات في الانجليزي عايزاك تجيب لي فيهو الدرجة الكاملة .. قالي خلاص عدوة الاساتذة علقت فيك .. قلت ليهو كلمتك غايتو .. يلا مع السلامة 

تاني يوم الصباح صحيت بدري وديت الصبارة ودغري على الروضة .. وانا داخلة اتطاقشت مع بت وهي طالعة بسرعة .. قالت لي معليش ما قاصدة .. قلت ليها لالا ما مشكلة .. لمن ركزت فيها كانت نفس البت الطقشتني في نفس المكان المرة الفاتت وبرضو مستعجلة .. عاينت ليها تاني لقيتها فاتت بعيد .. قلت يا ربي البت دي منو ومالها على طول مستعجلة! .... دخلت سلمت على الاساتذة ومشيت الفصل .. قلت ليهم صباح الخير .. قالو لي صباح النور .. ختيت الكتاب في الدرج وعاينت كدة لقيت درج تسابيح فاضي .. عقدت حواجبي بي استغراب وقلت يا عمر تسابيح وين الليلة .. قالي ما عارف يا ماما براءة الليلة ما جات .. قلت في نفسي يا ربي مالها بتغيب كتير كدة ما تكون مرضت تاني ... اسال منها مهند ولا احسن اسال خالتو عوضية .. فكرت شوية كدة ونفضت الفكرة من راسي وبديت ادي في الحصة ... 

بعد خلصت الحصة مشيت لمكتب المحاسبة شلت قروشي وطلعت على طول مشيت الموقف .. وقفت شوية كدة فجأة لمحت ليك عمو عثمان سيد القروش .. من سوء حظي لمن لمحتو عيني وقعت في عينو .. هو بالله التقول شاف جنيه دهب طوالي اتحرك جا علي .. قبلت منو وغمضت عيوني وقلت اصلو ماف داعي تجي اصول ماف داعي .. علييييييك الله ما تكرهني حياتي ... حسيت بيهو جاي علي فجأة في هايس وقف ولا كضبت طوالي ركبت وهو لمن وصل كان الهايس اتملا .. بقا يتشابا عشان يشوفني وانا اشيل وانزل لي تحت  لغاية ما الهايس اتحرك .. حمدت الله كتير اني نفدت منو .. ما لاقاني راجل لايوق زيو كدة ابدا ولا ظنيت ح يلاقيني ... وصلت البيت ومشيت عملت الفطور وفطرت مع ابوي واديتو ادويتو القربت تخلص ... 

بعدها مشيت اخدت لي نومة طويلة لغاية ما العصر اذن ابوي صحاني صلينا العصر وختيت الغدا اتغدينا وعملت المعتاد من غسيل وكنيس ورش وموضوع عبدو طلع من راسي كلو كلو .. بعد صلاة العصر بنص ساعة كدة الباب دق .. مشيت فتحتو طلع عبدو وقبل ما اقول اي حاجة رفع لي ربطة قروش وهو مبتسم من الضرس للضرس .. عاينت ليهو بإستغراب وقلت ليهو دة شنو .. رفع حواجبو وقالي دة حق الايسكريم ما فضلت ولا قطعة والناس كانو لسة عايزين بس الكمية خلصت .. قلت ليهو بصدمة ماااا جاااادي ... قالي والله العظيم امسكي .. مدا لي القروش .. مسكتها وانا ما مصدقة مرة اعاين ليهو ومرة اعيان للقروش .. دي كانت حق شغل تلاتة يوم .. قلت ليهو يعني الناس حبوهو .. قالي يعني ح يوكونو اشتروهو بالغصب ما اكيد حبوهو .. حمرت ليهو وقلت ليهو دايما بتخرب الفرحة بي مساختك دي  ... قالي للصراحة عندك اسالة غبية .. 

قلت ليهو اسي خلينا في فرحتنا دي .. انا ما مصدقة انو .. وقبل ما اتم كلامي تلفوني رن .. عاينت للاسم لقيتو عبدو عاينت ليهو بخلعة قالي مالك .. قلت ليهو انت منو وبتتصل لي كيف وانت واقف معاي .. ختا اصابعو بين عيونو بنفاد صبر وقالي تلفوني في البيت دي امي البتتصل .. عاينت للتلفون ورجعتو علي وقلت ليهو ااا ايوا ايوا صاح ... رديت قلت ليها الو .. قالت لي براءة الراجل جاي ارح تعالي .. قلت ليها ما جادة اسي في الزمن دة ؟ قالت لي اي جاي هو ومرتو هنديل بدقو في الباب اطلعي ... قلت ليها طيب طيب جاية .. عبدو قالي جو ولا شنو قلت ليهو اي ليه ما كلمتني .. ضحك وقالي خلاص امشي وتعالي انا داخل اتونس شوية مع عمو محمد .. قلت ليهو طيب ادخل ادخل ... هو دخل وانا مشيت دقيت الباب فتح لي مهند قالي اتفضلي .. لقيتهم قاعدين في الصالون سلمت عليهم وقعدنا اتكلمنا شوية .. بعد شوية الراجل قال نفسي في شاي لبن يا جماعة .. خالتو عوضية عاينت لي .. قمت مشيت عملتو زي ما بعملو دايما ولا حاولت اتكلف ابدا ... 

بعد جهزتو طلعتو ليهم وكنت متوترة ولا كأنهم جايين يتقدمو .. شربو الشاي واتونسو شوية .. الراجل ما ابدا اي رد فعل ودة خلاني مستغربة .. قال لي خالتو عوضية انتي عبدو وين .. قالت ليهو مشى الجيران بعد شوية بجي .. قال لي بكرة بتصلو حاجات رسلها ليهو عمو عوض الله من كندا قال يوصلوها ليهو .. انا خليت كل حاجة وركزت في جملة "عمو عوض الله" ... عاينت لي خالتو عوضية بإستغراب لقيتها بتتصرف عادي .. قلت في نفسي كيف يعني عمو ؟.. عمو عوض الله مش ابوهو ؟!! .. عاينت لي خالتو عوضية تاني بإستغراب لقيتها بتعاين لي وبتتكلم زي الفهمت استغرابي ... الونسة استمرت لغاية ما فاتو .. سلمنا عليهم في الباب والراجل قال لي خالتو بديك تلفون .. مشو ومهند فات يوصلهم 

دخلنا جوة وقعدنا وقالت لي شكلو عجبو الشاي لانو قال ح يتصل علي بعدين ... كنت ساكتة ساي .. قلت ليها انتي يا خالتو ليه الراجل دة قال لي عمو عوض الله انو عم عبدو ما ابوهو .. عاينت لي مسافة وسكتت .. قبلت مني وتاني عاينت لي .. اخدت نفس وقالت لي لانو عبدو ما ولدنا ..... 

{لا تدري لعل الله يحدث بعد ذلك امرا } .. 

                   الفصل العاشر من هنا