رواية اليك مني الفصل الاول1بقلم سبا النيل
نزلت من الركشة مخلوعة واتجهت على سلوى الكانت واقفة قدام المطعم وبتتصل كم مرة بتلفونها وهي متوترة، اول ما شافتني جاية عليها قفلت التلفون بسرعة واتحركت اتجاهي اثناء ما انا متحركة عليها، اول ما وصلنا بعض اتنقلت بنظراتي بينها وبين المطعم الوراها وهو مقفول على غير العادة وقلت ليها في شنو يا سلوى الحاصل شنو، قالت لي ما عارفة يا ريهام انا جيت على اساس موعدنا المعروف ولقيت المطعم مقفل والغريبة انهم ما اتصلو علينا ورونا انهم مقفلين والسبب شنو، عاينت على المطعم بإستغراب وكأني بتاكد من كلامها ورجعت عاينت ليها بحيرة شديدة وقلت ليها كيف يعني الكلام دة ؟ ، طيب ما اتصلتي على عمو صديق ؟ .. قالت لي وهي بتأشر على تلفونها إتصلت الف مرة من الصباح ما بيرد على مكالماتي، نعمل شنو يا ريهام الشفع بكونو منتظريننا الليلة ما معقولة نجيهم فاضيين ..
قالت كلامها دة وقبلت على المطعم بتعاين ليهو بنفاد صبر وهي خاتة يدينها في نصها ، سكتت بحيرة وأنا بفكر السبب البخلي عمو صديق يقفل بدون ما يورينا شنو وهو عارف انو عندنا مواعيد كل احد وتلات وخميس، يعني الليلة ما ح يكون في وجبة لي اطفال حلة شاكر ؟ ، اكيد ح يكونو مستنيننا بي فارغ الصبر ، لالا مستحيل ما ح نكسر بخاطرهم .. قلت كدة لي سلوى العاينت لي ثواني وقالت لي لكن الليلة ما ح نلحق يا ريهام خصوصا انو الساعة عاملة 10 ونص وزمن الفطور بكون فات خلاص .. قلت ليها لو زمن الفطور فات ف زمن العشا لسة .. مسكتها من يدها وجريتها وراي للركشة وانا بقوليها وبالنسبة للمطعم ف ما ح نقيف على مطعم عمو صديق لازم نشوف مطعم تاني يجهز لينا الاكل في اسرع وقت ..
ركبت وهي ركبت جنبي وقالت لي لكن ح نلقى مطعم متفرغ وين يا ريهام واكيد ح يكونو عايزين كاش ونحن ما عندنا كاش وبندفع ليهم بالشهر من التبرعات .. ختيت يدي على يدها البتحركها بتوتر وقلت ليها انتي ما تفكري في التفاصيل دي كتير ، نحن نسعى وربك بفرجها من عندو .. زفرت بإقتناع وقالت لي إن شاء الله يارب .. حركت راسي بتشجيع وعاينت لي عمو بتاع الركشة وقلت ليهو لو سمحت يا عمو اسماعيل بتعرف ليك مطعم شعبي في المنطقة دي؟ .. قالي اي في واحد قريب لي مجمع الشروق .. قلت ليهو بس ودينا ليهو عليك الله .. دور الركشة وقالي حاضر يا بتي .. اتحرك بينا مسافة ما يقارب الربع ساعة لغاية ما وقفنا قدام مطعم شعبي في مجموعة طرابيز وكراسي برا مختوتين في الرملة المرشوشة بي عناية ومحاوطة بي شجر متوسط الطول واصايص زهور ورا ليهو طوالي في المطعم الداخلي وفوق ليهو لافتة كبيرة مكتوب عليها مطعم الدرة للمأكولات الشعبية ..
نزلنا انا وسلوى ووقفنا قدامو ، منظرو كان مريح للاعصاب بي تصميمو البسيط وواجهتو المخطلتة بين اللونين الاسود والاصفر .. عاينت لي سلوى وقلت ليها ارح؟ .. حركت راسها بإيجاب واتحركنا على المطعم ، اتجاوزنا الجلسة الخارجية ودخلنا جوة واول ما دخلنا ضربنا هوا التكيف ، التصميم من جوة كان بسيط وحلو ومريح .. قعدنا في واحدة من الطرابيز واول ما قعدنا جانا النادل بي ابتسامة بشوشة وقالينا اتفضلو .. قلت ليهو لو سمحت عايزين نقابل سيد المطعم .. عاين لينا بإستغراب وتوتر وقالينا ان شاء الله خير في حاجة ما عجبتكم ؟ .. قلت ليهو لالا ابدا بس عندنا موضوع مهم عايزين نناقشو فيهو .. حرك راسو بتفهم وقالي طيب تمام دقايق وارجع ليكم ..
بعد ما فات عاينت لي سلوى القالت لي إن شاء الله نتوفق يا ريهام وما نرجع بخفي حُنين .. قلت ليها إن شاء الله والله لو ما اتصرفنا الاولاد ح يكسرو خاطري شديد .. قالت لي حتى انا والله ، عمو صديق ختانا في حتة ضيقة شديد الليلة ياخ .. قلت ليها اعذريهو يا سلوى الغايب عذرو معاهو، إن شاء الله لمن يجي ح نفهم منو الحاصل كلو .. قالت لي كلامك صاح إن شاء الله يكون بخير .. في وسط كلامنا دة سلوى قالت لي عايني الجاي علينا دة ، دة ياهو سيد المحل؟ .. عاينت ليهو بإستغراب وقلت ليها شكلو كدة .. قالت لي شاب يعني كنت مفتكراهو كبير لكن ظاهر إنو بتاع عمل وشغل وشخصية جادة .. قلت ليها ما علينا المهم يوافق ..
اول ما وصلنا قال السلام عليكم ، ردينا ليهو السلام .. قالينا إن شاء الله خير قالو لي عايزني في موضوع مهم .. عاينت لي سلوى ثواني ورجعت عاينت ليهو وقلت ليهو ايوا واتمنى انك تقدر تساعدنا .. سكت ثواني قبل ما يقول إن شاء الله اقدر اساعدكم .. سلوى قالت ليهو طيب اتفضل .. حرك راسو بإيجاب وجرا الكرسي التالت الموجود وقعد بعيد شوية وشبك يدينو بين رجلينو وقال اتفضلو .. اخدت نفس وحكيت ليهو بموضوع الوجبات البنعملها كل احد وتلات وخميس في الاسبوع عشان اطفال حلة شاكر والمعروف انها حلة الناس فيها على قد حالها والاطفال الفيها معظهم بعاني من سوء التغذية ف نحن بنحاول نساهم معاهم خلال الاسبوع وبندعهمهم بالوجبات دي من خلال التبرعات البتجينا وبنوفر ليهم اللبن كمان نهاية اليوم ، وحكيت ليهو بالحصل معانا الليلة في المطعم المتفقين معاهو يحضر لينا الوجبات دي والسبب الخلانا نجي هنا ..
كان ساكت وهو بعاين في الارض وبحرك يدو على لحيتو بحركة رتيبة قبل ما يرفع عيونو ويقولينا طيب انا ما عندي مانع، سلوى قالت ليهو يعني بتقدر تجهز لينا الوجبات حالينا ؟ .. حرك راسو بهدوء وقالينا إن شاء الله .. قلت ليهو بالجد حليت لينا مشكلة كبيرة شديد شكرا ليك واتمنى لو باقى الاسبوع دة المطعم المعانا ما فتح تستلم انت اعداد الوجباب وإن شاء الله بندفع ليك نهاية الاسبوع .. قبل ما يرد سلوى قالت ليهو اي وبالجد ح نكون ممنونين ليك كتير واتمنى الوجبات تقدرو تجهزوها في اسرع وقت لانو بالذات الليلة فوتنا ليهم الوجبة الاولى .. حرك راسو بنفس الهدوء وبدون ما يلتفت نادى على واحد من الندل الشغالين بصوت عالي .. نفس النادل القبيل جاهو وقاليهو ايوا يا استاذ مظفر .. وقف على حيلو وقبل عليهو وقاليهو جيب ليهم المنيو وشوفهم عايزين يطلبو شنو وبالكمية المحتاجنها وكلم اسعد خليهو يقفل المطعم على كدة عشان تقدرو تجهزو ليهم الطلبية في اسرع وقت لانهم مستعجلين وقبل الغدا تكون الوجبات جهزت تمام؟ ، قاليهو تمام إن شاء الله ..
بعد ما النادل فات قبل علينا وقالينا الشباب ح يجهزو ليكم الطلبية إن شاء الله تتوفقو وتقدرو تحصلو ، انا أستاذنكم عندي شغل ضروري اسي .. قلت ليهو لالا اتفضل طوالي وشكرا ليك ما قصرت معانا .. قالينا العفو وقبل فات لغاية ما طلع من بوابة المطعم .. سلوى عاينت لي وابتسمت وقالت لي زوق .. ابتسمت وقلت ليها شديد .. قالت لي الحمدلله الاتحلت ما اتوقعتها تتحلا بالسهولة دي .. قلت ليها مدام اتوكلنا على الله فما تشيلي هم ..
بقينا منتظرين لغاية ما جهزو لينا الوجبات كلها وكانو بشتغلو على رجل وساق بعد التعليمات الجاتهم دي .. لمن خلصو كان زمن الغدا دخل عديل .. اتصلت على عمو اسماعيل بتاع الركشة وجانا وجاب معاهو بتاع التكتك البرفع لينا الوجبات .. رفعناهم واتوجهنا طوالي على الحلة واول ما وصلنا لقينا الاولاد كلهم قاعدين بلعبو ومنتظرننا ووحدين معاهم امهاتهم .. سلمو علينا بترحاب وسلمنا على امهاتم لانو اتبنت بيننا علاقة معرفة وصداقة لمعظمهم .. بدينا انا وسلوى واتنين من البنات الشغالين معانا نوزع في الوجبات بالدبل عشان ضيعنا ليهم وجبة الفطور .. بعد خلصنا كان المغرب قرب يأذن وعمو اسماعيل وبتاع التكتك رجعو ..
شوية وسمعنا صوت بوري عربية ابوي البجي كل مرة في الزمن دة عشان يرجعنا .. ركبنا نحن الاربعة وانا ركبت قدام .. ابوي سلم علينا وقالينا ماشاء الله اها الليلة اليوم كان كيف يا بناتي ، سلوى قالت ليهو اسكت ساي يا عمو ما شفت الحصل شنو .. عاين ليهم بإبتسامة مخلوطة بشوية إستغراب وقالي الحصل معاكم شنو يا ربي ؟ .. سلوى جاها اتصال ف استاذنت وردت ف انا جاوبتو وحكيت ليهو الحصل كلو وفي النهاية قلت ليهو الحمدلله ربنا وفقنا يا ابوي .. قالي الحمدلله ما دام انتو بتعملو حاجة عشان الناس ف ربنا دايما ح يكون معاكم يا بتي .. سلوى بعد خلصت قالت دة عمو صديت يا ريهام قال حصل ليهم وفا ود عمو في البلد وسافر هو واهلو وما اظن يجو قريب .. قلت ليها لا حول ولا قوة الا بالله ، ربنا يرحمو ويغفر ليهو يارب .. كلنا اترحمنا عليهو .. قلت ليها معناها ح نواصل مع المطعم الجديد لغاية ما يرجع .. رفعت اكتافها وقالت لي شكلو كدة .. ابوي قالي ربنا يوفقكم يا رب ..
وفعلا بقينا مواصلين باقي الاسبوع دة مع المطعم الجديد وكتر خيرهم ما قصرو معانا ولا حصل مرة اتاخرو عن مواعيدنا .. كنت انا والبنات طوالي بنثني على التزامهم واكلهم وكمية الاكل بحد نفسها .. نهاية الاسبوع جمعت قروش التبرعات وسحبتها كاش ، سلوى كان عندهم مناسبة ف سقت معاي واحدة من البنات ومشينا المطعم عشان ندفع حق الوجبات .. الجو كان عصرية ف قعدنا في الجلسات البرا وشوية وجانا الويتر الاسمو عمر .. سلم علينا وقالينا اتفضلو .. قلت ليهو استاذ مظفر قاعد ؟ .. قالي للاسف والله طلع قبليكم بلحظات .. قلت ليهو ياخي ؟ .. قالي لحظة هداك يادابو طالع .. عاينت مكان بأشر وكان متجه على عربية عايز يركب ف عمر ناداهو من بعيد وقاليهو استاذ مظفر لحظة .. قبل علينا وطلع نظاتو الكان لابسها واول ما لمحني قفل باب العربية واتجه علينا ..
وقف قدامنا وقالينا السلام عليكم .. ردينا السلام .. قالينا كيف عاملين ان شاء موفقين في موضوعكم ؟ .. قلت ليهو الحمد لله كلو بخير والفضل برجع ليك بعد الله سبحانه وتعالى .. ابتسم ابتسامة خفيفة وقال دة واجبي .. ابتسمت وقبلت على شنطتي وطلعت منها ربطة قروش ومديتها ليهو .. عاين بي إستغراب وكأنو بيسأل دة شنو؟ .. فهمتو وقلت ليهو دي قروش الوجبات حقت الاسبوع ، مش اتفقنا ندفع ليك بالاسبوع .. سكت بدون ما يبدي اي تعابير على وشو .. علق النظارة الكانت في يدو على بداية قميصو من قدام ومدا يدو شال مني القروش وبحركة فجائية رجع ختاها قدامي على الطربيزة .. بقيت بعاين ليهو بإستغراب منتظرة تفسير .. مدا يدو على جيبو الوراني وطلع منو ربطة قروش وختاها على الربطة التانية قدامي ، الحاجة الخلتني مشوشة ومنتظرة تفسير اكبر منو ..