رواية اليك مني الفصل الثاني2بقلم سبا النيل
لمن لقاني ساكتة وملامح الاستغراب باينة على وشي ابتسم ابتسامة جانبية وقالي عايز اتشارك معاكم في الاجر، ممكن؟ .. قلت ليهو كيف يعني ما فهمتك؟ .. ختا يدو على واحدة من الكراسي الكانت موجودة وقالينا ممكن؟ .. قلت ليهو اتفضل .. جرا الكرسي وقعد .. قالينا شوفو ، انا عايز اتبرع بالوجبات البتشيلوها من هنا خلال الاسبوع ، عاين للقروش ثواني وقالينا يعني ما عايز تدفعو لي فيها حاجة ابدا .. ضحى الكانت ساكتة من بداية الكلام حمحمت وقالت ليهو يعني قروش التبرعات البتجي عشان الوجبات البتعملها لينا ح ترجعها لينا راجعة ؟ .. قاليها بالاصح اني ح اتكفل بالوجبات دي مجان والقروش البتجيكم من التبرعات دي اتصرفو بيها براحتكم ..
قلت ليهو طيب دة ما ح يأثر في شغلك وربحك بحاجة؟ .. فرد ضهرو على الكرسي وقالي شوفي، ما نقص مال من صدقة ، بعدين الربح البطلعو من باقي الايام الفي الاسبوع بكفيني وزيادة ، يعني ما تشيلي همي .. عاينت ليهو بتفاجؤ وقلت ليهو ش شنو؟ لا انا ما قصدي كدة انا ما شايلة همك بس يعني قصدي ال ال .. ضحى قاطعتني بضحكة وقالت ليهو طيب نتشرف بيك اكيد وربنا يعظم اجرك يارب .. وقف على حيلو وطلع النظارة ولبسها وقال اللهم امين يارب وربنا يوفقكم انتو كمان ، عن اذنكم ..
اتحرك من جنبنا وفات وقبل ما يركب العربية نادى عمر وقاليهو حاجة وبعدين ركب ودور فات .. عاينت لي ضحى القالت لي اسي القروش دي ح نعمل بيها شنو ؟ .. قلت ليها ما عارفة والله يا ضحى لكن ح نحاول ندخلها بطريقة ما في حاجة تفيد اولاد الحلة ولا رايك شنو ؟ .. قالت لي ممكن والله ، غايتو انا بقترح نديها لامهات الأطفال ك مبالغ مالية رايك شنو؟ ..
سكتت شوية بفكر والفكرة عجبتني وقلت ليها طيب فكرة حلوة .. ح نقسم مبلغ التبرعات على عدد العائلات ونوزعو ليهم نهاية كل أسبوع بإذن الله .. وفعلا شلنا القروش وكنا قايمين كدة جا الويتر شايل كبايتين عصير ختاهم قدامنا وقالينا استاذ مظفر قال ما تمشو بدون ما تشربو حاجة .. قلت ليهو بشوية تفاجؤ ما كان في داعي والله .. قالينا عادي اتفضلو وما تخجلوهو .. بعد ما فات انا وضحى اتبادلنا النظرات لفترة بسيطة وقعدنا نتناقش شوية وبعد خلصنا اتحركنا طوالي لقينا عمو اسماعيل منتظرنا ركبنا ورجعنا البيت ..
بليل بعد ما صليت وطلعت في السرير وقبل ما انوم اتصلت على سلوى الردت علي بصوت مرهق بدل على انو اليوم عندها كان متعب شديد .. سألتها من العرس وحكت لي عن تفاصيلو .. بعد انتهيت حيكت ليها عن الحصل الليلة ..في البداية اتفاجئت وقالت لي انتي متأكدة يا ريهام ؟ قلت ليها اي والله جادة معاك .. سكتت شوية وقالت لي سبحان الله رب ضارة نافعة، بالجد كتر خيرو وربنا يجزيهو خير .. بعدها اتونسنا شوية وقفلت منها ورقدت نمت ..
بداية الأسبوع التاني كنا بنتحصل على الوجبات بشكل مجاني من مطعم الدرة وسبحان الله الوجبات كميتها ما نقصت ابدا بل كانت بشكل اكتر وواضح .. استاذ مظفر كان مرات مرات بطلع معنا بي عربيتو على قرية شاكر ويشوف التجهيزات والتوزيع بعيونو وبراقب من بعيد لغاية ما شوية شوية بقا بشارك مع الفريق وحركتو بقت اكتر وبقا من المفضلين كمان عند اطفال الحلة اللي اول ما يجي بتلمو فيهو وهو كان بتعامل معاهم كأنهم اولادو .. لاحظنا انو الأطفال صحتهم اتحسنت كتير عن أول وحتى اهاليهم ..
مر ما يقارب التلاتة شهور على شغلنا دة وطبعا اعتذرنا من عمو صديق وواصلنا مع مطعم الدرة وعمو صديق اتقبل الحاجة دي وقالينا متى ما احتجتو لي انا تحت الخدمة .. كنا على أبواب الشتا .. قبل أذان المغرب كان المطعم جهز لينا وجبات العشا ف رفعناهم واتحركنا ومسفر اتحرك ورانا بي عربيتو .. اول ما وصلنا نزلنا وبقينا بنجهز في الحاجات عشان نبدأ التوزيع .. أثناء ما انا برص في الوجبات جاتني سلوى وقالت لي ريهام مظفر بناديك .. عاينت ليها بإستغراب وقلت ليها بناديني انا؟ ليه؟ .. قالت لي ما عارفة لكن شكلو حاجة مهمة .. سكتت ثواني وحركت ليها راسي بي ايجاب واتحركت عليهو .. اول ما وصلتو كان مديني ضهرو ..
حمحمت وقلت ليهو ايوا يا مظفر ناديتني ؟ .. اتلفت علي وكان شايل تلفونو في يدو .. قالي ايوا يا رهام كنت عايزك في موضوع مهم .. قلت ليهو اتفضل .. قالي بما انو الشتا داخل خلاص ف انا فكرت نجهز للعائلات دي كسوة الشتا قبل ما نتأخر والحاجات تغلا اكتر من كدة .. حركت راسي بتفهم اول ما فهمت كلامو وقلت ليهو فعلا كلامك صاح ، بس حاليا ما معانا مبلغ كافي من التبرعات عشان نقدر نجهز كسوة لي 72 عائلة ..
قالي انا حاسب الحاجة دي .. رفع التلفون في وشي على واحدة من صفحات الفيسبوك وقالي دة واحد بعرفو عندو محل ملابس شتوية كلمتو بالموضوع وقال انو ح يوفر لينا الكمية وبسعر مخفض وبتقسيط 6 شهور .. ابتسمت بفرحة وقلت ليهو بالجد ؟ .. سكت ثواني قبل ما يرجع تلفونو وقالي بالجد .. سكتت للحظات وتاني قلت ليهو طيب ح نسدد ليهو كيف .. حمحم وقالي ح تجمعي التبرعات وكل نهاية شهر ح نديها دفعة وبالنسبة للكسوة ح يكون مجهزها لينا نهاية الاسبوع دة بإذن الله .. قلت ليهو ان شاء الله يارب ..
سكتنا مسافة ، قطعت الصمت دة وقلت ليهو اااا طيب عايز حاجة تانية .. حرك راسو برفض وقالي لالا خلاص اتفضلي .. قبلت واتحركت راجعة بس سمعت صوتو قالي ريهام لحظة .. قبلت عليهو بإستغراب وقلت ليهو ايوا! ... اتقدم علي وهو بقول كان في حاجة تانية عايز اخد رايك فيها .. استعدلت وواجهو وقلت ليهو ايوا اتفضل؟ ... قالي بصراحة كنت عايز اجيب هدايا للشفع عشان افرحهم يعني .. ابتسمت وقلت ليهو حلو ، ح تكون حاجة كيوت شديد منك .. قالي كيوت؟ ، احم طيب انا محتاج مساعدتك انتي وسلوى وعايزكم تختارو ليهم الهدايا البتناسبهم لاني صراحة ما بعرف وتاني حاجة بكون مشغول شديد ودي حاجة محتاجة زمن طويل ..
سكتت بتفكير وقلت ليها طيب ما عندك مشكلة انا وسلوى بنتكفل ليك بالمهمة دي ما تشيل هم .. ابتسم وقالي شكرا ليك .. قلت ليهو العفو دة الواجب .. قالي تمام انا ح ارسل ليك القروش في حسابك وانتي شوفي عدد الأطفال وجيبي ليهم الهدايا البتنفع معاهم وغلفيها واذا نقصت ليكم حاجة وريني .. قلت ليهو تمام إن شاء الله ،اتحركت وجيت امشي قالي ريهام لحظة ..