رواية خطوات الفصل الثاني2بقلم سبا النيل
نزلت الشباك القصادو وقلت ليهو اركب .. رجع لي ورا خطوتين وقالي لالا بمشي براي .. عرفتو خاف مني وقال يمكن وراي ناس وعادي اوديهو للشرطة .. خصوصا انو قلبو ما ميت زي باقي الحرامية وعندو اخوان راجع ليهم .. قلت ليهو اسمعني لا اله الا الله محمد رسول الله .. اركب ما عايز اعمل ليك حاجة يا مان .. كفاية انك رجعت لي قروشي .. عاين لي بي شك .. قلت ليهو كلام رجال .. وقف شوية وبي تردد فتح الباب وركب ..
ضحكت وقلت ليهو كويس انك اقتنعت .. بلع ريقو وحرك راسو وقبل قدامو .. رفعت الشبابيك ختا يدو في الباب وقالي كان تخليهم فاتحات عشان الهوا .. فتحت المكيف وقلت ليهو ما بيحتاج .. دورت واستعدلت بالعربية ومشيت بي الشارع البودي للمكان الهو ساكن فيهو .. حسيتو اتطمن شوية .. قالي يعني انت ما ... قاطعتو قلت ليهو لالا انت فكرت كدة .. قالي ما اتوقعت نهائي .. قلت ليهو ما فرقت لو ما لاقيتك الليلة ما كان بقا عندي صاحب .. قالي يعني بالجد ما عندك اصحاب ولا زملا .. ضحكت وقلت ليهو لالا ...
قالي غريبة .. الزيكم بكون عندهم اصحاب بالكميات .. قلت ليهو لكن ما اصحاب حارة .. قالي صاح كلامك ما بتلقى بالساهل وسكت .. قلت في نفسي احاول انزل منو باقي الخوف دة وقلت ليهو نشرب قهوة؟ .. فكر شوية وقالي طيب بس على سريع عشان ما اتأخر .. نزلنا عند ست شاي قلت ليها حاجة فوزية اتنين قهوة مظبوطة ... عاينت ليهو قالي سكر خفيف .. قلت ليها واحدة سكر خفيف ..
جهزتهم وجابتهم لينا .. قعدنا نشرب واتكلما شوية وسألتو من دراستو وشهادتو وخبرتو .. شهادة مميزة بس بدون خبرات .. سالني اني كيف بقيت كدة في عمر صغير قلت ليهو واسطات وتوارث ... ضحك وقالي نقول حظ يعني .. قلت ليهو يمكن توفيق .. اتكلمنا شوية واتذكرت حاجة .. قلت ليهو شوية وجاييك .. حرك راسو بمعنى تمام .. مشيت اقرب بقالة خميت لي اكل وفواكه ومواد تموينية شلتهم وختيتهم في الضهرية ..
ناديتو وقلت ليهو نمشي .. قالي ايوا ارح .. ركبنا واتحركنا .. بقا بوصف لي لغاية ما قالي بسسس قبلك هنا هندا ليهو البيت .. عاينت ليهو كان بيت بسيط .. بسيط شدييييد .. قالي اتفضل .. قلت ليهو مرة تانية .. قالي لالا والله تتفضل .. ضحكت وقلت ليهو طيب .. ركنت العربية ونزلنا .. دق الباب فتح ليهو اخوهو الصغير سلم عليهو بفرحة كدة .. قاليهو اختك وين .. قاليهو قاعدة جوا .. قاليهو امشي قوليها طه معاهو ضيف .. قاليهو حاضر وجرا جوا .. عاينت ليهو بي استغراب وقلت ليهو اسمك طه ؟ .. ضحك وقالي عارفو ظابط .. ضحكت وقلت ليهو خليك واثق ..
دخلنا وعلى الرغم من بساطة البيت الا انو كان نضيييف جدا ومرتب ويفتح النفس .. قعدت ومشا يجيب لي موية لفتتني مجموعة شتول واصايص وورود مختوتة في جنبة من البيت ومرصوصة بي طريقة ظابطة شديييد .. قمت وبقيت بعاين ليهم ومجرد ما وقفت اقتحمتني الريحة بتاعتهم .. عطر فرنسي بس .. طه جا ولقاني مافيش ختا الموية وبقا يتلفت .. لقاني واقف جنب الزهور دي قالي عجبوك ولا شنو .. قلت ليهو يا زول دي يدين محترفة عديل العملتهم دي .. ضحك شديد لمن دمع وقالي اخر الزمن قبس تبقى يدينها محترفة عليك الله اسكت .. قلت ليهو قبس؟ قالي اختي ياخ جنها الحاجات دي النهار كلو تسقي وتقصقص وتنضف عملت لي صداع ... قلت ليهو لكن دي موهبة عديل معقولة ..
قالي كدي خليك من موهبة وما موهبة تعال اقعد ... قعدت وانا ريحة الزهور دي تقرييا علقت فيني .. ووفقا لطبيعة تفكيري العملي بقيت بفكر انو الزهور دي ممكن يفتحو منها مشروع يكون ناجح شديد وانا بقدر امولو ليهم ولو ما نجح هنا ممكن يتصدر برة لانو نتيجة زي دي ما بتطلع بالساهل .. قاطع تفكيري دة صوت اخو طه الصغير وهو بقوليهو .. طه طه ما جبت حاجة ناكلها .. طه شالو وقعدو في رجلينو وقاليهو مش قلت ليك يوم ليك ويوم عليك .. حرك راسو بسرعة طفولية بمعنى اي .. قبل ما طه يكمل كلامو قاطعتو وقلت ليهو والليلة اليوم ليك ... عاين لي طه بإبتسامة وعيونو في ضحكة وتاني عاين لي ونزل من رجلينو وقالي اخيرا يوم لينا .. طه عاين لي بمعنى بتقول في شنو ..
مسكت اخوهو من يدو وسقتو معاي برة العربية فتحت الضهرية ونزلت الحاجات .. وقلت لي اخوهو شيل دخل جوا .. طبعا اخد ليهو نطيطة وشال اكبر كمية ممكنة ومشى بيها براحة جوا البيت .. طه كان متفاجئ ومتابع بعيونو بس .. جا وقف قدامي وبصوت فيهو عبرة قالي دة شنو اسي ..