قلت ليهو علاء فشنو انا مستحيل انزل من غير م يجي محمد قال لي عايزك تتعرفي علي الزوله دي وانتي محمد حاكمك ولا شنو موش زواجك منو تمثيل قلت ليهو علاء محمد اكتر انسان حسيتو ح يستحملني وصابر معاي م زهج ولا تعب حسيت اني ارتحت ليهو قال لي من الاول انا قلت ليك كده ومدام حياتكم وصلت لكده اكيد انا تاني م ح اتعدا حدودي ولا ح اتصل لو في حاجه جديده برسل ليك في الواتساب وماتخافي اختك م بتجيها حاجه قلت ليهو اختي فهمتها عديل ووريتا الحصل لي تاني لو قدرو يهبشوها الا قدرها كده قال لي مدام كلمتيها م تخافي الناس ديل م بصطادو الا الناس البحسو انهم راسهم فاضي بس اختك مدام وعيتيها مستحيل يقدرو يعاينو ليها قلت ليهو ان شاء الله قال لي طبعا اختفيت من هناء لانها بدت تشك فيني وخافت شديد وانا م عايزها تشك ولا تخاف ولا تبطل البتعمل فيهو الا توصلنا لي كبيرهم وتحت تحت سمعت انو قتيبه مسافر بره ومعلومتي دي خلتني اقدم فيهو بلاغ انو م يغادر بره البلد حقك وحق غيرك لازم يرجع الناس دي لازم تتحاسب وقفت حياه ناس كتيره وبنات كتيره وعايزين يعيشو حياتهم لا م ح نخليهم باذن الله
انا برسل ليك صوره شوفيها وتاني م ح اتصل قلت ليهو حاضر رسل لي صوره لمن فتحتها لقيتا دي الدايه العملت لي العمليه قلت ليهو دي ملعونه كنت ح اموت علي يدها قال لي ابشرك دي قضيه مفتوحه براها وهي السبب في موت مني وقابضين عليها وقاعدين ناخد في اقوالها بس ما راضيه تفتح خشمها استخدمنا معاها اي اسلوب بس ما راضيه وعايزك انتي بصمت تجي القسم معاك زوجك طبعا بس نشيل منك اقوال عشان المره دي لو طلعت منها م ح نقدر نصل لاي شي لاني انا م قادر اخد اي دليل كلهن شككوك والواتساب بتاع هناء كلامهم بالغاز هم فاهمنها ومامفهومه بالنسبه لينا قلت ليهو طيب بخلي محمد اجي بفهمو بالكلام دا كلو انتظرت محمد جا وجا شايل ليهو اكل قال لي قومي جهزي لينا قلت ليهو قبل اجهزو في اخبار قال لي خير قلت ليهو محمد مني البت الحكيت ليك بيها ماتت والسبب طبعا هناء وعصابتها والدايه وقدرو يمسكو الدايه بس علاء قال ما عايزه تفتح خشمها قال لي علاء تاني انتي م عايزه تقفلي سيره الزفت دا قلت ليهو محمد والله انا مقدره غيرتك علي بس انا عايزه اصل لحل ولازم اصل ف اقرب وقت ساعدني ي محمد واوعدك اسم راجل غير ولدنا م اجيبو ابتسم قال لي ولدنا انا وانتي صاح وكان بعاين ف عيوني انا غلبني اعاين ليهو قلت ليهو ان شاء الله من غير م يشعر حضني وانا بقيت متجمده وضربات قلبي الفي اخر الشارع يسمعها هو حسا بي متوتره اعتزر لي قال لي غصبا عني بس م مصدق قلت ليهو محمد مفترض انا الافرح م انت بجد محظوظه الحاتكون انت حلالها قال لي انا المحظوظ عارفه اول يوم شفتك فيهو موش كان صريت ليك وشي واتكلمت م حاجه مدينه انك تمشي وانا م كنت عارف قصتك قلبي اكلني عليك وخوفتا عليك من عيشه الخلا قلت ليهو انا كنت بخاف منك وماقايله انت الامان ابتسم وقال لي نوسه انتي عارفه نحنا م بنتزوج بره من قبيلتنا نهاي ممنوع عديل بس انا ح اخالفهم قلت ليهو محمد عايزه اعيش مع امي مدينه ابتسم وقال لي نوسه حاجه مدينه اختارت انها تعيش كده وهي مرتاحه بس انا م ح اكون مرتاح لا عليك لا علي اولادي تمشي تعيشي معاي في بلدنا والحمد لله بيتي جاهز ما ناقصو الا العروس واهلي حاجزين لي بدل البت ميه بس انا م عجبوني والقدر وقعني فيك بتمني تخافي فيني الله وتحفظيني في وجودي وفي غيابي وانا ماضيك والله ما عندي معاهو مشكله وكل الحصل ليك انا م بمنعني وانا لو م وثقت فيك وفي تربيتك وتربيه اهلك ليك م كان زاتو فكرت ارتبط بيك رسمي وع فكره انا كنت مبسوط من اخوك بس عيبو تعاملو عنيف جدا والحياه بالعنف بتنقلب لضد والحمد لله انتي ربنا سترك وكدي قومي انا ميت من الجوع خلينا ناكل ماشي استحما انا قلت ليهو تمام مشيت جهزت الاكل وجيت طبعا محمد النوع البغير ف اليوم ميه مره نظيف ومرتب عكسي تماما انا زوله همجيه شديد قررت اني اتغير عشان الولد دا من نظافتو دي اكيد اهلو نظيفين ورغم انو شغلو كلو في الخلا بس من خلال ونستو عرفت انو هو بشرف علي أراضيهم وبقيف معاهم لحظه الحصاد ودا اكتر يوم ممكن اشتغل فيهو حبيت كلامو وحكاويهو رغم انو غامض بس بدا يفتح لي قلبو
تاني يوم محمد قال لي ارح القسم والبسي لبسك البدوي قلت ليهو حاضر لبستو وختيت البرقع في وشي عشان م اظهر للناس وعلاء لاقانا ف الشارع بارك لمحمد وبارك لي ودخلنا بقو يسالو فيني وبرد وجابو لي الدايه الملعونه وفي وشها ظاهر اللعنه قلت ليهم كل الحقيقه وهي شغاله تقول ليهم البت دي كذابه وانا ما بعرفها وطبعا انا م فتحت ليها وشي الضابط قال لي معليش ممكن تفتحي وشك استاذن من محمد قال ليهو تمام لمن فتحت وشي الدايه لمن شهقت وبقت تتمتم رده فعلها كان جواب لي كل الاسئله قلت ليها مفتكراني موتا صاح بس انا ربنا ما شال روحي عشان اكشفك انتي والغيرك الضابط سكتني شكلو م عايزني اتكلم طلعنا ووصلنا البيت وكنت برجف من الخوف اول مره في حياتي امش القسم محمد بقا يهدي فيني ويقول لي خلاص ي نوسه هانت مشيتك دي ح تكون نهايه قصتهم والمره دي ح تعترف بعد كده الله اعلم تاني تسكت قلت ليهو وان شاء الله
بعد كم يوم علاء قال لي الزوله دي ما راضيه تتكلم نهاي وهي اصلا جريمتها في مني براها توديها ورا الشمس بس نحنا عايزنها تتكلم وغير دا كلو الزوله دي مانعين منها الزياره ما لاقيه زول تحكي ليهو وهي عايزه توصل معلومه انك انتي حيه وح تخربي عليهم بس م مدينها فرصه انا هسي عايزك تدخلي لي قتيبه وتستدرجيهو وهو طبعا ح يعتبرك ضحيه جاهزه المهم وم تتصرفي من غير م انا اقول
قلت ليهو طيب وقال لي م عايزك تتكلمي معاهو بقيود حسسي انك مارقه قلت ليهو م بعرف واحتمال محمد م يرضا قال لي نوسه انتي ح تكوني خلف الشاشه ولو طلب الاقيك دا يوم المني وح يطلب ونحنا ح نكون معاك ومحمد زاتو ح يكون معانا قلت ليهو تمام قال لي بديك صفحه جاهزه تكون مفتوحه عندنا وعندك بس انتي ترسلي لي قتيبه تمام قلت ليهو تمام كلمت محمد ف الاول رفض بس تاني قال لي خلاص لكن ي نوسه نهاي م تفتحي ليهو الكميرا دا شرطي قلت ليهو موافقه المهم بقيت ادردش مع قتيبه وارسل ريكوردات وما حسستو اني بعرفو سالني من مكان سكني قلت ليهو مكان غير حلتنا وجا في راسي مكان ناس محمد قال لي حلو ووهمني انو رجل اعمال وبفتش لي عروس بت حلال بي قلبي قلت ليهو الحلال انت بتعرفو ي كلب كنت مجبره اتماشا معاهو ف الكلام وكل مره برسل لي قال لي منطقتكم دي جايها قريب قلت ليهو خير ان شاءالله قال لي عندنا حفله هناك قلت ليهو انت عازف قال لي لا انا مدير اعمال الفنانه الفلانيه انا هنا اتزكرت كلام علاء قال لي الكنج بتاعهم قونه كبيره من قونات البلد وحلف ابا يوريني اسمها انا طوالي بقيت اسال فيهو قلت ليهو انا من اشد المعجبين بي غناها قال لي خلاص اعتبري نفسك معزومه قلت ليهو مستحيل عرس م بعرفو قال لي لكن بتعرفيني انا ح تجي تقعدي معانا رايك شنو وعندي شغل عايز اطرحو ليك رايك شنو نتلاقه قلت ليهو كدي اشوف والله
وريت علاء بالكلام قلت ليهو الفنانه دي رئيستهم صاح قال لي لا قلت ليهو ما لا انا كده فهمت اقسم بالله بطني طمت منها ويستاهلو الخلق البتابعوها قال لي نوسه خشمك وعندك الناس ديل فوق م تتصوري اقسم بالله يكتلوك في ثانيه خلينا نحنا نتصرف معاهم م عليك بيهم كلمي محمد شوفي رايو شنو دي فرصه انك تدخلي ف الناس ديل من غير م تفتحي وشك وحاولي زيني عيونك بحاجات البنات ديل وغيري صوتك حسييهو انك فعلا مارقه تمام نشوف الشغل العايزك فيهو قلت ليهو تمام مشيت وريت محمد قال لي طبعا لا نوسه حدك هنا ولد واحد بتقابلي ماف انتي مفتكراني ديوث نوسه انا لو علي ضفرك دا م يشوفو زول انتي ناسيه حلتنا دي سايقك ليها عروس تجي تقولي لي انا ماشه قال لي ع فكره العرس عرس ولد عمي وانا زاتي ماش قلت ليهو طيب فرصه سوقني ومنها الاقيهم بقا يكورك فيني قال لي انتي عرضي كيف انا اخليك تمشي لي واحد دمرك انا ماضيك ما ح ازكرو تاني وبخيرك ي نوسه يا تسمعي كلامي يا تباري القصص دي لو وافقتي علي مبارات القصص دي انا ف الحاله دي معليش م ح اقدر ارتبط بيك رسمي ح اخليك تعملي العايزاهو وتصلي للعايزاهو وبعد تاخدي حقك برجعك لي اهلك واطلقك قدامهم واديك ورقتك وربنا يديك ود الحلال الخيار عندك بقيت محتاره اعمل شنو وف نفس الوقت انا بقيت عايزه محمد اكمل معاهو حياتي انتو رايكم شنو امش الاقي قتيبه وأسرع القضيه واخسر محمد ولا اصبر لمن تجي فرصه تانيه
الفصل الرابع عشر14
محمد بقا زهجان وم قاعد اتكلم معاي وانا الحيره كتلتنني وريت علاء قال لي نوسه حاجه بتدخلك في نقاشات م تعمليها المهم حاولي الولد دا حسسي انك جايه بس يوم الحفله اقفلي تلفونك تمام قلت ليهو تمام بقيت افكر وقلبي مقطوع م هاين علي زعل محمد لانو م يستاهل وف نفس الوقت حاجه بتوصلني للعصابه ديل لو بي روحي اعملها بس برضو ربنا ادانا عقل عشان نفكر وفي راسي اصلا داخله لي فكره اني امش قلت احسن استخير ومحمد نهاي خشمو م فتحو معاي ادخل واطلع واعاين لي مرات بحس بنظراتو دي بودع فيني وحاسي اني ح امش وهو قال لو مشيت م ح يقدر يكون معاي صليت وبقيت ادعي ربنا يكشف حقيقتهم وقاعده ف المصلايه محمد جا قعد جنبي قال لي نوسه الله يرضا عليك م تمشي ممكن انا م عندي سلطه عليك لانو انتي شايفه علاقتي معاك تمثيل رغم اني م شايفها كده متمنيك حلالي ومتمني تسمعي كلامي عشان مصلحتك اول قلت ليهو محمد انا اسفه وصدقني انا عمري م ح اغلط جد انا نفسي اكون زوجتك وخلاص اقتنعت وتاني م تقول لي ماعندي عليك سلطه انت لو م عندك علي سلطه العندو منو قال لي انا ح ابقا ليك سند قبل زوج انا فترتي القعدتها معاك دي خلتني اعرفك اكتر واقسم بالله لو م دخلتي الحكومه في قصتك دي كان في يوم واحد انتهيت منهم كلهم اصلا الزي ديل حرام زاتو يعيشو ولسه مواصلين في دمار الشباب وبنات الناس وماف بت سلمت منهم قلت ليهو ليهم يوم قال لي اكيد انا م عايزك تدخلي ف الموضوع دا مباشر خلي علاء يستدرجهم بطريقه تانيه قلت ليهو هو بكل الطرق محاولين بس عايزين الحاجه البتوصلهم سريع وانا عشان فاهماهم الناس ديل ممكن اوصلهم سريع قال لي ف النهايه ح تصلو بس عايزك تكوني بعيده قلت ليهو اكيد قال لي تمام طبعا انا ح امش البلد العرس دا ضروري احضرو قلت ليهو وانا قال لي دا زاتو المجنني م ح اقدر اسوقك ولا ح اقدر اخليك براك خصوصا انتي هنا مافاهمه شي ولا طلعتي وبراك زاتو م بخليك ماف حل غير اهلك اتزكرت امي خايفه مني قلبي وجعني قلت ليهو خلاص تمام احسن امش بيتنا قال لي تمام انا بكره بنزل اشتري لي حاجات لي نفسي وجلاليب وبجي راجع اوديك بيتكم قلت ليهو حاضر محمد طيب شديد حتي في تعاملو معاي م حصل عمل حاجه انا م موافقه عليها حتي اشترطت عليهو م ح اكون ليهو زوجه الا يكلم اهلو ويعمل عرسو وافق طوالي واحترم رغبتي قال لي العايزاهو وقال ح يكلم اهلو بعد يرجع
تاني يوم محمد مشا اشترا حاجاتو وجا ساقني بيتنا سلم عليهم ودخلنا وامي لسه مواصله في تعاملها اول م جينا طبلت نهي انا قلبي وجعني بس مستحمله محمد قال لي امي انا راجع البلد مرتي دي امانه في رقبتكم نوسه دي لو جاتا حاجه ما ح اعفي ليكم امي قالت ليهو تحرسني شيطان قال ليها دي بتك لحمك ودمك لو شيطان ولا جان بتعرفيها واحسن تطردي الوسواس دا بتك محتاجه ليك ما تظلموها اكتر من كده اداني قروش قال لي لو احتجتي لشي وودعني وفات وباسني في جبهتي وقال لي استودعك الله الذي لاتضيع ودائعه وطلع اللحظه دي عمري م انساها قلبي مقطوع علي فراقو رغم اني م قعدت معاهو كتير بس الايام القعدتهن معاهو تعادل كل حياتي طول وعرض بقيت قاعده واعاين امي تدخل وتطلع وتستغفر وتتكلم قومتا علي حيلي ودموعي نازله ع فراق راجلي وعلي مغستي وحركات امي قلت ليها يمه انتي فشنو انتي م عايزاني ولا فعلا جاتك حاجه وشايفاني شيطان ابت تتكلم معاي قلت ليها يمه انا لحمك ودمك انتي م عارفه العلي يمه انا فعلا موتا بقت مندهشه وتعاين لي قلت ليها يمه ما تخافي والله انا حقيقيه والدفنتوها دي م انا يمه اقنعك كيف والله انا بتك ولحمك ودمك ومحتاجه ليك يمه م طالبه منك غير تمثلي لي وقدام محمد انك عايزاني وفعلا انا بتك ما تحسسني بالعجز انا والله تعبت ومافيني حيل انا العلي م هين يمه انا ادمرتا قالت لي ي بت زحي مني واوعك تقعدي مع نهي اقعدي ف الديوان اتزكرت الديوان فاتح ف الشارع ونحنا نهاي م بنمشي بهناك ليهو الا لمن كان محمد في قعدت فيهو قلت ليها يمه محمد م خلاني براي عشان خايف علي انتي م خايفه علي تجدعيني ف الديوان ابت تتكلم معاي وامي بطبعها عنيده م بتتنازل بسرعه انجبرت قعدت ف الديوان وبمش اجيب اكلي براي وامي لمن العشاء يأذن تدخل بتها وتدخل معاها جوه وتطبل الغرفه انا لو ما شفت الاكعب من كده كان انتحرتا بس مجبوره استحمل امي وتحت تحت عرفت اخوي داير يعرس والبت الدايرها غرقانه غرق مع ناس هناء لانو علاء رسل لي صورتها مع الضحايا
يوم تحقيق الخطوبه وقفت ليهم في وشهم قلت ليهم نهاي م ح تمشو امي قالت لي وانتي دخلك شنو قلت ليها دخلي اني اختو يمه غصبا عنك البت دي م بتشبهكم قالت لي م شغلتك الولد دايرها قلت ليها ولدك بعرف اي شي غلبتو دي مالو قالت لي مالا طلعت من اهلا شهرين طبعا كلاما جرحني يعني قاصداني اتزكرت اني طلعت بشرفي الباقي وم واصلت معاهم ف الرزيله بس دي واصلت معاهم من كل الاتجاهات غرقانه غرق قلت ليها اريتا دي لو طلعت شهرين وعرست راجل زي محمد امي افتكرتني بقلل من قيمه ولدا قالت لي مالو ولدي سيد الرجال شرف وعز وادب قلت ليها بس عشان كده انا م عايزاهو يتزوج دي بالذات يمه ح تندمو اقسم بالله ادوني فرصه افهمكم حلفت قسم م تسمع كلامي شالت الهدايا والحاجات وفاتو انا اتصلت علي علاء رسلت ليهو صورها قلت ليهو البت دي عايزه كل معلوماتها الكعبه لانو اخوي عايز يرتبط بيها قال لي مالقيتو غير دي والله دي اخطر من هناء اوعك اخوك يتزوجها قلت ليهو م بسمع كلامي صعب اخوي قال لي اتصرفي ي زوله اتكلمي م تسكتي دا عرس م لعب اتصلي علي امنعيهو قلت ليهو طيب مسكت التلفون اتصلت علي اخوي قال لي اوعك تدخلي ف الموضوع دا ولو فتحتي خشمك بكسرو ليك اقعدي ايامك القاعداهن لمن يجي راجلك يسوقك الشي المحيرني اخوي عارف عني اي شي اكيد دي امي الحكت ليهو بس كيف امي تعتبرني بسم الله معناتا امي دي بس م عايزاني
بقيت محتاره اعمل شنو ومتاكده البت دي م بتنفع مع اخوي لانو صعب وهي بت فاكه وبتاعت مخدرات بقت علي قله ادبها يعني ماف ولد بتمناها وطبعا قتيبه يشيل ويتصل انا م رديت همي اخوي والفيهو اتصلت ع محمد ما ردا علي المهم اتصرفت من راسي ولبست لبسي وغطيت وشي مشيت لحقت ناس امي والناس محتارين دي منو امي جاتني قالت لي الجابك شنو قلت ليها م دخلك وزحيت منها لقيت العروس لابسه لبس فرحانه شديد وهناء قاعده جنبها عامله فيها صاحبه العروس مشيت وقفت في وشهن ومديت يدي للعروس قالت لي انتي منو فتحت ليهن وشي البت طبعا م بتعرفني بس هناء لمن شافتني لمن شهقت قالت لي نوسه اتلفت عليها قلت ليها بس ياها المرحومه …