رواية جبروت انثي الفصل السادس والعشرون26 بقلم نوسه حمد
سعد قال لي نوسه تقبليني زوجه علي سنه الله ورسوله قلت ليهو سعد انت اخوي من يوم عرفتك ما شايفه غير انك اخوي ولا ح افكر غير كده وانت الوحيد الشايف انو انا ومحمد بقينا بنحب بعض قدر شنو وبعدين ي سعد محمد ح يزعل منك شديد قال لي نوسه والله انا ماقصدي حاجه بس حسب الظروف المريتي بيها عايز استرك واكون ليك سند قلت ليهو من غير م تتزوجني انت اخوي وسندي وانت والله مافيك عيب وهسي لو كنت ما بتعرف محمد م كان رضيت بيك لاني انا خلاص اكتفيت وراجل غير محمد ما بمسك يدي بنتظرو حتي لو اتزوج وعمري بقا ميه سنه بنتظرو انا متاكده محمد مستحيل يخليني بالساهل بس كمان م بقدر اخالف اهلو لانو معترضين علي عدم زواجو وبتمني اكون اتزوج البتمناها ما تكون لحظه غضب مني ارتبط بي اي بت عشان يرضيهم عشان م يدفع التمن بعدين هو قال لي ربنا يخفف عليهو بس الشي المحيرني محمد ليه يقنع وما يجي يتفاهم معاك حتي لو انتي غلطانه هو وقف معاك وقفاتو دي كلها كيف المره دي م يشتغل بيك قلت ليهو معاهو حق صراحه انا كترتها ومسختها بي غبائي وقوه راسي لكن الموقف دا بركه الحصل انا اتخلصت من اكبر عاده سيئه عندي قوه الراس وركوب الراس انا بحمد ربنا ليل نهار اني اخدت درس في الحته دي عشان تتوبني لي ما شاء الله قال لي معليش ربنا بعوضك وباذن الله الواحد الاحد ح نجي انا وحاجه مدينه وعبيد ومحمد ما بضمنو لانو محمد النوع المكان البخسرو م برجع ليهو تاني كلام سعد قطع قلبي وقطع اخر امل خاتاهو لمحمد قفلت الخط وبطني طمت اكتر مما طامه ولو ماشايفه فرحت نهي واهلي ليها ارقد ف السرير راسي ما ارفعو من النفسيات العلي
مرت الايام وخلاص مافضل كتير ف التجهيزات والدنيا قايمه وقاعده واهل ابوي كلهم فرحانين لي نهي وبعد كانو مخاصمننا بقو يحبونا وماسكين العرس علي حسابهم وفعلا العز اهل وكل الناس مبسوطه بس انا كانت فرحتي ناقصه قبل العرس بيوم وديت نهي الكوفير ترسم اصرت علي اني انقش يدي وانا م كان عندي نفس بس لبيت رغبتها عشان ما احرجها ورسمت معاها لاول مره في حياتي من زمان بتمني منا اني ارسم وكنت حاكيه لمحمد بي امنيتي دي كان بقول لي ي نوسه بعد نتزوج كل ما يطلع الرسم بجيب ليك المره ترسم ليك كنت بفرح وبقول ليهو ببسمه جد وبسرح بقول لي انتي م مصدقه ليه انو ح يجي اليوم دا ووعد ي نوسه طول م انا حي والنفس فيني ح يحصل اي شي نفسك فيهو ودموعي بقت سايله محمد كانو كان ملاك انا كنت غبيه وما بفهم ضيعتو مني وكل لحظه بتمر علي بضغط نفسي بتندمني اشد الندم اني م حظيت بمحمد 😭💔 نهي قالت لي نوسه مالك عاينت ليها ودموعي لسه كانت نازله قلت ليها اتزكرت محمد قالت لي نوسه انا حاسه بيك من غير م تتكلمي وانا الما بعرفو شديد كل م اتزكر انو خلاص الحياه م فيها محمد تاني قلبي بنقطع من غير م اشعر ولي اول مره ابكي بصوت ونواح الناس كلهم م قدرو يسكتوني اللحظه الجاتني دي ما بقدر اطلعني منها غير محمد بقيت اقول محمد تعال عليك الله تعال وببكي بكا كانو محمد مات كان نفسي اصلو في بيتهم بس م بي يدي شي البنات افتكرو انو دا زوجي ومات بس قلت ليهم طلقني قالو لي اول مره نشوف مره مطلقه بتبكي عايزه راجلها قلت ليهو لو شفتوهو انتو زاتكم تبكو معاي قالو لي مدام بتحبي كده ليه خليتي يطلقك قلت ليهم غصبا عنو وربنا يسعدو مع الاختارا تكون شريكه حياتو 💔
يوم العرس جا كنت تعبانه وما جاهزه ولا لبست اي شيء شغاله اكفي ف الضيوف وروحي ناسياها وبعد فطرنا اهلنا بقينا نلم في عده الفطور ونرتب في بيت جيرانا عشان السيره ح تنزل عندهم وكنت براغب مع اسماعيل في الطباخ عشان ما ينقصنا شي لانو السيره جايه من بعيد وليها قدرها واحترامها بعد خلاص جهزت اي شي رقدت في مظلتنا ورجولي غبش ومبهدله شديد الناس كلها لبست الا انا والعجب اسماعيل اخوي قشر قشره لمن شفتو اتغزلت فيهو قعد اضحك رغم اني كنت بخاف منو زمان قال لي ليه م لبستي قلت ليهو ماعندي نفس قال لي علي الطلاق تلبسي كيف الكلام دا الناس ديل ضيوفك لازم تستقبليهم انتي امشي مكان قاعده نهي البسي قلت ليهو لا لا م بحتاج بمش الجيران اغسل رجولي ديل بي مويه وبلبس قال لي عليك الله ما تعاكسيها هديل البنات كلهن لابسات انتي ناقصك شنو م عندك فستان امش اجيب ليك واحد سريع واجي قعدت اضحك قلت ليهو م بتقصر ي اخوي والله محمد جايب لي واحدات جداد م ختيتهم في جسمي اسماعيل لمن قلت محمد زاتو اتأثر تأثير شديد بس م حسسني وانا اصلا العبره خانقاني وبقيت زي الشافعه اقل شي دموعي تجري عايزه محمد بي اي طريقه واي فهم بس اعمل شنو اسماعيل حسا بي قال لي سمح ادخلي جيبي حاجاتك وانا منتظرك هنا مشيت جبت اخر لبسه بدويه جابا لي محمد وجيت لقيت اسماعيل جادي منتظرني قلت ليهو النمش اودي الريحه دي لي امي نسيت اريحها دي ريحه محمد قال نوسه خليها امك انا بجي راجع اريحها وخلاص ارح اجهزي انتي ما تحرمي نفسك قلت ليهو طيب ماشه قال لي لا تمشي مكان نهي تتكوفري معاها قلت ليهو والله ماعايزه انا زاتي م نفسي في الحاجات دي قال لي تتزكري زمان لمن تعملي فازلين في خشمك انا بكب ليك فيهو التراب وبدقك قعدت اضحك قال لي يلا جا اليوم والانا موديك فيهو الكوفير عشان تعملي الحاجات دي قلت ليهو والله مانفسي زمان كان عندي نفس كبرتا وعقلتا قال لي لا دا عرس اختك ما يوم عادي ومسكني بالقوه ودور العربيه اتصل علي نهي جات ساقتني وقال ليها خلي البت تشخبطا زيك كده نهي قعدت تضحك ومحتاره في اسماعيل الصعب الكان مانعنا اي شي اجي اقول لي نوسه تعمل كده قالت لي يلا ادوك تصريح قلت ليها تصدقي زمان كان عندي نفس ورغبه بس هسي نهاي م نفسي كنت نفسي اتمكيج لي عرسي بس الظروف قالت لي هسي اليوم دا زي عرسك وتتمكيجي زيي بس ودخلتني وطلبت من بتاعت الكوفير تمكيجني بعد كنت رافضه استسلمتا قلت العباطه م سمحه النرضي ليهم البت يدها مبالغه خمسه دقايق مسكتني وميزتني ولمن عرفت اني لبسي بدوي ظبطت لي تسريحه ولمن لبست البنات الفي الكوفير كلهن اعجبن بي لبسي وقالن لي غريبه انتي جنسك شنو قلت ليهو لبس الباديه دا م ليهو علاقه بالجنس بس انا حبيتو قالو لي طيب شفتي وين قلت ليهم طليقي اهلو بلبسو كده قالو لي حلو والله ما تخليهو نهاي قلت ليهم اكيد ان شاءالله قومت عاينت لي نفسي ونهي م شافتني كانت تتكلم مع اياد طبعا نسيت احكي ليكم بي نهي واياد شكلها حبتو شديد لمن شافتني انخلعت قالت لي البت قلت ليك مكيجيها بس م تطلعيها احلي علي قلت ليها بطلي بكش انتي اساسا حلوه من غير مكياج ربنا يحفظك قالت لي نوسه ناس اياد وصلو قالو
مسكت التلفون اتصلت علي اسماعيل قال لي م تخافي البنات قايمات بالواجب وانا معاهم وبدينا نغديهم وما تجي براك قلت ليها كل منك ي نهي ورطتوني ام اياد بتكون تسال مني قالت لي ح تمشيها ليها اصبري اتزكرت ناس سعد اتصلت الخط دخل معاي قلت ليهو انت نسيت صاح وم كلمت حاجه مدينه صاح قعد اضحك قال لي معقوله ي نوسه استعدو ساي والله نحنا جايين في الطريق قريب الحافلتين قلت ليهو حبابكم الف والله تنورونا اتصلت علي اسماعيل كلمتو قال لي م تشيلي هم ضيوفك علي عينا وراسنا والاكل راقد م شاء الله كفينا ناس العريس وسقيناهم البارد والبنات وزعن الحلويات والخبايز والناس مبسوطين ونسيت اقول ليك لقيت لي عروس بعد تجي انتي قلت ليهو ان شاءالله تكون بت حلال ومن نصيبك قال لي ان شاءالله يلا عشان امش اكلم الطباخ لي ضيوفك الجايين ديل ناس الحله م يبهدلو الاكل قلت ليهو تمام قفلت منو وكنت مبسوطه بيتنا م دخلتو فرحه زي دي من حياه ابوي طلعت تلفوني وبقيت اتصل في تلفون محمد نهاي م دخل معاي شكلو لسه حاظرني قلت ليها نهي الرسايل بتصلو قالت لي اي بتصل وعليك الله ي نوسه كفايه انسيهو قلت ليها بالسهوله دي انساهو مستحيل ي نهي ادعي لي بس مسكت التلفون وبقيت بكتب ليهو في كل احساس حسيتو احساسي في اللحظه ديك زي الطفل المتعود احكي لي اهلو اي شي يحصل ليهو قلت ليهو محمد لاول مره رسمتا كان نفسي اكون ليك انا م زعلانه منك بس انا فاقداك محمد طمني مرتك بتحبك زي م انا حبيتك انا متاكده امك م ح تكون بتحبك زي ما انا حبيتك محمد انا حبيتك شديد عمري م ح انساك نفسي رسايلي دي تصلك وتقراها ونسيت اقول ليك امي مدينه وناس سعد قالو جايين لي عرس نهي كان نفسي تجي معاهم فرحتي ناقصه بدونك ماضايقه طعم للفرحه ودموعي لحظه م وقفت رسلت الرسايل دي حسيت العبره شويه فكتني كاني اتنفستا
اسماعيل اتصل علي قال لي ضيوفك وصلو ومعاهم علاء بي مرتو وي داب دخلو عايزين نكرمهم وحسك عينك تجي من هسي الا اياد يجي يسوق نهي بعد العقد وعاملين ليكم حفله بي بله ود الاشبه قلت ليهو شنو بله الجابو منو قال لي جابوهو ناس سعد قفلت الخط وجريت قلت لي نهي اتخيلي جابو ليك فنان منو قالت لي منو قلت ليها بله ود الاشبه قالت لي معقوله ي نوسه قلت ليها والله جد فجاه اتزكرت محمد انو تلفونو كلو بله وبحبو حب لدرجه انو مصاحبو وبجيهم ف البيت رسلت ليهو رساله قلت ليهو محمد جابو لينا فنانك المفضل ياريتك كنت حاضر قلبي وجعني وجع وبقيت اتخيل في الناس الليله القيامه ح تقوم اولاد حلتنا زاتهم بحبو الفنان دا
اياد اتصل علي نهي قال ليها الف مبروك عقدنا خلاص وانا هسي جاي اسوقك خليك جاهزه نهي شبعت بكا سكتناها بالقوه عشان المكياج
اياد اتصل قال لي نحنا بره الكوفير اجي جوه اسوق نهي ولا تطلع براها قلت ليهو تطلع براها كيف تعال سوقها والبت كانت بتصور فيهم لحظه كانت جميله شديد طلعنا بره وانا وراها فجاه لقيت محمد في وشي