بقيت اكورك وما شايفه قدامي وسامعه صوت ولد قاعد جنبي وبقا ماسك يدي وبقول لي نوسه مالك نوسه قولي بسم الله وانا ماسكه ليهو يمه افتحي النور يمه انا ما شايفه وهو اقول لي نوسه مالك قلت ليهو انت منو قال لي نوسه انا محمد راجلك قومتا علي حيلي وفي شباك كده فتحتو وعايزه انط منو وهو اقول لي نوسه ي بت استهدي بالله وشغاله اكورك انت منو وجبتني هنا كيف وناس امي وين فرجتا فيهو العماره كلها والناس بقو يطقو في الباب وانا من شفتهم قلت ليهم الولد دا خاطفني ودوني لي امي وابوي والناس بقو محتارين وهو ماسكني واقول لي اهدي ي نوسه عليك الله اهدي فشنو انتي مالك سحروك ولا شنو وانا شغاله ابعد فيهو مني وابكي والناس واقفه فكاني وزحا مني وانا حاولت اجري بس هو قال ليهم امسكوها لي وانا دموعي عشره عشره قلت ليهم دا خاطفني وداير اغتصبني وانا بنتحر لو م وديتوني لي امي وابوي والناس يهدو فيني وانا ساعه ونص اصرخ واكورك فجاه جا محمد بقا يتلي في قرأن باعلي صوت وانا بقيت اتلفت سامعه الصوت بس ما شايفاهو هو البقرا وبقيت اعاين في اركان الشقه كلها وافتش للصوت ما عدينا دقايق فتحتا عيوني ووعيت شفت الناس وانخلعتا وبقيت اتغطي في جسمي كاني كنت في حلم قلت ليهو محمد ديل منو وفشنو محمد قال لي نوسه الف سلامه ليك انا عرفتهم بسحروك لي الحمد لله انك رجعتي لي قلت ليهو اسحروني كيف وفي شنو قال لي في انك كنت في حاله غيبوبه عديل م قدرت اتحكم فيك الناس الواقفين قالو ليهو كويس انك كنت موجود ف الشقه لو الكلام دا حصل وهي براها ممكن تقع من البلكونه وان شاء الله ربنا يشفيها ليك والعين حق حصنها يوميا وربنا يسعدكم الناس طلعو مننا ومحمد شكرهم وانا بقيت خجلانه لانو الحاله الكانت بتجيني اي زول ما اتقبلها اكيد محمد بطنو طمت مني وبقيت سرحانه في اني اكلمو ولا اسكت ولا اعمل شنو خايفه اسكت واي زول غريب يحكي لمحمد وتاني محمد م بثق فيني لاني ح اكون غشيتو وخايفه انو يخليني لو عرف الحقيقه وانا نفسي اتستر في راجل عشان اكمل تعليمي الانحرمتا منو ولو م كلمت محمد تبقا مشكله تحت اي لحظه اتوقع انو الحاله دي تجي قدام اهلو قدام الناس وح اختو في حته ضيقه ولو كلمتو هسي قبل يدخل علي ح يطلقني والناس اشمتو علي وفوق الهم ازددتا هم زياده محمد قال لي نوسه انا لازم كل مره ارقي ليك انتي شكلك معيونه لانو الشي الحصل دا ما طبيعي انتي فجاه نسيتي انا مننو وانتي وين بقيت خجلانه م قادره ارفع راسي وانا النوع البتهرب لمن اكون بكذب قررت اني قدر اللحظات البكون واعيه فيهم اني اخلي محمد يتعلق بي ويحبني واحترمو اشد الاحترام وما اقصر منو قدر الزمن البنقضي مع بعض اشيلو في راسي في لحظه انا غبتا فيها عن الوعي محمد كان خايف علي ومخلوع من الشي الحصل لي وما زعل ولا انحرج بالعكس عالج الموضوع ورجعت للحياه في كسر من الثواني
بقيت افكر اتصرف كيف وما باقي لينا ايام ف الشقه وح نرجع ننزل عند اهلو واكيد الحاله دي ح تجيني ف يوم من الايام وانا معاهو جاتني اكتر من اربعه مرات وانا شايفاها خفت شديد وهو شايف انو حالتي ماشه زايده ولازم يعالجني بي رقيه وعرض حالتي لي دكتور وقال ليهو انو جاتا بعد العرس الدكتور بعد الفحوصات طلعت نظيفه وصوره الاشعه نظيفه ختا احتمال انو فعلا تكون لحظه جاتني من بعد العرس محمد النوع البحترم اهلو وبحكي ليهم اي شي قلت ليهو محمد ممكن م تحكي لي اهلك بي اي شي بينا ما ضروري يعرفو اي شي قال لي نوسه هسي الحاله دي لو جاتك هناك اها اقولو شنو لازم انا افهمهم سرحتا بعيد ودموعي بقت جاريه هو طوالي اتحسس قال لي نوسه انا اسف انا م قصدي شي انا قصدي عشان اهلي م يتخلعو قلت ليهو محمد قال لي عيون محمد سكتا مسافه وبقيت اعاين ليهو غمض عيونو وبقا مبتسم قال لي نوسه انا م حمل عيونك دي م قادر عديل عليهم وانا خايف اكون انا السحرتك قعدت اضحك قلت ليهو محمد فتح وبطل بكش ع اساس انك انت شين انت جميل شديد انا للان محتاره انت اخترتني ليه واحتمال تكون عرفت احلي علي قال لي نوسه انا م بقول ليك عرفت احلي عليك لانو انا الان شايف احلي منك ماف بس انا عرفت بنات كانو بضربو بيهم المثل ف الجمال صريت ليهو وشي قال لي ف نظري ماف احلي منك ي هبله وانا بحكي ليك افهمي ودا ماضي ي نوسه م تخلي الماضي يسرق اجمل لحظات حياتنا مع بعض قلت ليهو حاضر طيب كمل قال لي نوسه انا م بحب البت الما عندها حياء دي بعدين كيف ح تربي لي اولادي نحنا الاولاد ديل بنحب البت الانفتاحيه معانا بس ما بنتزوجا قلت ليهو حرام عليكم ليه ياخ قال لي نوسه انتي م تفهمي غلط دي غريزه جوانا بس والله ما بنتمادي في غلطنا الحمد لله وربنا غفور رحيم ويا نوسه م تمشي بعيد انا عمري م زنيت ولا فكرت في كده رغم انو اغلبيه الشباب او ٩٩ف الميه زنو بس انا لا عشان عقلك م يمش لبعيد قلت ليهو الحمد لله ربنا يحفظك
بس ي محمد عايزاك تفهمني وم تزعل مني ممكن اقعد عند اهلي قال لي كيف الكلام دا ي نوسه لا لا دا ما اتفاقي مع ابوك قلت ليهو محمد انا عارفه انك م ح تتقبل بس راعي لمشاعري انا م بستحمل اهلك يشوفوني كده وقعدت ابكي محمد قال لي نوسه مالا حالتك ي نوسه انتي سحروك ودي عين وانا والله بعالجك منها واحصنك براي ما تبكي عليك الله قلت ليهو محمد لا انا ما سحروني انا لي اربعه سنه بتجيني الحاله دي حتي امي وابوي ما بعرفهم قال لي بي خلعه واندهاش شنو شنو شنوووووو…………………
الفصل السادس
محمد قال لي نوسه استهدي بالله انتي الحاجه الجاتك دي غصبا عنك ما بتتصنعيها انتي وانا متاكد انها دي عين جاتك من بعد عرسنا لان كل الناس علقت عليك قلت ليهو لا ي محمد ما عين انا الحاله دي بتجيني ليها كم سنه محمد بقا مخلوع قال لي شنو شنو قلت ليهو عارفه رده فعلك بس م بقدر اغش عليك اكتر من كده قال لي نوسه م تهظري كيف كلامك دا انتي عاوزه تختبريني صاح قلت ليهو لا والله دي الحقيقه قال لي يعني انتو بتكذبو علي وابوك غشاني وانتي ليه م جبتي لي سيره بالكلام دا وكان بكورك ومتوتر شديد بقيت اهدي فيهو قلت ليهو من حقك تعمل اي شي فيني محمد لو عاوز تكتلني اكتلني انا نفسيا تعبت ما قادره اتحمل وبقيت ابكي محمد بعد م كان حنين علي بقا يعاين لي ودموعي هانت عليهو انا بقيت قاعده ف الارض وابكي زي الميت لي زول محمد زحا مني وطلع ليهو سجاره بقا يشرب مشيت عليهو قلت ليهو محمد انت بتدخن قعد اضحك قال لي بفرق بي شي قلت ليهو بفرق ي محمد صحتك اهم قال لي نوسه اسكتي انا م عايز اسمع صوتك بقا يكورك فيني وطلع مني مشيت حدي الباب م ركز معاي طلع وقفل الباب والدنيا ظلمت في وشي بس ما قنعت من رحمه ربنا انا مغلوب علي امري الحاله العندي ما بي يدي بقيت اقول يارب انت عالم بالنيه الجواي اديني علي قدرها يارب محمد ارجع لي انا حبيت الحياه انا بقيت م قادره وبكيت قدرتي والبكا ما حلاني والزمن بقا ماشي والدنيا ليل ومحمد م جا اتصلت عليهو تلفونو مغلق اتورتا شديد بقيت ما قادره استحمل محمد افوت اخليني براي انا عرضو مهما كان وانا بقيت خايفه واتورتا شديد والزمن بقا ماشي وضربات قلبي زادت قويت قلبي وشلت التلفون اتصلت علي علي اخوي ردا علي مخلوع قال لي نوسه مالك الحاصل شنو راجلك مالو حكيت ليهو كل الحاصل قال لي انا عرفت ح يحصل كده ي نوسه بس ابوي راسو قوي نوسه م تبكي انا جنبك اصبري هسي بتصل علي اي واحد من اصحابي يجي يسوقك تقعدي مع ناس امو وبكره يوصلك البيت وما تزعلي ولا تنكسري قلت ليهو علي انا امش كيف الحله الناس اقولو شنو انا م عايزه اكسر عينكم واقولو جابوها من شهر العسل راجعه علي بقا متوتر زياده قال لي نوسه لو عاينتي للناس ما ح تستفيدي شي وانتي تمشي وين وانا ي نوسه برسل اسوقك هنا معاي واعالجك الكلام دا ما بجي قلت ليهو ياعلي ابوي ما ح يوافق ولو عرف انو محمد عرف الحقيقه ح يطلق امي لانو حالف علي طلاق قال لي نوسه ابوي م يقدر يتكلم ودا زواج م لعب محمد كان لازم يعرف الحقيقه ودا كلامي من الاول بس ابوي عارض وعمل الفي راسو وانتي عارفه انا متناقش معاهو بسبب الموضوع دا وهو فهمو محدود قلت ليهو نصيبي ي علي وما زعلانه عارف ي علي انا ف الفتره الاخيره حالتي اتطورت شديد بقت تجيني تلاته مرات ف اليوم وحالتي كانت صعبه بس من اتزوجت جاتني مرتين بالحساب محمد كان برقي لي وبسمع صوت تلاوتو وبوعا ما زعلانه اني اتزوجت ولا اني ح اطلق انا مبسوطه اني عرفت محمد رغم انو علاقتنا لسه م تمت الشهر بس د محظوظه بيهو انا
علي قال لي نوسه م تزعلي وزي م احترمك الولد انتي احترمي رغبتو لو طلقك وما قدر اكمل معاك قلت ليهو اكيد علي قال لي يلا اقفل الخط اشوف واحد من اصحابي قلت ليهو تمام قال لي م تخافي م بتجيك عوجه اتحصني بس قلت ليهو حاضر قفلت الخط وحاولت اتصل ع محمد تلفونو م دخل معاي بعد دقايق علي رجع لي قال لي بجيك كريم صحبي ومعاهو اختو تقعدي معاهم لمن نحل الموضوع دا هسي قومي جهزي شنطتك قلت ليهو تمام اديتو العنوان وبقيت اجهز ف شنطتي شلت لي عبايات بس ومعاهم جلباب بيت وتوب هزاز وشلت اسدال الصلاه والمصحف لانهن زكره من محمد ولبست عبايتي وبقيت منتظره صاحب علي اخوي يجيني اتصلو علي وقالو لي خليك جاهزه مسافه السكه بس قلت ليهم حاضر وحاولت ف رقم محمد ماف رد والزمن اتاخر قلت ارسل ليهو رساله وبديت اكتب ودموعي سابقه حروفي (محمد انا اسفه والله انا م زعلانه من رده فعلك من حقك تعمل اي شي فيني وانتي م خليتني اكمل كلامي وقفلت الباب البيني وبينك بس م اتوقعت رده فعلك تكون كده محمد انا بي امكاني انو اغش عليك واخليك عايش ع اساس انو دي عين جاتني بعد العرس زي ما انت مفتكر بس ي محمد انا ما نفسي اغش عليك قلت ليك الحقيقه بعد حسيت قلبي مطمئن ليك بعد حبيتك وادمنتك جد قدر الايام العشتهم معاك اعادلن كل حياتي العشتها بالدبل م قصرت معاي بقيت لي اخ واب واخت وام وزوج ما كان نفسي اخليك بس نفسي م بتسمح لي اقعد ف عصمتك وانت شايل ف قلبك مني رضيانه بالطلاق اخر دعوه انا دعيتا ونفسي تتحقق نفسي اكون حامل منك نفسي في طفل منك اربطني بيك اكيد انت م نفسك تلد مني عشان الحاله البتجيني بس ي محمد احتمال بعد الد الحاله دي تروح مني للنهايه ما معروف النصيب انا سعيده اني كنت مرتك ما نفسي اخزلك زي باقي البنات العرفتهم وحقك علي والحاصل علي دا غصبا عني والله ي محمد انا عشت نفسيات م صدقت انك طلعتني منها بس شكلي مالي ف الطيب نصيب ابقا عافيه ي محمد انا اتصلت علي علي اخوي عشان اتصرف لي لاني خايفه وانا ما عارفه البلد والفيها وم ح اقدر ارجع البلد عشان سمعه ابوي محمد ممكن تخلي سبب طلاقنا حاجه مبهمه عشان لو ربنا رزقني منك بطفل ما يقول انك م وقفت معاي وف النهايه بقول ليك انا بحبك شديد وادمنتك وربنا يصبر قلبي ويطمني وانا بختفي من حياتك وما بكلمك الا اذا كنتت حامل وابقا عافيه نوسه حبيبتك انا ح انتظر صاحب علي اخوي واختو ح يجو يسوقوني ما تزعل من تصرفي دا بس انا لقيت نفسي براي في مكان ما بعرف عنو شي وانا بقيت مافاهمه انت مشيت وين او ح تجي متين في رعايه الله وحفظه واعفي لي…