رواية جبروت انثي الفصل الرابع والعشرون24 بقلم نوسه حمد
ام اياد قالت لي نهي بتقري قالت ليها اي بقرا وعايزه اجيب مجموع كبير وادخل طب قالت ليها م شاء الله شاطره شكلك قلت ليها نهي دي شاطره شديد بس انا طينه وعجينه قعدت تضحك قالت لي لكن انتي زوله فاهمه وعقلك كبير قلت ليها زي ابوي الله يرحمو كان ذكي شديد فجاه اتزكرت ابوي وقصتو بعد كنت باكل العبره خنقتني وغلبني ابلع اللقمه قومت من الاكل ام اياد مسكتني قلت ليها بطني اتملت ي خالتي اكتر من كده ح استفرغ طلعت بره وفعلا من الوجعه الفي قلبي حسيت بطني طامه محمد جا لاحقني قال لي نوسه مالك قلت ليهو محمد مخنوقه خلينا نطلع السطوح عايزه ابكي قال لي نوسه استهدي بالله مالك فشنو اختك ولقيتيها تاني فشنو قلت ليهو ابوي قال لي ابوك الله يرحمو ادعي ليهو قلت ليهو ابوي كتلتو المره المع ناس هناء و لازم اجيب حقو طلعت السطوح محمد بقا يقول لي نوسه كفايه ياخ وما اشتغلت بيهو واتصلت لي علاء قال لي حمد لله ع السلامه كنت عايز اتصل عليكم بس مشغول عامل كرامه قلت ليهو م بتقصر ي علاء عايزاك في موضوع قال لي خير ان شالله قلت ليهو ابوي قال لي مالو قلت ليهو عايزه اخد حقو قال لي نوسه المره الكتلتو اختفت بدري الوحيده الطلعت من القضيه قلت ليهو لا ي علاء لازم تتعاقب الزي دي م تقعد في الدنيا دي قال لي نحنا لو لقيناها ح نعمل اللازم بس الزوله دي اختفت حتي الايام الاخيره لاحظت ليها ماف قبل ما تجي انتي الحله لانو انا كنت بجمع ف معلومات ومشيت كم مره قبل ما هناء تشك فيني قلت ليهو انا بتصرف قال لي نوسه عليك الله كفايه خلي بالك من زوجك وعيشي حياتك الدنيا دي مغايسها كتير لو قلتي تسكيها ح تتعبي قلت ليهو اشيل حق ابوي وتاني لو موتا انا زاتي م فارقه معاي وقفلت الخط محمد قال لي نوسه عشان خاطري خلينا نتلما انا ما عايز اقول ليك تعبتا عشان انا عاهدت نفسي اكون ليك سند بس انا عايز اتزوج خلاص قلت ليهو محمد عشان خاطري بس اشيل حق ابوي حرمتنا من ابوي خلتنا مشتتين وهي تعيش مرتاحه دا ظلم قال لي نوسه حق ابوك عند الله م بضيع قلت ليهو دمرتو في الحياه ولمن كتلتو مات بالتعاطي بسببها الحمد لله ع كل حال يارب تصبرني انا تعبت وكنت ببكي محمد قال لي نوسه اموت ليك استهدي بالله م تعذبي نفسك وحق ابوك والله بيخلص دنيا واخره قلت ليهو ان شاءالله محمد بقا يحنس فيني ويونس فيني ويضحك فيني غصبا عني والشمس ماشه تغيب وكنا قاعدين ف الارض ومحمد ماسك يدي وبحكي لي وانا ميته بالضحك رغم احزاني بس محمد خفف علي اي شي وانا كنت مفتكراهو صعب بس هو النوع الصعب بس مع مرتو غير وصراحه دا احسن نوع من الرجال سعيده انو زوجي من النوع دا❤️✌🏻
الزمن اتاخر محمد قال لي نوسه يلا نصلي المغرب وناخد لينا نومه ناسيه ورانا سفر قلت ليهو طيب نزلنا ولقيت اياد اتكلم مع نهي طوالي حمرتا ليهو وشي وقلت ليهو اياد معليش نهي عايزه تنوم وسوقتها ومشيت دخلت الغرفه وشاكلتها شكله لمن بكت قلت ليها تضحكي معاهو ليه انتي نسيتي نفسك ولا عشان باريتي العاهرات ديل نسيتي نفسك نهي انتي لو اتغيرتي ح تبقي ممله ارجعي نهي التقيه البتحب قرايتها الحب والحاجات دي ملحوقه وصنف الاولاد دا اختيهو فاهمه ولا م فاهمه كنت بتكلم معاها وصوتي عالي وهي عينها م رفعتها من الارض جات تعتزر لي قلت ليها خلاص بس ليك ولي زمانك هسي الولد دا اقول شنو قالت لي انا م عملت شي غلط انا قاعده وجا يسال فيني اقوم امش وين انتي خليتيني وامو دخلت المطبخ افوت وين انا م فاهمه شي وغريبه في بيتهم حسيت نفسي انفعلت فيها وهي معاها حق م بتعرف زول هنا قلت ليها تمام صلي ونومي بدري عشان السفر قالت لي طيب سمعت صوت باب الغرفه بضرب لقيتو محمد قال لي نوسه تعالي عايزك قلت ليهو فشنو قال لي تعالي بس مشيت معاهو لقيت اياد قاعد قال لي نوسه انا والله بعتزر م قصدي اصلا اقعد مع اختك برانا وامي كانت معانا بس دخلت المطبخ وبقيت اسال فيها واختك م عندها ذنب انا الجيت قعدت معاها قلت ليهو معليش ي اياد بس نهي صغيره واي شي محسوب عليها انا م صدقت انها طلعت من العصابه ديل عايزاها تتعلم انها تخط خط احمر تحت الاولاد قال لي نوسه انا عايز نهي رايك شنو انخلعت بقيت اعاين ليهو قلت ليهو اياد معقولة قال لي ليه م معقوله انا عايزها علي سنه الله ورسوله قلت ليهو رغم الحاصل ليها كان قال لي نوسه انتي الحصل ليك اكعب منها ورغم ذالك ربنا عوضك بمحمد لانو شافك وعرفك انتي شنو وانا لحظتي القعدتها مع نهي لمن شيلتا اقوالها وهسي عرفتني نهي وانا جادي عايز اتزوجها عايزك تتكلمي معاها لو موافقه علي اسبوع بالكتير بجيكم رايك شنو
قلت ليهو اياد فكّر الموضوع ح يبقا مرهق ليك اصحابك ح يجو العرس ومصيرهم يشوفو مرتك ح يقولو ليك اتزوجت رده سجون ناهيك عن الكانت مسجونه فيهو ولا الحقيقه بس دي ح تكون نظرهم وما ح تقدر تدافع ليها قال لي نوسه العايز اتزوج هم ولا انا اسمعيني والله انا شخصيا م فارق معاي زول البتفرق معاي امي بس وامي العايزه نهي لانها عاجباها انتي وقالت الا تناسبكم قلت ليهو انا م عندي اي مشكله هسي لو علي بعقد ليكم بس نهي عندها راي واهلي هم العندهم القرار انا علي اقول مبروك وانت زول م هين راجل وقفتك معاي بالدنيا دخلتني بيتكم وانا غريبه استأمنتني وما عارف عني شي وامك مره طيبه وفعلا علي نياتكم ترزقون نهي اختي طيبه واشهد الله غير قرايتها م عندها شي بس الله اقطع اولاد الحرام هم سبب في الحصل ليها دا والحمد لله عدت علي خير قال لي اكيد وانا هسي عايزك تعتبريني اخوك وتتكلمي معاها تشوفي رايها شنو والله انا امي ناقاني نقه ف موضوع العرس دا بسبب استعجالها ارتبطت بواحد اخطر من هناء بس ربنا شاف لي وانفصلت منها يعني انا متزوج ومطلق ربنا. م قسم لي منها ولخير لانهاا كانت م كويسه لو ولدت زاتو كان ح اشك في ولدي قلت ليهو انت ليه م عرفتها من البدايه قال لي اسبوع بس وابوها اظنو عايز يسترها عقد لي وسلمني ليها م عشت زاتو تفاصيل العرس ودخلت عليها وماطلقتها من اول شهر عشان منظرها ووديتا اهلا بعد زمن طلبت ورقتا رسلتها ليها فعشان كده المره دي انا عايز بت ناس بت من عائله م بت بتتصرف ساي وم بتحسب تصرفاتها
قلت ليهو طيب بشوف نهي وبعد نرجع بنتكلم مع اخوي واشوف رايو قال لي تمام انا هسي بخليكم تنومو بس م اوصيك انا زول اخوك قلت ليهو جدا ي اياد وهي نهي تلقا زيك وين قال لي تمام مشيت لقيت نهي سرحانه وخايفه شكلها هرشتي ليها خوفتا لمن حسيتا مرتبكه مني قلت ليها نهي جبت ليك عريس قالت لي عريس شنو دا هظار ولا حلم قلت ليها جاده جبت ليك عريس قالت لي دا منو قلت ليها اياد لمن شهقت قلت ليها وطي صوتك م تفضحينا اقولو فرحانه قالت لي نوسه انا مصدومه 😳 الولد دا بنفسو الختا الكلبشات في يدي وسجني اجي اقول عايزني قلت ليها عشان حسا بيك مظلومه اها رايك شنو قالت لي انا م عندي راي انتي شايفه شنو قلت ليها انا الشيفاهو كل خير من كل النواحي امو وهو قالت لي م عندي مشكله بس انا القرايه نفسي اقرا قلت ليها الستره سمحه ي نهي لو عندك نصيب تقري بتقري لو م عندك نصيب لو عيدتي ميه مره م ح تنجحي انا شايفه انو تتزوجي وتوريهو انك عايزه تقري لو وافق احسن تقري وانتي متزوجه وما صعبه لو عندك عزيمه فعلا قالت لي تمام قلت ليها م ح اديهو رد هسي الا لمن اتكلم مع اخوي وافهمو قالت لي اي احسن قولي ليهو ح تفكر
تاني يوم سافرنا ووصلنا الحله متاخرين لانو اسماعيل جاب امي وجا فتح بيتنا لقيتهم م شاءالله مجتمعين ومعاهم ناس عمي الكانو بكرهونا بعد مشيت وساعدتا ولدهم بقو مبسوطين مني وكل مره يدعو لي لحظه لمتهم انبسطت بيها اكتر من اي شي وفتحت موضوع نهي قدامهم وقلت ليهم ح نتزوج سوا انا وهي اها رايكم شنو طبعا امي لمن شافت نهي اتكلمت وكلنا فرحنا شديد ما مشكله الشلل بس عدم سماع صوتها كان مدمرنا اكتر عمي قال لي الستره سمحه ي بتي والله انا حالف بت لي اخليها ماف اجي راجل بس طوالي بديهو عشان كده الراجل لو كويس وبخاف الله دا اهم شي نحنا م عندنا مشكله واسماعيل اخوي زاتو وافق قلت ليهم تمام ح اديهم رد اجو يطلبو يدها وتاني اجو للعرس مره واحده قالو لي كويس وانا عندي حاجه لازم اعملها ونحدد يوم محمد قال ليهم انا ح اجيب اهلي لمن ناس اياد اكونو جايين ونوسه تختار حاجاتا براها م ح اجيكم الا يوم عرسي اسوقها قالو ليهو علي بركه الله كان مبسوط وبعاين لي وانا طايره من الفرحه
عدت الايام وانا عايشه قصه حب مع محمد بقيت احبو شديد وهو كمان بس انا مشكلتي عنيده الفي راسي بعملو وبقيت افكر لازم اشيل حق ابوي ومحمد فات اهلو بقيت لا بنوم ليل لا نهار بس عايزه اشيل حق ابوي اتزكرت الولد الكان طاشي شبكه داك لبست عبايتي ومشيت بقيت اسال ف الناس وصفوهو لي لقيتو قاعد والمره دي مختلف تماما بقا شيخ عديل سلمت عليهو وقلت ليهو عايزاك ف خدمه ممكن قال لي اتفضلي قلت ليهو تتزكر المره الكانت قاعده وممثله انهها ام هناء قال لي ايوا استغفر الله وبقا يستغفر ويوسوس ساعه قلت ليهو معليش حقك علي بس عليك الله وريني مكانها قال لي ي بتنا موش انتي الله شافك وعرستي دايره بالناس ديل شنو قلت ليهو لا عندها وصيه عندي وانا راحله مع راجلي لازم اوصلها ليها انت عارف مكانا قال لي اي قلت ليهو عليك الله دلني ليهو وصفها لي في مكان الجن الاحمر م يعرفو وقويت قلبي ركبت ميه مواصلات وووصلت وكنت لابسه لبسي وهي طبعا م شافتني بيهو مشيت لقيتا بقت ست شاي والاولاد متلفين حولينا زي النمل لمن شافوني كلهم بقو اشاغلو فيني م ركزت معاهم في واحد شغلها لي مسكتو من جلابيتو وخنقتو وخشمي م فتحتو بحرف وهي بقت تقول لي فكيهو ومسكتها هي خنقتها بكل قوتي لمن بقت تذبد والاولاد بقو يفكو فيني واحد قدر يفكني منها ماف المره بقت تفرفر تحتي والناس بقو يكوركو قالو لي ماتت