طلعت من الكوفير لقيت بكري واقف لي بره جنب الكوفير مخلوع علي لمن مقلق قال لي نوسه انتي كويسه قلت ليهو كويسه يلا نمشي من المكان دا عايزين نلف اللفه الاقينا ليك محمد في وشنا لمن قلبي قال شح انا غلبني اجري ولا اعمل شنو محمد مسكني من يدي وقال لي جنيتي انتي دا شنو جو العشق الممنوع دا قلت ليهو محمد م تفهم غلط والله بكري اخوي قال لي اخوك اتكلم معاك انصاص الليالي نوسه انتي مفتكراني اهبل انا واقع من السماء سبعه مرات بكري قال ليهو محمد خلي كلامك معاي انا نوسه م عندها ذنب انا السبب ممكن زي م جاتك بالمعروف تخليني اسوقا بالمعروف فكاني وقبل علي بكري قال ليهو تسوقا انت منو عشان تسوقا انا عندي قسيمه بتخليني اسوقا واعمل العايزو ان شاء الله اكتلا انا قلبي بقا ادق وبكري صعب قال ليهو انت اظن فكت منك وجنيت البت دي م بت حرام بت ناس ومن حقها تختار وهي هسي ما عايزاك قال ليهو شكت ليك وبعدين هي براها الجاتني انا م حصل طرقتا بابا من يوم فاتت مني وقت وافقت عليها جاي انت تتسحب وتخليها تهرب معاك انت اظنك مجنون وشوف ي بكري نوسه دي لو م خليت طريقها م تلوم الا نفسك وساقني وفات اول مره اشوف دموع بكري وانو م قادر يدافع عني وانا اقول ليهو محمد عليك الله خليني حرام عليك قال لي اسكتي عشان ما امردغ بيك الواطه دي ساقني ودخلت الشقه قال لي شوفي ي نوسه دا م اتفاقنا انتي مرتي ماتسمحي لنفسك تعايني لغيري خلي كمان تهربي معاهو وتمسكي يدو فاهمه ولا م فاهمه وكان ماسكني من شعري وانا بقيت ارجف بقا ينهر فيني واقول لي فاهمه ولا م فاهمه بتكلم ردي وانا دموعي عشره عشره قلت ليهو فاهمه فكاني وقال لي نوسه انتي حلوه وبريئه معقوله الحلاوه دي كلها كانت ح تمشي مني بقيت خايفه منو م طبيعي عديل مره اكون عصبي ومره رومانسي وهادي شكيت فيهو انو بتعاطا ولا عقلو م تمام ونهاي ماياهو دا محمد البعرفو قال لي يلا قشي دموعك ديل وامشي اعملي الاكل دا وانا بقيت حاسه نفسي زي الخدامه تحتو كل البطلبو غصبا عني اعملو عشت معاهو اصعب ايام حياتي وفهمو غريب شديد حيرني وكل م ارفض اعمل حاجه بضربني عديل وبقا يطبلني ف الشقه ومابخليني اطلع نهاي وما لامه في اهلي ولا لامه في اي زول يوم انا قاعده ف الشقه سمعت صوت الباب بضرب وانا الخوف عايز يكتلني وهو محزرني الباب لو ضرب اقوم اشوف فيهو منو صوت الضرب بقا ماشي يعلا ويعلا مشيت عشان اعاين بالعين السحريه فجاه شفت البت الفي الرقم الوطني وهي حست انو في زول بعاين قالت لي افتحي الباب م تخافي عشان مصلحتك انا نهاي م فتحت خشمي وقلبي بقا ادق مشهد ولا في مسلسل وادي الذئاب قالت لي م تخافي مني انا عايزه مصلحتك عشان م تغلطي غلطتي لمن قالت لي كده رديت عليها قلت ليها انتي منو قالت لي انتي المنو قلت ليها انا نسيبه قالت لي جيتي هنا لشنو قلت ليها انا مرت محمد قعدت تضحك قالت لي عرفي صاح قلت ليها لا لا والله انا متزوجه محمد لي تلاته سنه قالت لي يا شاطره محمد عندو مره واحده عشان م يغش عليك ويوهمك زي م وهمني قلت ليها لا لا انا م واهمني انا متزوجني قبل مرتو دي قلت ليها انتي منو قالت لي مرتو الاولي بقيت ساكته قلت ليها اتزوجتي متين لمن قالت لي تاريخ عرسها قبل عرسي قلت ليها يعني محمد كان متزوجك قالت لي اي انا بقيت ارجع في زكرياتي محمد م كان متزوج قبليني خوفي زاد وبقيت ساكته خوفتا المكان اكون مسكون بس اتزكرت الرقم الوطني قلت ليها عايزه شنو قالت لي عايزاك م تكوني ف السر اعلني ارتباطك بيهو اياك تدقسي وما تكلمي اني جيتك انا م عايزه غيري تقع وقعتي وفاتت قلبي بقا ادق وحيلي مات بقيت اتعوذ حسيت انو دا كابوس انتظرتو جا المره دي استقبلتو بي بشاشه عكس كل مره وبقيت اسال فيهو كل سؤال بسالو ليهو بضايق وبهرشني قال لي نوسه م تتحققي مني في شي فاهمه قلت ليهو فاهمه يلا كلامو وردودو لي شككتني زياده طلبت منو اتصل علي اهلي رفض قال لي لو عايزنك رقمي عندهم انسي حاجه اسمها اهلك فاهمه دموعي جرت مشيت الغرفه طبلتها علي وبقيت ابكي قعد يحنس فيني لغايه م سكتا مرت ايام وايام وانا ف الوضع دا ما قادره اوجهو بالبت الجات حزرتني منو
يوم كنت حاسه اني م طبيعيه واليوم كلو استفرغ ومحمد ماف مع مرتو ديك وكان لمن امش ليها بطبلني وبجيب لي اي شي بحتاج ليهو اليوم كلو انا حيلي ميت واستفرغ وراسي لافي بقيت اطق ف الباب عشان اسمعني زول وينقزني للاسف ماف زول غيري شكلو ف المكان دا وقلبي خلاص داير يطير بقيت لا قادره اعمل اكل لا قادره اقوم حاولت اكورك بس ماف زول سمعني بقيت افتش لي تلفوني قلبت الشقه قلب سبحان الله لقيتو خاتيهو في مكان ما معروف زاتو بس ربنا وقعني فيهو فتحت التلفون واتصلت علي بكري قلت ليهو بكري انا بموت اتصرف تعال بلغ الشرطه كلم اهلي انا بتعذب عليك الله انقذني بكري قال لي نوسه رسلي لي اللوكيشن قلت ليهو م عندي نت قال لي برسل ليك رصيد نشطي قلت ليهو طيب نشطت ورسلت ليهو الموقع قال لي دقايق واجيك م عديت نص ساعه جاني والباب كان قوي مشا جاب ليهو زول وفلس الباب لمن دخل لقاني واقعه حيل م فيني شالني وجرا بي المستشفى الدكتور قال ليهو حرام عليك الزوله دي شويه وتموت هي والفي بطنها انا انخلعت قلت ليهو الفي بطني قال لي يعني م عارفه نفسك انتي حامل ودمك ضعيف وركبو لي دربات واليوم كلو شيلناهو فحوصات ودربات الدكتور خرجني واداني كميه من العلاجات قال لي حافظي علي الفي بطنك بكري قال لي نوسه تمشي اهلك احسن ليك الزول دا ح يدمرك لو رجعتي ليهو قلت ليهو ياريتني ما رجعت ليهو بس لي قسمه الفي بطني وانا بعد حملت هو وعدني انو يعلن رجوعو لي ومابقدر اربي ولدي بعيد من ابوهو اقول ليهو شنو بعد يكبر ويحتاج لوجود ابوهو اقول ليهو م قدرت استحمل ابوك بكري انا وضعي بقا حساس عشان كده رجعني الشقه بكري بقا متكلني ومشينا لقينا الباب مقفول بعد زمن محمد جا فتح الباب قال لي انتي م بتسمعي الكلام وجراني من شعري وبقا يصرب فيني بكري حجزني وقال ليهو بتموت في يدك وبتكتل جناك قلت ليهو محمد انا حامل وانت خليتني براي وانا يوم كامل استفرغ وماكان في زول في بالي غير بكري واتصلت عليهو عشان ينقذني قال لي موش كان تتصلي علي انا قلت ليهو انت مع مرتك انا خوفت ي محمد هسي انا جيت افرحك انا حامل قال لي حامل وقعد اضحك قال لي ي استاذه الما عارفاهو انتي انا عقيم م بلد انا بقيت مخلوعه والله لو م واثقه من نفسي كان صدقت اني حملت من غيرو قلت ليهو اقسم بالله انت م عقيم دا ولدك ي محمد اعلن زواجنا قال لي ولدي ولا ولد بكري طوالي بكري قال ليهو شوف يا زول انا م الراجل البهبش حاجه م حقتو كل مواقفي معاها حدي الان رجوليه م اكتر قال ليهو انتو عايزين تغشوا علي انا كلامكم دا م بمش علي ودخل جاب ليهو ورقه قال لي انتي طالق بالتلاته ودي قسيمتك انا شلت القسيمه ودموعي عشره عشره والشي الحيرني ليه قسيمتي جاهزه فتحتها وياريتني ما فتحتها قلبي انقسم النص النص تاريخ طلاقي بعد زواجي بشهر يعني انا قعدت مع محمد وانا مطلقه بس م كنت علي علم
الفصل الرابع والعشرون24
فتحت قسيمه الطلاق ويا ريتني مافتحت لقيت تاريخ طلاقي بعد شهر من عرسي يعني انا كنت قاعده مع محمد وانا مطلقه انا انهرتا وبقيت اكورك واجوط ودخلت جوه جبت لي سكين وكنت عايزه اقسم محمد النص النص محمد بقا اتصداني وبكري ماسكني وانا قلبي دم لو قدرت اصلو اشق راسو النص لانو وقعني في الحرام وانا م عارفه استغفلني
بكري بقا همو فيني لاني انا شبه جنيت عديل ومحمد طردني وجدع لي ملابسي وحاجاتي بكري شال شنطتي الجيت بيها بس وساقني وانا ابكي وهو يسكت فيني وانا م قادره استحضر الحاصل لي قلت ليهو بكري انا حامل بالحرام صاح وهو ما قادر يرد غير بقول لي لا حول ولا قوه الا بالله آلعلي آلعظيم اتزكرت تهمه محمد لي وانو دا م جناهو قلت ليهو بكري م تصدق محمد والله الفي بطني دا منو هو بكري انفعل وبقا اقول لي نوسه اسكتي ياخ انا راسي ح ينفجر بقيت ابكي وماشه وقف لينا بتاع عربيه افتكرني مرتو وعندي زول اتوفا وانا اشيل وابكي وبتاع العربيه اقول لي بكري سكتها لانو البكا م بجيب فايده وانا روحي ح تطلع بكري خشمو م فتحو وصلنا الداخليه ولقيناها مقفله بكري قال لي نوسه نمش الدكان عشان البيت فيهو عذابه مشا فتح الدكان والدنيا كانت برد انا علي المرض العلي برجف من البرد بكري ختا فيني بطانيه وانا لسه بردانه بكري دموعو نازله قال لي نوسه ياخ انتي قاطعه قلبي ودموعو جاريه وانا اقول ليهو بكري صبرني انا م تضعف انت ياهو السند الوحيد الفضلت لي اهلي ارجع ليهم كيف بعد الحاصل قال لي نوسه م عليك انتي لازم ترجعي وانتي اصلا مطلقه وعندك قسيمه انا ح اعقد عليك انخلعتا قلت ليهو والفي بطني قال لي الفي بطنك ح يكون ولدي ي نوسه انا ح اعمل المستحيل وما اخليك تنكسري رايك شنو قلت ليهو بكري انت عارف اني بحترمك شديد م نفسي ادخل حياتك واخربا ليك قال لي نوسه بالعكس انا حلمي انو انتي تكوني في حياتي وما تعتبري طلبي دا ليك بستقل ضعفك لا بالعكس انا وصلت لحلمي وكنت متاكد انك ح تكوني مرتي بس متين م عارف ويا نوسه حملك دا ماف زول عارفو غيري انا وانتي نسكت بيهو وانا خلال اسبوع بعقد عليك ومابسوقك البلد م عشان خايف من مرتي لا عشان تكملي تعليمك وتصلي للحاجه العايزاها رايك شنو قلت ليهو وابوك قال لي ابوي ماعارف اي شيء من الحاصل دا كلو عشان كده قبل الصبح نطلع بركب العربيه قبل تصلي انتي انا بتصل علي اخوك وبحكي ليهو اي شي واكيد ح يوافق انتي مهما كان لحمو ودمو وماف انسان طول ما انا عايش بغصبك ولا بلمس منك شعره قلتي شنو قلت ليهو م عشاني ي بكري عشانك انت م موافقه انا انت م تستاهل تربي ولد م ولدك قال لي نوسه ياخ دا ولدي وانا اموت وتكوني انتي زوجتي علي سنه الله ورسوله وافقي ي نوسه خلينا نبني مستقبل بعيد من الناس وابوي م ح يرفض ولا امي لانها بتحبك لو في رفض ح يكون من زوجتي وماعندها معاي كلمه وهي زاتا عند اهلا قربت تلد قلت ليهو بكري بس قال لي م بس وافقي ي نوسه والزمن جاري عشان ابوي مايسالني اقول لي انتي جيتي من وين قلت ليهو طيب بس ي بكري خايفه انت شايف حياتي جاطت كيف قال لي جاطت عشان تروق انتي رجعتي لمحمد عشان تكوني من نصيبي لانو لو م رجعتي لمحمد كان اكون ود عمتك ساقك وعرسك قلت ليها الله يقطعو ماعايزه اسمع عنو شي هو سبب كل الانا فيهو دا بس ي بكري الفي بطني دا ولد حرام لانو انا مطلقه قال لي انتي ماعندك علم بالطلاق والذنب ح يبقا في رقبه محمد ودي روح ي نوسه ما ح نضاري الغلط بغلط ونطلعو لو ليهو نصيب ف الدنيا بياخدو ومن هسي دا جناي والسر دا م ح يعرفو اي زول قلت ليهو بكري م عارفه اقول شنو بس شكرا لانك في حياتي اكتر انسان حبيتو ف الدنيا وزي م انت اتمنيتي انا كمان متمنياك وما شايفه حياتي مع غيرك وانا فرحانه لو قسمتنا كانت مع بعض قال لي نوسه وعد ح تكون وح تبقي مرتي الانا بحبها وبغير عليها وح تتعلمي وح تبقي دكتوره زي م اتمنيتي وح ااجر ليك هنا بيت قريب المدرسه عشان الحمل غلبني البقولو انكسرتا وربنا جبر بخاطري قبل الصبح بكري ركبني عربيه وقال لي نوسه خلي بالك من نفسك مسافه انا اجي اسوقك كلامو جوه قلبي رغم اني راجعه بي خيبه بس لقيت البطبطب علي وصلت الحله وكنت خايفه من رده فعل اهلي ابوي لمن شافني بقا يبكي ويبكي انا قطع قلبي والعجب امي قالت لي م دايره شي بس انتي م تفوتي مننا انا جاني سكري وضغط من الحسره رده فعل علي كانت صادمه ضربني لمن دمي سال بي خشمي وروحي كانت تطلع في يدو ابوي قال ليهو م عافي ليك فكها فكاني وفات وبقا نهاي م بتكلم معاي ساكت بس كاني م موجوده ف البيت امي قالت لي كسرتي عين اخوك ليه ي بتي عملتي كده قلت ليها يمه كلو منكم انتو كنتو ح تغصبوني علي محمد ود عمتي قالت لي محمد اطير ما يعود تاني يا بتي ما كان تتصرفي كده جبتي لينا الكلام في نفس اليوم دا بكري جا وجاب ابوهو وامو وجو يخطبوني ابوي طوالي وافق وامي زاتا علي اخوي رفض وقال يقطعني حته حته تاني م اعرس وانا قلبي بقا في يدي ماف زمن لو م اتزوجت بكري سريع حملي ح يظهر واهل بكري زاتو ح يرفضو تاني يوم اتكلمت مع علي واعتزرت ليهو قال لي انتي دمرتيني قلت ليهو اعفي لي ياعلي انا م قصدي شي وانا من قاصر عرستو لي غصبا عني وبقيت اتصرف براي كان نفسي اكون اي تصرف لي انتو معاي انت ماعارف الغيبه عنكم زرعت فيني شنو زرعت فيني عدم التصرف بحكمه بقيت بتصرف ساي م برجع للعواقب لاني كنت قاصر وفاقده السند الحقيقي الاهم انتو اهلي كل الناس ما ح يعوضوني ليكم انا عقلت ي علي واتعلمت من اخطائي وعشان انت ترجع ترفع راسك وافق علي بكري واوعدك يا علي تاني غير ارفع راسكم م ح تشوف مني شين علي بقا يبكي قال لي انتي مفتكره انا مرتاح من قساوتي ليك انا نفسيا تعبان من اي تصرف كان صعب ليك وندمان وعمري م ح اسامح نفسي وانا اذا وافقت علي راجل ح اوافق علي بكري لانو راجل عارفه ليه نوسه انا عرفت القصه كلها حتي حملك الداساهو وبكري والله راجل ماف راجل تاني بستاهلك غيرو انخلعت طبعا قلت ليهو عرفت من وين قال لي بكري لمن انا رفضت طلب مني اني الاقيهو برانا ولاقيتو وحكا لي القصه كلها انتي اتعذبتي ونحنا ماعارفين طلب مني اني اوافق عشان الحمل م يظهر زول استحمل اشيل مسؤوليه زي دي اكيد دا راجل ود رجال وانا اخدت معاهو موعد ح يجي يعقد يوم الجمعه وطلب انو نعمل ليك عزومه كبيره وانا ان شاء الله م بقصر منك ودا الراجل البستاهل نسلمك ليهو ومحمد ربنا ينتقم منو ويدمرو زي م دمرك ومن يوم الليله ي نوسه انا اخوك سندك م تدسي مني البمسك بمسني والغلط من الاول في عرسك الغصبا عنك وانتي صغيره م فاهمه شي قلت ليهو اعفي لي ووعد اني اصلح كل اغلاطي
بكري مبسوط بي زواجنا واشترا لي اي شي كاني م كنت متزوجه واتحنن وطلب مني البس زفاف وجدله ونهاي عرسي م ينقص شي والناس كلها فرحانه لي كاني اول مره اعرس وانا كنت طايره من الفرحه وطبعا اثار الحمل بدت تظهر علي بس قلت ليهم عيانه عندي ملاريا ويوم عرسي كانت اجمل فرحه وعزمنا كل دفعتنا والناس كلها مبسوطه لينا والبنات شغلنها لي قالن لي بكري راجل وبحبك من زمان بس انتي م اديتي فرصه انا جد كنت طايره من الفرحه لاني اخيرا وقعت في الراجل الصاح والحمد للة مراسم زواجنا تمت وبكري ساقني مدني وكان ماجر لي شقه هناك نزلني فيها طوالي قال لي قريبه للمدرسه اكتشفت انو بكري بحبني شديد وانا كمان حبيتو وادمنتو وكنت م بحمل غيابو ساعه عني ومرتو عرفت بالزواج زعلت وطلبت الطلاق بس بكري قال لي نهاي م ح يطلقا وح يراضيها قلت ليهو شيل ليها هدايا ودق ليها دهب راضيهو بيها وهي زي اختي م ضرتي وانت لو قصرت منها انا م ح اخليك ح أدافع ليها وجناها جناي قال لي نوسه انتي اصيله نزلت معاهو اشترينا ليها حاجات وشال ليها سلسل دهب وخاتم كبير وأسورة قال لي المره الجايه بدق ليك انتي قلت ليهو انا م عايزه دي كماليات ما اساسيات قال لي نوسه انا عمري كلو م ح اندم اني عرستك انتي اطيب انسانه ف الدنيا قلت ليهو وانت كمان ربنا اديك العافيه تاني يوم مشا البلد وانا م حاولت اتصل وازعجو رسل لي رسايل قال لي نوسه شكرا انك في حياتي مرتي رضت وانا الان معاها خلي بالك من نفسك بليل ابوي بجي ينوم معاك بحبك قريت الرساله وانبسطتا اني م خربت حياه مرتو وانو قدر يصالحها مره شهر علي زواجنا وبكري كلم اهلو اني حامل باركو لي كلهم ❤️
مرت ايام وبكري كان معاي جاهو اتصال من نسيبو قال ليهو مرتك دايره تلد ونحنا جبنا ليها دايه ف البيت وقدرت تولدها بس جاها نزيف مودينها الان المستشفي بكري قعد يجوط ويكورك قال ليهم كان تتصلو علي وما فهمني اي شي فات قال لي خلي بالك من نفسك انا لاحق مرتي انا بقيت ادعي ربنا انو يشوف حالها ونهاي م نومتا وبقيت اتصل علي بكري ماف رد واتوترتا شديد وبتصل لي عمي محمد ماف خبر وام بكري كمان اتصلت علي علي اخوي قلت ليهو اصلهم في الحله علي قال لي طوالي بمشي ما عديت ساعه علي اتصل علي قال لي نوسه مرت بكري اتوفت