علي قال لي نوسه مرت بكري اتوفت انا قلبي بقا ادق وبقيت ابكي واكورك لميت فيني جيراني كلهم وكنت ببكي من جوه قلبي بت صغيره وجاهله بسبب غلط اهلا راحت فيها الناس بسالو فيني المات ليك منو قلت ليهم ماتت مرت راجلي وبقو مندهشين وبعاينو لي بين مصدقين وما مصدقين لانو في نظرهم انو الضرات م بحبو بعض والبتموت التانيه بتفرح لكن لا والله الموت حار لو لي عدو او صليح ومشاعري اتجاها كانت حقيقيه ما مصنعه وخصوصا انا القبلت اكون مره تانيه وجيت فيها وما عندي زره حقد جواي بقيت افتش للبسوقني وبكري م راضي يرد ولا علي اخوي وانا لازم اصل بلد ناس بكري ما عايزه اتصرف من راسي عشان بكري يزعل بقيت اتصل علي علي اخوي قلت ليهو تعال سوقني قال لي انا بايت معاهم الصباح بجيك اتصرفي شوفي بت من الجيران تجي تقعد معاك قلت ليهو طيب مشيت لي جارتي اسمها سعاد عندها بتها اسمها دنيا قلت ليها خلي دنيا تنوم معاي انا براي قالت لي م عندك مشكله ودنيا مستعده طوالي جات معاي وشكلها هي النوع الجريئه والليل كلو تتكلم بالتلفون تتونس وتضحك بكري لو عرفني بكتلني اليوم دا عدا علي خير علي اخوي جا بدري قلت ليهو طيب انتظر مسافه البس واجهز شنطتي عملت ليهو شاي وقعد ف الصاله دخلت لبستا وصحيت دنيا وقامت لي بالجلاله لانها م نايمه قالت لي خليني بصحا بمش البيت رفضتا لانو البيت فيهو حاجات بكري طلعت معانا سلمت علي علي اخوي بدلع لمن علي اخوي ريالتو صبت لمن فاتت قال لي دي منو قلت ليهو بت جيرانا يا علي مالا قال لي سالتك ساي فجاه قال لي نوسه لبستي دي سمحه استغربتا قلت ليهو ياتو يوم بتسال من لبستك بس م تكون ياعلي ختيت البت دي في راسك قعد اتبسم قلت ليهو علي دي ما بتشبهنا دي عايشه في جلباب المدينه الاولاد عندها زي شراب المويه قال لي بتنعدل قلت ليهو علي انت اظنك جنيت وغير الموضوع دا وما تختو في راسك البت دي نامت معاي ليله واحده وتاني حلفت منها ساهرت بي تتكلم الليل كلو وشكلها بتحب عشان انت م توهم نفسك قال لي ادتني نظره حلوه معناتا اعجبت بي حسيتو عبيط ودا عينه النوع الما بحب ولا جرب الحب انا ما اتكلمت معاهو كتير مشينا البلد ونزلت في بيت ناس مرت بكري وعزيت اهلا والناس كلها متلمه فيني اعزو فيني شكلهم عرفو انو بكري اتزوجني وانا كان همي اتنين المولود وبكري سالت منهم قالو لي ولدت بت وكويسه قلت ليهم ودوني ليها مشيت لقيت مدينها لي جارتهم والده وترضع فيها البت ايه من الجمال تشبه امها وبكري قطعت قلبي وشكلها هاديه شديد بقيت قاعده مع جارتهم دي منتظره بكري يجي يشوف بتو وانا قلبي مقطوع اكيد بكون متاثر شديد انا عارفاهو حنين وسمعت انو لمن ماتت ضرب الدكتور وكسر المستشفى في راسهم وما قدرو يثبتوهو وكل م يحكو لي انا ابكي واتخيل منظرو بكري طيب وولوف شديد ما بستغني عن حاجتو بالساهل رسلت لي بت تناديهو لي روحي كانت معلقه والاقيهو البت جات راجعه قالت لي قال ليك اقعدي مع النسوان وما تقلقي علي ح اجي ان شالله يعني انا هسي م جاي بقيت ابكي عرفت بكري م كويس وحزين شديد حتي بتو ما جا شافا بقيت قاعده مع جارتهم لمن ترضعها انا بشيلا انومها تلاته يوم مرت من البكا بكري رسل للبت قال عايز اشوفها شيلتها ليهو وانا قلبي مقطوع لمن شافني م قدر يسكت بقا ماسكني انا وبتو ويبكي بي اعلي صوت حسيتو ماقادر يستحمل والرجال اتلمو فيهو وبقو يقولو ليهو ماف راجل ببكي وهو م قادر يسكت وكل م يعاين للبت يبكي واقول لي نوسه البت دي امانه في رقبتك ودي وصيه مرتي لمن قال لي كده انا قلبي انقسم النص النص لانها قبل تموت قالت ليهو البت امانه في رقبتك انت ونسيبه بقيت ابكي تاني وهو يبكي وبقينا قاعدين في الارض ماف راجل قدر يسكت بكري الا ابوهو جا حلف عليهو طلاق وساقو الديوان وانا كلامو وصدا صوتو بتردد جواي لحظات اشبه بلحظات الموت
مرت ايام والبت سماها علي امها ميعاد وام مرتو جات وبلغتني بوصيه بتها قلت ليها من غير وصيه والله ح تكون في عيوني وح تكون حته مني طبعا ام ميعاد صغيره وشكلها هي زاتا حامل ودينا البت لدكتور اطفال كشف عليها وكتب لينا ليها لبن وبكري مشا جابو وبقيت مهتمه بيها شديد وكانت ماليه علي وقتي بس الما متوقع المدرسه فتحت وكنت ممتحنه شهاده سودانيه بكري قال لي البت بوديها لي امي بعد كبرت شويه انا رفضت قلت ليهو لا دي وصيه المرحومه قال لي نوسه ما بتقدري والحمل انتي نسيتي قلت ليهو لا بقدر وبقرا درس اليوم باليوم قال لي انا. م ح اقدر اكمل دراسه عايز اشوف شغل مفصول من ابوي عشان المسؤوليه زادت قلت ليهو لا ي بكري لازم تكمل دراسه مافضل شي ح نجتهد وح نتعلم وتعال نفكر نعمل مشروع ف البيت علي شغلك امورنا بتظبط قال لي م عارف قلت ليهو نعمل لي صفحه ونعرض فيها حاجات تجيبا انت ونبيعها بربح بسيط اقرب لسعر السوق وانت توصل بنفسك وعلي شغلك في الدكان امورنا بتظبط قال لي تمام نشوف اكتر شي بمشي قلت ليهو تشوف تاجر مشهور بالماركه بتاعتو ونتفق معاهو قال لي طيب انا بشوف ليك ناس مصعب استايل نجيب منهم ونوزع رايك شنو قلت ليهو موافقه ونشغل معانا علي اخوي للولايات قال لي تمام ونبدا بي قروش الدهب بتاع ميعاد لانو امها ادتني ليهو قلت ليهو لا دا زكره لميعاد م تفكر تهبشو تدي ابوك يختو في الخزنه قال لي طيب نتصرف كيف قلت ليهو اتفق مع مصعب اننا نوزع ونسدد قال فهم برضو اتصل عليهو وشكلو هو زول كويس وافق طوالي وبدينا اول خطوه عملت صفحه باسم مصعب استايل وبقيت اعرض اي شي جديد وسبحان الله رزق البنوته الجديده الشغل من اول مره مشا معانا كويس شديد وصفحتي بدت تكبر وبقيت اوزع ولايات وبكري بقا ما شغال مع ابوهو قدرنا فتحنا مع مصعب فرع في مدني وبكري كان شغال فيهو وكان شراكه بينا وبين مصعب ومن ناحيه تانيه شغالين قرايه انا مع البت والحمل والقرايه لمن شكلي اتغير وملامحي اختفت عديل وكنت حاسه بتقصير حاولت جاهده اني ابقا سمحه غلبني عديل الحمل ليهو اثر ومرت الايام والشهور وماشين في القرايه كويس وولدت قبل ميعادي وجبت لي ولد بكري كان طاير من الفرحه وكانو نسا انو دا ما ولدو عايش بي كلو علي اساس انو دا ولدو بس كان بشبه محمد شديد وكانها كانت اشاره لي انو دا ولد محمد قطعه من محمد بكري سماهو سند قال لي دا السند ودا الحا يسندك انتي وانا وميعاد قلت ليهو ان شاء الله والايام بتمر ونحنا انضغطنا شديد في القرايه بكري جاب لي بت تمسك الاولاد عشان القرايه واشترا ليهو عربيه وارض وبدا يبني فيها والدنيا كانت ماشه رزقنا كان سمح وما اكتفينا بالدكان بس انا كنت بوزع ف الولايات وعلي كان مندوب ومع مرور الزمن فتحنا ليهو ف الحله مكان وكان بينا بالنص وأمورنا ظبطت وعلي كان بجيني طوالي بجي اشيل البضاعه من البيت اكتشفت انو علي علاقه قويه مع بت جيرانا دنيا وشفتهم عديل مع بعض وانا جايه من المدرسه قررت اني اتناقش معاهو فتحت معاهو الموضوع وقال لي نوسه البت دي انا عايز اتزوجها وما عندي شغله في ماضيها انا شايف نفسي معاها وبحبها شديد علي اتغير بعد كان صعب بقا ساهل شديد البت دي اكلت راسو وبقيت م عارفه اتصرف معاها كيف اخليهو يتزوجا ونبقا في طلاق وغيرو ولا احتمال ربنا اهديها ودا ح نعرفو الحلقات الجايه باذن الله
الفصل السادس والعشرون
تفكير علي حيرني بالذات هو صعب شديد كيف يقبل يعرس دنيا وكنت محتاره لمن مهمومه وظاهر في وشي بكري قال لي نوسه مالك قلت ليهو في موضوع محيرني قال لي الله لا جاب حيره كدي قومي اعملي قهوه وشوفي الاولاد وتعالي قلت ليهو طيب مشيت لقيت اولادي نايمين والبت الشغاله معاي زاتا نايمه وعملت القهوه وجيت حكيت لمحمد بكلام علي وقرارو قعد اضحك قال لي نوسه خليهو الولد حباها شديد قلت ليهو م عرف احب الا دنيا بكري انت ماعارف دنيا انا يوم نامت معاي احتمني النوم الليل كلو تتونس اتخلع قال لي متين نامت معاك قلت ليهو لمن مرتك اتوفت قال لي ايوا ويعني شنو لو بتتكلم بالتلفون البنات ديل كلهن بحبن واحد وما بعرسنو القسمه بتوقعن في واحد تاني انتي يعني هسي شايفه كلاما بالتلفون قله ادب قلت ليهو اي قعد اضحك قال لي نوسه تتزكري زمان انا مرات بتكلم معاك للصباح هل انتي كنتي قليله ادب سكتا وغلبني ارد قال لي ردي قلت ليهو انا كنت مطلقه بس لو كنت بت فتاه خشمي م بفتحو معاك قال لي نوسه استهدي بالله انا شخصيا م شايف كلامك دا مقياس لادب البت وماف راجل بقع في بت كعبه الا اذا كان هو زيها قلت ليهو لا والله علي محترم قال لي بس الطيبون للطيبات زي م نظرتك لي علي انو محترم انظري ليها هي باحترام وما تختي مقياس كلامها بالتلفون الا اذا شفتيها عديل مع ولد وما قاعدين ساي شفتيهم عديل بزنو ودي حاجه ممكن تقيسي بيها بس زي م وريتك انتي يوم من الايام اتكلمتي معاي وم قليله ادب عشان كده خلي علي ياخد راحتو وشجعيهو علي كده وانا حرم معاهو من الالف للياء علي راجل ويستاهل بس يأجل العرس لمن نخلص امتحانات انتي شايفه نحنا مضغوطين قدر شنو قلت ليهو طيب قال لي ارح نقرا شويه وتاني ننوم قلت ليهو طيب بقينا نقرا بتركيز والحاجه الواقفه علي بشرحها ليهو وهو كمان بكري زكي شديد بس عيبو مشغول بالشغل ومافاضي انا بضغط عليهو عشان نقرا وبقينا م فاضيين لاي شي وخلاص امتحاناتا ع وشك واهلي طولت منهم قلت لبكري قبل الامتحانات ماشه لي ابوي قال لي تمام خلي علي يسوقكم انا لو م الشغل مع القرايه كان مشيت قلت ليهو لا م بتقصر قال لي ع فكره ايام الامتحانات يا امي يا اختي تجي تقعد معانا واحتمال اختي قلت ليهو حبابن والله ينورو البيت بيتهم
مشيت اهلي وعلي كلم امي وابوي ووافقو وقالو لي تمشي معاهو للخطوبه لانو امي مع ابوي قلت ليهم تمام علي م صدق مشا كلم دنيا وعزمونا يوم الجمعه مشيت انا وبكري واولادي وعلي وعم محمد طلبنا يدها وشكلها حبت علي شديد واهلا ناس محترمين وناس بحبو الضحك والونسه والعجب ابوها زول مريح شديد في الونسه تتمنا م تقوم منو بعد شفت اهلا اطمئنيت شويه بكري قال لي تاني م تتسرعي ي نوسه البت دي كويسه واهلا م شاء الله قلنا ليهم بعد الامتحانات العرس طوالي قالو م عندهم مشكله وعلي اخر رومانسيه ونظرات بعد جينا انا وبكري شغلناها ليهو قرب يدقنا بس جد من جواي اتمنيت ليهو الزواج والاستقرار
تاني يوم مشيت المدرسه وتعبت شديد بكري كان م جا المدرسه عندو شحنه مشا يستلمها اتصلت عليهو جا جاري جري وداني الدكتور وانا صداع وطمام روحي ح تطلع الدكتور قال لي انتي حامل انا الخلعه دايره تكتلني حامل كيف انا والده قريب بكري مبسوط وفرحان وانا مندهشه وراسي ح ينفجر حالتي صعبه عندي طفلين في يدي ومعاهم حمل والقرايه علي روحي ح تطلع عديل اليوم كلو عديتو بكا وبكري مبسوط قال لي نوسه دي الحاجه البتربطنا ببعض ماتزعلي حبيبتي ودي كلها اقسام ي نوسه خليك راضيه بالقسمه قلت ليهو م معترضه بس الظروف قال لي كلو لخير بتترتب انا بتصل علي امي ياتجي يا تجيب اختي اختو صغيره بس م شاء الله النوع المتعلمه الشغل وخدومه شديد اتصل علي امو قالت ليهو خلاص بكره بخليها تجي مع ابوك لانو انا م بقدر اخوانك صغار قال ليها طيب قال لي يلا ي نوسه نشوف قرايتنا انا عايز علي اشتغل مكاني ف الفتره دي ونشوف واحد يوزع ف الولايات وكده قلت ليهو طيب قال لي لازم نجتهد ما باقي كتير الزمن م في صالحنا قلت ليهو طيب
تاني يوم عمي محمد جا وجاب امونه اخت بكري والبت دي مريحه لمن مبالغه من جات م قعدت انا قطعت قلبي وانا طبعا مع الحمل والعلي حيل بقا م فيني روحي طلعت واتبهدلت بهدله م يعلم بيها الا ربنا وبعد حالي دي بكري لمن اتغزل فيني بحس نفسي اجمل مني ماف قلت ليهو الثقه المفرطه مشكله قال لي خليها تكون مشكله يعني شنو انا شايفك كده وعيني ما ح تشوف بعدك انتي تاج راسي بكري اكتر انسان حسسني اني انسانه بكل حالاتي انا تعبانه وانا عيانه وانا شينه وانا حلوه ما حصل حسيتو مضايق من شكلي وقررت بعد امتحاناتي امشي لدكتوره عديل واهتم بنفسي
مرت الايام ونحنا خلاص امتحاناتا قربت شديد والزمن ضايق وبقينا م بننوم لا ليل لا نهار وعلي العلي سند ولدي تعب تعب شديد كان ح يموت عديل وديناها الدكتور ركب ليهو فراشه واداني حقن ودربات وبقا من كتفي م بنزل وقلبي فيهو ومن ناحيه تانيه القرايه علي بكري بقا يقريني حتي لو الحاجه هو قاريها بس كان بساعدني شديد وخلاص جا يوم الامتحان وسند ولدي لسه عيان والفراشه في يدو وما بنزل من يدي قلت لي بكري ح اسوقو معاي الامتحان رغم انو صعبه بس م بي يدي حيله ومشينا اول جلسه كانت تربيه اسلاميه اتوكلت علي ربنا وبكري ودعني وفات شايله ولدي وجلست للامتحان كان في مراغب معانا قدام قال لي ولدك م ح يخليك تمتحني جيبي امسكو ليك قلت ليهو هو مابجي لي زول عشان كده خليهو ما بحميني والناس بقو يعلقو علي وفي لحظتنا ديك الاذاعه جات ترصد اول يوم للامتحان وانا كنت حاله شاذه اتعرفو علي وصوروني بعد نص ساعه جا زمن الامتحان ومع بدايتو سند بقا يبكي وعذبني عذاب المراغبين البره جو داخلين وانا مركزه في ورقتي والامتحان كان حلو ويدي التانيه بهز بيها في سند في مراغب جا قريب قال لي ممكن اشيلو ليك والصوت م غريب علي قلت ليهو لا لا خليهو مرتاحه انا رفعت راسي وياريتني م رفعتو لقيتو دا محمد هو انخلع وانا انخلعتا لمن شهقتا الناس كلها بقو يعاينو لي