واثناء ما هو بيتكلم معاها شاف سماره داخله المكان اللي موجود فيه ومعاها واحد ولابسه فستان شياكه من اللي كان جايبهم لها وظبطه نفسها على الاخر وبتضحك وبتمد له ايدها عشان يقعدها على الكرسي شاف المنظر ده والدم فار في عروقه وبقى قاعد مش على بعضه ولا مركز مع فرحه اللي ركزت مع نظر تاني وشافته بيبص على واحده في خبطت على الترابيزه عشان تفوقه :
ــ يعني كون ان انت مش محترم وجودي معاك دي مشكله وكون انك تبص على واحده معاها جوزها او خطيبها بالطريقه دي تبقى مشكله اكبر وكويس قوي ان انا اكتشفتك على حقيقتك قبل ما ارتبط بيك يا حضره الباشا نعمان .
لسه كان هيتكلم سابته واخذت شنطتها ومشيت وهو كل اللي كان مركز معايا سماره وازاي تخرج مع واحد غريب وكمان تقعد وتضحك معاه بالمنظر ده وقام من على ترابيزته وهو زي الطور الهايج راح عليهم ومسكها من ذراعها وامرها :
ــ قومي يا بت ايه اللي جايبك هنا ومقعدك مع البقف ده وكمان بتضحكي وبتهزري وسايباه يمسك ايدك ده انت لعبتي في عداد عمرك النهارده يا سماره .
رفعت سماره حاجبها بابتسامه انتصار وهي شايفه الدخان طالع من وشه وكمان كانت واخده بالها من عروسته اللي سابت له المكان بغضب ومشيت وجواها بيزقطط من الفرحه :
ــ ده خطيبي ان شاء الله هبقى اعزمك على خطوبتنا يا نعمان بيه وبعدين انا حره اخرج على كيفي ومع اللي يعجبني وانت ما لكش حكم عليا لا انت جوزي ولا خطيبي ولا حتى اخويا ولا ابويا وبراحتي وبمزاجي .
نعمان ما شافش قدامه وهو بيشدها يقوم من على الكرسي ولوى دراعها ورا ضهرها وهو بيتكلم معاها بفحيح :
ــ يمين بعظيم يا سماره المحترمت نفسك ولميتي لسانك وخرجت معايا دلوقتي لهكون مكسر لك رجلك دي وهوديك لابوكي على نقاله الراجل الناقص اللي بيسيبك تخرجي في الوقت ده وتقعدي مع شباب .
حاولت تشد دراعها منه وهي مستمره في استفزازه :
ــ الله الله هو خدهم بالصوت قبل ما يغلبوكم ولا ايه الزم حدك يا باشا وملكش صالح بيا وبعدين انت مش كنت قاعد مع عروستك روح الحقها قبل ما تبلغ مامي وتخصم منك المصروف وتعاقبك يا نونه .
نعمان ما بقاش متحمل طريقتها في الكلام وفجاه نزل على وشها بقلم سمع اللي قاعدين في المطعم كلهم من شده الالم حطت ايديها على وشها وهي بتبص على الناس اللي شافتها وهي بتنضرب وفجاه سحبت شنطتها وخرجت من المكان بسرعه وهو مستناش جري وراها علشان يلحقها قبل ما تروح اي حته وقبل ما توقف تاكسي كان ساحبها من ايديها واخدها على عربيه بتاعته وفي سرعه البرق كان متحرك من مكانه وراحوا على الشقه اللي بيتقابلوا فيها وكل ده وهي عماله تعيط ومش عايزه تروح معاه لكنه واخدها بالغصب ،
وصلوا المكان ونزلها من العربيه وسحبها على فوق غصب عنها واجبار وطلع بيها الشقه واول ما فتح الباب زقها بعنف اترمت على الارض وقفل الباب وراه المفتاح وعينك ماتشوف الا النور نزل عليها ضرب موت وهي مش عارفه تفلت منه كل اللي بتعمله انها حاطه ايديها على وشها علشان ايدوا ما تطولش وشها وهي بتستنجد بيه يسيبها :
ــ حرام عليك كفايه ضرب انت ما لكش ضرب عليا ابعد عني سيبني في حالي انت هتتجوز عايز مني ايه ما انت هتعيش حياتك وهتتجوز وهتخلف كفايه ضرب اه حرام عليك يا مفتري .
ايديه وجعته من كتر الضرب على جسمها فنزل لمستواها وهو ماسكها من كتفها الاثنين ورفع وشها قصاد عينيه وبيحذرها بفحيح :
ــ واللي خلق الخلق يا سماره ان شفتك خارجه مع واحد ثاني ولا جنس راجل المره الجايه هكون كاسر لك رجلك الاثنين ومش مخليك تتحركي من مكانك خالص انت اتجننتي يا بت ازاي تعملي الحركه دي وانت قاصده تعمليها وعارفه ان انا هناك علشان تبوظي لي الجوازه وتربكيني .
نفضت ايديها من بين ايديه بالعافيه وهي بتمسح دموعها المتكحلين من عينيها وبتجز على اسنانها بغضب وبترد عليه الند بالند :
ــ انا حره ما انت هتتجوز سيبك من الانانيه اللي فيك دي يا نعمان وابعد عني طريقي ما بقاش زي طريقك وبعدين انت اخذت مني اللي انت عايزه ثالث ومثلث وما بقاش في حاجه جديده هنستنفعها مني كل حاجه حلوه وكل مشاعر وعواطف جميله في حياتي اديتها لك سيبني بقى اشوف حياتي انا كمان ...
ــ اسيبك مين ده في احلامك انا دلوقتي هاخدك اوصلك لبيت ابوك واقسمت بالله يا سماره بنتكرر اللي حصل تاني مش هتشوفي خير في الدنيا ابدا وبعدين انت بمزاجي وعلى كيفي وقت ما احب ارميكي هرميكي اما دلوقتي انا لسه عايزك ومصمم على وجودك .
ــ انت كده بتستدعي نار سماره يا نعمان وما تمسكش النار بايدك علشان ما تحرقكش وتولع فيك احسن لك سيبني في حالي لاني مش هرضي اني اكون عرفت طول العمر انا عايزه اتجوز واعمل بيت وعيله ويكون ليا عيال زيك بالظبط .
الاثنين استمروا في عنادهم لبعض وهو مصمم على اللي في دماغه وما وصلوش لحل خدها وصلها وهو بقى زي المجنون من عمايلها ،
$$$$$$$$$$$$$$$$
ــ يا نهارك مش فايت النهارده يا سمير هو انا مش قلت لك ارجع الاقيك قايم من النوم وساقي الزرع اللي في الجنينه بره ومجهز الفطار على ما ارجع ياض وفي الاخر اجي الاقيك نايم زي ما انت ده انا هخلي يومك جحيم النهارده يا سمير .
سمير كان جسمه بيوجعه ومش قادر يتحرك من مكانه ولا يقوم من السرير وحاسس انه تعبان بشده فترجى ابوه :
ــ معلش يابا سيبني النهارده مش قادر اقوم من مكاني حاسس اني تعبان وجسمي حالل من بعضه وعندي صداع ومش قادر احرك ولا دراعي ولا رجلي .
ابو ضربه بالكوميه في جنبه خلاه انتفض واتوجع قوي من شده ضربته وهو حاطط ايده على جنبه ماسكه والدمعه فرت من عينيه :
ــ ليه يابا حرام عليك بقول لك تعبان وجسمي بيوجعني تقوم تعمل فيا كده حرام عليك انت ليه قاصد تعذبني على طول ليه قاصد ما تشوفش ولا تعبي ولا حياتي اللي متدمره بسبب قسوتك عليا كنت بتخلفني ليه يابا لما انت هتعمل فيا كده .
خلص سمير كلامه وساح في العياط جامد وابوه شايف ان عياطه ده دلع وما ينفعش يعيط من الاساس فمسكه من دراعه وهو بيشده من على السرير يقومه غصب عنه :
ــ قوم ياض انت بطل سهوكتك دي وبطل كسلك وسيبك من كلامك الاهبل اللي هتقوله دي هو انت مفكرني عيل برياله علشان اصدق النحنحه بتاعتك داي ،
قوم فز انجر قدامي تك خابط في نفوخك انا مش عارف خلفه ايه السوده دي اللي ربنا بلاني بيها عيل خرع ولا له في الطور ولا الطحين وكمان مش عاجبك .
سمير خلاص كان فقد اعصابه من معامله ابوه ده غير جسمه اللي بيوجعه فعلا وقال لأبوه وهو بيبص في عينيه من بين شهقاته الشديده :
ــ موتني يابا وارتاح مني او ريحني من الدنيا اللي انت معيشها لي دي على الاقل اما اروح عند ربنا هيكون عليا ارحم منك ومن قسوه قلبك شكل ما اكون مش حته منك ولا لحمك ودمك علشان تعذب فيا كده ليل ونهار وتقطمني ليل ونهار كفايه انك غيرت خلقتي وخلتني شبه الشحاتين وما بيهونش عليك تجيب لي حتى جلابيه .
ــ انت بترد على ابوك يا سمير وبتبجح في وشه من امتى ياض اتعلمت انك تبجح فيا ما هو من شله الصيع اللي انت بتخرج معاهم كل يوم واني مهعرفش انت رايح فين ولا جاي منين داهيه تاخدك ولا ترجعك يا شيخ عشان استريح منك قوم ياض بدل ما هموتك بجد زي ما انت ما بتقول .
جر سمير في رجله وهو بيقوم بالعافيه وحاسس ان الدنيا بتلف بيه ومش قادر يتحرك من مكانه ابوه زقه علشان يتحرك فتره مع الارض ما حطش منطق ،
ابوه ما تهزش من غميانه وراح جاب ميه ودلقها على وشه وهو نايم مكانه على الارض وبعد سمير ما الميه نزلت عليه بغزاره فاق وابوه ما كفهوش اللي عمله فيه ضربه بالرجل في بطنه وهو بينبه عليه :
ــ اني خارج اجيب طلبات الفطار ارجع الاقيك فوقت من غيبوبتك دي وقمت شفت طلبات الجنينه عايزه ايه وشفت الست هانم وجهزت المطبخ للفطار وعلى الله ارجع الاقيك نايم مكانك .
خرج ابوه وهو جرجر جسمه بالعافيه وسند على الحيطه وفضل يعيط جامد عياط يقطع القلب من العيشه اللي هو عايشها بسبب ابوه وجحوده وقسوه قلبه وفكر ينتحر ويموت نفسه بدل المره 1000 وفي كل مره يتراجع شكل ما تكون في حته نظيفه في قلبه بتمنعه ان هو يعمل كده ،
كان واقف سمير في الجنينه ماسك الخرطوم بيرش الزرع وهو مش قادر يقف على رجليه فتقدم منه نعمان كان خارج رايح شغله وشافه بالمنظر ده :
ــ مالك يا سمير شكلك تعبان قوي ومش قادر تطلب طولك طالما تعبان كده ما استريحتش في سريرك ليه .
سمير ما بصلوش وهو بيتكلم ورد عليه على قد السؤال :
ــ ما تشغلش بالك بيا يا باشا روح انت على شغلك وانا ليا رب كريم قادر يقبض روحي ويريحني .
ــ ايه اللي هتقوله ده يا سمير حرام عليك يا اخي ايه التشاؤم والاكتئاب ده على الصبح اكيد ابوك الفقري منكد عليك وما رعاش ان انت مش قادر تطلب طولك وغصب عليك تقوم تشوف شغلك .
ــ عادي وايه الجديد ما كل حياتي انا مغصوب عليها شكلي لبسي ملامحي كل حاجه عكسي وكل حاجه مش بتاعتي وكل حاجه ضدي اشمعنى ابويا اللي هيبقى حلو .
ــ ما ابوك هو السبب في اللي انت فيه وهو اللي وصلك للمرحله دي ياما قلت لك يا سمير تعالى وابعد عنه وانا هروقك وانت مصمم تفضل في جحيم ابوك وانا مش هخليه يعرف طريق جره ليك .
ــ ابويا ارحم من الذئاب الكبيره اللي هقابلها بره في دنيا انا ما اعرفهاش وحتى لو كان هو لحمه مر معايا بس في الاخر ابويا يا باشا .
نعمان لمح امه بتبص عليه من بعيد وهو اصلا نازل بدري علشان ما يقابلهاش بعد ما اطفش العروسه فساب سمير الوجعه وحيرته وجري بسرعه قبل ما امه تنادي عليه وطبعا هو عارف انها حالفه له ،
ومر اليوم ده على سمير والوجع فاق الحدود معاه واول ما اخلص شغله دخل على سريره ينام وقرر انه ما يخرجش خالص ،
$$$$###$$$$$$$$$$$
هي صاحبتك اللي اسمها سماره ما جتش النهارده معاكي يعني وبقى لها اسبوع مطنشه لك هي البنت دي وقعت على الكنز ولا ايه ؟
ــ مش عارفه يا بت ما انا مستغربه برده هي البت دي بقت تستكبر عليا ولا ايه.
ــ اسكتي انت هبله وعبيطه ياما قلت لك سيبيكي من الطيابه اللي تتعاملي بيها مع الناس والبنت دي من ساعه ما شفتها معاكي قلت لك بدل المره 1000 انها سهونة وسوسه وانت بتدلقي عليها زي الجردل .
ــ طب والله لو طلعت بتتعامل معايا بالكبر ده لاخليها تندم علي اليوم اللي فكرت تتكبر على نعمات هي نسيت نفسها ولا ايه ده انا اللي طلعتها من الدفنه اللي كانت فيها وخليتها بنت زي بقيه البنات وفي الاخر ارن عليها ما تعبرنيش ماشي يا سماره .
ــ طب ما تقولي لي قصتها يا بت حكم انت بقيتي ملاوعه زيها ده انا حتى صاحبتك من قبلها بكثير وعيب لما تخبي عليا والبنت دي وراها حوار كبير .
ــ هقول لك وهو ادينا قاعدين بنلغي مع بعض البنت دي بتعرف صاحب الشغل بتاعهم راجل باشا كبير قوي أبهة من بقى لها سنين ماشيه معاه وبتروح تقابله في بيته ومنغنغها ومعيشها احلى عيشه وفي الاخر اتبطرت عليه وعايزاه قال يتجوزها وهو طبعا ما عجبهوش كلامها واتخانق معاها ما هو مش هيتجوز الخدامه بتاعته اللي طالها من غير جواز .
ــ هييييييي يا نهار ابيض بقى البنت اللي عامله نفسها ولا كانها جايه من بلاد بره وبتتأنتك علينا طلعت ماشيه في السكه البطاله ومسلمه نفسها الراجل عجبت لك يا زمن .
ــ هي سماره معتزه بنفسها بس المره اللي فاتت حلفت لي انها هتنتقم منه ومن ابوها وهتوريهم ايام سوداء عرفت ان هو هيخطب راحت نفس المكان اللي هيقابل فيه خطيبته عشان تبوظ عليه قعدته وناويه له على نيه سوداء .
ــ طب طالما الراجل غني يا بت ليه ما تروحيش تفهميه الفوله بتاعه البنت دي ونيتها وتستفادي من وراه ولا هي اللي هتاكل من التورته لوحدها وانت تاكلي الفسيخ ابو ريحه منتنه .
ــ لا يا شيخه حرام عليك دي ائىتمنتني على سرها معقول اخونها والبسها في الحيط اسكتي بطلي وز في دماغي .
ــ روحي وانت هبله كده خليكي زي ضلها على الفاضي ولا بتستفيدي منها باي حاجه ولا بيهون عليها حتى تديكي فستان من اللي بيديه لها .
نعمات عينيها زاغت من كلام صاحبتها وبدات تفكر فيه ونوت على نيه ما يعلم بها الا ربنا لسماره وده كله علشان ما ردتش عليها في مره .
$$$$$$$$$$$$###$
ــ حمد لله على السلامه يا نعمان يا اللي راجع بعد نص الليل علشان ما تقابلنيش ولا بترد على تليفوناتي طول النهار اكيد عارف عملتك السوداء اللي انت عملتها امبارح مع خطيبتك وخليتها تخرج من المكان وهي زعلانه واخده على خاطرها منك وسودت وشي قدامهم يا ابن بطني .
ــ قوام خليتيها خطيبتي ياماما انا يا ستي خلاص كرفت الفرحه دي ولا عايز سعاده ولا حزن وبعدين هي اللي فهمت غلط والظاهر كده هتبقى عقلها صغير وبتشك في كل حاجه وانا ما يلزمنيش المره اللي تشك فيا .
ــ خش في عبي ياض لا خش في عبي ،
انت ياض مفكرني هبله ودقه قديمه وعلى نياتي انت المفروض قاعد مع واحده بتحترمها وما تفكرش تبص لغيرها وسيبك من هناك الزايغة دي يا نعمان وتطلع دلوقتي تتصل بيها وتعتذر لها وتتفق معاها على ميعاد وتصلح كل الغلط اللي انت عملته انا بقى فرحه ديت دخلت في دماغي ومصممه عليها .
ــ اتصل بمين يا حاجه انت عارفه الساعه كام احنا بعد نص الليل زمانها نايمه في العسل ان شاء الله كمان شهرين ثلاثه كده .
ــ انت ايه يا واد انت كتله بجاحه وقله ادب متحركه على الارض وبتعصي اوامر امك طب اعمل حسابك اداره الشركه كلها تتسحب منك وكل حاجه هاخدها من تحت ملكيتك وانت عارف انها كلها املاكي وهخليك مجرد موظف في الشركه والمنظره والهيبه تضيع منك خالص لو ما عملتش اللي بقول لك عليه .
ــ لا وعلى ايه هتصل لك بها دلوقتي حالا قدامك وهصالحها واراضيها واداديها زي العيال الصغيره بالظبط احنا ناقصين غضب نبع الحنان كله الا غضب الام اللي يتهزلوا سبع سماوات يا حاجة .
وفعلا طلع التليفون ورن عليها يجي خمس مرات لحد ما ردت عليه وهو كان زهقان من قله ذوقها واول ما سمع صوتها وهي بتتكلم بتناكه :
ــ مين معايا مش عيب يا بني ادم قله الذوق دي تتصل بعد نص الليل وتزعج الناس .
سمير كان حاطط ايده على رقبته وهو بيشاور لامه مخنوق من طريقه كلامها بس هي اجبرته ان هو يكمل المكالمه ويعتذر لها :
ــ معلش يا برنسيسه اصل ما يحلاش الكلام والفرفشه الا بعد 12 بتصل بالبرنسيسه عشان اعتذر لها انا اللي حصل امبارح واقول لك انك فهمتي غلط وعايزه اتفق معك على خروجه في المكان اللي تختاريه يا جميل علشان اللي ما حصلش المره اللي فاتت يحصل المره الجايه .
ــ انا هقبل اعتذار لك بس علشان خاطر طنط ست ذوق معايا وحبيتها ودخلت قلبي هبعت لك المكان وانت تحدد الميعاد وتبقى تكلمني الصبح تصبح على خير .
قفل معاها الموبايل وهو بيقول لامه بلوم:
ــ بقى يا شيخه عايزاني اتجوز السمجه دي دي تقله وانا مش طايقها ولا طايق كلامها حرام عليك يا ماما
-- ايوه هي دي وما فيش غيرها اللي هتظبطك وتمشيك على العجين ما تلخبطهوش وهتخليك مستقيم انا عارفه انا مختاره مين وعلشان كده هي مش لاده عليك .
ــ انت بتعملي معايا كده ليه ده انا ابنك يا شيخه المفروض تجيبي لي واحده تريحني تبسطني تدلعني مش واحده عامله زي الاستاذ اوامر متحركه .
ــ ما انا ياما جبت لك اللي تطبطب وتدلع وكنت بتتمنع خلاص فات الاوان انك تختار وهي دي اللي هتتجوزها يا نعمان يا اما كده يا اما هحرمك من كل حاجه عشان انا زهقت منك ومن دلعك .
ــ يوه ادي المكان ليكي هسيبه وطالع واعملي اللي يريحك وانا اخبط دماغي في الحيط والعلمك بقى انت اللي هتشيلي ذنب عدم ارتياحي للبني ادمه السمجه دي .
$$$$$$$$$$$$$$$$$
سمير شاف ابوه نام اخيرا وقرر ان هو يخرج النهارده ويفك عن نفسه بقى له اسبوع ما خرجش من الاوضه كنا بالتحديد الساعه 9:00 بالليل في الشتاء يعني الوقت متاخر خلص لبس وجهز نفسه للخروج ،
بعد شويه وصل سمير المكان وكانت القهوه اللي بيقعد عليها على طول فجاله واحد من اللي بيقعد معاهم :
ــ ازيك يا سمير عيش من شافك بقالك كتير ما جيتش القهوه يجي من شهر فينك يا جدع ؟
ــ اكون فين يعني من اهو موجود وعايش لسه يا ريت ربنا ياخذني ويريحني بدل العيشه اللي انا اعيشها دي .
ــ طب ليه كده يا شيخ حرام عليك ايوه يا جدعان على ملافظك ده انت شغال عند نعمان باشا اللي مروق على الناس كلها ومروق عليك على الاخر ايه يا عم شايل هم ايه ؟
ابتسم بسخريه ابتسم سمير بسخريه:
ــ والله انت ما عارف حاجه اسكت احمد ربنا على اللي انت فيه وبلاش تبص على المناظر اللي عند غيرك وتحكم عليها بالظاهر وانت ما تعرفش الباطن ساعات الوش بيداري بلاوي ما يعلم بها الا ربنا .
مشي سمير من القهوه خالص وراح مكان بعيد ما فيهوش ناس قدام البحر وهو بيبص حواليه يمين وشمال ما لقاش ناس قعد على الرمل وفجاه صرخ بصوت عالي :
ــ اه من الدنيا واللي بيجرى لك فيها هتستحملي لحد امتى يا سميرة هتستحملي لحد امتى مخبيه نفسك ورا قناع سمير ؟
تعبت يا رب من كل اللي حواليا تعبت من ابويا اللي خبيني في جلابيه الولد وصمم ان انا اعيش حياتي على اني ولد تعبت من نعمان اللي استغلني ولما عرف ان بنت ما رحمنيش وما خلاش فيا حته نظيفه لكل بنت ولا عايز يرحمني ولا من الناس اللي عيونها بتنهشني لو قلبت سمارة ذل واتذليت اهانه وضرب واتمرمطت من كل اللي حواليا اعمل ايه يا رب عايزه اعيش زي ما انت ما خلقتني مش عايزه اتنكر عايزه اتجوز واخلف وأعيش زي بقية البنات .
ورجعت بعقلها لخمس سنين وقت ما نعمان شافها وهي بنت كانت بتتسحب وخارجه من ورا ابوها وهي لابسه لبس بنات كانت زي القمر نعمان شافها وهي خارجه استغرب جدا مين اللي خارجه من بيتهم دي والفضول قتله ان هو يروح وراها عشان يشوف هي مين وفضل فعلا مراقبها لحد ما وصلت قدام البحر وقررت انها تنزل فيه وقبل ما تنزل سمعت صوته وهو بيقول لها :
ــ انت مين يا بت وكنت خارجه من بيتنا بتعملي ايه وبتتسحبي زي الحراميه انت حراميه؟
سماره اتخضت بشده من اللي جواها مره واحده وانصدمت لما لقيته نعمان ولسانها نطق بصدمه :
ــ ايه ده نعمان بيه ؟
ــ الله ده انت طلعتي عارفاني وحافظاني انطقي يا بت ازاي تدخلي الفيلا بتاعتنا وتخرجي منها وانت بتتسحبي يا اما هوديك السجن حالا .
سماره فضلت تجيبه يمين وشمال لكن ما اقتنعش بولا كلمه لحد ما لقيته قرب منها وبيجرها على الارض :
ــ طب ايه رايك ان الكاميرات هروح اراجعها وهجيبك وانت خارجه بتتسحبي وهدخلك السجن الليلة وهبيتك فيه لو ما اعترفتيش انت مين ؟
ما لقيتش حل غير انها تعترف له هي مين ابوها زمان لما جابها كان ملبسها لبس صبيان وحلق لها شعرها ومن وقت ما دخلت البيت وهي بتحلق شعرها لحد ما ترجت ابوها في يوم ان هي هتلبس باروكه وما يحلقلهاش شعرها علشان مش عايز حد يعرف انها بنت وخصوصا انهم من الصعيد وحاطط في دماغه انهم هيطمعوا فيها :
ــ انا سمير ابن محروس يا نعمان بيه .
انصدم نعمان وهو بيبص لها بذهول :
ــ يخرب بيتك سمير مين انا شايف قدامي كتله من الانوثه والجمال متحركه سمير ده واد انتي هتشتغليني .
حلفت له علشان يصدقها :
ــ والله العظيم انا سمير انا بنت مش ولد وابويا اللي عمل فيا كده وخلاني ابقى ولد علشان الناس ما تطمعش فيا وعلشان الست هانم كمان ترضى تشغله عندكم لانها كانت كاتبه في الاعلان لو البواب عنده بنت مش عايزين .
ــ بقي ابوكي دفنك جوه عبايه الواد علشان خاطر نفسه ! ازاي رضيتي انك تغيري من خلقه ربنا ازاي رضيتي انك تكبتي نفسك بالطريقه دي طول السنين دي كلها !
ــ ما باليد حيله يا باشا ما ليش غير ابويا في الدنيا ولازم اسمع كلامه ومجبره اني اعمل اللي هو عايزه ده كل يوم ضرب وزعيق وبهدله جتتي ما بقتش متحمله عذاب وليه وعمايله فيا فاضطريت اني اخضع للريح واسمع كلامه .
بص نعمان لجسمها المرسوم ولهيئتها اللي تخلي اجدعها راجل يميل على بوزه :
ــ بس انت اكتشاف خطير يا سماره خلاص انت بقيتي بتاعه نعمان وتخصي نعمان هاتي ايدك يا حلوه .
شافت في عيونه نظرات رغبه ونظرات هتاكلها وعرفت في الوقت ده انه هيستعملها لرغبته زي ابوها ما استعملها بقسوته لخدمته ومن وقتها من وقت ما مدت ايديها في ايد نعمان وهي ما بقتش سماره البنت المتغطيه البريئه اللي دنسها ومرحمهاش .
عودة من الباك
فضلت على حالها تصرخ من اللي هي فيه لحد ما خرجت كل طاقه الوجع اللي جواها وقررت انها ترجع لابوها بشخصيه سماره وهي طبعا عارفه ان المواجهه هتبقى صعبه ما بينهم هم الاثنين بعد ما خلعت جلابيه سمير روحت على البيت في فيلا نعمان وقبل ما تدخل كانت شالت الباروكه بتاعه سمير وقلعت جلابيه سمير وفضلت بجلابيه سماره ودخلت على ابوها اللي اول ما شافها انصدم