الدكتوره قالت لي انتي حامل انا خلاص المعاي كملت وبقيت ابكي من جوه قلبي واترجا فيها تديني حبوب انزل الجنين وانا والله اغتصبوني والحمل ما بي ارادتي وكنت ببكي بكا هستيري وكلامي نصو مفهوم ونصو م مفهوم كاني بتكلم مع الحيط وخلاص راسي ح ينفجر اقبل علي وين افوت وين امي ح تكتلني وح انزل راسي اهلي الارض اهلي م يستاهلو نحنا اتربينا احسن تربيه الامتحان دا صعب يا طلعت منو بالسلامه يا حجري غطس للنهايه والسر دا ماف زول عارفو غير علاء وعلاء فات خلاني شكلو انصدم وكنت محتاجه اثبت اني فعلا اغتصبوني عشان ع الاقل علاء يقيف جنبي م بقدر احكي لي اهلي لانو اهلي الهم ح يكتلهم وح يموتو عديل والدنيا مسخت لي وم ح اقدر اصارحهم رجعت البيت ودموعي عشره عشره لحسن حظي لقيت امي م جات نهي جاطت فيني وانا بعاين ليها كانها ما بتتكلم لاني فعلا الهم الفي راسي مخليني عمياء وطرشه بقيت اتصل علي علاء م برد رسلت ليهو في الماسنجر برضو ماف رد وياهو املي الوحيد زول اتحاما فيهو من الدنيا الصدمتني دي يوم يومين هو م برد وخلاص قنعت منو 😭💔
بقيت افتش لحلول تانيه واكل كنت م باكل وحالتي الصحيه ساءت شديد وكنت مبسوطه اني مجوعه نفسي عشان الفي بطني ينزل قررت اوجهه قتيبه وهناء مشيت بيتهم العصر لقيتهم اخر ونسه وفي بت قاعده جنب قتيبه بتقرا ف المدرسه بت محترمه ومؤدبه وشاطره ف نفس الوقت لمن شافتني جرت اهلا وانا دخلت صدفه هم انخلعو قامو كلهم علي حيلهم قلت ليهو قتيبه انت ليه عملت كده بالبساطه دي تدمر حياتي وانت منو وشنو وقايل نفسك شنو عشان تعمل في بنات الناس كده قال لي ما قايل نفسي حاجه ونوعك دا بالحسنه ما بجي احسن اشيل حقي بالقوه قلت ليهو دقيقه دقيقه بالحسنه م بجي انت عملت لي شنو خليتني دوخت انتو عصابه صاح فشنو هناء ردي علي كيف انتي بالطريقه دي القلم ما زال بلم ولا المدرسه داخلاها عشان الاصطياد ودا كلو خليهو قتيبه دا منو وجا من وين وفشنو فهموني دا بيت دعاره صاح دي امك ي هناء ولا تبع التمثيليه ردو علي بسخافه هناء قالت لي ذكيه وحسك عينك خشمك تفتحيهو ولا انتي زاتك عندك وش عندك خيارين يا تتزوجي قتيبه عرفي وتكوني قاعده مكان امي دي يا تشتغلي معانا وقروش بنعزك قلت ليها تف عليك وعلي الرباك انتي مجنونه انا م بشتغل معاك لو كسرتي رقبتك كفايه فضيحه واحده وانا م جيت هنا عشان اتحاور معاكم انا جيت هنا تشوفو لي صرفه للفي بطني دا وتاني حتي اتفاهم معاكم قتيبه قال لي م مشكله انا بتصرف في الفي بطنك دا بس عندي شرط تشتغلي معانا قلت ليهو اشتغل شنو قال لي ح تعرفي بعدين بس وافقي انتي اول وحلك عندنا قلت ليهو موافقه هناء قالت ليهو قتيبه انت جنيت بتتكلم كده ليه غمز ليها وبقيت في نصهم مافاهمه شي بس حسيت وراهم سر كبير قلت ليهو موافقه ي قتيبه ارح هسي خلوني ارتاح من الهم دا قال لي لا هسي الدكتوره عندها حالات بكره زي الوقت دا تجي هناء بتكون منتظراك وبكرر ليك بكره غير كده م ح تقدري تتخلصي من الفي بطنك دا قلت ليهو بالدقه والدقيقه بكون هنا رجعت البيت وخلاص شبه قلبي بقا قوي وامي اتكلمت معاي وقالت لي تاني ماف طلعه ولو ادعا الامر بطبلك ف البيت ي بت انتي بتفوتي وين م سامعه المصايب الفي الحله دي مالك دايره تجنيني انا لو جاتك حاجه احسن لي اموت ساي انتو امانه في رقبتي ما تجنينني انا قلبي انقسم النص ودخلت الغرفه بكيت قدرتي وصليت وبقيت ادعي ربنا انو ينقذني من الناس ديل لاني م حملهم ولا بقدرعليهم
تاني يوم امي بقت قاعده لي في قلبي غلبني البعملو بس لازم اطلع ولازم اتصرف اتسحبتا منها ومشيت لقيت قتيبه وهناء منتظرني مشيت معاهم مكان مهجور كده وبيت اوسخ من الوسخ في محل مقطوعه وفيهو واحده كده اظنها دايه ما دكتوره منظرها يخوف انا خلاص حيلي مات بقيت اتمتم قالت لي ارح م عندي زمن وبقيت مافاهمه شي والناس ديل دايرين يعملو شنو م عارفه انا بقيت تحت رحمتهم يا موتا يا حييت وكان في غيري برضو بنات كل واحده سارحه في التانيه وفي قلبنا الف سؤال واي واحده معاها الولد الغلط معاها حسيت نفسي نجسه لاول مره وقلبي مقطوع وانا احتمال الوحيده الحصل لي ما بي ارادتي بس ف نظر الناس الفي المكان دا بي ارادتي والدايه كانت بتتعامل معانا بي همجيه وتكورك فينا كاننا غنم انا استلمتني من العصر ولي المغرب م فكتني ونزفت نزيف مبالغه وهي شكلها ما بتفهم شديد متهجمه علينا ساي انا تاني م وعيت بي اي شي الا بعد زمن انا مجدوعه في مكان والكلاب تنبح جنبي والدم مغرق المكان وماعرفت انا زاتي وين شكلها غابه
الفصل الثامن
فتحت عيوني والمكان كان عباره عن ظلام وحسيت دمي مغرق المكان والكلاب جنبي تنبح ومافي اضاءه غير اضاءه شايفاها من بعيد وبديت استحضر انا وين والحصل لي شنو وفشنو والدم دا شنو اتزكرت اخر مره كان مشيت مع قتيبه وهناء واتزكرت الدايه والهمجيه الكانت فيها وحيلي كان م شايلني عشان اقوم والدنيا كانت برد وسبحان الله ما خوفتا نهاي رغم انو المكان الانا فيهو بخوف بس ربنا نزل لي سكينه وطمأنينه من فوق حاولت اقوم حسيت راسي لافي شكلي نزفت شديد واتقدرتا قومتا والمكان كان مخيف بس انا راكزه ومشيت اتجاه النور وكنت م شايفه غير النور دا قربت منو سمعت صوت مرا عجوز حسيت رجولي اتشعبطن في بعض قالت لي منو انتي وم تخافي ادخلي دخلت سلمت عليها وكانت قاعده في مكان بدوي مريح وهادي وبراها اتعوذتا ودخلت قالت لي م تخافي انا بني ادم م شيطان انتي الجابك هنا شنو المكان دا ماف زول بجيهو قلت ليها المكان دا وين يمه قالت لي بتعرفي البطانه قلت ليها لا قالت لي طيب جيتي هنا كيف قلت ليها دي قصه طويله ممكن يمه تديني ملابس قالت لي الدم دا شنو انتي عندك نزيف قلت ليها اي قالت لي كويس الشنطه ديك فيها ملابسي شيلي منهن قميص وتوب وشيلي الطش دا واستحمي برا في الصقيعه قلت ليها الصقيعه دا حمامكم قعدت تضحك قالت لي الصقيعه دي ارض الله الواسعه دي قلت ليها الناس بشوفوني قالت لي ماف زول بشوفك المكان ليل وغير كده الرجال بجو الصباح مشيت عملت القالت لي عليهو ولسه النزيف منكسر فيني وانا حسيت قوتي كلها كملت قالت لي فشنو وانتي منو حكيت ليها الكلام من البدايه بقت تتعوذ قالت لي انا م ندمانه اني اخترت الوحده وانعزلت عن العالم ورفضت الزواج ربنا يستر عليك ي بتي وقامت علي حيلا ولعت ليها نار وغلت لي حرجل وادتني قرض قالت لي امضغيهو دا علاجي لكل مرض الحمد لله لي ٨٠سنه م اتعالجت عند دكتور 🥼 بقيت امضغ في القرض وامضغ في حظي وقلبي انقطع منو وادتني الحرجل المغلي وطعمو قش قش غلبني عديل اشربو قالت لي اشربي عشان تتعالجي انتي محتاجه علاج شربتو بالرجاله وتاني عملت لي يانسون لاني كنت بكورك من الالم وببكي الشمس لمن شرقت هي قامت حلبت ليها غنمايه وعملت الشاي بطريقه بدويه حلوه انا كنت بتأمل فيها وفي شجاعتها وانها عايشه براها ف المكان دا شربت الشاي والمغص ماشي في زياده وانا ابكي واكورك ماقادره استحمل وحيل بقا م فيني بقيت عباره عن جنازه سمعت صوت رجال جوها وغلبني اشيل حيلي واستر نفسي هي قامت من مكانها سترتني والرجال سالوها قالت ليهم قاطعه الطريق قومو بالواجب وجيبو لي عدسيه معاكم وكتبت ليهم اعشاب قالت ليهم جيبوها وجيبو بندول الرجال مشو وانا الالم بقطع في قلبي وهي شغاله تغلي لي ف الاعشاب دي وانا اشيل واشرب المهم حاجه تروح لي الالم دا حسيت نفسي ارتحتا واظني غرقت ف النوم ونومتي كانت طويله لاني تعبت شديد فتحت عيوني لقيت حاجه مدينه خاته ليها صاج لحمه في النار ولابسه لبس بدوي كده زي البنشوفو في التلفزيون المره دي شكلها مثقفه شديد لانو المكان القاعده فيهو م عشوائي مكان مرتب شديد وهي زاتا مرتبه وانا بليل م كنت شايفه حاجه فتحت عيوني وبقيت اتامل ف الطبيعه حسيت براحه رغم انو وضعي م مريح قالت لي صحيتي انتي اها كيف من المغص قلت ليها كويسه قالت لي قومي اكلي انتي محتاجه دم دمك كلو اتصفا عاينت لي نفسي لقيت النزيف لسه قالت لي قومي استحمي وتعالي قلت ليها لكن الشارع قالت لي ماف شارع والمكان دا ماف زول بجيهو والرجال جابو لي حاجاتي وفاتو شغلهم م بجو لي نهايه اليوم قومي مشيت استحميت ونظفت المكان وولعت ليها حطب طلح وختت لي اللحمه قدامي قالت لي اكلي انا بقيت اكل شديد لاني كنت جيعانه وطبعا اول مره اتذوق طعم الشيه الحقيقي المرا دي عملتها كيف م عارفه ولا عشان انا جيعانه اكلت وهي تشيل وتزيد فيني قالت لي ينفعك ي بتي ويبقي ليك بصحه دعواتها كانت بتخش جوه قلبي بتزكرني بي امي وفجاه اتزكرت ناس بيتنا العبره خنقتني وبقيت ابكي قلت ليها امي بتكون جنت واخوي بكون جنا قالت لي معليش ي بتي احسن ليهم يجنو ويقولو روحتي من الفضيحه الانتي فيها قلت ليها فعلا والله وربنا يصبر امي ويلزمها الصبر قالت لي صحتك اهم من اي شي هسي ما تفكري كتير غير في صحتك اول م تبقي كويسه امشي ليهم قلت ليها طيب وبقيت اسال فيها اكتشفت انو ابوها كان عمده وكان قاعد نفس قعدتها دي وقالت لي م عارفه امي ولا قومت لقيت عندي ام عشت بدويه في الخلا دا وما احتجت لحاجه عندنا الاراضي الزراعيه الاولاد بزرعو وبحصدو وببيعو وبجيبو ليها القروش وهي بتحب حياه الباديه اكتر وما عندها استعداد تعيش لا في قريه لا في مدينه سالتها انها م اتزوجت قالت لي ما اتزوجت لاسباب كتيره م عايزه اجيب اطفال واعيشو في الخلا دا وانها ندمت علي قرارها دا وقالت لي هسي قروشي ديل البيرثهم منو ماعندي الا الرجال الشغالين معاي انا بقيت مستمتعه لي حكاويها وانها كيف قدرت تعيش في الخلا دا وهي انثي ومن كلامها اتعلمت منها كتير الرجال المساء جو جابو ليها قروش كتيره ختتهم في الشنطه الفيها الملابس وعملت ليهم الاكل في واحد سالها مني قالت ليهو عينك ما ترفعا عليها دي في رقبتنا قال ليها ما تقعد معاك تمشي بيتهم شاكلتو وطردتو وبقت تكورك في الرجال التانين قالت ليهم البت دي زي اختكم لمن تمشي لي اهلا حسكم عينكم واحد يقول فيها كلمه ولا يعاين ليها ودخلت جابت ليها قروش قالت ليهم جيبو ليها عبايات ولبس بدوي قالو ليها كويس وبكره م تنسو تاني تضبحو ليكم بهيمه البت دي عيانه قلت ليها يمه انا بقيت كويسه قالت لي دا بعرفو انا وبعدين انتي مالك خليهم يضبحو م خسرانين حاجه
بعد كنت تعبانه حسيت نفسي كويسه ومستمتعه بالزي البدوي ونسيت الدنيا بالفيها قعدت معاها شهر وكل يوم احلي من القبلو بعد بقيت كويسه قلت ليها يمه انا ماشه اهلي لمن دموعا جرت قطعت قلبي قالت لي ياريتك بتي اتمنيتك تكوني لي بت قلت ليها يمه انا هسي بتك قالت لي جوه عيوني وقلبي ربنا يبارك فيك ويحفظك ويكفيك شر اولاد الحرام ونصيحتي ليك ي بتي خليك بت ضكرانه الناس تعمل ليك الف حساب مش يستقلوك ويدمروك وامشي عديل في طريق الله ما بتجيك حاجه لو رقدتي في الشارع الحارس الله بس انتي اعرفي كيف تواجهي الدنيا بقوه وشجاعه واجدعي الخوف وراك قلت ليها اصلا انا بقيت م خايفه وانا راجعه يمه عشان اشيل حقي وانقذ باقي بنات الحله م يقعو ضحايا زيي قالت لي الله يحفظك عين العقل كلامك وما تشيلي هم لو احتجتي شي تعالي لي انا امك م عندي تلفون عشان اتواصل معاك بس تعالي لي قلت ليها انا زاتي م عندي تلفون قالت لي اي شي بشتري ليك انتي بقيتي حته مني قلت ليها لا لا يمه م محتاجه قالت لي عشان تطمنيني عليك اتصلي علي في تلفونات الرجال ديل قلت ليها كويس يمه وكانت حزينه انها ح تفارقني بس كان لازم امش اهلي امي بكون قلبها مقطوع كلمت الرجال جو ساقوني واشترو لي لبس زياده وتلفون وادتني قروش كتيره اول مره الاقي انسان طيب زيها والمسافه كانت بعيده شديد روحي طلعت حتي وصلنا حلتي نزلوني وادوني ارقامهم وفاتو غطيت وشي بالملفحه ومشيت لقيت جنب بابنا في صيوان كبير والناس كتار خوفتا م قدرت امش سالت لي شافع من شفع حلتنا ديل قال لي دا بكا انا قلبي بقا ادق وخلاص حيلي مات قلت ليهو المات منو قال لي ماتت بتهم نسيبه لقوها مكتوله ومجدوعه بقيت منططه عيوني معقوله السمعتو دا اكيد ديل اهلي طلعو الكلام دا خوفه من الفضيحه وخلاص انا في نظرهم ميته وفي نظر ناس الحله انا ميته وما عاد رجوعي ليهو لازمه وقررت اني اختفي بس افوت وين لو رجعت مكان كنت م ح اشيل حقي بقيت متكمكمه ومشيت جنب ناس هناء الناس اعاينو لي ساي م عارفه عاجبهم الزي البدوي ولا محتارين ولا مالهم م ركزت شديد تركيزي كان في بيت ناس هناء وجات طالعه ومعاها بتين غريبات ما شفتهن ف الحله وجاتهم عربيه حاولت الحقهم م قدرتا اتصلت علي الرجال قالو لي انهم قريبين لي شديد قلت ليهم تعالو سوقوني قالو لي خير قلت ليهم خير ان شالله بس انا عايزه اعيش مع يمه قالو لي تمام ورغم اني محتاجه اكون هنا عشان انتقم بس افضل لي حاجه مدينه لغايه ما اشوف لي صرفه ليهم ويا انا يا هم