رواية جبروت انثي الفصل الحادي والعشرون21 بقلم نوسه حمد
محمد مسكني من يدي وخشمو م فتحو بحرف وعاوزين نزوغ في وسط الجوطه ديك بس قتيبه وقف ف وشنا وقال لينا دخول الحمام م زي خروجه انتو تموتو هنا بس واتشهدو محمد قال ليها تبقا راجل تمد يدك علينا ولا راجل من رجالك ديل يصلنا اقسم بالله في لحظه بس احرق المكان دا بالفيهو عشان كده م تعارض طريقي انا سكت ليك استفذيتني وكذبت علي الايام الكنتهن معاكم والغضب الفيني قادر يحرق دوله كامله وعشان انت م بتعرفني انا شنو خليني اطلع من سكات قتيبه بقا يضحك بي استفزاز قال ليهو شوف الناس ديل كلهم لو سمحو ليك تطلع انا ما بسمح ليك الا روحك دي في يدي محمد مسك قتيبه من قميصو بي يد واحده الناس كلها مخلوعه قال ليهم تخلونا نطلع ولا اكتلو وقتيبه كان بفرفر تحتو انا خوفتا وبقيت اقول ليهو فكو ي محمد الشرطه جايه فجاه المكان جاط والناس بقو مرتبكين والكبار عاوزين اتخارجو بي اي فهم وما عديت ثواني وعلاء واياد وسعد جو وقدرو قبضو علي كل الموجودين من ضمنهم هناء وقتيبه وخطيبت اخوي والرجال الكبار لحظه كانت حاسم لشر نفوس كل الموجودين وكانت لحظه انتصار بالنسبه لي ومحمد م قادر اصدق ساعه حاضني ويبكي وانا اكعب منو كنت واقفه علي الهبشه علاء قال لي نوسه كفايه حزن وكفايه بكا انتو م تستاهلو ويلا نشيل أقوالكم عشان ترجعو بدري فرحت شديد وكنت متشوقه اعرف القصه والحاصل شنو ومحمد كيف قدرو يقنعوهو يمشي معاهم في اثناء م منتظرين عشان يشيلو اقوالنا قلت ليهو محمد انت مشيت معاهم ليه قال لي نوسه انا استفذوني وقالو انهم ماسكنك يا امش معاهم واشتغل معاهم يا يكتلوك انتي واختك انا خوفت عليكم فديتكم بي روحي وانا خليني انتي الحصل شنو ومالك متبرجه كده عيب ي نوسه انتي تظهري مفاتنك لي الرجال قلت ليهو محمد اقسم بالله غصبا عني ودي تبع الخطه وياريتا بقت علي التبرج محمد انا وزعت معاهم مخدرات وحضرت بت لمن ماتت بسبب الاجهاض وجدعناها محمد قال لي وجدعتوها ليه ي نوسه ليه م كلمتي ناس علاء قلت ليهو هم عارفين بس انا م كنت عارفه مكان رميناها لانو كان راكب معاي سواق قال لي السواق اليوم شفتيهو قلت ليهو اي وقبضو عليهو معانا قال لي بس تمام قلت ليهو تلفون البت معاي ي محمد اهلا يتصلو ليها وموصياني اني اكلمهم لو ماتت ونفسها كان تطلع من دي وتمشي تعمر بس ربنا م قسم ليها غلطت وندمت قال لي معليش ياها حال الدنيا كان احسن ليها تلدو ولا تدمر روحها كده ح تلقا البستر عليها هي وطفلها قلت ليهو دا ماضي خلاص كان بعد كده م بتنفع مشينا ادينا تلفون البت لي علاء وطلبنا منو يوصل وصيه البت ويتصل يبلغ اهلا ويسلمهم الجثه والسواق وقتيبه والدايه يعملو معاهم اللازم دخلوني شالو أقوالي من لحظه انا بت قاصر مافاهمه للدنيا شي واستدراجهم لي انا وغيري ووقوعنا في فخهم بالتخدير ودمارنا وفي نفس اليوم طلعونا بس الوقت كان متاخر اياد ساقنا معاهو البيت سلمت علي امو لمن شافتني لمن فرحت وكانت خايفه علي وحكينا ليها القصه من الاول للاخر وماقادره تصدق انو في ناس كده محمد قال ليها والله انا لو م شفت بي عيني والقصه دي حكاها لي زول مابصدقو الحاجه الكانت حاصله في خفاء بس كانت مدمره لجيل ومجتمع وبنات فيهم بنات الناس وفيهم البنات الاصلا مارقات والحمد لله انو العصابه دي انتهت والشرطه فتحت عينا للاشكال الزي دي ام اياد قالت لي انتي بت حلال ربنا يسعدك مع زوجك انا من شفتك اتمنيتك ليهو ولدي دا حالف م يخطب براهو الا اخطب ليهو اخواتو كلهم عرسن وسافرن مع رجالن وهو بقا حارسني قلت ليها ربنا اديهو بت الحلال قالت لي اختك ان شاء الله محمد عاين لي وعاينت ليهو قلت ليها يمه لو في نصيب ربنا يقويهو وما ح نلقا ليها الاحسن من اياد قالت لي ان شاءالله انتي اتكلمي معاها ونحنا جاهزين قلت ليها ان شاء الله بكره اول م اصل بكلمها اتزكرت اخوي وامي وانهم قالو انا مجنونه وانا شيطان طلعت تلفوني ورسلت لي اخوي لاول مره صور خطيبتو مقبوض عليها ومره في الحفله الكانو عاملنها قلت ليهو كده كيف وكانت لابسه لبس بنات م كويسات اخوي بقا يتصل عايز يعرف انا منو ابيت ارد محمد قال لي ردي قلت ليهو ارد لشنو كلامي كتبتو ليهو م ضروري يعرف انا منو وع فكره ي محمد انا طلعت من اهلي طلعه نهائيه واخترت حياتك قال لي نوسه ع عيني وعلي راسي وزعلك دا لحظه شيطان بأذن الله ترجعي واجيب اهلي اخطبك واجيب ليك حاجاتك واتزوجك قلت ليهو بس امي اتناقشت معاي قال لي امك كانت عمياء من الحقيقه بس بعد تعرف الحقيقه ح تشكرك وناس الحله كلهن بشكروك انتي نقذتي جيل قادم الفات دا خلاص بي خيرو وشرو عدا بس انقذتي الاجيال الجايه كان مصيرهم يكون اخطر منكم بس ربك ستر
عدينا اليوم مع ناس اياد امهم اكرمتنا وماقصرت معانا والصباح بدري قلنا ح نسافر علاء جا يودعنا وشكلو مرهق قال لي فتحت تلفون البت واستقبلت اتصالات اهلا ومشينا جبنا الجثه وعرفو الحاصل شنو امها من الصدمه م قدرت تستحمل وقعت وجاتا جلطه قلت ليهو الحمد لله انها انسترت ما اكلنها الكلاب قلت ليهو والدايه قال لي طبعا قبضنا عليها والناس ديل اعترفو بسهوله لاننا نحنا كنا عارفين كل اطراف جرائمهم بالادله مافيهم واحد بقدر ينكر حاجه والبنكر بنطلع ليهو الدليل تاني بعترف قضيه مهلكه من يوم انا عرفتها ما خليت حاجه م عملتها وحلتكم دي بجيها كل مره العايزو منك في كميه شباب مدمنين انا ح اوريك ليهم بالاسم بعد الناس ديل اتقبض عليهم ماف طريقه تاني ادخل ليهم صنف مخدر الحله لانو نحنا قطعنا كل جزورهم تمشي عديل تتكلمي مع الشباب ديل وترشديهم انهم اقرب مركز بتاع علاج ادمان اتجهو ليهو عشان مايضيعو اكتر ممكن يجنو عديل لو م لقو الجرعه ممكن يكتلو الروح عشان كده حاولي انقذيهم وتكوني م قصرتي اهلهم ح يشكروك وما تخافي البقتنع ليك ارفعي سماعه التلفون بلغيني انا بخليهو يتعالج مجان قلت ليهو طيب ي علاء ربنا يهون بقا يزكر لي ف الاسماء وفي منهم اولاد عمي والاولاد ديل صغار العبره خنقتني عديل اداني ورقه مكتوب فيها الاسماء وشكرني وقال لي ربنا يسعدك ويسعد محمد وارزقكم الزريه الصالحه قلت ليهو امين ويخلي ليك مرتك واولادك قال لي امين يارب تسلمي وفات نحنا طلعنا وراهو غشينا سعد مكان قاعد ومشينا الميناء ركبنا محمد قال لي بنزلك في اهلك واعملي حسابك ما تدخلي نفسك في حته ضيقه الاولاد المدمنين ديل ما ليهم امان قلت ليهو م تخاف علي انا قادره اقنعهم وح يقتنعو لانو م ح يلقو حل غير العلاج لانو ماف جرعه بقت قال لي تمام نزلنا في بيتنا لقيناهو فاضي ومطبل امي مستحيل تخلي بيت ابوي فاضي مشيت سالت جيرانا كانو بعيدين مننا شويه قالو لي ناس امك تقريبا رحلو الخرطوم احترتا امي ترحل الخرطوم دي معجزه قلت لمحمد في حاجه اكيد محمد قال لي طيب الحل شنو قلت ليهو نكسر الطبل ونقعد قال لي انا قعادي م مننو فايده انا عايز اجيب اهلي قلت ليهو طيب انا بقعد براي قال لي جنيتي مثلا مستحيل اخليك براك نحنا هسي نبيت هنا وتاني يوم نمش الخرطوم قلت ليهو لا انا عايزه اشوف اولاد حلتنا الادمرو ديل واقنعهم محمد قال لي ياخ كفايه انا تعبت والله م قادر استحمل قلت ليهو معليش نتم جميلنا للنهايه قال لي طيب تلاته يوم م بزيدهن ولا دقيقه خلاص انا عايز اتزوج قلت ليهو حاضر كسرنا الطبل وقعدنا ف البيت وسعد رجع اهلو انا تاني يوم بديتا بي اولاد عمي فيهم واحد ما بحبنا رغم اننا م عملنا ليهو حاجه دخلت البيت سلمت عليهم بقو محتارين الجابني شنو وانا لابسه كده ليه المهم سلمت عليهم وقلت ليهم عاوزه نزار قالو لي نزار عايزه بيهو شنو قلت ليهم ح تعرفو بعد اتكلم معاهو دخلت لي عمي لقيتو راقد ف السرير ومربط نزار بالجنزير منظر قطع قلبي من غير م اشعر دموعي جرت عمي متاثر شديد قال لي ولدي ضاع مني ولدي بارا اولاد الحله دمروهو ادوهو حاجه خلتو مجنون قلت ليهو لا ي عمي انا جيت عشان الكلام دا وبي امر من الشرطه وحكيت ليهو القصه كلها عمي شبه م مصدق بس الحاصل لي ولدو خلاهو يصدق قال لي انا الحله دي برحل منها قلت ليهو لا ي عمي م ترحل انا بفهمك اي شي نزار دا لازم اتعالج نوديهو مركز بتاع علاج ادمان وصدقني يا عمي ح ارجع احسن من اول انت بس ساعدني ممكن قال لي انا معاك بس وريني اعمل شنو واعزريني انا جاهل العلي عملتو ربطت ولدي بجنزير عشان ما يعمل مصيبه في زول قلت ليهو لا انا هسي بتصل لي الزول المكلفني بالمهمه دي اوصف لينا المركز ونمشي عليهو هسي قبل بكره قال لي سمح اتصلت كلمت علاء وحكيت ليهو قال لي لو قدرتي وصلتي البقيه واقتنعو ليك تكوني م قصرتي ومره واحده سوقيهم كلهم عشان يتشجعو ببعض واهلهم اتشجعو ببعض وريت عمي قال لي انا زاتي بمش معاك وفيهم فلان وفلان ماتو في الشارع م معروف سبب موتهم بس ارح نشوف البقيه مشينا بقينا ندق بيت بيت وندخل ونحكي ليهم نصهم الكتير اقتنعو لينا وديل الناس الكانو عاوزين اولادهم اتعالجو والبقيه اولادهم طلعو منهم وماعارفين ليهم بلد اكيد مشو يفتشو للحاجات دي في مكان تاني المهم قدرنا لميناهم وكانت حالتهم تحنن شبه غايبين عن الوعي ومافاهمين شي جبنا عربيه كبيره لميناهم فيها ووديناهم المركز وسجلوهم ومسكوهم مننا اهلهم شكروني ورجعت منهم محمد قال لي خلاص ممكن تقعدي مع ناس عمك ديل قلت ليهو طيب بس اهلي قال لي طيب اتصلي علي اخوك قلت ليهو طيب اتصلت وردا علي قلت ليهو كيفكم وناس امي كيف قال لي انتي منو قلت ليهو نسيبه بقا ساكت م ردا علي قلت ليهو مالكم فشنو امي ونهي وين قال لي نهي قلت ليه نهي مالا بقا يبكي ويبكي وانا قلبي بقا يدق وحالتي بالبلا قلت ليهو نهي مالا رد قال لي ادعي ليها