رواية جبروت انثي الفصل الثالث والعشرون23 بقلم نوسه حمد
اياد بقا يفتش في الملفات قال لي نوسه انتي اختك دي م شفتيها يوم قبضنا علي ناس هناء وقتيبه قلت ليهو متين قال لي اختك مسجله معاهم وانا اخدت منها اقوال وفي لحظتي حسيتا واقعه ضحيه للناس ديل قلت ليهو اياد عليك الله خليك جادي اختي عايشه قال لي عايشه ي نوسه وانا هسي ممكن اجيبا ليك قلت ليهو اياد اختي مسكينه اختي غير صلاتها وقرايتا م عندها شغله لغايه ما هناء قررت تنتقم مني وتوقع اختي واسال علاء قال لي نوسه انا مصدقك بس أنا القضيه طلعت من يدي خلاص قلت ليهو كيف يا اياد دي اختي قال لي نوسه م غلطتي انا ولا غلطتك انتي غلطت اختك قلت ليهو اياد اختي شكلها خافت مننا انا ومحمد خليني اشوفا اتفاههم معاها اياد عليك الله م تظلمها واحبسني مكانا اختي صغيره وكنت ببكي ومحمد بسكت فيني قال لي نوسه اختك غبيه ياخ مفترض تفتح خشمها ياخ قلت ليهو م عارفه ي محمد مالا
اياد قال لي دقيقه اجيبا رسل العسكري وجابا نهي اختي اتبهدلت وبقت كئيبه وكانت بتبكي وبتقول لي نوسه انا ح اموت قلت ليها نهي ليه م اتكلمتي ليه م فتحتي خشمك قالت لي افتح خشمي فشنو قلت ليها لحظه انا جيت وجات بعديني الشرطه قالت لي م شفتك قلت ليها كيف م شفتيني المكان كان جايط بسببنا وانو انا مبلغه الشرطه قالت لي نوسه انا كنت جوه خايفه وانجبرتا علي الحال دا قلت ليها الجبرك شنو يا نهي ليه عملتي كده قالت لي امي م وافقت علي العريس قلت ليها عريس شنو يانهي دا كلو تمثيل عشان تصلي المكان دا وانا نبهتك الف مره فلنفترض امك م وافقت تهربي معاهو قالت لي غصبا عني وما اكتشفتهم الا لمن وصلت وكنت حابسه نفسي نهاي م طلعت معاهم ولا خليت زول يلمسني وكنت خايفه بس هم حاجزني وفتشت لالف طريقه عشان اهرب بيها م لقيت لغايه م الشرطه قبضت عليهم وانا من ضمنهم وكنت مبسوطه انو الشرطه قبضت علي السجن ارحم لي من الشفتو معاهم انا ندمانه واستاهل دا ابسط عقاب ممكن اخدو انا استاهل اكعب من كده عصيت امي وطلعت منها وم سمعت كلامك صدقت خطيبه اخوي ودمرتني والحمد لله انها جات علي كده وحافظت علي شرفي وما اتعاطيت معاهم حاجه قلت ليها الحمد لله ي نهي ربنا حفظك وان شاءالله انا ح اعمل المستحيل ح اطلعك واثبت برائتك وهسي م تخافي انا معاك م ح افوت منك لو ادخل معاك السجن اياد قال لي علي شنو ي نوسه انا بطلعها بي ضمانه محمد قال ليهو مستعد انا بس نهي م تبيت ف السجن قال لينا تمام وبدا عمل الاجراءات ومحمد اتصل علي اهلو حولو ليهو القروش الحا نضمن بيهن نهي وطلعنا اياد حلف نمش معاهو بس محمد رفض قال ليهو معليش ح نجيكم بس زياره نسلم علي الوالده قال لينا تنورونا والله وبدل تاجرو امي اصلا براها ح تفرح بيكم محمد قال ليهو معليش انت شايف براك نحنا تعبانين قدر شنو عايزين نكون برانا ناخد راحتنا وح نجيكم ان شالله مشينا اجرنا في فندق ومحمد نزل جاب لينا ملابس وحاجات واكل نهي قالت لي نوسه راجلك دا طيب حظك انتي مفترض تشكري ناس هناء انهم عملو جريمتهم دي عشان تقعي في طريق محمد قلت ليها فعلا والله ربنا جبر بخاطري وعوضني وعقبالك ي نهي وان شاءالله بس تكوني اخدتي درس قالت لي اخدت درس ساي انا اخدت دروس وتاني من جنب امي م بزح قلت ليها امي ربنا اديها العافيه ويقومها بالسلامة قالت لي امي مالا يا نوسه قلت ليها امي من انتي طلعتي وقعت انشلت نهي بقت تبكي وم مصدقه وقالت الا نمشي ليها بليل دا قلت ليها نهي انا عازراك بس ماف طريقه نتحرك من هنا لازم ننتهي من القضيه دي وح اتصل علي اسماعيل بكره اخلي افتح ليها الاسبيكر خليتهم مقلقين عليك بس الحمد لله انا اتصرفت وفكرت وجيت هنا طوالي حضنتني قالت لي ربنا م يحرمني منك ي نوسه انا مبسوطه انو الدنيا جمعتنا تاني قلت ليها الحمد لله عدت بي خيرها وشرها محمد جا قال لي نوسه ارح عشان تاكلو وترتاحو حبه مشينا اكلنا محمد بقا يونس فينا ويحكي لينا بقصص مضحكه طلعنا من جو النكد شويه بعد خلصنا اكل محمد قال لينا ادخلو ارتاحو انا برقد هنا نهي قالت ليهو لا والله خليك مع مرتك انا برقد هنا قال ليها ادعي لي انها تكون مرتي حقيقه وطلع وقفل الباب نهي بقت محتاره قالت لي نوسه محمد دا قال كده ليه موش انتو متزوجين قلت ليها اي نعم انا متزوجه علي الورق بس عشان استر عرضي وهو كان موافق لغايه م حبينا بعض وعايزين نكمل باقي ترتيبات عرسنا جيت لقيت المصايب فوق دماغي انتي ماف وامي انشلت والحمد لله قالت لي محمد دا لو راجل تاني افوت منك م اشتغل بيك بس ربنا بحبك وقعك فيهو قلت ليها الحمد لله ربنا عوضني ادعي لي احظا بيهو للنهايه قالت لي ان شاء الله
تاني يوم اتصلت علي علاء سالتو من مرتو ولدت قال لي الحمد لله مرتي جابت نوسه قلت ليهو م شاء الله الف حمد لله ع السلامه قال لي سميتا عليك وان شاءالله تجي زيك في فهمك وصمودك وشجاعتك وفهمك وقوتك قلت ليهو ان شاءالله تجي احسن مني وربنا يبعد عنها اولاد الحرام وما تشوف شر في حياتا قال لي امين يارب اها وصلتو لشنو حكيت ليهو انو نهي اتمسكت من ضمن الناس بقا مخلوع قال لي دي اختك قلت ليهو ياها يا علاء قال لي طيب ليه م اتكلمت معاك حكيت ليهو بالحصل كلو واياد قال م ح يقدر يتصرف لانو القضيه اترفعت للقاضي قال لي فعلا ي نوسه بعد كده الا توكلي محامي وما تشيلي هم انا اي شي محتفظ بيهو حتي تخطيط هناء لي نهي اختك محتفظ بيهو بس انتي بكره شوفي محامي شاطر خلي يتابع القضيه دي واختك ان شالله تطلع وما تشيلي هم الحمد لله انها اتلقت حيه قلت ليهو الحمد لله م عارفه اشكرك كيف ي علاء انت ضابط مثالي م قصرت مني وانا المفترض اسمي عليك قال لي ان شاءالله قريب ح تتزوجي محمد علني وحا تولدي وان شاءالله تجيبي ولد وتسمي علي وهديتو جاهزه قلت ليهو كونو انو سميتو عليك دي براها هديه ربنا اديك العافيه وشكرتو وقفلت
اتصلت علي اسماعيل وقلت ليهو نهي لقيتا ومعاي هسي م مصدق كان لغايه م اديتو اتكلم معاها وقالت ليهو افتح الاسبيكر لي امي خليني اتكلم معاها اسماعيل فتح الاسبيكر لي امي ونهي بقت تتكلم مع امي وتبكي وامي شكلها منفعله ومبسوطه بس م قادره تتكلم نهي شبعت بكا قفلت الخط وبقيت اسكت فيها قالت لي انا السبب قلت ليها نهي دي كلها اقدار ناهيك عن الاسباب وخلينا نحمد الله انها جات علي كده وربنا يطلعنا من المصيبه الانحنا فيها دي محمد قال لينا كلو خير انا طالع اشوف محامي واجيكم قلت ليهو تممام محمد طلع بعد مسافه اتصل علي قال لي لقيت محامي شاطر البسو وانزلو لي قلت ليهو طيب لبسنا ونزلنا ليهو ووصلنا مكان المحامي اتكلمنا معاهو وحكينا ليهو من طق طرق للسلام عليكم قال لينا م عندكم مشكله حاولو جيبو لي الدليل البثبت نيه العصابه ديل وانا اسبوع بالكتير بطلعك براءه اتصلت علي علاء رسل لي كل الادله اديتن للمحامي ومشينا المحكمه وقدمنا المحامي بالنيابه عن اختي وحددو لينا جلسات وبقينا كل مره نمش الجلسه وفعلا م عدينا اسبوع المحامي طلع نهي براءه وافرجو عنها شكرت المحامي وحاسبناهو ومشينا اياد اتصل علي قال لي امي عازماكم قبل تمشو البلد قلت ليهو طيب حكيت لي نهي بي ام اياد وانها كانت عايزاك لي ولدا اياد دا قالت لي بعد الحصل لي دا مستحيل يعرسني قلت ليها مالك انتي والله تستاهلي سيد سيدو بس معليش ي دنيا قالت لي انا م عايزه عرس نوسه انا عايزه اقرا عايزه اكون متفوقه وح تشوفي نهي تانيه امي وقرايتي وصلاتي والبيت بنات الحله ديل كلهن م بنفعن معاي قلت ليها بنات الحله فيهن العفيفات الشريفات ديل يستاهلن تصاحبيهن ما تحكمي علي كل الناس بتجربتك السابقه قالت لي فعلا والله قلت ليها ارح نجهز عشان نمش العزومه لبسنا اللبسات الجابن لينا محمد نهي قالت لي الا البس زي لبسك قعدت اضحك قلت ليها انا دا مستقبلي ودا لبسي بعدين انتي عايزه بيهو شنو البسي فستانك ساي قالت لي لا بس الا البسو نفسي ي نوسه ولا م عايزه تديني قلت ليها كمان م اديك الا الجديده الجابا لي محمد نهي انبسطت وطلعت فيها احلي علي محمد قال ليها نهي مالك ومال اللبس والخمخيم نوسه الله قاسم ليها كده انتي مالك قالت ليهو حبيتو ونفسي اجربو قال ليها لكن في نوسه احلي منك قعدت تضحك قالت ليهو اكيد انت ح تشوف كده يعني عايز تشوفو فيني احلي قال ليها فيك حلو والله وانتي اختي ي نهي وربنا يسعدك قالت ليهو انا مبسوطه انو ربنا اداني اخو زيك م ح انسا وقفتك جنبي واي قرش صرفتو فيني ح ارجعو ليك بعد اشتغل قال ليها انتي مجنونه انتي كمان اختي تستاهلي اكتر من كده بنتكلم كده اياد جانا بي عربيتو واتصل لمحمد قال لينا الحاجه تشيل وتتصل نزلنا وركبنا العربيه اياد كان بعاين لي نهي محمد لاحظ ليهو وغمز لي انا فهمت بس م ختيت في بالي انو ممكن يعجب بي نهي وصلنا بيتهم امو لمن شافتني فرحت ورحبت بينا ولقيناها ضابحه لينا عديل وقالت لي نورتونا عقبال م نجيكم نحنا قلت ليها شرف لينا تزورونا وان شاءالله ح اعزمكم لي عرسي قالت لي سجمي عرس شنو انتي دا م راجلك قلت ليها راجلي بس عاقد علي لسه م كملنا باقي عرسنا قالت لي بس دي فرصه اياد زاتو اعرس معاكم بقيت اعاين لمحمد ومحمد اعاين لي وشبه م فاهمين لكن شكلها بتلمح لي انهم عايزين نهي بس معقوله اياد بعد الحصل دا كلو يقول عايزها ولا ح يحكي لي امو بي حقيقه نهي ودا الحا نعرفو الحلقات الجايه بأذن الله