رواية جبروت انثي الفصل التاسع والعشرون29 بقلم نوسه حمد
بدينا حبستنا انا ونهي بس نهي زمنها ضيق والشغله كتيره وامي مشلوله يعني انا كان لازم اقوم باللازم رغم انو جيرانا والاهل بساعدو بس ف تفاصيل ما بعملا اي زول الا ام العروس وامي ربنا اديها العافيه لو قايمه علي حيلا م بتقصر نهي كل م تحاول تساعدني بمنعا بقول ليها لا انتي ماعندك زمن خليك في تفاصيل نفسك وبنات عمي ماقصرن منها انا شغاله في شغلتي ومجتهده في نفسي وخلاص الزمن ضايق وعملنا حنه لي نهي ف البيت والعرس باقي ليهو يومين اياد جا يسوق نهي عشان يوديها الكوفير تتحنن وتاني يوم تلبس اسماعيل اخوي رفض قال ليهو لا الا تمش معاها اختها وانا محمد مكلمني انو ح يوديني ونهي غبيه لو كلمتنا انو ايااد جاي كان وقفناهو بس م اتكلمت وبتصل علي محمد م برد ورسلت ليهو ميه رساله وفعلا نهي م عندها زمن لو م سافرت اليوم عشان ترسم
محمد رجع لي قال لي مالك فشنو خير ان شاءالله حكيت ليهو بالحاصل قال لي صعب انا أصلكم اليوم بس انا عندي حل ارسمو لي نهي هنا وبكره نتحرك واكون بعد بكره الحفله رايك شنو قلت ليهو تمام مشيت كلمت اياد قال لي م عندي مشكله بس المهم نهي تخلص حاجاتا وهاك ديل قروش الرسم قلت ليهو لا يا اياد انا ح اناديها ليك اديهن ليها براك قال لي نوسه م تبقي معقده قلت ليهو لا والله م معقده بس انا ف القروش دي خلوني بعيد قال لي طيب نادي نهي عشان انا م اتاخر مشيت ناديت نهي اياد سلّمها القروش وطلع انا وهي طلعنا بعديهو اقرب كوفير واتوكلنا يا طلع سمح يا اتبهدلت ولحسن حظها لقينا بت شابه شكلها راسمه رسم مبالغه وختت في نهي رسم رهيب قلت ليها شفتي انتي زعلتي من اسماعيل لمن منعك تمشي مع اياد قبل حفلتك وكلو لخير ربنا رايد ليك ترسمي سمح قالت لي فعلا ي نوسه وانا نهاي تاني م بزعل لو في حاجه اتعكست علي وامر المؤمن كلو خير البت زاتا ظريفه ونستنا ونسه واتفقت معاها ترسم لي وشيلت رقمها قالت لي اتصلي علي بس م عندك مشكله رجعنا البيت تعبانين م قدرت اتصل لمحمد وكنا مجهزين اي شي وخالتي جات تقعد مع امي واهلي كلهم مأجرين ليهم بص سياحي ماشين احضرو حفله نهي محمد اتصل علي قال لي انا بره وانا كنت ي داب قايمه من النوم قومتا مخلوعه وطبعا انا كنت محبوسه لوني بقا رهيب وكنت ملفلفه شعري وحسيت نفسي اتغيرت شديد فعلا الاهتمام بنظف وبنور وانا ظهر فيني سريع لاني م كنت بعمل كريمات قبل كده طلعت اشوف محمد وكنت ي داب صاحيه ريحتو هو بره وأنأ جوه شميتا لبست لي توب هزاز وطلعت محمد بقا يتشهد قال لي نوسه بقيتي حلوه قعدت اضحك قلت ليهو كريمات دي قال لي خليك من الكريمات جد انتي بقيتي تجننني وكان بتغزل فيني لمن خجلت منو قلت ليهو محمد اسماعيل هسي بجي يكشنا ارح كان جايب معاهو هدايا اهلي قال لي هاك امي قالت ليكم حاجه بسيطه قلت ليهو والله امك م قصرت ماف داعي للتعب قال لي ماف تعب واتفضل ادخل محمد بقا يصفق ويسلم علي ناس البيت دخل سلم علي امي ومشا بهناك الديوان قال لي اي زول خلي يعمل لي قهوه ولا اقول ليك عايزها من ايدك وخلي نهي تجهز وانتي البسي عبايتك تمام قلت ليهو حاضر مشيت ظبطت ليهو قهوه اسماعيل شالا مني قال لي م أشوفك بهناك هرشني ومحمد اشيل وارسل لي خجلت اقول ليهو اخوي منعني المهم لبسنا وجهزنا واتحركنا طوالي محمد كان اشترا عربيه جديده ومشينا بيها وصلنا سريع واياد انتظرنا بس محمد قال ليهو ما تركز معاهن انا باجر شقه نقعد فيها لغايه بكره محمد اجر الشقه ومرت علاء جات قعدت معانا واول مره نتعرف بيها بت حلوه وراقيه ومحترمه والعجب بتها السموها علي قطعه سكر ومحمد مشا ناس العرس عشان يساعد اياد لو عندهم حاجه وتاني يوم مشينا الكوفير واستاذنت محمد اني البس قال لي م بحرمك دا عرس اختك اخدي راحتك اتمكيجتا معاها والبت ظبطتني شديد ومشينا الحفله واهلي كلهم جو وكانت الفرحه م ساعياني طبعا اياد عرف البت العجبت اسماعيل عليهو واتفق معاها يلاقيها يوم الصاله تشوفو ويشوفا وطبعا هو النوع الخجول داك خلاني امش معاهو سلم عليها وهو شكلو معجب بيها شديد وهي زاتا قالت ليهو كلم اهلي وكان فرحان شديد وحكا ليها ظرفو وقالت ليهو امك امي وان شاء الله اكون معاك ف الحلوه والمره حكيت لمحمد طوالي قال لي اسماعيل في باقي اليوم دا نمش ليهم ولو فعلا البت دي عايزاك نكلم اعمامك ديل م يرجعو وناجر شقه تاني وبكره اعقد قال ليهو احتمال م توافق ولا اهلا ما يوافقو نقعد الناس ساي قال ليهو واحتمال يوافقو نحنا م خسرانين شي نقول للناس انتو تعبانين نبيت الليله ونرجع بكره قلت ليهو فكره ي اسماعيل ولازم ننفذها قال لي تمام المهم جينا راجعين الشقه وودعنا نهي سافرو مصر والمساء مشينا لي اهل البت ابوها شكلو زول دغري قال ليهو والله حبابكم وانتو م دايرين سؤال عنكم ولدنا اياد عرس اختك وانا بشوف راي البت لو موافقه هسي بعقد ليك نحنا عارفين راي البت وانتظرناهو مشا اتكلم معاها واظنها قالت ليهو موافقه هم ناس بسيطين علي قدر حالهم طوالي محمد مشا العربيه وجاب ليهم قروش قال ليهم دا المال وبكره بنجيكم ناس عقد وطلعنا اسماعيل قال لي محمد مستحيل يقبل بي كده محمد قال ليهو نحنا اخوان واحتمال الف الزمن واحتاج ليك لو م مقدم ليك م ح القاك وانا صراحه ماشي بنظريه عندك ادي الناس اعمل رصيد للاخره ما للدنيا لانو المال بروح وبتفضل الروح وربنا يقدرني اسماعيل شكرو شديد قال ليهو م بينا شكر المهم انت تقضي غرضك دا جينا راجعين كلمنا اهلي وشده م انبسطو نوم م نومنا الليل كلو نغني وكنا ماجرين شقتين قصاد بعض ومبسوطين لي اسماعيل شديد تاني يوم محمد نزل اشترا بارد وحلويات وحاجات كتيره ومشينا العقد واسماعيل بقا مبسوط اتصلنا كلمنا امي وتزغرت ليهو ساي ونهي م قدرنا نصل ليها لانها مسافره وعقدنا لي اسماعيل وقال ليهم بجهز بجي اسوقها ان شاءالله ورجعنا ف نفس اليوم بيتنا وبقيت متعلقه بي امي شديد ومواصلين ليها في العلاج الطبيعي والحمد لله امي قدرت تمشي وعملنا ليها كرامه انا فرحت شديد انو امي قامت قلت مرت أسماعيل نيتها بيضاء قدمت الكلمه السمحه والحمد لله امي ربنا شفاها وما ح تحتاج تاني لي زول
وخلاص انا بقيت في العد التنازلي ومحمد بقا مشغول بسرق اللحظات عشان نتكلم فيديو كول كنت مبسوطه بتفاصيل زواجنا وملهوفه شديد لي يوم فرحي وقبل العرس بيوم اتصلت للبت وجاتني ف البيت رسمت لي محمد حاسبها وبي زياده م قصر منها وتاني يوم جا ساقني مشيت الكوفير واهلي قالو جايين الحفله توالت الافراح علينا والحمد لله ويوم فرحي كان مبالغه والناس كتيره وامي مدينه جات وسعد وعبيد بي اولادهم وكانو فرحانين لي من جوه قلبهم ❤️ولاول مره اشوف بيت ناس محمد بعد خلصنا الحفله دخلنا البيت بيت كبير وواسع ومبني بنيان رهيب قال لي دا بيتك حمدتا الله ليل نهار علي العوض الجميل الحمد لله اهلي اطمئنو علي وفاتو ونحنا سافرنا مصر لشهر العسل وجيت راجعه مخصوص لعرس اسماعيل وما شاء الله اسماعيل رجع شغلو وبقا نائب المدير وراتبو كان كويس شديد فصل الديوان وعملو نظام غرفه وصاله وحمام داخلي وميزهم شديد وجاب عفش ليهو ولي امي البت زي ما بقولو كراعا خدره فتحتها عليهو والحمد لله جات بي رزقها وامي م شاء الله مسكت بيتا وكانت مبسوطه وفرحانه لينا والحمد لله حياتنا اترتبت احسن من اول ومرت الايام والشهور والسنين نهي ولدت واسماعيل زاتو ولد وانا ربنا م قسم لي محمد كان مقلق شديد من الموضوع دا كنت بقول ليهو كل شي قسمه بقول لي نفسي في ولد ومرت السنين من غير م نحس واولاد نهي واسماعيل دخلو المدارس وانا لسه ربنا م اكرمني وكلام اهلو كتر والمضايقات كترت كانو بزعجونا بالاسئله المكرره كل لحظه حلوه بخربوها لينا بالسؤال واهلو قالو انا م بلد وانا ومحمد الوحيدين عارفين اني بلد بعد معانا اقنعت محمد نمشي الدكتور كان متردد بس اقنعتو قلت ليهو لو عندك او عندي مشكله ح تتحلا احسن من نقعد ساي قال لي تمام وعملنا فحوصات ودخلنا الدكتور طمني علي صحتي قال لي ما عندك شي عشان يبقا سبب لعدم تاخر الحمل بس المشكله في زوجك للاسف عقيم انا الدنيا ضلمت في وشي وقلبي وجعني وجع ومحمد لاول مره اشوفو يبكي عديل