علي اخوي صحاني قال لي قومي في ضيوف لبستا عبايتي ومشيت الغرفه الفيها ابوي والضيف كان قاعد جنب ابوي وانا وشو ما شايفاهو. مشيت ومديت يدي اتفاجات انو الضيف محمد بقييت م شايفه عديل وقبل يقوم ويمد يدو سحبتا يدي وخليتو مدا يدو وقلت ليهو معليش انا م بصافح وما اديتو نظره خليتو واقف ولسه مادي يدو جيت جنب ابوي قلت ليهو يابا كيفك هسي قال لي تمام ي بتي وكدي سلمي علي راجلك قلت ليهو راجل ياتو راجل انا ما شايفه هنا في راجل غيرك علي قال لي نسيبه اسكتي قلت ليهو مالي انا ي علي قاعده ارد علي ابوي ومالكم انتو قلبتو علي قال لي احترمي راجلك قلت ليهو علي اول شي انا محترمه نفسي جدا والراجل البتتكلمو عنو دا انا عيني م وقعت فيهو لانو لو اديتو نظره تاني حرااااام علي لانو للاسف بقا غريب بالنسبه لي محمد قال لي نسيبه اديني فرصه اشرح ليك انتي في حاجه م عارفاها قللت ليهوانت ليه ما اديتني فرصه لي جدعتني وانا بت قاصر وفي بلد انا م بعرف فيهو زول ياخ انسانيه ساي ما كان تجدعني مهما وصلت من الغضب ما بتفوت بت شافعه مافاهمه شي في شقه براها ولو ما اتصرفتا انا بحكمه هسي كان تكون فضيحتي بجلاله علي قال لي نوسه كفايه ادخلي جوه قعدت ف السرير قلت ليهو مع احترامي الشديد ليك يا اخوي بس عندي كلام عايزه اقولو لمحمد ومحمد شغال لي نوسه افهميني عليك الله انا دموعي بقت عشره عشره قلت ليهو عشمت فيك خير ي محمد وقلت خلاص ربنا انقذني واحتمال اتعالج من الحاجه العندي الغلبت اهلي ديل واصريت اني احكي ليك الحقيقه عشان ما تكون مغشوش وما وقفت علي كده بعد انت جدعتني وجينا راجعين لي ابوي بخيبت رجانا انا واخوي الخرجو ليهو بسببي ابوي ما استقبلناوطلعت عارف طلعت وين مشيت افتش ليك ي محمد لانو ربنا قال وجعلنا بينهم موده ورحمه رجعت افتش للرحمه واترجاك اني تشغلني خدامه عندك انت واهلك بدل اكون عايشه ساي وابوي انجلط بسبب حسرتو علي وانا ربنا رب الخير وقعني في راجل بالف راجل وبقا لي ابوي التاني والوحيد الشاف معاناتي العانيتا وبقا لي سند حقيقي ووصلني للانا فيهو دا لو م هو كان اكون لسه لافه ف الشوارع ويا محمد م طالبه منك غير ورقتي احترم اهلي ديل وطلقني انا مستعده اكتل روحي ولا ارجع ليك واهلي ديل تاني م ح يغصبوني عليك انا بقيت واعيه وفاهمه وطلعت منو خليتو ابكي واتحسر. حسيت نفسي ارتحت من هم جواي مشيت لقيت امي تعمل ليهم ف قهوه قلت ليها يا حاجه اديني معاك كبايه عندي كلام عايزه اكتبو قالت لي ي بت دا كلام شنو بدل تحمدي الله انو راجلك جا ارجعك ويا بتي تنستري في بيتك قعد اضحك قلت ليها شايفاني ما مستوره شايفاني لافه بالشوارع يمه الستره م راجل الستره دي بتزوعوها انتو جوانا وابشرك يمه انا لمن اموت مستوره يمه انا كنت راقده ف الشارع ربنا جاب لي السترني واكرمني واحترمني وما سمعني كلمه شينه يمه انا واعيه وعارفه بعمل فشنو يمه انا كنت قاصر وانتو اتحكمتو فيني واقتنعت وقبلت حصدتا شنو راجل جدعني في شقه براي يمه انتي قادره تتخيلي انا تاني لو رجعت ليهو تبقا اهانه ليكم واهلو عارفين انو جدعني ما قالو ليهو غلط ارجع ليها وعمو العامل فيها صاحب ابوي ما قال ليهو ما تخليها براها يمه انا عندي كرامه وكرامتي فوق كل شي وماعايزه راجل عايزه اعيش جنبكم واكمل تعليمي واتفوق وارفع راسكم قالت لي احيا يا بتي قطعتي قلبي انا دايره اموت مرتاحه قلت ليها بعد الشر عليك يمه وانا لو م ريحتك ابقا م نسيبه بتك التعبتي فيها تسعه شهور يمه انا م صدقت انك رجعتي طبيعيه للحياه قالت لي الله يسترك
دخلت الغرفه وقررت اكشف عن حقيقتي في صفحتي والحاجه دي ح تكون صدمه لي ايلاف شديد المهم عملت تصوير لي لقطه اذاعتي في التلفزيون وكتبت عليها كلام انا متاكده ح اغير وجهه نظر ناس كتار للحياه وحكيت عن معاناتي من المرض والطرد من المدرسه وزواجي الفشل بسبب مرضي والحياه الانا رجعت ليها اقوا من اول واني تاني م ح اتاثر بكتابه ولا حقد ولا حسد لاني بقيت محصنه نفسي نزلت المنشور وقفلت التلفون
بكري اتصل علي قال لي نوسه ابوي من فوتي بقا متغير وما طبيعي وخايف عليك طبعا انا مستعده اموت ولا عمي محمد اشوف عليهو مكروه م خليتو تابع كلامو قومتا لبستا عبايتي وطرحتي وشيلت شنطتي ومشيت دايره استاذن منهم علي قال لي لا م تمشي قلت ليهو ليه م امش دا ابوي الوقف جنبي علي انت عايزني يعني انقطع منو قال لي م كده بس م تمشي براك انا بمش معاك قلت ليهو طيب اجرنا عربيه ومشينا ابوي محمد لمن شافني قام علي حيلو وبقا امدح فيني الريله ست البنات الريله شنو كده ما عارفه انا اضحك ودموعي عشره عشره سلمت عليهو واطمئنيت عليهو وبكري جا لقاني قاعده سلم علي ومشا حسيتو م طبيعي لحقتو قلت ليهو ماش وين قال لي نوسه عايزه اتكلم انا ح اموت قلت ليهو علي اخوي ح يكتلني وح يفهم اني جيتك انت وانت عارف اني جيت لابوي قال لي نوسه انا عارف انك ما ح تجيني انا عشان كده كذبت عليك قلت ليهو بكري بالغت علي اخوي ح يشك فيني قال لي خلي يشك ي نوسه علي اخوك دا كان وين لمن انتي كنتي معانا قلت ليهو بكري افهم ديل اهلي قال لي انا م قلت ما اهلك بس ي نوسه نحنا الاهلك انا م قادر اشتغل ابوي بقا ما فاهم انا مالي قلت ليهو بكري اعفي لي انا اعمل شنو ماعندي شي بقعدني هنا بكري حسيتو م طبيعي قال لي نوسه انا ح اتزوج بت عمي💔 انا بقا قلبي مقطوع قلت ليهو الف مبروك قال لي نوسه انا م مرتاح انا ما عايز اظلم البت معاي قلت ليهو وانت تظلمها لي بت عمك اولي بيك وح تكون منتظراك وح تكون بتحبك قال لي بس انا م بحبها بحبك انتي ي نوسه سكتا وم رديت عليهو وانا من جواي نفسي اقول ليهو انا بحبك بس م عايزه اكون انانيه مشيت وبقا يتكلم معاي م رديت لقيت علي اخوي اشرب في قهوه مع عمي محمد قعدت وبقيت سرحانه عمي محمد قال لي كيفك ي بتي انا بعد كم يوم جاي لي ابوك وجاي اعزمكم عرس بكري انا قلبي من جوه مقطوع قلت ليهو الف مبروك وتنورنا وتشرفنا ي عمي وقلت لي علي يلا الزمن اتاخر علي بقا محتار فيني بس م ركزت معاهو قال لي نوسه مالك اتغيرتي انتي عايزه الولد الاسمو بكري دا ولا شنو بقيت اتمتم وغلبني ارد زغتا من الكلام بس كان ظاهر من وشي وصلت البيت دخلت غرفتي وشبعت بكا بعد امي جات قالت لي قومي ابوك دايرك حتي صحصحتا ابوي بقا يحنس فيني عشان ارجع لمحمد اقنعتو وطمنتو اني م محتاجه راجل في حياتي غيرو هو وعلي ووريتو اني عايزه انجح حتي افكر تاني في عرس ومشيت
مسكت تلفوني ولقيت ليك المنشور عامل الفين لايك وتعليق والناس مبهورين بي شديد وناس حلتنا فخورين بي شديد وكل زول مشير منشوري ومفتخر بي شكرتهم شديد وبقيت مبسوطع ومرتاحه نفسيا
جذبتني الرسايل لقيت رسايل ايلاف في وشي وطبعا افتكرتها عايزه تعتزر لي لقيتا كاتبه لي مفتكره نفسك ح تغيظيني بنجاحك وزي ما كتبتك مره بكتبك الف مره قلت ليها كدي جربي يا حاقده ي حاسده انتي معاك الشيوخ والدجل والشعوزه وانا معاي ربنا وكتابو وحظرتها فجاه جاتني ليك طلب دردشه جديد فتحتو لقيتو محمد ود عمتي وساعه فاتحه دردشتو بين ارد وافتح نيران جهنم علي او اطنش واريح نفسي من الماضي انتو رايكم شنو
الفصل الرابع عشر14
جاتني دردشه جديده من حساب فتحتها لقيتو محمد ود عمتي ساعه انا فاتحه الدردشه وبتكلم مع نفسي هل ارد ولا لا بالاخص انو هو ود عمتي بتربطني بيهو صله رحم بس كل م اتزكر انو اتزوج البت الرسلت ليهو منها انا رسايل اتغاظ وهو شافني قريت محادثتو وبقا يشيل ويترجا فيني اني ارد م ركزت معاهو حظرتو وارتحتا من هم وما كده بس مسكت الحساب نظفتو من ناس حلتنا بتاعين الشمارات واخترت اني ابعد منهم نهااااي
مرت الايام وانا مبسوطه مع اهلي اتصل علي المدير وقال لي اها الثانوي ح تقريهو وين قلت ليهو انا رجعت البلد مع اهلي وما معروف قال لي انا عملت مدرسه خاصه ثانوي ومتكفل بي دراستك وسكنك واعتبريها دي منحه مجانيه رايك شنو قلت ليهو انا م عندي مشكله اشوف اهلي قال لي تمام نحنا معاك في البريحك ولو اخترتي ي بتي تكوني في بلدكم نحنا متكفلين ليك بالادوات المدرسيه واللبس والكتب قلت ليهو جزاك الله الف خير ماف داعي للتعب قال لي العفو ي بتي انتي تستاهلي واشهد الله مكانتك من بناتي وداير ليك التفوق والبتبقي عليهو انا معاك قلت ليهو ح ارجع ليك يا استاذ
كلمت امي وابوي رفضو قالو لي مستحيل ما عندنا بت بتقعد بره البيت اتزكرت لمن هم طردوني ورقدت ف الشارع وين كان كلامهم دا قلت ليهو يابا م تنسا انك في يوم رفضتني والشارع دا كان ارحم لي منكم وما كل الشوارع فيها ناس سيئه والحافظ الله انا ربنا حفظني واتفوقت ورفعت راسكم وكل الناس بقت تعرفني يعني انو زول يضايقني دي مستحيله يابا وانا عايزه أتفوق
علي اخوي جا واترجيتو انو يوافق قال لي ع شرط انا بمش بشوف الوضع لو كويس ومعاك بنات ناس م عندنا مشكله فرحتا وشكرتو ابوي دمعتو في عينو قال لي تاني ح تفوتي تخليني قلت ليهو يابا كل خميس وجمعه وسبت بجيكم بمش نهايه اليوم السبت قال لي الله يوفقك ي بتي وهديل المدارس جنبك قلت ليهو م قادره انسا انهم رفدوني وقطعو قلبي وحرموني قال لي معليش ي بتي دا نصيبك
يوم اقش ف الحوش وكنت مغبره سمعت الباب يضرب فتحتو لقيتو بكري ومحمد عمي جو وجايبين معاهم خروف وحاجات كتيره انخلعت شديد بكري لمن شاف حالتي كده قال لي نوسه ماف غيرك بشتغل قعدت اضحك قلت ليهو انا وحيده والحمد لله دا قدري ومستمتعه بالحاجه دي دخلتهم لي ابوي وابوي بقا يبكي مع عم محمد وشكرو شديد امي قالت لي الحقي علي اخوك ف الدكان قبل امش السوق جريت كلمتو وجا داخل شايل خروفو واكرمناهم وماقصرنا منهم بكري طلب مني اوديهو بحر حلتنا انا رفضتا لانو اهلي ما بخلوني بس قعدت معاهو في الشارع وكنا بنعاين للناس وبنعلق فجاه لمحت في يد بكري دبله قلت ليهو مبروك بقا يدس في يدو مني قلت ليهو بكري الله يسعدك ما تتحسس وكان مهموم وماقادر يعاين في عيوني قال لي نوسه عرسي بعد اسبوع ونحنا جينا نعزمكم وما تجي انتي قعدت اضحك قلت ليهو والله اجي كيف م اجي واتناقشت معاهو انو ينساني ويبدا حياه جديده وانا ما يركز معاي حسيتو ما قادر يرد رجعت منو غرفتي قفلتها علي وشبعتا بكا انا حبيتو اكتر مما هو حباني بس م عندي نصيب في الحب قررت اني اقفل قلبي علي كده وانسا بكري عشان ح يتزوج قرار كان صعب بس ما بي يدي واصلا بكري من عرفتو هو خاطب
لمن عرس بكري قرب امي قالت لي نجهز للناس ديل خبيز وفطير واخوك اشتري البهايم جهزنا الحاجات وانا نزلت السوق اشتريت لي ملابس لعرس بكري وزي الليله وبكره العرس علي اخوي اجر العربيه ورفعنا حاجاتنا ومشينا واول م عيني وقعت في بكري محنن انا قلبي انقطع وهو بقا م قادر زاغ مني وانا دخلت لقيت لي بنات قعدت معاهم وعلي اخوي مشا مع بكري وام بكري عرفتني علي الناس وكانو طايرين بي السماء وكل دقيقه يضيفوني بحاجه ناس كريمين شديد انا كنت مبسوطه وسطيهم بليل بعد الناس نامو بكري دقا علي قال لي منتظرك جنب الباب قلت ليهو لا ي بكري انت عريس الناس تقول شنو قال لي ياخ الناس م شغال بيهم انا قلت ليك تعالي عشان م اجيك جوه قلت ليهو لا وبطل جن قفلت التلفون وحاولت انوم فجاه جنب سريري اسمع صوت بكري قال لي نوسه تعالي انا بقيت ارجف وبقيت اتلفت فجاه جات امو قالت ليهو مالك ما نومتا بكره بتقع علي وشك قال ليها نعسان والله بس اخو نسيبه دا رسلني ليها طبعا بعد كده لازم اقوم مشيت معاهو قلت ليهو بكري انت مالك فشنو حسيتو م طبيعي وعيونو حمر وكان بنطق كلمتين والتانيه بشهق فيها انا قلت روحو تطلع قلت ليهو مالك قال لي سكران قلت ليهو شنو بكري جنيت انت قعد اضحك قال لي جننتنيني انتي قلت ليهو حرام عليك انا عملت شنو قال لي شوفي انا م قادر انساك وتعبتا والسكر ما حل بس من شفتك انا ما قادر نوسه انا بحبك قلت ليهو بكري اقسم بالله انا حبيتك اكتر منك بس ي بكري انت خاطب وماصاح زاتو هسي نقيف الوقفه دي تقتنع بقسمتك وانا بدعي ربنا يسترك دنيا واخره وبتمني ترجع بكري المتعلم الفاهم الانا عرفتو وماتضيع مستقبلك بسكر واوعدني ي بكري انك م تشرب تاني بقا يعاين لي في عيوني وطلع ليهو قزازه من جيبو لمن فتحها قربتا انا اقع ريحتها كعبه شديد عرفتو انو دا سكر شيلتها منو وجدعتها ومشيت جبتا لي جردل مويه بقيت اكشح فيهو لغايه م حسيتو صحصح واعتزر لي قلت ليهو لو فعلا حبيتني تقتنع بي مرتك وتنساني قال لي صعب ي نوسه قلت ليهو م صعب وانت قادر انك تنساني وعايزه امشي بقا يقول في شعر وكان بنم زي ابوهو شكلهم ما شاء الله بكتبو اشعار كل حرف منو كان بيطلع بيقطع قلبي وهو دموعو عشره عشره قطع قلبي ودعتو وقلت ليهو دي اخر لي قعده معاك انت بقيت راجل متزوج ومشيت وجاتني نفسيات عديل وتاني يوم العرس والناس تلبس وطبعا بقيت اتهرب من بكري وهو كل م يجي داخل جوه محل النسوان يفتش لي بعيونو وجات لحظه السيره والناس سيروهو لي بت عمو انا لبست ومشيت معاهم وقلبي بتقطع وما انتظرت لمن ساق مرتو جينا راجعين البيت وكان قلبي مقطوع علي حسا بي سالني م رديت عليهو ونفسنتا عديل وروحي دي طلعت ما قادره اتخيل بكري مع غيري وطبعا عروسو كانت حلاتا وصغير شافعه ساي فرحانه بالتوب والمكياج اظنها ما فاهمه للعرس شي بس شكلها بتحبو شديد وبكري بتحبا ولد بالف راجل ❤️
يوم بفتش في الفيس والرسايل لقيت لي رسايل كتيره من حساب فتحتها عباره عن تهد*يد ومرسلن لي صورتي انا وبكري جنب باب بيتنا وكان ماسك يدي صوره بعيده بس وشي كان فيها ظاهر وكاتبين لي عامله فيها الشريف الرضي ح نفضحك في كل القروبات ويا انا يا انتي الاسلوب دا عرفتو دي ايلاف ماف غيرها معاديني في الدنيا دي بس الشي الشطب راسي ايلاف الصورني ليها ورسل الصوره منو معناتا ما هي براها ف الغيرها العايزني اقع وادمر ووصلو معاي مرحله التهد*يد