محمد حسيتو استغل ضعفي عشان يضغطني وانا بقيت بين امرين كل واحد اصعب من التاني قلت ليهو محمد حرام عليك عشان العشره البينا استرني بس انا م عندي استعداد اكون زوجتك ومانفسي وانت متزوج الحمد لله قال لي نوسه اختاري يا تكوني مرتي وتكملي تعليمك يا ورقه طلاقك واهلك ليك حريه الاختيار قلت ليهو انا ح اوفق اني اكون زوجتك بس ما من قلبي وما نفسي اكون ليك زوجه قال لي ح تتعودي وح تكوني زوجتي علي سنه الله ورسوله قلت ليهو علي سنه الله ورسوله بس ف السر قال لي ف السر من اهلي وزوجتي بس اهلك ح ابلغهم بتلفون عشان م يتعبو يفتشو ليك قلت ليهو طيب
مشيت معاهو وكنت بطني طامه بس افضل لي اكون معاهو واكمل تعليمي ولا اسافر مع محمد ود عمتي ويدمرني وم اكمل الطريق النفسي امشي فيهو قلبي كان مقطوع شديد بس استحملت وصلنا شقه نزلني وقال لي انا ح امشي لي مرتي اتحجج ليها واجي اقعد معاك اسبوع بس الليله ح تبيتي براك قلت ليهو حرام عليك ي محمد انت مفتكرني بت ماشي معاها عشان تجدعني في شقه براي ودي المره التانيه ي محمد عليك الله لو عندك زره رحمه عاملني كانسانه م تستغل ضعفي انا م ضعيفه بس الدنيا كسرتني ولو استخدمت قوتي لا انت لا اهلي م ح تقدرو علي خاف فيني ربك انا تعبت والله تعبت ورغم اني م نفسي ارجع ليك بس لو أعلنت رجوعك لي قدام اهلك وزوجتك انا اوعدك اني اكون ليك زوجه وما اقصر منك واخاف فيك ربنا في وجودك وغيابك قال لي نوسه م عارف اقول شنو بس انا صعب اني اكلم مرتي قلت ليهو خايف منها صاح ولا بتحبها م عايز تكسر خاطرها قال لي نوسه ما تسالي كتير بس انا عايز ارجعك ونفسي تكوني زوجتي قلت ليهو انا ح اوافق ع اي شي بس اعلن رجوعنا وصدقني ح انبسط بس عليك الله م تكسرني اكتر مما كسرتني قال لي خليها للظروف انا ح اعلن زواجنا اذا ولدتي مني قلت ليهو لمن الد ح تعلنو حرام عليك قال لي نوسه خلاص قفلي الموضوع دا واديني حل نهاي لو م موافقه انا هسي بسلمك اهلك قلت ليهو تمام موافقه قال لي انزلي دا المفتاح ودي الشقه مسافه تغيري انا ح اجيب لي اكل قلت ليهو تمام دخلت غيرت ملابسي واتصلت علي بكري قال لي نوسه اوعك توافقي علي الزله والاهانه دي قلت ليهو كيف ي بكري انا اهلي ح يغصبوني علي ود عمتي قال لي افضل ليك ولد عمتك من الزله دي وليه انتي زاتك تعملي كده نوسه حرام عليك ما تتوهي ف النص انا بترجاك ترجعي لصوابك قلت ليهو اعمل شنو يا بكري انا خلاص استسلمتا قال لي ترخصي نفسك قلت ليهو بس دا زوجي علي سنه الله ورسوله قال لي ماقلنا شي بس هو ماعايز يعلن رجوعكم وفضل انك تكوني زوجه سريه نوسه انتي لو قبلتي انا م موافق وانتي عارفه معزتك عندي انا والله ماخليت مكان م فتشتك فيهو م صدقت انك رجعتي لي وعلي فكره يا نوسه علي اخوك صعب م عارف لو شافك ح يحصل شنو قلت ليهو علي انا عازراهو كتر عليهو حياتي اتشربكت قال لي انتي الشربكتيها كان ترجعي بيتكم وتصري علي عدم موافقتك بي ود عمتك ولا تهربي مع محمد قلت ليهو خلاص بقت كده قال لي تمام يا نوسه ومدام ح تكوني زوجه تانيه كان توافقي علي قلت ليهو انا م زوجه تانيه انا الاولي قال لي نوسه خلاص البريحك انا م ح ابلغ اهلك وعلي فكره محمد راجلك دا ممثل بارع ياخ والله لاخر لحظه محسسني انو زاتو ما عارفك وهو طلع متفق معاك المهم علي مشا ع اساس انك هربتي حاولي خلي محمد اول م يجي يتصل ويبلغهم قلت ليهو تمام قال لي خلي بالك من نفسك انا ح اشتاق ليك ي نوسه وما ح انساك وع فكره مرتي قربت تلد وابوي حالف يسمي البت نسيبه قلت ليهو ربنا يحلها بالسلامه ووريني برساله قال لي خلاص بس انتي م تحسي انك براك لو كل الناس اتخلو عنك انا معاك ي نوسه وربنا يسعدك ويوفقك علي اختيارك والعفو قفل مني وحسيت كلامو جوه قلبي اتمنيت قسمتي تكون معاهو بكري راجل بمعني الكلمه بس مالي ف الطيب نصيب بقيت سرحانه لغايه مالقيت محمد في وشي لمن قلبي بقا ادق قال لي نورتي بيتك ي نوسه م رديت عليهو قلت ليهو محمد اتصل علي اهلي قال لي جدا اتصل علي علي اخوي وقال ليهو نوسه زوجتي معاي علي اظنو جاط فيهو وبقو يتشاكلو ودا يحلف علي دا الشي الوجعني علي اخوي قال ليهو دي م اختي انا نسيبه اختي ماتت من لحظه فكرت ترجع ليك وقفل الخط محمد حسيتو بطاعن فيني قال لي حتي اهلك اتبرو منك سكت منو وم رديت عليهو دخلت غرفه قفلتها علي ومحمد بقا يدق ف الباب م فتحتو لغايه م سمعتو قال لي انا طالع بجيك بكره ختيت ليك قروش ف الطربيزه تحتنا كوفير انزلي اتحنني واتظبطي عندهم انا بكره وانا جاي ح اجيب ليك معاي ملابس وسمعت باب الشقه قفل طلعت صليت وقريت شويه قران وبقيت اتزكر في كلام علي اخوي وابكي يعني يا اعملو الفي راسهم يا انا م بتهم بقيت اتحسر علي قسمتي اتزكرت ابوي بكون حالتو صعبه اتصلت علي. علي اخوي قال لي عايزه شنو بعد نزلتي راسنا قلت ليهو علي انا ما نزلت راسكم دا راجلي قال لي راجلك دا براك رفضتيهو وانا ابوي حنسناك ليهو بس انتي رفضتي وهسي بعد جاتك قسمتك السمحه العجبتا كلنا كبرتي راسك قلت ليهو انتو مافاهمني انا عايزه اكمل تعليمي انا شايفه نفسي في العلم اكتر مما شايفه نفسي في الحياه وانا وريتكم اسباب رفضي لي محمد ود عمتي انا م عندي استعداد اعيش في حرب كتابه ودجل وشعوذه انتو ما شفتو انا كنت بعاني كيف ساعتين بغيب فيهم عن الوعي اصعب مما تتصور مرات انا بحس اني ميته ونكير بسال فيني في اصعب من الاحساس دا وايلاف اي اطلقت منو بس عندها منو الجنا قال لي بتها لمن تكبر الله كريم قلت ليهو لا انا خلاص اخترت عايزاك تديني ابوي اعافيهو قال لي ابوي دايره تكتليهو انتي وانا خلاص تاني ماعندي اخت اسمها نسيبه البسألنا منك بقول نسيبه ماتت وطالما اخترتي تكوني زوجه في السر انسي انو عندك اهل ووراك رجال وانا لو عارف مكانك اقسم بالله اكتلك ميه مره وقفل الخط قلبي وجعني وروحي طلعت اتصلت علي بكري حكيت ليهو قال لي نوسه انا م عارف بس انتي اخترتي النار ح تقدري تعيشي كده قلت ليهو عشان اتعلم مجبوره وربنا يجبر بخاطري قال لي ربنا كريم ي نوسه انا م ح اقفل لغايه م تنومي وفعلا بقينا نتكلم لغايه م نومتا في الخط واظنو بكري زاتو نام والتلفون وقع مني عديل م وعيت الا بمحمد في وشي وماسك التلفون والمكالمه شغاله قال لي سته ساعات تتكلمي مع بكري انا بقيت اتمتم وقلبي قال شح وطاخ اداني كف حسيت انو تاني وقعت في حرب والله يستر
الفصل الثاني والعشرون
فتحت عيوني لقيت محمد في وشي وماسك تلفوني والمكالمه شغاله قال لي سته ساعات مع بكري وفي وقت متأخر معقوله يا نوسه انا بقيت اتمتم ودايره اقوم ابرر موقفي طاخ اداني كف بقيت م قادره وشكلو بكري سمع النقاش والاسبيكر كان فاتح بقا اقول ليهو انت لو راجل م بتمد يدك عليها محمد قال ليهو شوف ي بكري الفات شي والجاي شي ونسيبه دي رجعت لعصمتي حته انك اخوها وبخاف عليها وبتونسها لي انصاص الليالي دي تاني م عندي ولو لاقتك في الشارع سلام الله م تدي ليها فاهم ولا م فاهم وقفل الخط ومسك تلفوني حظر بكري وبقا يكورك ويجوط فيني حسيت انو نحنا بنمثل في فيلم رعب ولا في مسلسل المشهد دا نهاي ما وقع لي انو حقيقه وبقيت قاعده في ركن الغرفه زي المسجونه وشال مني التلفون وقال لي شوفي الحياه دي فيها انا وانتي وبس فاهمه حسيتو عصبي وجواهو مشاكل وفرغها فيني انا يعني وقعت ضحيه من كل الاتجاهات قلبي وجعني طلع من الغرفه بقيت ابكي علي حظي وبقيت ادعي ربنا ينتهيني من الكابوس دا وبقيت ادعي علي اي زول وصلني للزله والاهانه دي جا داخل قال لي انتي لسه قاعده قومي ارح ادخلك الكوفير دا وجبت ليك ملابس تعالي شوفيهم بقا يتكلم معاي كانو ما الشخص الكان بكورك فيني وبنهر فيني هسي انا طبعا واقعه تحت رحمتو خلاص مسكني من يدي وطلعنا لقيتو جايب لي ملابس كتيره وعبايات ونقاب قال لي م عايز زول يشوفك غيري والشي الجذبني لبسات كده زي بتاعت الرقص البنشوفهم في المسلسلات المصريه قلت ليهو دي لمنو قعد اضحك وقعد ف الكرسي وخلف رجلينو قال لي ليك يعني لمنو قلت ليهو اعمل بيهم شنو قال لي غير برائتك دي ماف شي خلاني اتمسك بيك اكتر قال لي دي بدله رقص يا ماما قلت ليهو طيب جايبا لمنو قال لي بنهره كده لمن انخلعت كيف يعني لمنو ليك انتي قلت ليهو انت مفتكرني بت شوراع صاح انا حركات المسلسلات المصريه دي م بتنفع معاي قال لي دا لو كان بالحرام انتي مرتي وانا عايز اشوفك بترقصي لي قلت ليهو لا طبعا انا مجرد تفكير حسيت اني قليله ادب وانت قليل ادب قال لي شوفي يا ماما ح تلبسيهم وح ترقصي وح تتعلمي وهسي دا كلو خليهو جهزي لي قهوه وفي شيشه في المطبخ ولعيها لي بخلعه كده قلت ليهو لا لا دا م عش زوجيه دا بيت دعاره قعد اضحك قال لي دا فهمك المحدود دا وبطلي نقه ويلا اعملي القلتو وبقا اكورك انا قلبي وقف بقيت اتكلم مع نفسي ياربي محمد دا الغيرو شنو م كان كده كان محترم لابعد الحدود فشنو خلاهو يبقا كده بقيت محتاره ودموعي نازله علي حالي قبلت الزله والاهانه بس احساس اني م كويسه دا م ح اعيشو نهاي نفسي م بتسمح لي مشيت دخلت المطبخ وبقيت افتش لي حاجات الشاي وحسيت انو الشقه دي كان فيها غيري وقلبي دقاتو زادت بقيت افكر ياربي اسالو ولا لا بعد مجازفات وصراع مع نفسي الداخلي قدرت اتخلص من احساس الرعب الجواي وعملت القهوه قلت ليهو الشيشه م بعرف قال لي تتعلمي قلت ليهو م نفسي اتعلم قال لي لا ح تتعلمي وتعالي اوريك بقا يفتش للفحم ووراني وقال لي ولعي معاها بخور قلت ليهو بخور اجيبو من وين قال لي جوه بتلقي قلت ليهو دي شقه منو ي محمد قال لي حقتي ليه سالتي السؤال دا قلت ليهو حاسه انو كان فيها زول ساكن قال لي اي كنت فيها انا مرات اهل مرتي بجو يقعدو معاها وانا اشتريتا عشان راحتي قلت ليهو محمد انت مالك اتغيرت كده فشنو بقا يتهرب من كلامي قال لي الاتغير منو ياني انا زاتي محمد قلت ليهو لا والله انت م محمد العرستو انا بقا سرحان وفجاه كورك فيني قال لي نوسه م تبقي ممله قلت ليهو انا م ممله بس هل القروش بغيرن الراجل م اتوقعت انك بعد الله يفتحا عليك تتغير للأسواء قال لي نوسه بطلي كلام وامشي جيبي البخور خليني اظبط راسي وامشي اوديك الكوفير انا ماشي الشغل مشيت دخلت الغرفه بتاعت النوم وقلبي اكلني حسيت انو الروح الكانت في المكان دا ما محمد براهو حسيت انو كانت معاهو بت والخوف داير يكتلني انا بكره اللف والدوران ومكان بكون فيهو لف ودوران م برتاح فيهو وفجاه سمعتو يكورك باعلي صوت انا جنيت عديل بقيت افتش للبخور زي المجنونه وفتحت الدولاب بقيت افتش لقيت لي رقم وطني بتاع بت وعاينت للصوره ما ياها المره الشفتها مع محمد وشكوكي زادت ذياده شلت الرقم الوطني ختيتو في نص الكتاب حقي الفي الشنطه وفتحت التوليت لقيت البخور شيلتو ومشيت اديتو ليهو حسيت انو ماياهو محمد وفي شي في حياتو او كان فعلا كده وانا بس م عديت معاهو ايام وبقيت افكر لازم اشيل تلفوني واحكي لبكري واهرب منو امش لي اهلي واصر اني م اتزوج ولد عمتي بس لازم اتخلص من كابوس محمد دا خليتو شرب شيشتو وقهوتو ونزلني الكوفير وانا زي البكما دخلت نادا بتاعت الكوفير وبقا يتونس ويضحك معاها ويعلقو علي انا خوفت منهم رسمي وبقيت منططه عيوني الشي الزاد خوفي قال ليها م تطلع الا لمن اجيها انا وحسيت انهم بعرفو بعض قلت ليهو محمد عايزه تلفوني قال لي عايزه بيهو شنو ماف تلفون تاني وفات وحسيت اني لو قلت لبتاعت الكوفير دي اديني تلفونك اتصل ح تكلمو والبنات الشغالات معاها قادرات برضو ح يكلمنها لي بقيت بعيوني بفتش لبت حلال ارسل بس لبكري رساله وانا م كنت عارفه انا وين المهم بتاعت الكوفير استلمتي قالت لي واحده افردي لي شعري لوحده تانيه تشيل جسمي وواحده تعمل لي جلسه ونظافه لي وشي وواحده تانيه تركب لي رموش وتظبط حواجبي ما ادني فرصه اتنفس دي تفكني لي دي لمن حسيت جاني هبوط وما شاء الله البنات مبالغه انجزني في ساعتين وبقيت منتظره الرسامه تجي وجات قالو لي الرسامه بتاعت الكوفير الاساسيه عندها مناسبه وانتي زوجك قال تجهزي اليوم شفقان اظنو عشان عرسان قلت ليهم لا لا انا متزوجني ليهو تلاته سنه بقن مخلوعاات قالن لي انتي شكلك مسكينه امسكي في راجلك دا قوي م تدي الغيرك فرصه سكت منهم وما رديت بقلبي قلت ليهن دا ما الراجل البمسكو فيهو قوي دا راجل عايز يغير الفطره الجواي وابقيني غازيه المهم انتظرت الرسامه جات وشكلها ما بتعرفهم بعد جات استلمتني كلهن طلعن ودورن شيشتن وقهوتنك وبقن يرقصن ويضحكن باعلي صوت الرسامه قالت لي ي بتي الجابك هنا شنو الكوفير دا مشبوه قلت ليها كيف قالت لي عديل اوعك تجي هنا تاني ولو عايزه بديك رقمي تتصلي علي قلت ليها تمام عندك رصيد قالت لي اي حكيت ليها بقصتي اتاثرت وادتني تلفونها وقالت لي اتصلي لي اخوك يجي يسوقك قلت ليها ديل م بخلني قالت لي انتي م عليك اتصلي عليهو ووصفي ليهو لمن هو يصل انا بعمل معاهن جوطه انتي زوغي برررراحه قلت ليها تمام رسلت لي بكري رسايل وفهمتو ووصفت ليهو انو يجي بكري طوالي قال لي بتحرك وحنتك م تخليها تنشف تطلعي نوسه انا م بخليك براك لازم اجيك قلت ليهو طيب المهم الرسامه خلصت مني وحنتي نشفت غسلتها وبكري قال لي انا بره اتصرفي اطلعي كلمت الرسامه قالت لي يلا انا بعمل معاهن مشكله وانتي اول م تحسي انهن كلهن متلمات فيني اطلعي وما عليك قلت ليها لا لا بضربنك قالت لي بقدرن بس انتي اطلعي قلت ليها تمام المهم عملت الاتفقنا عليهو وخليتن اتلمن فيها كلهن وطلعت لقيت بكري جنب الكوفير مخلوع علي لمن مقلق قال لي نوسه انتي كويسه قلت ليهو كويسه يلا نمشي من المكان دا عايزين نلف اللفه الاقينا ليك محمد في وشنا لمن قلبي قال شح