بقيت ماده يدي والاستاذ بجلد فيني بكل قوتو وانا ما حاسه بي شي وبعاين ليهو بس في عيونو نهاي ما رمشتا ودقا الناس كلهم الجو متاخرين ووقفنا ساعه يكورك فينا لغايه م المدير سمعو وجاهو قال ليهو ديل مالن يا استاذ قال ليهو ديل متاخرين بعد الجرس ضرب م دخلو الفصل عاين لينا المدير لقاني معاهم قال ليهو الليله بي نسيبتن دقيتهم معليش يا استاذ سامحن وديل طلبه صغار ما تتعامل معاهم كده قال ليهو لا دا اسلوبي البجي بعد انا ادخل بنجلد والمره الجايه بنطرد والعاجبو من هسي يقعد والما عاجبو يطلع انا لو بقا طالب واحد بدرسو ما فارق معاي لكن تسيب وقله ادب ما بتنفع معاي انا في يوم كنت طالب زيكم وكنت طايش وما جايب خبر لو رجعني الزمن ح اكون زي ما الاستاذه بتمنوني ودا كلو عشان مصلحتو والما عاجبو اتفضل اطلع والبطلع تاني م يدخل لي حصه كلهم خايفيين يرجفو انا طوالي طلعت المدير قال ليهو ي استاذ شويه ع الطلبه قال ليهو كده عاجبكم عاجبكم ما عاجبكم بخت الطبشيره وبطلع المدير فات وجا لاحقني قال لي معليش ي بتي داير مصلحتكم وانتي اكتر واحده عارف العلم معانا وكفاح وحرب لازم نخوضها انا بقيت محتاره دا استاذ شنو سالت المدير قال لي دا استاذ هندسيه ف المحليه هنا اساتذه الهندسيه بالحساب ودا اصلا م استاذ مهندس شغال في شركه هنا بس طلبنا منو انو يجي يدرس ونزل معانا والله من غير مقابل مادي قال لغايه م الوزاره توفر لينا استاذ وي بتي داير مصلحتكم انتي م تزعلي وهسي بجي بتكلم معاهو وعشان م تفوتي الحصص عليك هو اصلا بجي مرتين في الاسبوع المدير طلع وانا بقيت منتظره وشكلو الحصه خلصت بكري جا وكان ملهوف علي قال لي نوسه معليش الاستاذ جلدك شديد صاح وفتح يديني وبقا يمسح لي فيهو فجاه الاستاذ جا ومسك بكري جلدو جلد قال ليهو مالك ومال الطالبه دي قال ليهو شنو المالي ومالا وانت تجلدني ليه وزاتي ما عايزك حصتك دي واعتبر كلامي دا تحدي ورجاله والله تاني تجلد نسيبه دي انا اقيف ليك بره اجلدك جلد عمرك م ضوقتو انت بتلعب ولا شنو الاستاذ بقا هايج ويكورك المدير جا وبقا يعتزر قال ليهو معليش بكري دا اخوها قال ليهو اخوها كيف دا ابوهو محمد ودي ابوها حمد قال ليهو يا استاذ نسيبه دي لظروف صحيه كانت فتره بعيده من اهلا وما لقت غير عم محمد وبكري دا وبقو ليها اهل والناس كلها عارفين قصتهم المدير اعتزر لي بكري وطلعو واعتزر للاستاذ وبقا يهدي فيهو وانا قال لي اقعدي هسي نسيبه دي عايزه تعتزر ليك وتاني م ح تتاخر قال ليهو دي خليها تلحقني في مكتبي عايز اشوف فهما شنو وعايز اتكلم معاها قلت ليهو لا اتكلم هنا انا م بدخل لي استاذ مكتبو المدير حسا بي احرجتو بقا يعتزر ليهو قال ليهو بت جزيره فهما عيب تمش لولد مكان وهو براهو اعزرها الاستاذ بقا اتبسم وقال ليهو حصل خير وتاني م تكرريها وطلع وانا طلعت لقيت البنات قالبات المكان قلب وونستهن كلها الاستاذ ومتجمعاتت ونادني قالن لي ما قلتي الاستاذ م بعجبك انتي م شفتي لمن بجلد فيك بتعايني ليهو كيف تعايني ليهو جوه عيونو ماقلتي م ح يعجبك ما رديت عليهن ولسه مواصله سرحانه وهن شغالات اتشاكلن فيهو دي تقول ح يحبني انا ودي تقول ليه ما يحبني انا وكل واحده منبرشه فيهو براها قلت ليهن هوي ها انتن جيتن تقرن ولا تراهقن هنا قال لي الاتنين ودي مرحله بتمر بيها كل بت ولا يختي انتي ما بتحسي قلت ليهن لا انا بحس وبحب وبقيت سرحانه قالن لي بتحبي ي مجرمه كدي ورينا بتحبي منو وشكلو كيف طويل ولا قصير واخدر ولا اسمر وعندو لحيه ولا شنب بس وعندو وجنات زي الاستاذ دا قعدت اضحك قلت ليهن دا مقياسكن للحب بالشكل ولا شنو قال لي اها انتي النوع البتحبي القروش معناتا بتحبي جلابي قلت ليهن في الحب انا م حبيت راجل اكتر من ابوي ولمن قلت ليكن بحب قصدي اقول ليكن انا بحب العلم وبحب التعليم وبحب الكتاب قعدن اضحكن قال لي حبي ساي ونحنا بنحب والله وقعنا في حب الاستاذ دا ادمناهو واحده قالت ليهم انا كان ختيتو في راسي بحبو وبعرسو قلت ليها انتي بتحبي ساي احتمال متزوج وبي اولادو احسن تحترمن نفسكن وهو جابوهو يقريكن م يحبكن في واحده شليقه اسمها رغده قالت الا تمش تسألوا قلت ليها بي طريقتك الا عايزه تنجلدي قالت لي ومالو والله ولا بحس بالسوط منو وفاتت انا بعد كنت قايمه قلت كدي النقعد اسمع ردو جات من بعيد تتحسر قالت ليهن اخدن راحتكن طلع متزوج بس م والد انا بقيت اتبسم قالن لي شمتانه صاح وهن ما عارفات انو انا مرتو ودا راجلي
مرت الايام وانا كنت متكيفه شديد لحصه محمد وكنت بجي اول الناس البنات بقولن لي خايفه منو صاح وكان شرحو حلو طيش الفصل في الهندسيه بقا شاطر وبقا مهتم بي شديد بسالني كتير وبقومني كتير كان بديني احساس انو انا الطالبه الوحيده الفي الفصل ما معاي زول حتي بكري علق عليهو قال لي ليه الاستاذ دا مهتم بيك كده قلت ليهو احتمال عشان انا الاولي ماقدرت اقول ليهو دا راجلي نهاي بكري لو عرف دا راجلي ح يغير شديد ورغم انو علاقتي بيهو خوه بس لسه غيور علي وغيرتو دي ساعدتني كتير ولد واحد بسالني ماف كلهم بخافو منو وغير كده لو عرف انو دا راجلي ممكن م يحضر حصتو كتمت السر جواي وشكلو محمد زاتو كاتم السر جواهو والشي المحيرني تاني نهاي م سالني ولا اتكلم معاي برانا وبحترمني شديد قدام الناس ما حسس اي زول بالحقيقه
مرت الايام ورجعت الحله لقيت محمد ود عمتي قاعد مع ابوي سلمت عليهو ودخلت غرفتي استحميت وصليت وفتحت تلفوني لقيت محمد متصل علي كتير وميه رساله قبل اقراهم سمح اتصل علي قال لي نوسه وصفي لي مدرستكم دي جنب شنو عشان اجيك هناك قلت ليهو تجيني لشنو بصفتك شنو انا مشيت اقرا م مشيت الاقي الاولاد قال لي انا م ولد انا ود عمتك لحمك ودمك قلت ليهو ود عمتي هنا فوق راسي بس في مكان تاني لو لاقيتك كتف فوق كتف م عندي ليك حاجه وسلام الله م بديك ليهو قال لي ليه قلت ليهو لانو في جبتهك م مكتوب ود عمتي وانا سمعتي فوق كل شي داير تبقيني مطمع للاولاد بعد كانو بحترموني بعد اشوفوني مبارياك ح يطمعو فيني والاحترام بضيع قال لي نوسه انا ح اكون راجلك قلت ليهو محمد لو بقينا انا وانت برانا مستحيل اتزوجك انا وريتك وبعدين اكون لمعلوميتك انا لسه في عصمه راجل تاني قال لي قاعد يصرف عليك متواصل معاك انتي عايزاهو موش ياهو جدعك في شهر العسل كلمتو دي هزتني قلت ليهو الله اجازي الكان سبب في دماري وربنا انتقم منو وانا م جدعني عشان فيني كلمه عشان الحاله الكانت بتجيني بسبب فعايل مرتك واختصر علي نفسك ارجع مرتك عشان بتك وسوقا وامشو ابدو حياه جديده وانا شخصيا عافيه ليها قال لي م شغلتك قلت ليهو لو م بعدت عن طريقي بكلم اهلي قال لي عليك نور كلميهم انا زاتي عايزهم يعرفو عشان ف نفس الوقت يعقدو لي قلت ليهو يعقدو ليك وانا في عصمه راجل تاني قال لي شنو شابكاني عصمه راجل تاني قسيمتك دي انا وعلي بكره بنمش نجيبا وانا ولد عمتك اولي بيك من الغريب وخالي م ح يرفض انا بكلم فيك عشان تكوني عارفه تمشي المدرسه بهنا تجي تلقينا عقدنا م خليتو تابع كلامو حظرتو وقلبي بقت ادق ابوي احتمال يوافق ولو اتكلمت معاهو في الموضوع دا بقول لي عرفتي من وين بقيت في نار انا
جاتني رسايل من رقم غريب مكتوب فيها انا بكلم فيك عشان تجهزي ح نجيب القسيمه منو وح اتزوجك وح نسافر نتم باقي عرسنا هناك خليك جاهزه حظرت الرقم زاتو وبقيت سرحانه اتصرف كيف وقررت اني اتكلم مع محمد عشان ما انظلم تاني مره وقلبي كان موجعني انا عايزه اتفوق واكمل تعليمي وابوي احتمال يوافق عشان عايز لي الستره بس انا مستحيل اخلي تعليمي بعد الوصلت ليهو دا
رجعت المدرسه ولحسن حظي لقيت الحصه الاخيره بتاعت محمد انتظرتها خلصت وهو طلع من المدرسه ومشيت وراهو هو حسا بي اني وراهو وقف في شارع كده فيهو زقاق وانا جيت سلمت عليهو قال لي نوسه علي فكره انا مشتاق ليك وانا عيني في الارض عايزه ارد سمعت ليك طاخ بكري طار في محمد بنيه ودمو رشح في الحيطه ولا ادا محمد فرصه انو يدافع علي نفسو وبقا يضرب ومحمد ح يموت تحتو والناس اتلمت انا بقيت احجز في بكري واقول ليهو بكري فكو دا راجلي عليك الله فكو وبقيت احجز وامسك في بكري واقول ليهو والله دا محمد راجلي …
الفصل الثامن عشر18
بقيت اقول لي بكري عليك الله فكو دا محمد راجلي والله دا راجلي بكري بقا اعاين لي وفكا محمد قلت ليهو بكري حرام عليك والله انا م غلطتا دا راجلي ما تظلمني وهو بعاين لي وبقش ف الدم الفي خشمو الناس بقو اقولو ليها يازول انت مجنون مره ماشه مع راجلا تدقو انت اظنك متعاطي وهو نهاي م فتح خشمو محمد قام وكان دمو سايل مسكني من كتفي قال لي نوسه انتي كويسه قلت ليهو كويسه في راجل قال ليهم الولد دا سلمو للشرطه شكلو مجرم وكنت متوقعه رده فعل من بكري قصادي بس غير بعاين لي م عمل شي محمد قال ليهم معليش ي جماعه دا سوء فهم وبكري دا اخوي جزاكم الله الف خير وفرق الناس وبكري لسه واقف محمد قال لي نوسه خلينا امشي انتي الداخليه انا بعاين ليك
مشيت وانا قلبي بقا مقطوع وانا بعرف بكري شكلو دخل في صدمه وكانو م بتكلم مشيت وبقيت اتلفت كلّ مره وراي محمد شكلو عايز اتكلم مع بكري واتفاهم معاهو بكري احرجو وفات انا خلاص الدنيا مسخت لي م كان نفسي ادس من بكري الحقيقه وبقيت اتندم ياريتني لو اتكلمتا ياريتني لو وريتو من الاول وصلت الداخليه غيرت ملابسي وطلعت جيت الدكان لقيت عمي محمد بتكلم مع بكري وبقول ليهو الضربك منو ياولد اتكلم وبكري نهاي م اتكلم ساكت وكان بطلع في حاجاتو شال شنطتو وفات ابوهو لحقو ابا اتكلم عمي محمد جاني راجع قال لي نوسه فشنو انا حاسي الفيهو بكري ولدي دا بسببك بكري بعد عرس ما داير ينساك دي مصيبه شنو الوقعت فيها دي وحسيتو متحسر قلت ليهو يابا اعفي لي اذا سببت ليك مشاكل انا م قصدي شي انتو اكتر من اهلي قال لي لا بتي انتي عارفه معزتك عندي بس انا في ولدي ماعايز يفهم إنك متزوجه قلت ليهو ودا السبب في الحاصل الان قال لي كيف حكيت ليهو بالحصل بقا يتشهد ويستغفر قال لي ي بتي كان توريهو من الاول م كان تصدمي قلت ليهو خوفت يابا خوفت انو م يحضر حصتو قال لي اريتا كان بقت علي عدم حضران الحصه من الحصل دا قال لي شكلو رجع البلد والبلد فيهو شنو غير الدمار بي حالو دي بمش اتلما علي اسامه قلت ليهو اسامه دا منو قال لي صاحبو سكران وحيران وغير السكر م عندو شي طفشني من الحله بي ولدي كنت فاتح لي دكان هناك وحالي ميه الميه كبر بكري وكبرت معاهو الهموم لو ما كان طلعت انا بكري ولدي ما كان قرا حرف وكان اكون صايع ساي قلت ليهو يابا اعفي لي والله انا زاتي واقعه في مصيبه وانا محمد دا من شهر العسل تاني ما لاقيتو غير جانا في بيتنا والقدر جابو لينا استاذ ومشيت عشان اقول ليهو لو جوك للقسيمه ماتديهم افضل لي اكون معلقه كده ولا اتزوج ود عمتي ويحرمني من القرايه قال لي ود عمتك راجل البت الكتبتك قلت ليهو ياها قال لي م نصيحه انتي م توافقي وانا زاتي مابخليك توافقي انا كمان ولي امرك قلت ليهو انا لحقت محمد عشان اترجاهو م يديهم القسيمه وادمر تاني قال لي كدي قومي ارح نمش لي راجلك دا انا بتفاهم معاهو اتصل علي المدير وشال رقم محمد واتصل عليهو وقال ليهو انا ابو نسيبه تعال لي ف المكان الفلاني محمد اظنو كان قريب جا سلم علي عمي محمد وعرفتو عليهو وقلت ليهو دا ابو بكري عمي محمد قال ليهو بعتزر يا ولدي ونسيبه غلطت كان تكلم بكري ونحنا نسيبه دي في رقبتنا وبكري دا معروف هنا البتكلم مع نسيبه بكتلو عشان كده اعزرو دي عرضنا وامانه في رقبتنا محمد قال ليهو انتو فوق راسي بس بكري ما عايز يتفاهم معاي قال ليهو بكري م اتفاهم مع زول ورجع الحله وانا م ناديتك عشان بكري انا ناديتك عشان موضوع كانت دايراك في نسيبه وبقا يحكي ليهو ومحمد يعاين لي قال لي صاح الكلام دا قلت ليهو اي قال لي شوفي ي نوسه انتي ماف راجل تانيبغصبوك عليهو انتي تختاري بنفسك تاني شريك حياتك وانا اوعدك اكون ليك سند وتكوني في عصمتي لو ما عايزاني انا نهاي م بغصبك وماف راجل ح يلمس يدك من غير موافقتك وابشرك من غير م تقولي لي انا م كان اديتهم القسيمه ولا اقطع حبل الود البينا الا ارجع ليك واسمع منك واطلقك بس اغصبوني ع كده مستحيل وربنا يحفظك خلي بالك من نفسك لو احتجتي اي حاجه انا في النهايه زوجك ما تختشي مني قلت ليهو العفو مستوره عمي محمد قال ليهو اصيل ي ولدي وربنا يهدي سركم وترجعو لبعض محمد عاين لي وانا عاينت ليهو وكل واحد نظرتو كانت كلها حسره استاذنت منهم ومشيت الداخليه اتصلت علي بكري من تلفون واحده ردا علي وصوتو م طبيعي حسيت انو سكران قلت ليهو دا شنو البتعمل فيهو دا انت ليه كل مره تجري تسكر مفتكر السكر حل لا ي بكري لحظات وح ترجع تاني للفيهو وح تكون هردتا كبدتك ساي قال لي الريله ست البنات وبقا ينم ويمدح فيني وانا قصاد كل كلمه وجع كنت ببكي بكا حسيت انو بكري موجوع بسببي من جواهو المشكله انو عارف حقيقتي وانا ما وعدتو بشي بس دا الحب البجي غصبا عن عينك وعن الظروف كان جنبو واحد بتكلم قلت ليهو اديني ليهو اداني ليهو حسيت صوتو طبيعي م زي بكري قلت ليهو انت منو قال لي معاك اسامه قلت ليهو لي تديهو يسكر قال لي اكون لمعلوميتك انا الله هداني لي شهر م دخلت لي سكر في خشمي انا قاعد لا علي لا بي جوني اولاد الحله قالو لي بكري سكران وواقع ف الخور ما عديت ثواني بتناقش معاهو انتي اتصلتي وبعدين انتي منو قلت ليهو انا نسيبه زميلتو قال لي زميلتو ولا حبيبتو وهسي هو سكران بسببك قلت ليهو انا م حبيبتو انت م فاهم حاجه قال لي يا زوله كدي خير خليني اقنعو واسوقو الديوان لغايه ما يهدا شويه تاني بوصلو البيت قلت ليهو بعد توديهو البيت امش لي امو طمنها عشان م تقلق وقفلت منو كنت متوتره شديد وبقيت اصلي وادعي ربنا يهديهو وبكري م يستاهل شاطر ومحترم وود ناس ما نفسي حبو لي يضعفو 😭😭😭😭😭
تاني يوم الصباح مشيت المدرسه لقيتا مقلوبه ومعدوله وكلهم بتكلمو عن موقف امس والناس عرفو اني مرت محمد والبنات مشغلاتنا لي قال لي كيف هو زوجك وتكوني ما عارفه انو شغال هنا وكيف هو يدقك بالطريقه دي ويطردك كمان ولا بكري معقوله ما عارف زوجك وهو قريبك اكيد في سر ولازم تحكيهو لينا ما ركزت معاهم وما رديت علي اي واحده سكتا بس ولمن جات حصتو الناس اشيلو واعاينو لي وانا بعد م كنت بكون مركزه بقيت خجلانه وبقيت اتندم بحركتي دي وكلامي مع محمد بره المدرسه بكري طفش والناس بقو م مريحني بس بقيت م مركزه حتي محمد بقيت اتجنبو شديد لانو بكري قاطع قلبي لو جا ولقاني مع محمد ممكن يموت عديل وكده كده انا رافضه محمد عشان اتخلي عني وانا ف عز حوجتي ليهو م قادره انسي انو جدعني وانا ف شهر العسل التفكير ح يشل راسي والامتحانات نهايه السنه وبكري م جا لغايه م اكتشفت انو محمد نزل ليهو البلد واقنعو وجابو
رجعت البلد يومين قلت ارتاح شويه وبرضو م حكيت لي اهلي بي انومحمد شغال في المدرسه كالعاده لقيت محمد ود عمتي وكنت كرهاناهو م ركزت معاهو ابوي ناداني وفتح معاي موضوع محمد قلت ليهو ابوي انت عايزني تاني اقع انت شفتني انا اتفوقتا وعايزه اتم قرايتي قال لي ي بتي ريحيني انا عمري ماشي ومشوراك طويل انتي ومحمد ود عمتك طقا بابك قلت ليهو بقلبي انت م عارف الحقيقه قلت ليهو محمد متزوج قال لي مطلقها بالتلاته يعني تاني م عندهم طريقه رجعه عرسي وكملي تعليمك في البلد السمحه ديك وامي جات تحنس فيني وعلي زاتو اتلمو كلهم وبقو يحنسو فيني علي محمد انا رفضتا شديد ابوي قال لي لو عايزاني اكون مرتاح عرسي ود عمتك ما اتكلمت معاهو طلعت ودموعي في عيني رسلت ليهو رساله قلت ليهو احترم اني م اتكلمت بالحقيقه عشان نحنا اهل وما عايزه عدوايه بينا واهلي لو عرفو الحقيقه ما ح يوافقو وح تبقا بينا مشاكل وابعد عن طريقي انا عندي امتحانات لو سمحت ردا لي برساله قال لي م مشكله العرس بعد تخلصي امتحاناتك دي بارد برود عجيب يطمم البطن زي ايلاف وواحد جدعت التلفون ونومتا
رجعت المدرسه لقيت البنات متلمات واقطعن واحده قالت ليهم احتمال دي زوجتو ف السر والمعاهو دي الحقيقيه لانو في شي ما مفهوم قلت ليهم فشنو ودي منو المعرسه في السر قالن لي اسالي نفسك وفاتن قعدت اضحك قلت ياهو دا الاتوصلن ليهو مفتكرني متزوجه محمد ف السر م ركزت وماشه ع الفصل جذبني محمد معاهو بت سمحه كده الشمار حرقني رغده جاتني طايره قالت لي مزه صاح انتي وين وهي وين قلت ليها منو قالت لي المع محمد م رديت قالت لي ماشه اسلم عليهم انا طوالي مشيت معاها سلمنا عليهم والبت شكلها مرح ولطيفه قالت ليهو م شاء الله طلابكم محترمين انا خلاص ضمنت اختي رغده بغلاسه كده قالت ليهو ممكن تعرفنا قال ليها جدا ونهاي م عاين لي كانو خايف منها قال ليها دي نسيبه ودي رغده طلاب عندي ورغده قالت ليهو دي منو قال لينا دي المدام انا راسي حسيتو طااااار فووووووق وغلبني البسويهو ابكي اكورك اعمل شنو …………