رواية لقاء السحاب الفصل الرابع4بقلم حياة محمد الجدوي
مخطرتش على بالك يوم تسأل عنى
وعن يا مجافيها النوم يامسهرنى
أنا قلبي بيسألنى... إيه غير احواله
ويقولى بقى يعنى ...مخطرتش على باله
في الدور الارضي قدمت ناهد الشاى بعد الغداء في حين خرج عبد العزيز التليفون فتفاجأ ب٢٠٠ مكالمه فايته من عادل إبنه
عبد العزيز: الله الله الله اعد ياست
كريم: إفتح التليفون ورد على إبنك
عبد العزيز: لا خليه يتربى شويه
كريم: : يابرودك يا أخى بقى إبنك هيتجنن وعمال يتصل عليك وإنت مطنشه كده ليه ناوى على الهبل بتاعك
عبد العزيز: لا خلاص أنا هاعمل بشورتك بس مش دلوقتي
كريم: طيب إمتى إن شاء الله ؟
عبد العزيز: أنا عايزه يلف ويدور ويحاول يلاقى حل ولما تتقفل كل الابواب في وشه ساعتها هيجى لى وهيسمع كلامى
كريم: وافرض اتصرف يا خفيف تخسر إبنك ؟
عبد العزيز: ياريت يعرف كنت اطمنت عليه بس أنا عارف إنه لا يعرف يتصرف ولا يعرف يعمل حاجه
وفجأة رن جرس الباب فتحت ليليان
كريم: مين يا ليليان ؟
ليليان: مس سميحه يا بابا
كريم ': أهلا أهلا منوره يا ام مصطفى تعالى
( دخلت سميحه وهى سيده في ال٤٥ من عمرها )
سميحه: منوره بوجودك يا ابو محمد
دخلت وقعدت على الكرسى
ناهد: شوفى ابله سميحه تشرب إيه يا ليليان
ليليان: من غير ماتقول أنا عارفه القهوة بتاعها حالا
سميحه: تسلمى لى يا لى لى ( كنت عايزاك في حاجة كده يا استاذ كريم)
كريم: قولى إللى عندك يا أم مصطفى الدار امان ده عبد العزيز صاحبى واخويا
سميحه: وماله ربنا يديم المعروف
( وفتحت شنطتها وخرجت رزمه من الفلوس. وقالت : سمى بالله وعد كده دول خمس روزم كل روزمه بعشر ألاف جنيه يبقوا كده كام
كريم: يبقوا خمسين الف جنيه
سميحه: الله ينور عليك كده يبقى قبضت اسمك في الجمعيه.
ناهد: الله يبارك لك عشان دول جهم في وقتهم.
سميحه: بس بقولك الاسم التانى بتاعك هيتأخر شويه
كريم: ليه بس
سميحه: الحاج متولى بيستأذنك إنه هياخدها بدالك اصل بنته هتتجوز كمان شهرين
كريم: إن كان كده ماشي ربنا يتمم له على خير
سميحه: طيب خد إمضى
كريم: يادى وصولات الامانه إللى هتدخلنا السجن
سميحه: وتدخلك السجن ليه بعد الشر وبعدين إنت مفيش زيك لا في الأخلاق ولا فى التعامل .دايما بتريحنى بس دى ضمان حقوق وزى ما غيرك بيمضى لازم تمضي إنت كمان الحق حق
( إبتسم عبد العزيز وهو بيتابعها بعيونه)
ليليان: احلى كوبايه قهوه لأحلى مس سميحه في الدنيا
سميحه: شكرا يا لى لى . عامله ايه في مذاكرتك دلوقتي
ليليان: ميه ميه مانتى عرفانى
سميحه: عشان عرفاكى فيقول ربنا يستر
ليليان: كده يا ابله مش واثقه فيا وانا كنت بقول عليكى ابلتى وحبيبتى أنا خلاص زعلانه
شوفى هتقدرى تعيشى إزاى وأنا زعلانه منك
ضحكت سميحه وقالت: عادى خالص ولا يفرق معايا
ليليان بزعل طفولى: كده كل شوفى مين هترضى تتجوز إبنك بقى شوفى هيعيش إزاى من غيرى
ضحك كريم وهو بيخلع جزمته يحدفها بها ويقول: تتجوزى مين يابنت الكلب( في حين جريت ليليان على اوضتها)
ضحكت سميحه وقالت: ضحكتينى يا ليليان الله يفرح قلبك
خرجت ليليان من الأوضه وقالت: انسى خلاص مهما تعملى مش هرجع له يعنى إبنك خلاص شوفى مين هترضى به هيعنس من غيرى خلاص
سميحه: فعلا عشان كده هاجر وساب مصر كلها اول ماقلت له هجوزك ليليان
ليليان بقمصه: كده ماشى يا ابله ياانا يا إبنك ده وقبل ما تكمل كانت جزمه كريم في وشها
سميحه بضحك:المهم كنت عايزاك في حاجة يا استاذ كريم
كريم: أأمرى
سميحه: الأمر لله المهم أنا كنت بلم من الناس عشان نجيب حاجه في جهاز بنت متولى هتساهم بكام
كريم: هو إنتى جايبه الجمعيه وعينك فيها
سميحه: المفروض يعنى ازعل من الكلمتين دول وأقولك مش هاخد حاجه بس بالعند فيك آه أنا عينى منها عندك مانع
ضحكت ناهد وقالت: مانتى عارفه كريم وهزاره
سميحه: ها هاتدفع كام
كريم: ٥٠٠ جنيه حلوين
سميحه: هزهم شويه خليها باكوا إنت عارف الدنيا غاليه والأجهزة الكهربائية بقت اسعارها نار
كريم: ليه إنتى هتجيبى إيه
سميحه: عايزه اجيب الثلاجة والغساله والبتوجاز.
كريم: إن كان كده ماشي أدى الألف بتاعتى
سميحه: وإنتى يا ناهد
ناهد: مانتى اخدتى من كريم
سميحه: لا ياختى كريم حاجه وإنتى حاجه هزى جيبك ده إنتى موظفه وعلى قلبك أد كده
ضحكت ناهد وقالت: يا ستار يا رب ماشي بس هما ٣٠٠ بس عشان احنا في اخر الشهر
اخدت سميحه الفلوس وقالت: حلوين هو أنا هطمع ( وطلعت الدفتر وقيدت الحاج كريم ١٣٠٠جنيه)
طلع عبد العزيز المحفظه وخرج منها روزمه من الفلوس وقال: أنا كمان عايز أتبرع بالمبلغ ده معاكوا
بصت له سميحه وقالت: تعمل إيه يا حبيبي!!!!إنت مين اساسا
كريم: ده يبقى....
سميحه بغضب: يبقى على نفسه حد قاله متولى شحات واحنا بنلم له الصدقه عشان بسلامته يتبرع له
عبد العزيز: أنا قصدى
سميحه:قصدك ولا مش قصدك حاجه تخصك وبعدين إحنا أهل وجيران في بعضنا إنت مالك حاجه غريبه
كريم: ماتفهميش غلط هو يقصد....
سميحه: مش محتاجه تفسير جنابه عايز يساعد صح
عبد العزيز: آه والله ده قصدى
سميحه: واحنا بنساعد بعض عشان لو حد عنده مناسبه يلاقى الكل يساعده الأخ ده عنده إبن ولا بنت وهيتزنق في جهازها
كريم: لأ وحتى لو عنده ده مليونير مش محتاج
سميحه: طيب ونبقى نردهاله إزاى إن شاء الله
ولا اقول لكم عن إذنكوا أنا ماشيه
وقامت وخرجت في حين كان عبد العزيز بيبص عليها بإعجاب شديد وبعدها نادى ليليان وقال: بت يا ليليان مين دى؟
ليليان: دى ابله سميحه كانت ابلتى وأنا في ابتدائي .
عبد العزيز: آه .....
&&&&&&&&&&&&&&&&&ـ
دخلت إيناس معرض كبير للأدوات الصحيه بقت عرفان مشغول فقربت منه وهى تبتسم
إيناس: مشغول
عرفان: يعنى
إيناس: بإيه
عرفان: بجمع حساب الشهر بتاع المعرض
إيناس: طيب وإيه الأخبار
عرفان: زى الزفت يعنى لو جمعنا إللى بمعناه الشهر كله وخصمنا منه فلوس الايجار والكهرباء ومرتبات العاملين مش هتلاقي اى مكسب طلع لنا يعنى إحنا بتشتغل للناس
إيناس بقلق: يعنى مفيش أى مكسب خالص
عرفان: يعنى خمس ألاف جنيه بس
إيناس: حلوين
عرفان: حلوين إيه بي هما الخمس ألاف جنيه بيتحسبوا فلوس دول مايجوش تمن عزومه واحده من عزومات عبد العزيز بيه
إيناس: واحنا مالنا وماله هو ربنا موسع عليه وبعدين إحنا لسه في الأول وإن شاء الله سنه ورا سنه يكبر مشروعنا ونبقى أغنى من عمر كمان
عرفان: موت يا حمار على ما نوصل إلى بتقولى عليه هيبقى بعد عشرين سنة ساعتها ابقى أخد الفلوس أصرفها على علاجى .أنا مش عايز كده أنا عايز اتمتع بها وأنا شباب
إيناس: إحنا عايشين كويس جدا وحياتنا ممتازه والحمدلله
عرفان: الحمد لله طبعا بس إيه المانع لما تبقى حياتنا احلى وأحلى وبدل ما تركب عربيه مرسيدس بقالها خمس سنين نركب فورد ولا نبدل كل سنه عربيه وبدل ماحنا ساكنين في شقه نسكن في ڤيلا في أحلى كومباوند .أحسن مليون مره من ڤيلة عبد العزيز بيه.
إيناس: محدش يكره وأنا معاك بس إزاى
عرفان: زى ما قلت لك الحل عند عبد العزيز بيه لما يحطنا تحت جناحه ويشغلنا معاه كده نبقى وصلنا بجد بس برضو كله متوقف عليكى إنتى
إيناس: وهو لازم حكايه الخلفه دى مفيش غيرها
عرفان: لا طبعا بس صدقيني الخلفه دى هتختصر حاجات كتير وهتساعدنا كتير
إيناس: بس أنا قلقانه ومش مرتاحه
عرفان: ليه بس هو مش الدكتورة طمنتك وقالت مش هتحتاجى إلا شريط حبوب منشطه بس وهتحملى على طول بس إنتى قولى يا رب
إيناس: يارب
&&&&&&&&&&&&&&&&&&
يوم الخميس فى ڤيلة عبد العزيز
كانت العائلة كلها مجتمعه عند البيسين
والطباخ ومساعده واقفين عند الشوايات ورائحه اللحم المشوي والكفته والطرب في كل مكان
ليليان: يا سيدى على الروايح الحلوه أنا جعت
محمد: هدى صوتك فضحتينا
ليليان: بقولك ايه انا من دلوقتي مليش دعوه بعيالك عشان ماتقولش هدى بالك من حد أنا بعد ماأكل هقعد ألعب
محمد: يا ستار يا رب منك أمهم هتاخد بالها منهم مش محتاج منك حاجه .
قام حمزه وقال: على ما الأكل يخلص أقوم اتمشى شويه يالا يا هدير ( قامت هدير ومسكت في إيده )
ليليان: أجى معاكوا
ناهد: تروحى فين يابت إنتى ماتتهدى شويه وبعدين واحد ومراته إيه يدخلك ما بينهم
عبد العزيز: أجلى يا أم محمد قصف جبهه
ليليان: كده يا زيزو بدل ما تدافع عنى ماشي وأنا اللى كنت وريت صورتك لصاحبتى إللى اتجننت عليك وكان نفسها تتعرف عليك
كريم: لا والله وإنتى بتذاكرى الثانويه ولا اشتغلتى خاطبه على غفله
ليليان: يابخت من وفق راسين في الحلال وبعدين أنا مصره إن العروسه رقم عشره هتكون من إختيارى
كريم: وإنت موافقها على الهبل ده
عبد العزيز: خليها تحلم وبعدين اساسا كل إختيارتها وحشه
ليليان: والله
عبد العزيز: كلهم بنات طائشة زيها كل واحدة متأثرة بمسلسل عربى خيبان وجايه تطبقوا عليا
كريم: وإنت خلاص ماشى ورا البت دى فى هبلها فين عقلك
عبد العزيز: اهو الواحد بيسلى
كريم: بجد إيه اخبار إبنك
عبد العزيز بدون إهتمام: معرفش من بعد أخر مره وأنا معرفش عنه حاجه
كريم: يابرودك يا اخى بقى سايب إبنك كده ومش هامك .
عبد العزيز: والله لو عرف يعيش من غيرى يبقى راجل يعتمد عليه أما لو لف وملقاش غيرى يبقى يمشي على مزاجى وساعتها سعيد تربيته من اول وجديد.بقولك إيه تحب اشغل إيه على ما الأكل يخلص
كريم: حطلنا أمل حياتي
أمل حياتي ياحب غالى ماينتهيش
ياأحلى غنوه سمعها قلبى ولا تتنسيش
خد عمرى كله بس النهارده خلينى أعيش
بدأ كريم وعبد العزيز يدندنوا مع الست:
خلينى جنبك خلينى في حضن قلبك خلينى
وسيبنى احلم سيبنى
ياريت زمانى مايصحنيش مايصحنيش
ياريت زماني مايصحنيش
عرفان: الله الله إيه العظمه دى اعد ياست.حاجه حلوه خالص صح يا عبد العزيز بيه
عبد العزيز وهو منسجم: هو فيه أحلى من الست وأغانى الست
عرفان: إلا ماقلتش عملت ايه في العماره إللى تبنيها في العاشر
بص له كريم بغضب في حين قال عبد العزيز بخبث: عرفت منين إنى شغال في عماره في العاشر
عرفان: هى فيه حاجه بتتدارى
عبد العزيز: عندك حق وعلى العموم قربنا نخلصها
إبتسم عرفان بسعادة وقال: طيب أنا عندى مجموعه رخام وسيراميك درجه اولى فوق الممتاز وهديهم لك بأسعار هايله
عبد العزيز: بس أنا متعاقد مع مصانع بتوريد لى كل حاجه بأسعار ارخص من السوق بكتير
اتغير وش عرفان وبعدها قال: بس يعنى خد فكره وشوف وبعدين أنا تحت أمرك
قام كريم وقال بضيق: ماهو قالك متعاقد مع مصانع ....متقوم يالا يا عبد العزيز ناكل
عبد العزيز: يالا أنا جعت اوى ها يا عرفان هتيجى تاكل
بص له عرفان بضيق وقال: جاى وراكم اهو