رواية دون أن أشعر
الفصل العاشر 10
بقلم ال زهراء
قال ليها لازم يموتتت الداهي دا،امو وقفت وقالت ليهو اقتلني انا اول، هو أتراجع وانا طوالي قمت وقولت ليهو قسيمة اختكم حا تصلكم! ،وتاني عاينت ليهم كلهم وطلقتها قدامهم ووعاينت لسياف وقولت ليهو تعال لي برة لمن اهلك يكونو ماف لانو انا بحترمهم وما عايز اضرب ولدهم قدامهم، سياف ما قدر يتحكم في اعصابو وكان تاني عايز يتهجم علي ،جاء عمو محمد وقال ليهو بحزم سياف!!!!!، سياف وقف طوالي، جاء واداهو كف قدامي وقال ليهو انت حيوان ولا شنو انا ما كلمتك وقولت ليك أمور الشماسيه ديل ما تعملها تاني ،قلع منو المطوة وقال ليهو انت حفيييد نادر ما زي اي زول تاني فراعي لتصرفاتك، طيشك دة ما بنفع معاي وانت عارف انو انا بعمل ليك شنو، سياف دة سكت ساي وما فتح خشمو بكلمة تاني جاء لي وقال لي انت ياكلب لمن شبعت يادوب قررت تتمرد ،انت كنت بياع في بقالة شهاداتك ما عملت ليك اي حاجة ،ولا كنت قادر تطلع حق رصيدك ،انا ما كان اصلا أوافق وازوج بتي لناس ما من مستوانا،شال عصايتو الكانت في يدو وختاها لي في كتفو وقال لي انا ضد الطلاق بس حا اقيف مع بتي لانك انا حاس انو غلطت لمن زوجتها لزول زيك ،وتاني عاين لمرتو وقال كلو منك ما كان اسمع كلامك، تاني انا ما حا اسمع منك اي حاجة ،وانا بس البقرر ندى حا تتزوج منو، تاني رجع لي انا وقال لي انت كان ما نحن كنت اسي تشحد!، قولت ليهو انا يا عمو محمد بحتر...، قاطعني وضرب بيدو العصاية وقال لي اسمع هنا يا ولد الطيب انا لا عمك ولا حاجة والعملتو في بتي حا يرجع ليييك... انت قايل انو البنيتو ما بقدر انا اهدمو،قولت ليهو انت بس سفرتني بس انا بشغلي ومجهودي قدرت اكون نفسي، ضحك وقال لي انت فاكر كدة صاح، قايل انو بقدارتك البسيطة قدرت تعمل مكانتك هنا، اعرف لو ما انا دعمتك خطوة ما كنت مشيتها، وانا حالياً حا أوقف الدعم وامشي اعمل مجهودك دة وشوف بوديك وين ،حسيت زي الصبت فيني مطرة ما قدرت اقول ليهو اي حاجة!!، اول مرة ما اقدر ارد على زول، قولت ليهو اعمل العايز تعملو انا ما خايف لانو انا اثبت نفسي هناك ولا انت ولا غيرك بقدر يطلعني من شغلي، ضحك وقال لي شكلو انت ما بتعرفني!، قعد وقال لندى بديك دقيقة تمسحي دموعك دي وتتهذبي ،ندى دي خافت خوف طوالي مسحت دموعها وصلحت نفسها ، وجات قعدت جنبو وسكتت ،تهاني قالت ليهو محمد البت مضايقة فيها شنو لو نفست على نفسها، قال ليها تبكي على واحد كلب زيو!، هي وين وهو وين، اهلو شحادين !!!، ما قدرت استحمل لحظة قال كدة طوالي شلت المطوة الكان جدعها من سياف في الأرض وجييت عليهو قولت ليهو سكتا في اهانتي بس تدخل اهلي في الموضوع ما حا اخليك نهاي، ضحك وقال لي تعال لو راجل كان قاعد ومستكين وببرم في شنبو ، اتقدمت بس تاني جدعت السكين لانو يدي كانت بترجف ، ضحك وقال لي الكلب ياهو كلب اجدعو برة يا سياف!، سياف جاء ووسحبني بقوة برة ورماني ،قومت ضربتو وتاني هو ضربني بقينا كدة ،عمو محمد جاء وقال ليهو سياف انا ما قولت ليك ما تخلي زول يتفوق عليك في حاجة، كيف تخليه يضربك! ،جاء وضربو بالعصاية في ضهرو وقال ليهو انا ما ربيتك كدة انت حا تكون ضعيف لمتين!، سياف دا غضب وضربني ضرب شديد لمن ما حسيت بجسمي، وتاني بقيت اشوف طشاش طشاش.
لمن صحيت لقيت امي جنبي!! وبتبكي، قولت ليها ما حا اخليهم، قالت لي حا تعمل ليهم شنو حا تشتكيهم مثلا، قولت ليها لا حا اقتل سياف!!!، قالت لي بغضب صحصح لنفسك انت ما واعي للحاجة العملتها كيف تمشي للناس ديل ووتطلق بتهم ،انت عارف محمد قال لي شنو!؟، قولت ليها قال شنو ،قالت لي حا يوقف قرايه اختك ،قولت ليها دقيقة دقيقة اختي قاعد يقريها هو ما على اساس بعتو قطعة أرض ،قالت لي لااا ما بعناها انت عشان بتصرف علينا ما شوفنا حل تاني غير نطلب منو المساعدة فساعدنا لكن اسي بعملتك دي ضيعت اختك وضيعت نفسك ،قولت ليها انتي عارفة قال عليكم شنو اسي وقال علي انا شنو ياخ الزول دة ما خلا لينا نبذ ما نبذو لينا القروش تتطير وانا اختي بقريها، قالت لي تقريها من وين، قولت ليها انا بعرف اتصرف المهم انتي ما تقلقي قروشهم البذلونا بيها ما عايزنها ،قالت لي غبي!، اسي خليييت النجفة ندى عشان واحدة قليله اصل زي مها عمر، قولت ليها اسي مها ما سالتك صاح!، انا حا ارجع ليها وهي ما عندها اي مشكلة ولو انتو وافقتو ولا لا ما فرقت معاي ،قالت لي أهلها كعبيين ابوها كان في السجن اختها دي حدث ولا حرج، داير باسرة مفككة وسيئة السمعة شنو ،قولت ليها انا حا اتزوجها هي ولا حا اتزوج اسرتها،فجأءة كدة خالتو تهاني وكانت معالم وشها متغيرة وحسيتها زي الكانت بتسمع في كلامنا، جات وقالت لأمي سلامتو انا ما كان عايزة الأمور تصل لهنا سياف دا عصبي ومن أقل حاجة بجوط!، قالت ليها امي ماف مشكلة حصل خير، قالت ليها طيب نحن حا نكفل بتكاليف المستشفى المهم ما عايزين اي شكوة ولا حاجة تانية!، دخلت يدها في شنطتها وطلعت ربطة قروش وقالت لأمي دي حاجة بسيطة واعتذار بسيط، قولت ليها شيلي قروشك واتخارجي ،نحن ما بنقبل حاجات زي دي، وما تخافي انا ما بشتكي لانو حقي بشيلو بيدي ،خالتو تهاني بكت في اللحظة دي وقالت لي اعفي لي انا والله مجبورة اتصرف كدة ،عرفت انو عمو محمد جبرها، قولت ليها ما تخافي ما حا اشتكي بس امسكي قروشك عليك ،قالت لي طيب بس عليك الله ما تاذي ولدي عارفاهو طلب اناني بس انا كاي ام وما بحب ولدي يتاذي، هو صعب وانا عارفة طبعو بس ما عندي قدرة اضبطتو وبس بدعي ليهو بالهدايه، امي قالت ليها يا تهاني ما تخافي ياسر ولدي زول عقلاني وما حا يفكر يرد ليهو.
طلعت طوالي امي قالت لي يا حليلها تهاني المسكينة مما اتزوجت محمد وهي شقيانة ملامحها دي اتبدلت وكبرت قبل اوانها ،قولت ليها هي اختارت تكون كدة، قالت لي بحسرة يا ولدي الزول لمن يكون عندو اولاد بخاف من حاجات كتيرة.
______________________________
جانب مها
مر اسبوع وانا في حاله كر وفر وخاصة انو دكتورة تهاني اعتذرت واخدت اجازه الفترة الفاتت ،بس الليله قالت حا تنزل مشيت بدري ومريت على العيانين وجيت قعدت ومنتظرة البوص تجي للمرور!، جات داخلة وسلمت علي سلام بارد وسلمت على الناس سلام حلو ،جات تاني وقعدت جنبي وقالت لي عايزة اتكلم معاك على انفراد بس بعد المرور ، قولت ليها طيب يا بوص، مرينا ومشينا الكافتيريا قالت لي انتي فسختي خطبتك من ولدي عشان تتزوجي راجل بتي!!؟، قولت ليها وانا مخلوعة لا لا ياسر ما عندو علاقة، قالت لي بغضب اوعى تكذبي هو طلقها عشان يتزوجك انتي ،عارفة المشاكل الحصلت بالسبب دة شنو ؟؟!، ندى دخلت في اكتئاب وسياف زادت عصيبو ومحمد بقى ما بتكلم معاي لانو عاملني انا السبب ،انا حاسة انو اسرتي انهارت وكلو بسببك ،انا ما قايلاك من النوع البشيل راجل من مرتو بس يبدو انو طلعت غلطانة شديد ،انتي واحدة ما مربيه ولا شوفتي التربيه بعييينك ،دا آخرة البربيهو ابو بدون ام، بكيت في اللحظة دي بكا شديد وقولت ليها انا بحترمك بس ما بسمح ليك تسيئي لتربية ابوي وانا ما عارفة اصلا الحاصل شنو وليه قولتي كل الكلام دة بس باكد ليك انا لا ما عندي علاقة بياسر لا من بعيييد ولا من قريب ولا حا تكون!، قالت لي ما تكذبي يا مها هو بذات نفسو قال وافقتي... انا ما عايزة احتك بيك باي صورة انا ما حا امنعك تشتغلي بس في وحدتي ما حا اقدر اتقبلك ،وما تخافي حا تقدري تشتغلي لانك قادرة بس اعملي حركات الدكاترة وبراهم بشغلوك ،قولت ليها انتي فاكراني شنو ؟؟؟!، قالت لي لو وريتك الحاجة الفاكراها عنك حا تموتي هنا قبلك وما حا تبكي بس، قامت ومشت وخلتني ابكي بكاء شديد انا ما عملت اي حاجة ليه تفتري فيني وتقول عني كلام ما بتقال حتى للعدو لي تعايرني بتربيه ابوي لي ما هو انا امي ماتت والحاجة دي ما بارادتي ولا ارادتو ،اتصلت بياسر وقولت ليهو انت الجماعة ديل قولت ليهم عني شنو؟؟؟!، قال لي ما قولت حاجة ،قولت ليهو اكيد ما بجي ساي ويقولو لي انو انا وافقت بيك، قال لي ديل مجانين بس ما تخافي انا حا اكون جنبك دايما َما بخليهم يحقرو بيك وانا شايف كمان انو نثبت ليهم انو الشي دا صاح، عشان ماف فايدة من التبرير، قولت ليهو انا ما ببرر لزول ولا بثبت حاجة لزول اي زول عندو رأي فيني هو حر!!، انا بس عايزة اعيش بسلام بعيد عن مشاكلكم فلو تاني ذكرت اسمي ولا اتكلم عني كلام انا ما قولتو ما بخليك نهاي، لانو دة ما بمسني انا لكن كمان بمس اهلي بالسوء وانا ما برضى، انا ما عندي اي علاقة بيك ولا عشمتك وما قولت ليك اي حاجة تانية غير لا وانت عارف فلو قولت هي وافقت تكون خليتني في ورطة كبيرة وانا ما حا اسامحك، قال لي قولت ليك ديل بكذبو، قولت ليهو وليه اصدقك انت احتمال زاتك بتكذب المهم ما تتصل بي ولا تراسلني واوريك حاجة كمان اعتبرني ما موجودة اساسا، قفلت الخط في وشو!، وبقيت قاعدة كل ما اقول انو الدنيا ضحكت في وشي تجييني حاجة تعكر مزاجي ،انا اعمل شنو واتخلص من العبء والناس ديل كيف!، رجعت البيت وانا مكتئبة شديد دخلت جوة وبقييت قاعدة سياف رسل ليها قال لي مها عمر انت لسه ما بتعرفني كويس ،اي بكي بكتو اختي بسببك انتي حا تبكيهو مضاعف اصبري بس ،ريقي نشف بعد الرساله دي و خشيت في اكتئاب حاد ،ما عارفة ليهم كلهم مفكرين انو شلبتو وانو انا كنت السبب ،انا بس رفضتو!!، رسلت ليهو رساله وقولت ليهو انا زهجت منك ومن أسرتك ولو المرة دي ضايقتني ولا عملت لي حاجة حا اشتكيك بس ،رسل لي وقال لي لو قعدتي حيه للوقت داك اشتكي، دقات قلبي بقت زيادة قولت عايزة يقتلني الإنسان دة ولا شنو.
الصباح لقيت ابوي لابس قولت ليهو على وين، قال لي في أمر لازم اهتم بيهو ،كان ظاهر انو مبسوط، قولت ليهو طيب مع السلامة ،مشيت المستشفى وومشيت وحدة وحدة لقيت بوص طارق شغلني معاه مشيت اسحب ورقة عشان يوقعها لي البوص بس المدير الطبي رفض، قولت ليهو المرة الفاتت ما قبلت، قال لي اسي ماف طريقة شغل هنا تاني عشان كدة ما تفتشي، قولت ليهو اسي قدامي اديت البت ،قال لي انا ما بقدر اشغلك هنا عندك سوء سلوك وحتى جاني تقرير موقع من المستشفي الكنتي شغاله فيها زمان، قريت التقرير قولت ليهو صاح حقت السجن بس التقرير حق اهمال المرضى وموت زول بسببي غلط ،قال لي انا ما بقدر اجازف دي سمعة مستشفى استني التوزيع الرسمي بس ، طلعت وانا زعلانة شديد فجأة كدة لقيت سياف في وشي قال لي ماف اي شغل ليك هنا المدير الطبي صاحبي وانا كلمتو بسرقتك لقروش راجل اختك ودخلتك السجن وسلوكك الكعب واهمالك في الشغل وحتى جبت خطاب موقعو مدير مستشفى ودا بضمن ليك انو ما حا تمشي اي مكان تاني ،قولت ليهو انت قايل نفسك بتحارب فيني يعني بعمايلك دي غلطان انا ما من النوع البستسلم لو ما لقيت فرصة هنا حا اشوف فرصة في حتة تانية مستحيل ناس المستشفات التانية يكونو كلهم ناسك!!، لو مشيت الواق الواق انا بعمل الأتاش وماف زول بقدر يمنعني! حتى لو انت، قال لي انا للواق الواق معاك وحا نشوف حا تتقدمي كيف في شغلك، قولت ليهو حا نشوف يا سياف واعرف انو انت بتحارب في الزول الغلط انا مفروض ما اوريك الحاجة دي بس انا ما قادرة عليك وتعبت نفسياً منكم! ،والله ما لقيت زول لئيم زيك ولا في يوم فكرت انو ممكن اصادف زول بكرهني وعندو حقد اتجاهي وحتى بحب يشوة سمعتي ،اكتر حاجة واجعاني انو ما قولت الحقيقة وكذبت عليهو انا ما حصل اهملت مريض ولا حصل غلطت في حق زول!، انا زولة مهنية واديت القسم ومستحيل اهمل لي مريض، انا حا اخلي المهنة دي كلو كلو عشانك انت بس وعشان تشوف ليك موضوع تاني غيري، شلت تلفوني وقولت ليهو لحسن الحظ انو تلفوني بسجل مكالمات واليوم داك اتسجلت اسمع عشان تفهم وتبطل حماقتك دي قال لي ما عايز اسمع، قولت ليهو بصوت عالي تسمعو عشان اللعبة السخيفة دي تنتهي انا كنت عايزة اسمعو لأمك برضو بس قولت ماف داعي اثبت ليها اي حاجة وخاصة بعد هي سقطت من نظري بس انت لازم تسمعو عشان أسقط ليك غرورك واوريك انو انت غلطان وانزلك من الوهم العايش فيهو دة ،سمعو وبقى ساكت.
قولت ليهو تاني انت ما عايز تنتقم لاختك ،انت بس مستمتع بتعذيبي وما لاقي زول غيري عشان تظهر نقصك فيهو! ،انت ما متزن نفسياً عشان كدة بتحارب في بت ضعيفة ،انت زول متكبر ومتعالي وما بتحب زول يكون احسن منك، وأنا عشان استفزيتك ووحدي القولت ليك حقيقتك شوفت انك مفروض تحاربني وتذلني عشان ترضي غرورك اتقدمت خطوة عليهو ورفعت ليهو اصبعي وقولت ليهو بس اسمع ما انا البتذلا ولا انا البحني ليك راسي وبعتذر منك وبحنسك عشان تبطل امورك معاي ،حاربني كدة ما هو اصلا ماف زول غيري تفضي فيهو غضبك ،انا ما حصل كرهت زول في حياتي بس انت خليتني اكرهكك!، انا ما عايزة اشوفك وما عايزة تاني اسمع اسمك، ما قال كلمة كان ساكت بس!، وتاني قال م...، قاطعتو وقولت ليهو بغضب اسمي دا ما تذكرو انا بقرف لمن تذكر اسمي،طلعت منو سريع وانا برجف من الخوف كان مفروض اقول ليهو كل الكلام دة من زمن بعيد بس انا كنت مرعوبة منو بس خلاص فاض بي.
باليل ابوي كان قاعد وزهجان قولت ليهو الحصل شنو معاك الصباح ما كنت مبسوط، قال لي الحيوان دا حا اوريهو بكرة رضى رضى ما رضى حا اوريهو عمر بكون منو، قولت ليهو في شنو ما فهمت، قال لي شغل بس ما تشتغلي بي.
زي الساعة واحدة صباحاً ابوي شال تلفونو وقال لي انا طالع برة شوية وبجي ،قولت ليهو ليه في الوقت دة في حاجة انت عيان عايز شي، قال لي لا ما تخافي ماشي هنا وجاي في زول لازم ألاقيهو، قولت ليهو اسي الساعة واحدة ،قال لي هو ما فاضي الا اسي وبعدين عندي عربية ،قولت ليهو الساعة دي ناس تسعة طويله قاعدين ،قال لي ما تخافي ماف عوجة بتجيني قايلاني اول مرة امشي بالعربية بوقت متأخر زمان كل ما تمرضن بوديكن الساعة 2 عادي والبلد بقت امنة وماف حاجة.
دخلت جوة وانا قلبي قابضني ولشنو ما عارفة كنت ما مرتاحة نهاي بقيت صاحية وانتظرت وما جاء صليت الصبح وما جاء، الشمس شرقت وبرضو ما جاء اتصلت بيهو للمرة الالف وما رد فجاءة رجع لي رقم غريب رديت قال لي زول صاحب التلفون دة لقوهو مطعون جوة عربيتو وسارقين حاجاتو واسي اتوفى..............