رواية دون أن أشعر
الفصل الحادي عشر 11
بقلم ال زهراء
قال لي زول صاحب التلفون دة لقوهو مطعون جوة عربيتو وسارقين حاجاتو واسي اتوفى،التلفون وقع من دي من غير ما احس، ومشاعري كلها اتجمدت في اللحظة دي، قولت دا بهظر اي اكيد بهظر ابوي اسي بجي!، رفعت التلفون بسرعة واتصلت بيهو ما رد، تاني اتصلت رد، قولت ليهو بحس باهت ومبحوح وين هو؟، قال لي الجنازة في مستشفى...، ومنتظرين اهلو ،قولت ليهو انت كذاب، قال لي يا بت الناس لو ما مصدقة تعالي شوفيه بعيييينك!، قفلت التلفون سرييييع ورجولي بقن يرجفن ما كانت عندي الجراءة امشي الدولاب اجيب عبايه البسها، فقدت التوازن وقعدت في السرير ،اتصلت بمروة وقولت ليها وانا ببكي ومغبونة وصوتي شبه مختفي ابوي يا مروة بقولو مات الحقيني انا ما قادرة!!، مروة دي صرخت بأعلى حسها وقالت الخلا علينا!، وتاني قفلت التلفون فيني، بعد ساعة كدا جات وهي بتبكي ومعالم وشها متغيرة! ،قعدت في رجولي وقالت لي وين ابوي!، قولت ليها قالو في مستشفى....، قامت سرييييع وقالت لي ماشه اشوفو!!، أتقدمت خطوتييين وطوالي اغمى عليها، انخلعت وجيت عليها ،تاني مشيييت سرييع وجبت ليها موية ورشيتها بيها لمن صحصحت أصرت تمشي حضنها وانا ببكي بحرقة وقولت ليها ما عندنا الشجاعة انو نمشي وانتي حالتك دي ما حاله مشيه، قالت لي وهي بتصرخ لااااا انا بمشي دة ما بكون ابوي في غلط!، بقيييت ابكي بكى معاها!، لمن حسييت انو راسي تقل!، قولت ليها تاني البقعد معاي مني والبونسني منو!، والبسندي منو، انا تاني امشي لمنو واشكي لمنو يا مروة!، قالت لي بحس مبحوح هسسس ابوي ما مات بقول ليك هس، زدت البكاء وبقينا قاعدين في الارض، هي طوالي شالت تلفونها واتصلت وقال بحس متقطع ابوي... يا عمو... بابكر.... قالو... مات.... وهو في مستشفى....، ممكن... تمشي ....تشوفو.... لينا .....اكيد هم بكذبو، قفلت تاني.
فجاءة كدة دخلت جارتنا وكانت مخلوعة قالت سمعت صوت بكائكن كلمناها بقت تبكي معانا ،شوية شوية البيت دة كلو اتملا، مروة قامت وبقت تصرخ اطلعن برة ابوي ما مات ما عندنا زول مات هنا، النسوان ديل كلهن جن ضمنها بس وما اشتغلن بكلامها واما انا حلفت ما اقوم من الأرض وكنت ماسكة بس تلفون مروة! على أمل انو يتصل بي عمو بابكر وينفي الخبر، التلفون اتصل رديت قال لي إنا لله وإنا إليه راجعون عمر اتوفى، جدعت التلفون بقيييت اصرخ! بأعلى حسي والنسوان ديل يشيلن ويصبرن فيني، انا ما فقدت ابوي انا فقدت ام صاحب اخو! فقدت أغلى ما عندي، استغفرت ورقدتا في الأرض واتغطيت بطرحتي!، ما كان نفسي اتحرك!!، النسوان حاولن يجرني عمتي جات وقالت ليهن خلنها!، جات ورفعت راسي وختتو في رجولها وبقت تبكي ،قالت لي ما تبقي ساكتة ابكي وما تكتمي الجواك!،ما اشتغلت بيها وبقيت بس متغطية وقولت في نفسي يا ريت لو دة حلم.
بعد ساعتين الجنازة جابوها انا طوالي قومت بدون وعي وجريييت ليها كان في رجال كتار شديد!، في يد سحبتني وكان سياف قال لي مها البسي توب وتعالي الرجال كتار!!!، قولت ليهو ابيييت زح مني!!!، ماشة اشوفو! زح!، قال لي ماف ليك مشيه!!، قولت ليهو وانا بصرخ زح قولت ليك ماشة اشوفو لازم اشوفو!، قال لي وانا قولت ليك استري نفسك وامشي، طرحة بس ما بتنفع الرجال كتار، حاولت امشي اعترض طريقي!، جوطت وصرخت وبرضو ما اشتغل بي!، في مرة جابت لي توب ولبستو لي ،حتن رضى يزح لي! ،دخلت جوة طوالي!، وقعدت جنب راسو!، وفتحت الملايه الكانو مغطيناها بيهو لمن شوفت وشو صرخت تاني!، وبقيت ابكي بأعلى حس ، بوستو من جبهتو وبقيييت جنبو وما اتحركت جات مروة وقعدت جنبي!، تاني جات عمتي وقالت لي الغسل بعد كدة!، طلعت وبقيت قاعدة في العتبه حقت الغرفة الهو فيها!، لمن انتهو دخلت شوفتو وتاني طلعت وقفلت الغرفة، جو الرجال وقالو زحي خيلنا نشيل العنقريب ، انا هنا قومت وقولت ليهم وانا بصرخ ما بتودو ابوي لاي حتة!، بقيت كدة جاء قريب لي وكان غضبان وقال لي زحي ولا باذاك ابيييت!!، اداني كف!!!، وكان عايز يديني التاني سياف مسك يدو ولواها ليهو لمن جاء عمو محمد وبعدو منو، سياف قال ليهو تاني ما اسمع انك ضربتها!، هي مصدومة ما اكتر من كدة كان تشيلو بس المفتاح من يدها ، قلع المفتاح مني ،جاء عمو بابكر يلي هو راجل عمتي، ووقف المشكلة البين سياف وقريبي ، وتاني قال لي دا مصير الأولين والآخرين ما عايزة تكرمي ابوك بدفنو!، زحيت طوالي واتنازلت!، فتح الباب وشالو العنقريب!!، وانا كنت قاعدة في حتتي وبصرخ لمن ما حسيت بحاجة.
لمن صحيت لقيت مروة جنبي!، ادتني موية رفضت ،قالت لي حا تموتي بالطريقة دي!
استمريت يومين وانا بالحالة دي كنت من السرير ما بقوم!، وكنت ما باكل الا شوية والمويه دي كان نادرا ما اشربها!، مروة جات وقالت لي وهي بتصرخ وديناك المستشفى مرتين المرة دي برقدك هناك بس يلا قومي معاي ،قولت ليها ما عايزة وحا اكل، اكلت ونومت.
بعد اسبوعين وضعي اتحسن شوية وبقيت اقوم وحتى بعد كل صلاه بستغفر على الكنت بعمل فيهو، تاني مروة جات وقالت لي امشي معاي بيتنا، قولت ليها دا بيت ابوي وانا ما ببعد منو، قالت لي انا ما بقدر اخليك براك الله يرضى عليك امشي معاي ، قولت ليها لا ما بمشي، بقت تحنس وتحنس وتتبكى لمن وافقت، دخلت جوة ولقيت اتصال من ياسر للمرة الالف بس ما رديت، سمعت انو جاء الوفاة وكمان طلب يشوفني عشان يعزيني بس انا رفضت ما كان عايزة معاهو اي احتكاك.
مشيت مع مروة بيتها، احمد طبعا طلع بس شغال في ولايه تانية ويجي من شهر لشهر!، ومروة دي شكلها خففت الطلبات عليهو بعد هرشتها وبقت ما بتسالو وعلاقتهم شبه اتصلحت.
العصر وانا قاعدة بلعب في حمودي ود مروة الصغير!، جات خالتو انصاف ام ياسر وهي زعلانه شديد ،قومتني بقوة وجرتني معاها جوة حمودي دة لمن انخلغ، نادت مروة بصوت عالي جات وقالت ليها انتي واختك قصدكم شنو ،لشنو شلتو من ولدي قروش عشان تتمو وفاه ابوكن! ،قولت ليها انا ما شلت، قالت لي مروة الجات شالتهن بس انتي الطلبتيهن،انتي بعد ما طلقتي منو مرتو عايزة تبقيهو على الحديدة ويصرف عليك!، قولت ليها انا ما طلبت اي قروش، قالت ليها سمعتكم بتي بس هي خافت من ردة فعلي وما كلمتني الا اسي!،قولت ليها بتك قالت شنو ؟!، قالت لي قالت جات مروة وقالت ليهو مها قالت ليك دينا قروش عشان عندنا دين لناس بقالات !، عاينت لمروة وقولت ليها مروة الكلام دة صاح!! قالت لي بحس متقطع م... ه... ا، قولت بصريخ خلاص الفيني انتهت ياخ انا تاني ما بسامحك، وتاني عاينت لخالتو وقولت ليها شحدت باسمي بس انا ما عندي علاقة، قالت لي ههههه اصدقك لشنو بس ختي حاجة في راسك الكبير دة يا دكتورة طالما انا عايشة ياسر دا ما بتزوجك!، قولت ليها انا رفضت ولدك اصلا ،والقروش ديل ما عندي فيهن اي دخل، ضحكت وقالت لي شحادة وكذابة كمان ،لمن قالت كدة زعلت شديد قمت طوالي دخلت شلت دهب امي و طلعت مروة لحقتني وقالت لي اقيفي اسي ماشة وين؟؟!، قولت ليها مالك ومالي ماشة السماء الحمراء اوعى تاني تتصلي بي!، ركبت ركشة وطوالي مشيت بيتنا وقعدت، الباب دقا مشيت ولقيتها مروة ،اتكلمت معاي كلام كتير بس ما اشتغلت بيها وتاني طردتها.
في اليوم التاني!، الباب دقا لقيتو سياف قولت ليهو عايز شنو؟؟!، قال لي قاعدة في البيت دة براك لشنو ؟؟؟، قولت ليهو انت اولا عرفت كيف والجابك شنو!؟، قال لي مشينا نتفقد احوالكن انا وابوي وسالت منك مروة قالت لي رجعت البيت القديم ،قولت ليهو اها انت لحقتني لشنو ؟!، قال لي صاح تقعدي في بيت براك؟؟!،ما كان عندي اي نفس اتكلم وخاصة مع سياف دة كنت عايزة اقفل الباب مسكو بيدو وقال لي بغضب انا ما انتهيت كلامي!، قولت ليهو امشي شوف شغلة تانية غيري عليك الله، قال لي حا تطلعي من البيت دة وحا نشوف كلام منو البمشي، قفلت الباب في وشو وصرخت قولت حا تعمل شنو عشان اطلع والله بالشرطة ما تقدر تطلعني، ضحك وضحكتو استفزتني.
بالمساء زي الساعة 2 صباحاً حسيت زي الفي كركبة كدة خوفت شديد وطوالي اتغطيت واتجمدت في مكاني طبعا اصلا بيتنا عبارة عن هول وجوة ليهو غرفة والكركبة كانت في الهول وتاني في غرفتين برة ، قومت مخلوعة وقولت دهب امي في الدولاب!، اتصلت بعمو بابكر ما رد ،تاني اتصلت بعمو محمد! رد وكلمتو براحة!، كنت مقلقة وماشة وجايه وقولت يارب يجو سريع كان في كبايه في الطربيزة وقعتها من غير ما انتبه، انخلعت شديد الباب فتح تاني كان لابس كمامة وسديري وانا اتجمدت في مكاني!، قال لي البيت دا ما قالو لي فاضي بس ما مشكلة زيادة الخير خيرين!! بقى يقرب على وختا السكين في رقبتي قال لي تصرخي بضبحك! ، فجاءة في زول جاء داخل وكان سياف قال ليهو خليها ،قال ليهو زح انت كدة والا بضبحها زحا بعيد وهو جراني معاها للباب كدة وشلحني بسكينو وجرا انا هنا انهرت عديل وبقيت قاعدة!! وبعد لمست رقبتي انخلعت زيادة كان داير يحلقو قولت ليهو ما تخليني براي، جاء وخت منديل وقال لي جرح خفيفة ما تبقي خوافة وتاني مرة اسمعي الكلام، عمو محمد جاء بعدها وقال لي سياف الحمدلله اني اتصلت بيك وكنت قريب، استغربت سياف شغلو القريب هنا شنو!، ودوني المستشفى عقمي لي الجرح وطوالي سياف قال لي تنومي في الميز، نومت الصباح مشيت البيت وقعدت، الباب دق طوالي فتحتو سياف قال لي بغضب ليه خليتي الميز وجيتي ،قولت ليهو انا بيتي هنا ما الميز لكن، زهج وضرب الباب بكل قوة وقال لي انتي ما بتتوبي المرة الجاية عارفة حا يعمل ليك شنو!، بلعت ريقي وقولت ليهو ما خايفة!، قال لي تمام بس اعرفي انا ما بخليك تقعدي هنا قولت ليهو شكرا على المساعدة بس ما تدخل في موضوع ما بخصك، قفلت الباب في وشو ،صرخ وقال لي والله يا مها حا اخليك تطلعي اليلله من البيت دة ولا ما بكون اسمي سياف.
بالعصر كدة الباب تاني دق، ولقيتو هو قربت اقفلو مد لي ورقة لقيتها عقد بيت!، قال لي البيت دا باسمنا نحن ،قولت ليهو كذااااب كيف باسمكم قال لي اداهو ابوي لابوك!، ولو ما مصدقة جبت ليك المحامي الكتبو لينا عقد البيت!، عقلي عمل error انا قايله انو ابوي اشتراهو بقيت ابكي لانو طول السنين دي كنت مفكرة عندي بيت بس طلع بيت زول تاني ،ما كان عندي حاجة كتيرة الملمها لانو لسه ما جبت شنطتي من مروة!، جيت وقولت ليهو اتبسطت كدة صاح ،قال لي انا كلمتك انو تطلعي من البيت دة! ما معقول بت تقعد براها!!، لو عندك مشاكل مع اختك ولا لو ما مرتاحة هناك اقعدي في ميز الدكاترة!، وانا...، قاطعتو وقولت ليهو سياف ما من حقك تفرض على راايي ،ركبت ركشة طوالي وتاني نزلت عن عمتو دخلت وسلمت هي جات وحكيت ليها الحاصل ،قالت لي تقعدي معانا طوالي نحن لقيناك،قعدت هي اصلا عندها اولاد وبت واحدة والبت مغتربة برة ومع راجلها.
مرن كم يوم وانا بصراحة ما كنت مرتاحة لانو أولادها بقو مقيدين بي ،يعني الواحد بقى ما بجي يتونس مع امو!، عمو بابكر بس هو البقعد معانا وبتونس.
مشيت المطبخ عشان اساعدها لقيت ولدها الصغير مهتدي وهو بقول ليها البت دي بتقعد معانا لمتين! ،قالت ليهو يا ولدي اسكت البت يتيمة ام وابو تقعد وين يعني!، دخلت طوالي وانا مضايقة بس قولت بيتو وهو حر لازم اشوف لي مكان تاني بأسرع وقت، بعد الفطور جاء ولدها الوسطاني وقال لي امي وين؟!، قولت ليهو عند الجيران قال لي دي مشكلة ، قولت ليهو عايز حاجة!، قال لي اصحابي جو وعايزين جبنة ،طوالي انا قومت وقولت ليهو بعملها ليك عملتها ليهو.
مرت ايام وبقو متعودين علينا وحتى ما بطلبو من امهم الجبنة وبطلبوها مني وبقو لي زي اخواني وأكتر!، حتى مهتدي جاء وقال لي زمان شايفك ثقيله بس بعد اتعرفت عليك طلعتي زولة ظابطة.
كل دة بفكر فيهو وانا ماشة اجيب شنطتي وحاجاتي الباقية من مروة، لمن وصلت بيتها لاقيت ياسر نادى لي بس ما اشتغلت بيهو مسك يدي بعدها ،جات امو طالعة وبقت تصرخ فيني وتبذني يا مطلوقة يا هاملة يا ما مربيه!!، كانت اسوء الألفاظ وولدها كان بسكت بيها ،قولت ليهو شوفت تاني انت وامك ديل لو بس عاينتو لي بشتكيكم،كان عايز يتكلم ،قولت ليهو بغضب ياسر كلامي واضح يا ود الناس انا ما دايرك ولو عملت لي اي حاجة ما دايراك فابعد مني.
دخلت جوة لناس مروة شايفاها في الشباك شايله ملف، دخلت عليها انخلعت وختتو تحت المخدة، قولت في نفسي في حاجة اكيد بس اعرفها كيف، تاني شالتو ودخلتو جوة وجات تسلم علي، قولت ليها انا عندي حاجات هنا عايزة اشيلهم واطلع ولو عايزاني ما ازهج منك واقول ليك كلام فارغ ما تتكلمي معاي ،سكتت ساي وقالت لي طيب انا ماشة المطبخ أتم باقي الغداء ولمن تهدي بتكلم معاك ، مشت بهنا طوالي دخلت الغرفة الدخلت فيها الملف، بقيت افتش ما لقيتو تاني فتشت برضو ما لقيتو!،فتحت الدولاب وبقيت افتش ما لقيت، قعدت في الأرض وعاينت لتحت الدولاب لانو مروة حريصة وومكن تدس في اي مكان ،لقيتو! وقمت طوالي قريتو وانصدمت لمن عرفت انو دا ملف فيهو ورق ورثة!، انا البعرفو انو ابوي قال جدو نادر كتب كل حاجة لولدو محمد بس اسي الشي دا مقسم بشرع ربنا لاولادو كلهم ،طيب الحاصل شنو وليه الأوراق دي هنا، جات في اللحظة دي مروة وانصدمت طوالي!، وحاولت تقلع الورق ،قولت ليها اول حاجة فهميني ديل شنو وحاولي اقلعيه تاني ،قالت لي ما دخلك جيبيهو، قولت ليها مروة احسن ليك تعترفي والا انا حا افضحك!، بلعت ريقها وقالت لي ديل سبل نجاتنا يا غبية!، دي اليد الماسكين منها محمد،دي أوراق مهمة، قولت ليها ما فاهمة فهميني قولت ليك والا حا اوريهم لاي زول ،قالت لي اسكتي حا افهمك زمان نادر قبل ما يموت خاف من اولاد يتحاربو في الورثة وزول يظلم زول لانهم كلهم كانو متفرقين، فكتب بالتساوي حقو لاولادو وسلم الملف لأبوي ،ومحمد كان الولد الوحيد القاعد معاهو وصادف اليوم داك انو سمع كلامهم فلمن نادر دخل في غيبوبة، محمد قال لأبوي جيب الأوراق وانا بعمل ليك اي حاجة دايراها !، ابوي رفض بس تاني وافق بعد وفاة امي ،وتاني ياهو بصم نادر وشال حقو كلو وتاني بعد الغيبوبة دي تاني ما صحا واتوفى ،ومحمد قال لاخوانو عشان انتو ما جيتو شفتو ابوكم كتب لي الحق باسمي كلو!، هم قطعوها مع محمد لأنهم طالبو بحقهم لانو وضعهم كان سيء شديد بس هو رفض المهم نحن اسي مهددين بيهو محمد ،قولت ليها لا مستحيل انتو كلكم كنتو متكتمين على الحاجة دي، ياخ دي ورثة والله كلكم تدخلو النار ،قالت لي هم ما بستاهلوها ما اشتغلو بيهو في مرضو، قولت ليها بغضب هو مش كتب ليهم معانتو ما زعلان أكيد في حاجة منعتهم!، الحق حق وكونو انو عايز يقسم بالتساوي ما من حقكم تدسو منهم، انا لازم اكلمهم بالحقيقة ،قالت لي على جثتي يا مها ،بقينا نتضارب دفرتها لمن وقعت وجريت ،قفلت الباب سريع بالمفتاح! ، هي شكلها قامت لانو بقت تصرخ وتقول لي افتحيهو!، ما اشتغلت بيها، قررت امشي لام سياف واوريها الحقيقة هي صاح اتلائمت معاي بس ما مرة بتسكت عن الغلط، طوالي ركبت ركشة ومشييت.
_____________________
بلسان سياف
تلفون ابوي كان بتصل شكلو نساهو ومشى الشغل ،رديت عليهو ،جاني صوت بت وهي بتقول الحق مها شالت الورق وقالت عايزة تكشف الحقيقة ،ما عارفة ماشه بيهو وين!، قفلت طوالي وقولت اي حقيقة اي ورق!!! بقيت قاعد في البيت ،تاني طلعت برة بعد مدة عشان كنت عايز استفسر من ابوي عن الحاصل!!، لقيت مها معرقة وملامحها متغيرة جات و سالتني من امي لانو في العيادة ما لقتها، قولت ليها امي الليله مشت وفاة زميلتها وما فتحت العيادة!، قلقت وتاني مشت وتاني جاتني راجعة ،قالت لي طيب بتعرف عنوان واحد من اعمامك!، قولت ليها نحن مقطوعين منهم من وفاه جدي!، قالت لي تمام، قولت ليها ألفي يدك دي شنو، قالت لي ولا حاجة، قربت وقلعتو منها وقريتو وانصدمت لمن شوفت الفيهو، قولت ليها دة شنو!!، قالت لي ما عارف انا قايلاك عارف، قولت ليها لا والله، حكت لي وقالت لي تاني اقيف معاي ورجع الحق لاصاحبو عاينت فيها وقولت ليها شوفي شغلة تانية الأوراق دي ما بتطلع ولو كلمتي زول انا بقتلك!، بقت تجوط فيني وقالت لي انت اكتر واحد حقير لاقيتو في حياتي ما خايف على حق الناس ،قولت ليها مهاااا احسن ليك تتخارجي وما اسمعك فتحتي خشمك بكلمة واحدة ،ادتني كف وقالت لي متوقعة شنو منك انا حا اكلمهم! ما بسكت، قولت ليها امشي كلميهم منو البصدقك ولو صدقوك منو البثبت انو الحق حقهم.
نبذتني وقالت لي انت اسوء انسان اقابلو في حياتي حا تتعذبو كلكم يوم القيامة، طلعت وانا طوالي دسيت الملف، ورجعت لمروة وقولت ليها معاك سياف ما تكلمي ابوي بالحصل الملف معاي وتاني اختونا، قالت لي المعاك ورق مزيف الأصلي معاي ،قولت ليها عارفة لو هددتي ابوي بيهو البحصل شنو ،قالت لي ما خايفة.
________________
بلسان مروة
الملف الأصلي ابوي خاتيهو في بيت عمتي!، والنسخة كانت معاي!، جريت بيت عمتي وفتشت وما لقيتو سالتها لو ابوي جاء قبل ما يتوفى هنا، قالت لي اي جاء باليل قبل وفاتو بساعات ، وشال ورق وطلع بس ما عرفتو حق شنو،قولت واااي لكن مشى وين الورق دة خلاص حياتنا اتدمرت.
__________________
بلسان سياف
انا شوفت ابوي شايل ملف وفيهو ورق لمن شايفني داساهو وانخلع وعرفت دا الملف الأصلي!،لكن ما سالتو.
بعد كم يوم اتصلت لي ريم الفترة الفاتت كنت مقطوع منها عديل وخاصة انو حولت المدينه الساكن فيها ،المهم بقينا نتونس وفي إطار الونسة قالت لي مها قالت مسافرة لبت عمتها تحبس ليها أولادها ،قولت ليها كيف الكلام دة مسافرة متين، قالت لي بعد اسبوعين ،قولت ليها برجع ليك اسي مشغول،حسيت الدينا ضاقت بي واني مخي وقف !، مسافرة يعني تاني ما حا اشوفها!، قعدت واتذكرت كل حاجة معاها!، البت دي جاطت حياتي بس ماف زول قدر علي غيرها، لو صرخت وقالت اسكت بسكت تلقائياً ،لو نبذت بضحك بس ،ما عارف عملت لي شنو ،تاني قولت لاا يا سياف ما لازم تعمل كدة مفروض افرح عشان حا اتخلص من اكتر زول مزعج في حياتي.
بعد كم يوم وانا بس بقيت بس بتصل على ريم وبسالها من مها وعن تحهيزاتها للسفر وعن الناس العايزة تقعد معاهم، وهي كانت بترد علي وما بتسألني من حاجة
وانا كدة اتصلت بي ريم وقالت لي انا برة المستشفى مشيت ليها ،قالت لي اتصلت بيك عشان تجيبني بس ما رديت انا جاية أودع مها عشان مسافرة بعد اسبوع والاسبوع الجاي ما فاضية أودعها، قولت ليها كنت مشغول ماشه اسي ليها، قالت لي اي، قولت ليها اوصلك، قالت لي تمام وصلتها لبيت عمة مها ونزلت جاتها طالعة وسلمت عليها وما سلمت علي، بقيت اعاين فيها وريم لاحظت زحيت بصري ومشيت ركبت العربية وبقيت اعاين ليها ، ريم جاتني بالشباك وقالت لي بقعد معاها الليله دي وبكرة الصباح بسافر.
الصباح جيت وسوقت ريم وطوالي البصات ،قالت لي سياف النظرة الأمس لمها دي شنو ؟!، قولت ليها ماف حاجة، قالت لي ما تكذب انت بتحب مها، قولت ليها احب ليها شنو ما عندي شغله بيها، قالت لي انت ما ملاحظ لنفسك طول الأسبوعين ديل مها مها، قولت ليها ريم انا ما عندي ليها حاجة وعشان اثبت ليك لو عايزة بكرة بعقد عليك،قالت لي تمام أعقد، قولت ليها اكلم ابوك، كنت عايز اتصل، قالت لي سياف ما تغش على نفسك ما شايف وشك كيف وانت بترفع في التلفون انت بتحب مها صاح بس مكابر ،قولت ليها ريم انا ما بحبها،قالت لي طيب انا عندي اخوي هناك وعايز عروس ارشح ليهو مها بترضى ،قلبي عمل شح وقولت ليها اعملي العايزة تعمليهو ،اتنهدت وقالت لي كدة ارتحت معانتو ما عندك ليها حاجة ما عندي اخو انا كنت عايزة اختبرك ،قولت ليها ايوا ، ركبت الحافلة وهي مبتسمة واتحركت.
الأسبوع قبل سفرها كان كالجحيم كنت مضايق وما مشيت الشغل و مشاعري سيطرت علي وما قدرت اتحكم في نفسي! وما قدرت هي تطلع من تفكيري انوم بيها واقوم بيها وبس كلامها هو البتذكرو، ،ومرات كتيرة بمشي جنب ناس عمتها عشان المحها مجرد لمحه وتاني بجي البيت، امي جاتني وقالت لي يا ولد مالك قاعد انت ماف حاجة بتوقفك عن شغلك ،دقنك بقيت ما بتحلقو ما شايف نفسك ملامحك اتبدلت في الأسبوع دة، قولت ليها ما مالي حاجة فترة زهج، ندى قالت ليها خلتو ريم شكلها وضحكن علي وطلعن، اليوم الفيهو سفرها كان نفسي مقفولة من اي حاجة وكنت زهجان شديد وقلبي زي الفهيو نار وعرفت انو بحبها هو مفروض اعرف من زمن حبستها لمن كانت قاعدة في البيت براها وقعدت في العربيه عشان ماف زول يدخل عليها بس برضو دخل من جهة تانية ولحسن الحظ ابوي اتصل وقال لي مها جاها حرامي فدخلت طوالي ليها!.
كنت معصب وزعلان في نفس الوقت عشان عرفت روحي اني بحبها بعد كل الوقت دة، عدم شوفتها تاني دي بحد نفسو مشكلة ولو اتزوجت زول تاني انا ما بسامح نفسي الخسرتها، اتنهدت وقمت طوالي ومشيت ليها في بيت عمتها، عمتها قالت لي طلعت.
طوالي مشيت المطار لقيتها مع ود عمتها، قالت لي جاي تعمل شنو ،قولت ليها عندي معاك كلام، قالت لي ما عايزة اسمعو، قولت ليها اسمعيني لاخر مرة والا ما بمشي، قالت لي ما عايزة اسمعك بس خايفة من انو تعمل مشكلة هنا مشينا قالت لي عايز شنو قولت ليها مها ماف زول عاملني معاملتك دي ،انت الوحيدة الواجهتيني والوحيدة الوقفت في طريقي ووريتيني حقيقي... لمن تقولي سياف بصوتك دي بحس اني فرحان لأنها كانت منك غير، انا جواي كنت بحبك بس كنت كااتم الشعور دة في قلبي وبحاول ادسو بنبذك ، وحتى كنت غاش على نفسي واسي حا اقولها ليك وما بخفي الشعور دا لاي سبب من الأسباب... انا بحبك ولا اقول أقول ليك كلمة حب ذاتها شويه على الإحساس الحاس بيه انتي يا ستي متملكاني وشوفي انتي زي الاوكسجين بالنسبة لي .... لمن تبعدي يا مها انا بضايق ما بقدر اكون مرتاح وحتى طلبت انو اتحول عشان اشوفك، حياتي بتبقى متوقفة ما بحس بالفرح وماف حاجة والله بتقدر تعوضني غيابك الا حضورك كنت غبي انو ضيعتك من يدي مرة والمرة دي ما حا اضيعك، قالت لي وهي بتعاين في وشي وما مرسوم ملمح في وشها وببرود مبالغ فيه انتهيت خلاص لو انتهيت انا قدامي طيارة عن اذنك قولت ليها دة بس العايزة تقوليه ضحكت ضحكة استهزاء وقالت لي بحدة وهي بتعاين لي منتظر مني شنو بعد كل العملتو فيني قولت ليها منتظر تديني فرصة؟؟!، قالت لي عيد بس كلمتك دي تاني عشان يكون عندي تصرف اخر معاك.!!!!، قولت لي انا متفهمك بس ما بقدر من دونك انا والله ما كنت قايل نفسي حا احبك ما كنت قايل انو حا تكوني في كل تفكيري والا ما كنت عملت كل دة معاك انا من دون ما أشعر حبك سيطر علي، ضحكت مرة تانيه وقالت لي بنبرة قاسية إن شاء الله يا سياف الحب القولت عليه دة يحرقك ويعذبك كل يوم زي ما عذبتني واعرف انو انا مستحيل احبك ولو بقيت اخر واحد انا ما عايزك ما عايزاك فاهم زول لئيم منزوعة من قلبك الرحمة ما بتحن على اي زول بكيت ليك حنستك قولت ليك مستقبلي بضيع قولت لي ما يضيع لمن عرفت الورقة شلتها وهددتني وبعد كدة ما كفاك اشتغلت عملت مشكلة وبسببك طردوني وأهم شي حنستك تعمل العمليه للبت الصغيرة وانت رفضت بس عشان القروش وانا اضطريت اشيل قروش راجل اختي وبسببك اشتكاني وجدعني في السجن وانت جيت تضحك علي وبعد دة كلو تجي تقول بتحبي وعايزني هههه، اتحركت وسرعت من خطواتها بعد الكلام دة ما حاولت الحقها من عيونها ظاهر كمية كرهها لي، حسيت بالانهيار انا كسياف ما كنت متوقع انو احصل مرحلة زي دي بسبب بت قعدت في الكرسي وختت يديني في وشي وقولت جواي اواسي نفسي بشنو؟؟! والقى حل للمشكلة دي كيف ليه هي بس ليه يا سياف ليه بالذات البت دي ليه يعني ارضى اتعذب كدة هل حا اقدر انساها؟!، قلبي سبقني بالإجابة ودق دق مبالغ فيه وقولت هي دي بتتنسي ياخ دي من غير ما احس حبها بقى جواي.......